လူၤကၣ် ၂၂:၁-၇၁
-
ပှၤလုၢ်တၢ်ဒိၣ်တဖၣ် ကူၣ်ထီၣ်ဖးလီၤလၢ ကမၤသံယ့ၣ်ၡူး (၁-၆)
-
တၢ်ကတဲာ်ကတီၤလၢ ဘူၣ်လဲၤကပာ်အလီၢ်ခံကတၢၢ်တဘျီအဂီၢ် (၇-၁၃)
-
တၢ်ဒုးအိၣ်ထီၣ် ကစၢ်ဟါတၢ်အီၣ် (၁၄-၂၀)
-
“ပှၤလၢ အကဟ့ၣ်လီၤကွံာ်ယၤ တဂၤန့ၣ် အိၣ်ဒီးယၤလၢ စီၢ်နီၤခိၣ်” (၂၁-၂၃)
-
အဝဲသ့ၣ်တဲအါလိာ်သး တဂၤဒီးတဂၤလၢ မတဂၤမ့ၢ်ပှၤအဒိၣ်ကတၢၢ်လဲၣ် (၂၄-၂၇)
-
ယ့ၣ်ၡူးမၤတၢ်အၢၣ်လီၤအီလီၤလၢ ဘီမုၢ်အဂီၢ် (၂၈-၃၀)
-
တၢ်တဲဆိပာ်ဘၣ်ဃး စီၤပ့းတရူးကသမၢတၢ်အဂ့ၢ် (၃၁-၃၄)
-
ဘၣ်ကတဲာ်ကတီၤသး, နးခံဘ့ၣ် (၃၅-၃၈)
-
ယ့ၣ်ၡူးဃ့ထုကဖၣ်တၢ်လၢ ကစၢၢ်သ့ၣ်စၤယံးအလိၤ (၃၉-၄၆)
-
ပှၤဟဲဖီၣ်ယ့ၣ်ၡူး (၄၇-၅၃)
-
စီၤပ့းတရူးသမၢယ့ၣ်ၡူး (၅၄-၆၂)
-
ယ့ၣ်ၡူးဘၣ်တၢ်ဒုၣ်ဒွဲၣ်စံးအၢအီၤ (၆၃-၆၅)
-
တၢ်သမံသမိးအီၤလၢ ပှၤယူဒၤဖိအကွီၢ်ဘျီၣ်လၢ အဒိၣ်ကတၢၢ်တဖျၢၣ် အမဲာ်ညါ (၆၆-၇၁)
၂၂ ဘူၣ်ကိၣ်လၢအတပၣ်ဒီးကိၣ်မံၣ်ဘၣ် လၢပှၤကိးအီၤလၢ ဘူၣ်လဲၤကပာ်န့ၣ်+ ဘူးထီၣ်ကဘၣ်ဝဲလံ.+
၂ ဒီးမ့ၢ်လၢ ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် ပျံၤပှၤဂီၢ်မုၢ်အဃိ+ အဝဲသ့ၣ် ဃုကျဲအဂ့ၤကတၢၢ် ဒ်သိးကမၤသံ ယ့ၣ်ၡူးအဂီၢ်လီၤ.+
၃ ဒီးစီၤယူဒၤအံၣ်စကၤရံၤအိာ်လၢ အပၣ်ဃုာ်လၢ ပှၤတဆံခံဂၤအကျါန့ၣ်+ မုၣ်ကီၤလံၢ်* နုာ်လီၤလၢ အသးပူၤလီၤ.
၄ အဝဲ လဲၤတဲသကိးတၢ်ဒီး ပှၤလုၢ်တၢ်ဒိၣ်အခိၣ်တဖၣ် ဒီးပှၤကွၢ်ထွဲ တၢ်လုၢ်ဟံၣ်အခိၣ်တဖၣ် ဘၣ်ဃးဒီး အဝဲကဘၣ် ဟ့ၣ်လီၤကွံာ် ယ့ၣ်ၡူးလၢ အဝဲသ့ၣ်အအိၣ်ဒ်လဲၣ်န့ၣ်လီၤ.+
၅ အဃိ အဝဲသ့ၣ်သးခုဒိၣ်မး ဒီးအၢၣ်လီၤဝဲလၢ ကဟ့ၣ်အီၤစ့လီၤ.+
၆ အဃိ စီၤယူဒၤ တူၢ်လိာ်ဝဲ ဒီးစးထီၣ်ဖဲန့ၣ် အဃုဝဲ တၢ်ခွဲးတၢ်ယာ်လၢ ကဟ့ၣ်လီၤကွံာ် ယ့ၣ်ၡူးလၢ အဝဲသ့ၣ်အအိၣ် ဖဲပှၤဂီၢ်မုၢ် တအိၣ်ဘူးဒီးအီၤဘၣ် အဆၢကတီၢ်လီၤ.
၇ ဘူၣ်ကိၣ်လၢ အတပၣ်ဒီးကိၣ်မံၣ်ဘၣ်တသီ လၢပှၤကဘၣ်မၤသံဝဲ ဆၣ်ဖိကီၢ်ဖိလၢ ဘူၣ်လဲၤကပာ် အဂီၢ်န့ၣ် တုၤဃီၤဝဲလီၤ.+
၈ အဃိ ယ့ၣ်ၡူးဆှၢလီၤ စီၤပ့းတရူး ဒီးစီၤယိၤဟၣ် ဒီးတဲဝဲလၢ “လဲၤကတဲာ်ကတီၤပာ်စၢၤ ဘူၣ်လဲၤကပာ်လၢ ပကအီၣ်တၢ်အဂီၢ်တက့ၢ်.”+
၉ အဝဲသ့ၣ်တဲအီၤလၢ “နအဲၣ်ဒိးလၢ ပကလဲၤ ကတဲာ်ကတီၤအီၤဖဲလဲၣ်.”
၁၀ အဝဲတဲဘၣ် အဝဲသ့ၣ်လၢ “ဖဲသုလဲၤနုာ်လီၤလၢ ဝ့ၢ်ပူၤအခါ သုကထံၣ်လိာ်သးဒီး ပိာ်ခွါတဂၤလၢ အစိာ်ဝဲ ထံဒၢတဖျၢၣ်လီၤ. နုာ်လီၤပိာ်အခံလၢ ဟံၣ်လၢ အဝဲလဲၤနုာ်လီၤဝဲ တဖျၢၣ်အပူၤတက့ၢ်.+
၁၁ ဒီးတဲဘၣ် ဟံၣ်ကစၢ်လၢ ‘သရၣ်တဲဘၣ်နၤလၢ “ပှၤတမှံၤအဒၢးလၢ ယကအီၣ် ဘူၣ်လဲၤကပာ် ဒီးယပျဲၢ်ယဘီၣ်တဖၣ်န့ၣ် အိၣ်ဖဲလဲၣ်.”’
၁၂ ဒီးပိာ်ခွါတဂၤန့ၣ် ကဒုးနဲၣ်သု ဒၢးဖးဒိၣ်တဖျၢၣ်လၢ ဟံၣ်ဖီခိၣ်တတီၤ လၢဘၣ်တၢ်ကတဲာ်ကတီၤပာ်စၢၤအီၤလီၤ. ကတဲာ်ကတီၤ ဘူၣ်လဲၤကပာ် ဖဲန့ၣ်နီၤ.”
၁၃ အဃိ အဝဲသ့ၣ်လဲၤဝဲ ဒီးထံၣ်ဝဲဒ် ယ့ၣ်ၡူးတဲ အဝဲသ့ၣ်အသိး ဒီးအဝဲသ့ၣ် ကတဲာ်ကတီၤတၢ်လၢ ဘူၣ်လဲၤကပာ်အဂီၢ်လီၤ.
၁၄ ဖဲတၢ်ဆၢကတီၢ် ဟဲတုၤအခါ ယ့ၣ်ၡူးဆ့ၣ်နီၤ သန့ၤအသး ဒီးအတၢ်မၢဖိတဖၣ်လၢ စီၢ်နီၤခိၣ်လီၤ.+
၁၅ ဒီးအဝဲတဲ အဝဲသ့ၣ်လၢ “တချုးလၢ ယဘၣ်တူၢ်တၢ်ဒံးဘၣ်န့ၣ် ယအဲၣ်ဒိးအီၣ် ဘူၣ်လဲၤကပာ်အံၤဒီးသု ဒိၣ်မး.
၁၆ ယကတဲဘၣ်သု တချုးလၢ ဘူၣ်အံၤအခီပညီ ဟဲလၢထီၣ်ပှဲၤထီၣ်လၢ ကစၢ်ယွၤ အဘီမုၢ်အပူၤဘၣ်န့ၣ် ယတအီၣ် ကဒီးအီၤလၢၤဘၣ်.”
၁၇ ဒီးပှၤဟ့ၣ်လီၤအီၤခွး ဒီးအဝဲစံးဘျုးစံးဖှိၣ်ကစၢ်ယွၤ ဒီးတဲဝဲလၢ “ဟံးန့ၢ်အီၤဒီး ဟ့ၣ်လီၤသုသး တဂၤဝံၤတဂၤတက့ၢ်.
၁၈ ယကတဲသုလၢ စးထီၣ်ခဲအံၤဒီးဆူညါ တုၤလီၤလၢ ယွၤအဘီအမုၢ် ဟဲတုၤဝဲတစုန့ၣ် ယတအီ စပံးထံလၢၤဘၣ်.”
၁၉ ဒီးအဝဲဟံးန့ၢ်ကိၣ်,+ စံးဘျုးယွၤ ဒီးဘိးကၢ်ဝဲ ဒီးဟ့ၣ်လီၤ အဝဲသ့ၣ် ဒီးတဲဝဲလၢ “ကိၣ်အံၤ ဒိလီၤဝဲယနီၢ်ခိ+ လၢယကဟ့ၣ်လီၤကွံာ်အီၤ လၢသုဂီၢ်လီၤ.+ ဆဲးမၤဒ်အံၤလၢ တၢ်သ့ၣ်နီၣ်ထီၣ်က့ၤယၤ အဂီၢ်တက့ၢ်.”+
၂၀ ဖဲအဝဲသ့ၣ်အီၣ်ဟါတၢ်အီၣ် ဝံၤအခါ ယ့ၣ်ၡူးဟံးန့ၢ်စပံးထံတခွးဒီး မၤဝဲဒ်န့ၣ်စ့ၢ်ကီးလီၤ. အဝဲတဲဝဲလၢ “စပံးထံတခွးအံၤ ဒိလီၤဝဲ တၢ်အၢၣ်လီၤအီလီၤအသီလၢ+ အကဘၣ်တၢ်ပာ်ဂၢၢ်ပာ်ကျၢၤအီၤ ခီဖျိယသွံၣ်+ လၢအကဘၣ် တၢ်လူလီၤအီၤလၢ သုဂီၢ်လီၤ.+
၂၁ “ဘၣ်ဆၣ် ကွၢ်မီၤ, ပှၤလၢ အကဟ့ၣ်လီၤကွံာ်ယၤ တဂၤန့ၣ် အိၣ်ဒီးယၤလၢ စီၢ်နီၤခိၣ်လီၤ.+
၂၂ တၢ်ကွဲးအသးခဲလၢာ်လၢ ဘၣ်ဃးဒီး ပှၤကညီဖိခွါန့ၣ် ကလၢထီၣ်ပှဲၤထီၣ်လီၤ.+ ဘၣ်ဆၣ် ပှၤလၢ အကဟ့ၣ်လီၤကွံာ်အီၤ တဂၤန့ၣ် ကဘၣ်ကီဘၣ်ခဲလီၤ.”+
၂၃ အဃိ အဝဲသ့ၣ် တဲသကိးလိာ်အသး တဂၤဒီးတဂၤလၢ မ့ၢ်မတဂၤ ကမၤတၢ်အၢ တမံၤအံၤလဲၣ်.+
၂၄ ဒီးအဝဲသ့ၣ်စးထီၣ် တဲအါလိာ်အသးဆူၣ်ဆူၣ် ဘၣ်ဃးဒီး မတဂၤ မ့ၢ်ပှၤအဒိၣ်ကတၢၢ်လၢ အဝဲသ့ၣ် အကျါလဲၣ်န့ၣ်လီၤ.+
၂၅ ယ့ၣ်ၡူး တဲအဝဲသ့ၣ်လၢ “ပှၤကလုာ် အစီၤပၤတဖၣ်န့ၣ် ပၢပှၤဂၤ ဖဲအသး ဒီးပှၤလၢအအိၣ်ဒီး တၢ်စိတၢ်ကမီၤလၢ ပှၤကလုာ်တဖၣ်အဖီခိၣ်န့ၣ် ပှၤကိးအဝဲသ့ၣ်လၢ ပှၤမၤဘျုးမၤဖှိၣ်တၢ်တဖၣ်လီၤ.*+
၂၆ မ့မ့ၢ်သုန့ၣ် တဘၣ်မ့ၢ်ဒ်န့ၣ်ဘၣ်.+ ဘၣ်ဆၣ် ပှၤလၢအဒိၣ်ကတၢၢ်လၢ သုကျါတဂၤန့ၣ် မ်အကဲထီၣ်ဒ်သိးဒီး ပှၤလၢအသးစၢ်ကတၢၢ်+ ဒီးပှၤလၢ အတီခိၣ်ရိၤမဲတၢ်တဂၤန့ၣ် မ်အကဲထီၣ် ဒ်သိးဒီး ပှၤပျဲၢ်တက့ၢ်.
၂၇ ပှၤလၢအဒိၣ်န့ၣ် ကမ့ၢ်ပှၤလၢ အအီၣ်တၢ်တဂၤဧါ မ့တမ့ၢ် ပှၤတဂၤလၢ အမၤန့ၢ်တၢ်လၢ ပှၤဂၤအဂီၢ်ဧါ. ကမ့ၢ်ပှၤလၢ အအီၣ်တၢ်တဂၤ တမ့ၢ်ဧီၤ. ဘၣ်ဆၣ် မ့မ့ၢ်ယၤန့ၣ် ယမ့ၢ်ပှၤတဂၤလၢ အမၤန့ၢ်တၢ်လၢ သုဂီၢ်လီၤ.+
၂၈ “ဘၣ်ဆၣ် ဖဲယထံၣ်ဘၣ် တၢ်မၤကွၢ်တဖၣ်အခါ+ သုမ့ၢ်ပှၤလၢ အဆဲးအိၣ်ဒီးယၤလီၤ.+
၂၉ ဒီးဒ်ယပၢ် မၤတၢ်အၢၣ်လီၤအီလီၤ ဒီးယၤအသိး ယမၤ တၢ်အၢၣ်လီၤအီလီၤဒီးသု လၢဘီမုၢ်အဂီၢ်+
၃၀ ဒ်သိး သုကအီၣ်တၢ်အီတၢ်လၢ ယစီၢ်နီၤခိၣ် လၢယဘီမုၢ်အပူၤ+ ဒီးကဆ့ၣ်နီၤလၢ လီၢ်ပစိာ်အလိၤ+ ဒီးစံၣ်ညီၣ် အံၣ်စရ့လး ၁၂ ဒူၣ်အဂီၢ်လီၤ.+
၃၁ “စီၤၡံမိၣ်ဧၢ, စီၤၡံမိၣ်ဧၢ, မုၣ်ကီၤလံၢ် ဃ့ဂုၤသုကိးဂၤဒဲးဒ်ဘု* အသိးလီၤ.+
၃၂ ဘၣ်ဆၣ် ဒ်သိးနတၢ်နာ် သုတလီၤစၢ်တဂ့ၤအဂီၢ် ယဃ့ကညးယွၤလၢ နဂီၢ်ဝံၤလံ.+ ဒီးဖဲနသ့ၣ်ညါလီၤက့ၤ နသးအခါ မၤဆူၣ်ထီၣ် နဒီပုၢ်ဝဲၢ်တဖၣ်အဂံၢ်အဘါနီၤ.”+
၃၃ ဘၣ်ဆၣ် အဝဲတဲ ယ့ၣ်ၡူးလၢ “ကစၢ်ဧၢ, ယအိၣ်ကတဲာ်ကတီၤ ယသးလၢ ယကလဲၤဒီးနၤလၢ ဃိာ်ပူၤဒီးတၢ်သံအပူၤလီၤ.”+
၃၄ ဘၣ်ဆၣ် ယ့ၣ်ၡူးတဲအီၤလၢ “စီၤပ့းတရူးဧၢ, ယကတဲနၤ, တနံၤအံၤ တချုးလၢ ဆီဖါအိၣ်အိထီၣ်ဒံးဘၣ်န့ၣ် နကသမၢယၤလၢ နတသ့ၣ်ညါယၤဘၣ် သၢဘျီလီၤ.”+
၃၅ ဒီးယ့ၣ်ၡူးတဲစ့ၢ်ကီး အဝဲသ့ၣ်လၢ “လၢညါ ဖဲယမၢ သုလဲၤစံၣ်တဲၤလီၤတၢ်အခါ ယတမၢ သုလဲၤစိာ်စ့ထၢၣ်, တၢ်အီၣ်အထၢၣ် ဒီးခီၣ်ဖံးဘၣ်.+ ဖဲန့ၣ်အခါ တၢ်လၢအတယၢဒီးသုဘၣ်န့ၣ်* အိၣ်တမံၤမံၤဧါ.” အဝဲသ့ၣ် တဲဝဲလၢ “တအိၣ်နီတမံၤဘၣ်.”
၃၆ ဒီးအတဲဘၣ် အဝဲသ့ၣ်လၢ “ဘၣ်ဆၣ်ခဲအံၤ သုမ့ၢ်အိၣ်ဒီး စ့ထၢၣ်မ့ၢ်ဂ့ၤ တၢ်အီၣ်အထၢၣ်မ့ၢ်ဂ့ၤန့ၣ် လဲၤစိာ်အီၤတက့ၢ်. ဒီးသုနးမ့ၢ်တအိၣ်ဘၣ်န့ၣ် ဆါလီၤကွံာ်သုဆ့ကၤ ဒီးပှ့ၤန့ၢ် နးတဘ့ၣ်တက့ၢ်.
၃၇ ယကတဲဘၣ်သုလၢ တၢ်ကွဲးအသး လၢအမ့ၢ် ‘အဝဲကဘၣ်တၢ် ပာ်ပနီၣ်အီၤ ဒ်ပှၤမၤကမၣ်တၢ်အသိး’+ န့ၣ်ကဘၣ်လၢထီၣ်ပှဲၤထီၣ် လၢယၤလီၤ. တၢ်ကွဲးအသးအံၤ မ့ၢ်ဝဲ ယဂ့ၢ်လီၤ.”+
၃၈ ဒီးအဝဲသ့ၣ် တဲဝဲလၢ “ကစၢ်ဧၢ, နးအိၣ်လၢအံၤခံဘ့ၣ်.” ဒီးယ့ၣ်ၡူးတဲ အဝဲသ့ၣ်လၢ “ပှဲၤအံၤန့ၣ် လၢပှဲၤလံ.”
၃၉ ဖဲအဟးထီၣ်ဝဲအခါ ဒ်ညီနုၢ်အသိး အဝဲလဲၤလၢ ကစၢၢ်သ့ၣ်စၤယံး ဒီးအပျဲၢ်အဘီၣ်တဖၣ် လဲၤပိာ်အခံ စ့ၢ်ကီးလီၤ.+
၄၀ ဖဲအဝဲသ့ၣ် လဲၤတုၤလၢ တၢ်လီၢ်တတီၤန့ၣ်အခါ ယ့ၣ်ၡူးတဲဘၣ် အဝဲသ့ၣ်လၢ “ဒ်သိး သုသုတလီၤလၢ တၢ်လ့ပစီအပူၤတဂ့ၤအဂီၢ် ဃ့ထုကဖၣ်တၢ် ထီဘိတက့ၢ်.”+
၄၁ ဒီးအဝဲဟးထီၣ်ကွံာ်လၢ အဝဲသ့ၣ် အအိၣ်ကယံၤဝဲ တကွံာ်လၢၢ်ဃၣ်ဃၣ် ဒီးအဝဲချံးလီၤအခီၣ် ဒီးစးထီၣ် ဃ့ထုကဖၣ်တၢ်
၄၂ ဒီးတဲဝဲလၢ “ပၢ်ဧၢ, မ့ၢ်ဘၣ်နသးန့ၣ် ထုးကွံာ်ခွးအံၤ လၢယအိၣ်တက့ၢ်. ဘၣ်ဆၣ် တဘၣ်မ့ၢ်ဒ် ယတၢ်ဘၣ်သး အသိးဘၣ်. မ်တၢ်ကဲထီၣ်အသးဒ် နတၢ်ဘၣ်သး အသိးတက့ၢ်.”+
၄၃ ဝံၤဒီး မူခိၣ်ကလူးတဂၤ ဟဲလီၣ်ဖျါထီၣ်အသး လၢအအိၣ် ဒီးဒုးဆူၣ်ထီၣ် အဂံၢ်အဘါလီၤ.+
၄၄ ဘၣ်ဆၣ် အဝဲတူၢ်ဘၣ်တၢ် နးမးအဃိ အဝဲဆဲး ဃ့ထုကဖၣ်တၢ် ဆူၣ်န့ၢ်ဒံးအလီၢ်+ ဒီးအကပၢၤ ကဲထီၣ်ဒ်တၢ်သွံၣ် လီၤစီၤလၢ ဟီၣ်ခိၣ်အလိၤအသိးလီၤ.
၄၅ ဖဲအဝဲဃ့ထုကဖၣ်တၢ် ဝံၤအလီၢ်ခံ အဝဲဂဲၤဆၢထၢၣ်ဒီး က့ၤဝဲလၢ အပျဲၢ်အဘီၣ်တဖၣ်အအိၣ်လီၤ. ဒီးအထံၣ်ဝဲလၢ အဝဲသ့ၣ် မံဘၣ်အသး, မ့ၢ်လၢ အဝဲသ့ၣ်လီၤဘှံးလၢ တၢ်သူၣ်အုးသးအုး အဃိလီၤ.+
၄၆ အဃိ ယ့ၣ်ၡူးတဲဘၣ် အဝဲသ့ၣ်လၢ “ဘၣ်မနုၤအဃိ သုမံလဲၣ်. ဂဲၤဆၢထၢၣ် ဒီးဆဲးဃ့ထုကဖၣ်တၢ် ဒ်သိး သုသုတလီၤလၢ တၢ်လ့ပစီအပူၤတဂ့ၤအဂီၢ်တက့ၢ်.”+
၄၇ ဖဲယ့ၣ်ၡူးတဲတၢ်ဒံးအခါ စီၤယူဒၤလၢ အပၣ်ဃုာ်လၢ တၢ်မၢဖိတဆံခံဂၤအကျါန့ၣ် ဟဲဆှၢဝဲပှၤဂီၢ်မုၢ် ဒီးအဝဲလဲၤလၢ ယ့ၣ်ၡူးအအိၣ် ဒ်သိးကနၢမူအီၤလီၤ.+
၄၈ ဘၣ်ဆၣ် ယ့ၣ်ၡူး တဲအီၤလၢ “စီၤယူဒၤဧၢ, နကဟ့ၣ်လီၤကွံာ် ပှၤကညီဖိခွါအံၤလၢ တၢ်နၢမူတထံၣ်န့ၣ်ဧါ.”
၄၉ ဖဲပှၤလၢအိၣ်ဝးတရံးအီၤတဖၣ် ထံၣ်ဝဲတၢ်လၢ အကကဲထီၣ်အသးအခါ အဝဲသ့ၣ်တဲဝဲလၢ “ကစၢ်ဧၢ, ပကဘၣ်ကျီ အဝဲသ့ၣ်လၢနးဧါ.”
၅၀ ဒီးပှၤလၢ အဝဲသ့ၣ်အကျါတဂၤ ကျီဝဲ ပှၤလုၢ်တၢ်ခိၣ် အဒိၣ်ကတၢၢ် အကုၢ်တဂၤဒီး အနၢ်ကုလၢ အထွဲတခီ ထီၣ်တဲာ်ဝဲလီၤ.+
၅၁ ဘၣ်ဆၣ် ယ့ၣ်ၡူး တဲဝဲလၢ “ပှဲၤန့ၣ်ဘၣ်လံ.” ဒီးယ့ၣ်ၡူးထိးဘၣ်ဝဲ အနၢ်ကု ဒီးမၤဘျါက့ၤအီၤလီၤ.
၅၂ ဝံၤဒီး ပှၤလုၢ်တၢ်ဒိၣ်အခိၣ်တဖၣ်, ပှၤကွၢ်ထွဲ တၢ်လုၢ်ဟံၣ်အခိၣ်တဖၣ် ဒီးပှၤသူၣ်က့သးပှၢ်လၢ အဟဲဖီၣ်အီၤန့ၣ် ယ့ၣ်ၡူးတဲ အဝဲသ့ၣ်လၢ “သုဟဲစိာ်နးဒီးနီၣ်တီၢ် ဒ်ပှၤဟဲဖီၣ် တၢ်ဟုၣ်တၢ်ဘျၣ်တဂၤအသိးဧါ.+
၅၃ ဖဲယအိၣ်ဒီးသုလၢ တၢ်လုၢ်ဟံၣ်ပူၤ တနံၤဘၣ်တနံၤန့ၣ်+ သုတဖီၣ်ယၤဘၣ်.+ ဘၣ်ဆၣ် ခဲအံၤ သုတၢ်ဆၢကတီၢ် ဒီးပှၤလၢအအိၣ်လၢ တၢ်ခံးကျါတဖၣ် အဆၢကတီၢ်န့ၣ်ဘၣ်လံ.”+
၅၄ ဒီးအဝဲသ့ၣ်ဖီၣ် ယ့ၣ်ၡူး ဒီးလဲၤကိးအီၤလၢ+ ပှၤလုၢ်တၢ်ခိၣ် အဒိၣ်ကတၢၢ်အဟံၣ်ပူၤ ဘၣ်ဆၣ် စီၤပ့းတရူး ပိာ်ထီၣ်အခံ တယံၤတဘူးဒီးအီၤလီၤ.+
၅၅ ဖဲအဝဲသ့ၣ် မၤကဲၤထီၣ်မ့ၣ်အူလၢ ကရၢၢ်အခၢၣ်သးအခါ အဝဲသ့ၣ် ဆ့ၣ်နီၤဝဲဒ်သိးသိး ဒီးစီၤပ့းတရူးဆ့ၣ်နီၤလၢ အဝဲသ့ၣ်အကျါ စ့ၢ်ကီးလီၤ.+
၅၆ ဘၣ်ဆၣ် ကုၢ်မုၣ်တဂၤ ထံၣ်စီၤပ့းတရူးဆ့ၣ်နီၤလၢ မ့ၣ်အူကပၤအဃိ အဝဲကွၢ်အီၤထံထံ ဒီးတဲဝဲလၢ “ပှၤတဂၤအံၤ ပိာ်ယ့ၣ်ၡူးအခံ စ့ၢ်ကီးလီၤ.”
၅၇ ဘၣ်ဆၣ် အဝဲဂ့ၢ်လိာ်ဝဲဒီးတဲဝဲလၢ “ခွါမုၣ်ဧၢ, ယတသ့ၣ်ညါအီၤဘၣ်.”
၅၈ ဒီးတစိၢ်ဖိဝံၤ ပှၤအဂၤတဂၤထံၣ် စီၤပ့းတရူးဒီး တဲဝဲလၢ “နပၣ်ဃုာ်စ့ၢ်ကီးလၢ အဝဲသ့ၣ်အကျါလီၤ.” ဘၣ်ဆၣ် စီၤပ့းတရူး တဲဝဲလၢ “ခွါဧၢ, ယတပၣ်ဘၣ်.”+
၅၉ ဒီးပူၤကွံာ်တနၣ်ရံၣ် ဝံၤအလီၢ်ခံ ပိာ်ခွါလၢအဂၤတဂၤ တဲဝဲလၢတၢ်သးဆူၣ်အပူၤလၢ “ပှၤတဂၤအံၤ မ့ၢ်ပှၤကၤလံၤလါဖိအဃိ အမ့ၢ်စ့ၢ်ကီးပှၤလၢ အပိာ်ယ့ၣ်ၡူးအခံ နီၢ်ကီၢ်လီၤ.”
၆၀ ဘၣ်ဆၣ် စီၤပ့းတရူး တဲဝဲလၢ “ခွါဧၢ, နတဲတၢ်မနုၤလဲၣ်န့ၣ် ယတသ့ၣ်ညါဘၣ်.” ဖဲအတဲတၢ်ဒံးအခါန့ၣ် ဆီဖါအိၣ်အိထီၣ်ဝဲ တဘျီဃီလီၤ.
၆၁ ဖဲန့ၣ်ကစၢ်ဃၣ်ဃီၤအသး ဒီးကွၢ်စီၤပ့းတရူးလိၤလိၤ ဒီးစီၤပ့းတရူး သ့ၣ်နီၣ်ထီၣ်က့ၤ တၢ်ကတိၤလၢ ကစၢ်တဲဘၣ်အီၤလၢ “တနံၤအံၤ တချုးလၢ ဆီဖါအိၣ်အိထီၣ်ဒံးဘၣ်န့ၣ် နကသမၢယၤသၢဘျီလီၤ.”+
၆၂ ဒီးအဝဲ ဟးထီၣ်လၢတၢ်ချၢ ဒီးဟီၣ်ဝဲ နးမးလီၤ.
၆၃ ပှၤလၢ အဖီၣ်ဃာ်ယ့ၣ်ၡူးန့ၣ် စးထီၣ်ဒုၣ်ဒွဲၣ်စံးအၢအီၤ+ ဒီးဒိအီၤတီၢ်အီၤ+
၆၄ ဒီးကးဘၢအမဲာ်ဝံၤ အဝဲသ့ၣ်သံကွၢ်အီၤလၢ “နမ့မ့ၢ်ဝံဒီး မတဂၤတီၢ်နၤလဲၣ်န့ၣ် တဲဘၣ်ပှၤတထံၣ်သၢၤ.”
၆၅ ဒီးအဝဲသ့ၣ် ကတိၤထီဒါယ့ၣ်ၡူးလၢ တၢ်ကတိၤအါမံၤလီၤ.
၆၆ ဖဲမုၢ်ဝါထီၣ်န့ၣ် ပှၤဂီၢ်မုၢ်အပှၤသူၣ်က့သးပှၢ် လၢအမ့ၢ် ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ်န့ၣ် အိၣ်ဖှိၣ်ရိဖှိၣ်+ ဒီးအဝဲသ့ၣ်လဲၤကိး ယ့ၣ်ၡူးလၢ ပှၤယူဒၤဖိအကွီၢ်ဘျီၣ် လၢအဒိၣ်ကတၢၢ်တဖျၢၣ် ဒီးတဲဝဲလၢ
၆၇ “နမ့မ့ၢ် ခရံာ်န့ၣ် တဲဘၣ်ပှၤသၢၤ.”+ ဘၣ်ဆၣ် ယ့ၣ်ၡူးတဲအဝဲသ့ၣ်လၢ “ယမ့ၢ်တဲသုသနာ်က့ တမ့ၢ်လၢ သုကနာ်ယၤ နီတစဲးဘၣ်.
၆၈ တကးဒံးဘၣ် ယမ့ၢ်သံကွၢ်သုန့ၣ် သုတတဲဆၢဘၣ်.
၆၉ ဘၣ်ဆၣ် စးထီၣ်လၢ ဆၢကတီၢ်ခဲအံၤ ဒီးဆူညါန့ၣ် ပှၤကညီဖိခွါ+ ကဆ့ၣ်နီၤလၢ ကစၢ်ယွၤလၢ အစိကမီၤဒိၣ်တဂၤ အစုထွဲလီၤ.”+
၇၀ ဖဲန့ၣ် အဝဲသ့ၣ်ခဲလၢာ် တဲဝဲလၢ “မ့မ့ၢ်ဒ်န့ၣ် နကဲကစၢ်ယွၤ အဖိခွါဧါ.” ဒီးအဝဲတဲ အဝဲသ့ၣ်လၢ “ဒ်သုတဲ အသိးလီၤ.”
၇၁ အဝဲသ့ၣ်တဲဝဲလၢ “ပလိၣ်ဘၣ်တၢ်အုၣ်အသး အဂၤအလီၢ်အိၣ်ဒံးဧါ. ပနၢ်ဟူဘၣ် အတၢ်ကတိၤလၢ အဟဲထီၣ်လၢအကိာ်ပူၤလၢ ပနီၢ်ကစၢ်လီၤ.”+
