ယိၤဟၣ် ၁၈:၁-၄၀
-
စီၤယူဒၤ ဟ့ၣ်လီၤကွံာ် ယ့ၣ်ၡူး (၁-၉)
-
စီၤပ့းတရူးသူဝဲနး (၁၀, ၁၁)
-
ယ့ၣ်ၡူး ဘၣ်တၢ်လဲၤကိးအီၤလၢ စီၤအၣ်နၣ်အအိၣ် (၁၂-၁၄)
-
စီၤပ့းတရူး သမၢယ့ၣ်ၡူးအဆိကတၢၢ်တဘျီ (၁၅-၁၈)
-
ယ့ၣ်ၡူးအိၣ်လၢ စီၤအၣ်နၣ်အမဲာ်ညါ (၁၉-၂၄)
-
စီၤပ့းတရူး သမၢယ့ၣ်ၡူး ခံဘျီတဘျီ ဒီးသၢဘျီတဘျီ (၂၅-၂၇)
-
ယ့ၣ်ၡူးအိၣ်လၢ စီၤပံၤလးအမဲာ်ညါ (၂၈-၄၀)
-
“ယဘီယမုၢ်န့ၣ် တဘၣ်ဃးဒီး ဟီၣ်ခိၣ်အံၤဘၣ်” (၃၆)
-
၁၈ ယ့ၣ်ၡူး တဲတၢ်ဂ့ၢ်တဖၣ်န့ၣ် ဝံၤဒီး အဝဲဒီးအပျဲၢ်အဘီၣ်တဖၣ် လဲၤဝဲလၢ တၤသၣ်အလီၢ်လၢ အအိၣ်လၢ ကံဒြိၣ်တၢ်တြီၤပူၤ+ အဝၢ်ဘးခီလီၤ. ဒီးအဝဲဒီး အပျဲၢ်အဘီၣ်တဖၣ် လဲၤနုာ်လီၤဝဲ ဖဲန့ၣ်လီၤ.+
၂ မ့ၢ်လၢ ယ့ၣ်ၡူးဒီး အပျဲၢ်အဘီၣ်တဖၣ် ထံၣ်ဖှိၣ်လိာ်အသးဖဲန့ၣ် အါဘျီအဃိ စီၤယူဒၤလၢ အမ့ၢ်ပှၤလၢ အဟ့ၣ်လီၤကွံာ်ယ့ၣ်ၡူးန့ၣ် သ့ၣ်ညါ တၢ်လီၢ်အံၤစ့ၢ်ကီးလီၤ.
၃ အဃိ စီၤယူဒၤဟဲကိးဝဲ ပှၤသုးဖိတဒူၣ် ဒီးပှၤပၢၤတၢ်ဖိလၢ ပှၤလုၢ်တၢ်ဒိၣ်အခိၣ်တဖၣ် ဒီးပှၤဖၤရံၤၡဲတဖၣ် မၢလီၤဝဲလီၤ. အဝဲသ့ၣ် ဟဲစိာ်ဝဲ ဆှိ, မ့ၣ်အူဒၢ ဒီးစုကဝဲၤတဖၣ်လီၤ.+
၄ ဒီးယ့ၣ်ၡူးသ့ၣ်ညါဝဲ တၢ်ခဲလၢာ်လၢ အကကဲထီၣ်အသးဒီးအီၤ တဖၣ်အဃိ အလဲၤဝဲလၢ ပှၤတဖၣ်န့ၣ်အအိၣ် ဒီးတဲအဝဲသ့ၣ်လၢ “သုဃု မတဂၤလဲၣ်.”
၅ အဝဲသ့ၣ် တဲဆၢအီၤလၢ “ပှၤနစၤရ့းဖိ ယ့ၣ်ၡူးလီၤ.”+ ယ့ၣ်ၡူးတဲအဝဲသ့ၣ်လၢ “ယမ့ၢ်ပှၤအဝဲန့ၣ်လီၤ.” ဒီးစီၤယူဒၤ လၢအဟ့ၣ်လီၤကွံာ်အီၤတဂၤန့ၣ် ဆၢထၢၣ်လၢ အဝဲသ့ၣ်အကျါစ့ၢ်ကီးလီၤ.+
၆ ဘၣ်ဆၣ် ဖဲယ့ၣ်ၡူးတဲ အဝဲသ့ၣ်လၢ “ယမ့ၢ်ပှၤအဝဲန့ၣ်” အခါ အဝဲသ့ၣ်သုးလီၤလၢ အလီၢ်ခံ ဒီးလီၤဃံၢ်ဝဲလၢ ဟီၣ်ခိၣ်လိၤလီၤ.+
၇ အဃိ ယ့ၣ်ၡူးသံကွၢ်ကဒီး အဝဲသ့ၣ်လၢ “သုဃု မတဂၤလဲၣ်.” အဝဲသ့ၣ် တဲဝဲလၢ “ပှၤနစၤရ့းဖိ ယ့ၣ်ၡူးလီၤ.”
၈ ယ့ၣ်ၡူး တဲဆၢဝဲလၢ “ယတဲသုဝံၤလံ, အကဲယၤလီၤ. အဃိ သုမ့ၢ်ဃုယၤန့ၣ် ပျဲက့ၤ ပှၤတဖၣ်အံၤတက့ၢ်.”
၉ တၢ်မၤအသးဒ်အံၤန့ၣ် မၤလၢထီၣ်ပှဲၤထီၣ် ယ့ၣ်ၡူး အတၢ်ကတိၤလၢ အမ့ၢ် “ပှၤလၢ နဟ့ၣ်ယၤန့ၣ် တဟါမၢ် နီတဂၤဘၣ်.”+
၁၀ ဒီးစီၤၡံမိၣ်ပ့းတရူး ထုးထီၣ်အနးဒီးကျီဝဲ ပှၤလုၢ်တၢ်ခိၣ် အဒိၣ်ကတၢၢ် အကုၢ်တဂၤ ဒီးအနၢ်ကုလၢ အထွဲတခီ ထီၣ်တဲာ်ဝဲလီၤ.+ ကုၢ်တဂၤအံၤ အမံၤမ့ၢ်ဝဲ စီၤမါလဃူးလီၤ.
၁၁ ဘၣ်ဆၣ် ယ့ၣ်ၡူးတဲ စီၤပ့းတရူးလၢ “ထၢနုာ်က့ၤနးလၢ အတြိးပူၤဟီ.+ ခွးလၢ ပၢ်ဟ့ၣ်ယၤန့ၣ် ယတကြၢးအီဧီၤ.”+
၁၂ ဒီးပှၤသုးဖိတဖၣ်, သုးခိၣ် ဒီးယူဒၤအပှၤပၢၤတၢ်ဖိတဖၣ် ဖီၣ်ယ့ၣ်ၡူးဒီး စၢဃာ်အီၤလီၤ.
၁၃ အဝဲသ့ၣ် လဲၤဆှၢဆိအီၤလၢ စီၤအၣ်နၣ်အအိၣ်, မ့ၢ်လၢ အဝဲမ့ၢ် စီၤကၤယါဖၤ အမံၤပှၢ်ပိာ်ခွါအဃိလီၤ. စီၤကၤယါဖၤန့ၣ်+ မ့ၢ်ဝဲပှၤလုၢ်တၢ်ခိၣ် အဒိၣ်ကတၢၢ် ဖဲနံၣ်အဝဲန့ၣ်လီၤ.+
၁၄ နီၢ်ကီၢ်န့ၣ် စီၤကၤယါဖၤ မ့ၢ်ပှၤတဂၤလၢ အဟ့ၣ်ကူၣ် ပှၤယူဒၤဖိတဖၣ်လၢ ပှၤတဂၤ မ့ၢ်ဘၣ်သံလၢ အဝဲသ့ၣ်အဂီၢ်န့ၣ် ကကဲဘျုးလၢ အဝဲသ့ၣ်အဂီၢ်လီၤ.+
၁၅ စီၤၡံမိၣ်ပ့းတရူး ဒီးယ့ၣ်ၡူးအပျဲၢ်အဘီၣ် လၢအဂၤတဂၤ ပိာ်ထီၣ်ဝဲ ယ့ၣ်ၡူးအခံလီၤ.+ ပှၤလုၢ်တၢ်ခိၣ် အဒိၣ်ကတၢၢ်န့ၣ် သ့ၣ်ညါယ့ၣ်ၡူး အပျဲၢ်အဘီၣ်တဂၤအံၤလီၤ. အဃိ အဝဲလဲၤနုာ်လီၤပိာ်ဝဲ ယ့ၣ်ၡူးအခံလၢ ပှၤလုၢ်တၢ်ခိၣ် အဒိၣ်ကတၢၢ် အကရၢၢ်ပူၤလီၤ.
၁၆ ဘၣ်ဆၣ် စီၤပ့းတရူး ဆၢထၢၣ်ဝဲလၢ တြဲၤအချၢလီၤ. အဃိ ယ့ၣ်ၡူးအပျဲၢ်အဘီၣ် လၢပှၤလုၢ်တၢ်ခိၣ် အဒိၣ်ကတၢၢ် သ့ၣ်ညါဝဲတဂၤန့ၣ် ဟးထီၣ်ဒီး လဲၤတဲတၢ်ဒီး ကုၢ်မုၣ် လၢအမ့ၢ် ပှၤခိးတြဲၤဖိတဂၤ ဒီးကိးနုာ်လီၤဝဲ စီၤပ့းတရူးလီၤ.
၁၇ ဒီးပှၤခိးတြဲၤဖိတဂၤန့ၣ် တဲစီၤပ့းတရူးလၢ “နမ့ၢ်ပှၤတဂၤန့ၣ် အပျဲၢ်အဘီၣ် တမ့ၢ်ဧီၤ.” စီၤပ့းတရူးတဲဝဲလၢ “တမ့ၢ်ဘၣ်.”+
၁၈ မ့ၢ်လၢတၢ်ဂိၢ်အဃိ တၢ်အကုၢ်အပှၤတဖၣ် ဒီးပှၤပၢၤတၢ်ဖိတဖၣ် ဆၢထၢၣ်လၢ မ့ၣ်အူလၢ အဝဲသ့ၣ် မၤကဲၤထီၣ်ဝဲအကပၤ ဒ်သိးကဆူးမ့ၣ်အူ အဂီၢ်လီၤ. ဒီးစီၤပ့းတရူးစ့ၢ်ကီး ဆၢထၢၣ်ဒီး အဝဲသ့ၣ် ဒီးဆူးမ့ၣ်အူလီၤ.
၁၉ ဒီးပှၤလုၢ်တၢ်ဒိၣ်အခိၣ် သံကွၢ်သံဒိးယ့ၣ်ၡူး ဘၣ်ဃးဒီး အပျဲၢ်အဘီၣ်တဖၣ် ဒီးအတၢ်သိၣ်လိအဂ့ၢ်လီၤ.
၂၀ ယ့ၣ်ၡူးတဲဆၢအီၤလၢ “ယတဲတၢ်လၢ ပှၤခဲလၢာ် အမဲာ်ညါပျီပျီ ဒီးထီဘိန့ၣ် ယသိၣ်လိတၢ်လၢ ဘူၣ်ဘျီၣ်တဖၣ်အပူၤ ဒီးလၢတၢ်လုၢ်ဟံၣ်အပူၤ+ ဖဲပှၤယူဒၤဖိခဲလၢာ် ဟဲအိၣ်ဖှိၣ်ဝဲ အလီၢ်လီၤ. ယတတဲတၢ်လၢ တၢ်ခူသူၣ်အပူၤ နီတမံၤဘၣ်.
၂၁ ဘၣ်မနုၤအဃိ နသံကွၢ်ယၤလဲၣ်. သံကွၢ်ပှၤလၢ အနၢ်ဟူတၢ်လၢ ယတဲအီၤတဖၣ်န့ၣ်သၢၤ. တၢ်လၢယတဲန့ၣ် အဝဲသ့ၣ်သ့ၣ်ညါလီၤ.”
၂၂ ယ့ၣ်ၡူးတဲဝဲဒ်န့ၣ် ဝံၤဒီး ပှၤပၢၤတၢ်ဖိလၢ အဆၢထၢၣ် ဖဲန့ၣ်တဂၤန့ၣ် ဒဲယ့ၣ်ၡူးအမဲာ်+ ဒီးတဲအီၤလၢ “နကြၢးတဲဆၢ ပှၤလုၢ်တၢ်ဒိၣ်အခိၣ် ဒ်န့ၣ်ဧါ.”
၂၃ ယ့ၣ်ၡူးတဲဆၢအီၤလၢ “ယမ့ၢ်တဲကမၣ်ဘၣ်တၢ် တမံၤမံၤန့ၣ် တဲဖျါထီၣ်ယတၢ်ကမၣ်သၢၤ. ဘၣ်ဆၣ် ယတဲတၢ်မ့ၢ်ဘၣ်န့ၣ် ဘၣ်မနုၤအဃိ နတီၢ်ယၤလဲၣ်.”
၂၄ ဒီးဖဲယ့ၣ်ၡူး ဘၣ်တၢ်စၢဃာ်အီၤဒံးအခါ စီၤအၣ်နၣ် ဆှၢထီၣ်ယ့ၣ်ၡူး ဆူပှၤလုၢ်တၢ်ခိၣ် အဒိၣ်ကတၢၢ် စီၤကၤယါဖၤ အအိၣ်လီၤ.+
၂၅ ဒီးစီၤၡံမိၣ်ပ့းတရူး ဆၢထၢၣ် ဆူးမ့ၣ်အူ ဖဲန့ၣ်လီၤ. ဒီးအဝဲသ့ၣ် တဲအီၤလၢ “နကဲအပျဲၢ်အဘီၣ်တဂၤစ့ၢ်ကီး တမ့ၢ်ဧီၤ.” အဝဲဂ့ၢ်လိာ်ဝဲ ဒီးတဲဝဲလၢ “တမ့ၢ်ဘၣ်.”+
၂၆ ဒီးပှၤလုၢ်တၢ်ခိၣ် အဒိၣ်ကတၢၢ် အကုၢ်တဂၤလၢ အဒီဘူးဒီတံၢ်ဒီး ပှၤလၢစီၤပ့းတရူး ကျီဝဲအနၢ်ကုန့ၣ်+ တဲဝဲလၢ “ယထံၣ် နအိၣ်ဒီးအီၤလၢ တၤသၣ်အလီၢ်ပူၤ တမ့ၢ်ဧီၤ.”
၂၇ ဘၣ်ဆၣ် စီၤပ့းတရူး ဂ့ၢ်လိာ်ကဒီးဝဲ ဒီးတဘျီဃီန့ၣ် ဆီဖါအိၣ်အိထီၣ်ဝဲလီၤ.+
၂၈ ဒီးအဝဲသ့ၣ် လဲၤဆှၢယ့ၣ်ၡူး စးထီၣ်လၢ စီၤကၤယါဖၤ အဟံၣ်တုၤလၢ ပဒိၣ်ဖးဒိၣ် အဟံၣ်ကရၢၢ်ပူၤလီၤ.+ ဖဲန့ၣ်အခါဘၣ်လၢ ဂီၤခီဂီၤဂီၤလီၤ. ဘၣ်ဆၣ် ဒ်သိးအဝဲသ့ၣ် သုတမၤဘၣ်အၢလီၤ အသးတဂ့ၤအဂီၢ်+ ဒီးဒ်သိးအဝဲသ့ၣ် အီၣ်ဘူၣ်လဲၤကပာ် ကသ့အဂီၢ် အဝဲသ့ၣ် တနုာ်လီၤလၢ ပဒိၣ်ဖးဒိၣ် အဟံၣ်ကရၢၢ်ပူၤဘၣ်.
၂၉ အဃိ စီၤပံၤလး လဲၤထီၣ်လၢတၢ်ချၢ ဆူအဝဲသ့ၣ်အအိၣ် ဒီးတဲဝဲလၢ “သုပာ်ဒ့ၣ်ပာ်ကမၣ် ပှၤတဂၤအံၤလၢ တၢ်ဂ့ၢ်မနုၤလဲၣ်.”
၃၀ အဝဲသ့ၣ် တဲဆၢအီၤလၢ “ပှၤတဂၤအံၤ မ့တမ့ၢ် ပှၤမၤကမၣ်တၢ်ဖိဘၣ်န့ၣ် တမ့ၢ်လၢ ပကဟ့ၣ်လီၤအီၤလၢ နစုပူၤဘၣ်.”
၃၁ အဃိ စီၤပံၤလး တဲအဝဲသ့ၣ်လၢ “က့ၤကိးအီၤလၢ သုနီၢ်ကစၢ် ဒီးစံၣ်ညီၣ်အီၤဒ် သုတၢ်သိၣ်တၢ်သီ အိၣ်ဝဲအသိးသၢၤ.”+ ပှၤယူဒၤဖိတဖၣ် တဲအီၤလၢ “တၢ်တဟ့ၣ်ပှၤအခွဲးလၢ ပကမၤသံ ပှၤနီတဂၤဘၣ်.”+
၃၂ တၢ်ကဲထီၣ်အသးဒ်အံၤန့ၣ် မၤလၢပှဲၤထီၣ်ဝဲ တၢ်ကတိၤလၢ ယ့ၣ်ၡူးတဲတ့ၢ်ဝဲလၢ အကဘၣ်သံဒ်လဲၣ် အဂ့ၢ်လီၤ.+
၃၃ စီၤပံၤလး က့ၤနုာ်လီၤလၢ ပဒိၣ်ဖးဒိၣ် အဟံၣ်ကရၢၢ်ပူၤ ဒီးကိးန့ၢ်ယ့ၣ်ၡူး ဒီးသံကွၢ်အီၤလၢ “နကဲ ပှၤယူဒၤဖိ အစီၤပၤဧါ.”+
၃၄ ယ့ၣ်ၡူးတဲဆၢဝဲလၢ “နထုးထီၣ် တၢ်သံကွၢ်တခါအံၤ လၢနနီၢ်ကစၢ်ဧါ. မ့တမ့ၢ် ပှၤတဲဘၣ်နၤ ယဂ့ၢ်အဃိဧါ.”
၃၅ စီၤပံၤလး က့ၤတဲဆၢဝဲလၢ “ယၤန့ၣ် မ့ၢ်ယကဲပှၤယူဒၤဖိဧါ. နပှၤကလုာ်ဒီး ပှၤလုၢ်တၢ်ဒိၣ်အခိၣ်တဖၣ် ဟ့ၣ်လီၤနၤလၢ ယစုပူၤလီၤ. မ့ၢ်နမၤဘၣ် တၢ်မနုၤလဲၣ်.”
၃၆ ယ့ၣ်ၡူးတဲဆၢဝဲလၢ+ “ယဘီယမုၢ်န့ၣ် တဘၣ်ဃးဒီး ဟီၣ်ခိၣ်အံၤဘၣ်.+ ယဘီယမုၢ် မ့ၢ်ဘၣ်ဃးဒီး ဟီၣ်ခိၣ်အံၤန့ၣ် ယခ့ယပှၤတဖၣ် ကဒုးတၢ် ဒ်သိးပှၤယူဒၤဖိ သုတဖီၣ်န့ၢ်ယၤတဂ့ၤအဂီၢ်လီၤ.+ ဘၣ်ဆၣ် ယဘီယမုၢ်န့ၣ် တဟဲအိၣ်ထီၣ်ခီဖျိလၢ ပှၤဟီၣ်ခိၣ်ဖိအဃိဘၣ်.”
၃၇ အဃိ စီၤပံၤလးတဲအီၤလၢ “မ့မ့ၢ်ဒ်န့ၣ်န့ၣ် နကဲ စီၤပၤတဂၤဟီဧါ.” ယ့ၣ်ၡူး တဲဆၢဝဲလၢ “ဒ်နတဲအသိး ယမ့ၢ်စီၤပၤတဂၤလီၤ.+ ယဟဲအိၣ်ဖျဲၣ်ထီၣ် ဒီးယဟဲအိၣ်လၢ ဟီၣ်ခိၣ်ချၢန့ၣ် မ့ၢ်ဒ်သိး ယကအုၣ်ယသးလၢ တၢ်မ့ၢ်တၢ်တီအဂီၢ်လီၤ.+ ပှၤလၢအအိၣ်လၢ တၢ်မ့ၢ်တၢ်တီအအိၣ် တကပၤကိးဂၤဒဲးန့ၣ် ကဒိကနၣ် ယကလုၢ်လီၤ.”
၃၈ စီၤပံၤလး တဲအီၤလၢ “တၢ်မ့ၢ်တၢ်တီန့ၣ် မ့ၢ်မနုၤလဲၣ်.”
စီၤပံၤလးတဲဝဲဒ်န့ၣ်ဝံၤဒီး အဝဲဟးထီၣ်ဒီး လဲၤကဒီးဝဲလၢ ပှၤယူဒၤဖိအအိၣ် ဒီးတဲအဝဲသ့ၣ်လၢ “ပှၤတဂၤအံၤ ယတထံၣ် အတၢ်ကမၣ် နီတမံၤဘၣ်.+
၃၉ ဖဲဘူၣ်လဲၤကပာ်န့ၣ် သုအိၣ်ဒီးလုၢ်လၢ်လၢ ယကဘၣ် ပျၢ်ကွံာ်န့ၢ်သု ပှၤတဂၤလီၤ.+ အဃိ မ့ၢ်သုအဲၣ်ဒိးလၢ ယကပျၢ်ကွံာ်န့ၢ်သု ပှၤယူဒၤဖိအစီၤပၤဧါ.”
၄၀ ဒီးအဝဲသ့ၣ် ကိးပသူထီၣ်ကဒီးဝဲလၢ “တမ့ၢ် ပှၤတဂၤန့ၣ်ဘၣ်, လၢစီၤဘၤရးဘါဟီ.” စီၤဘၤရးဘါန့ၣ် မ့ၢ်ဝဲ တၢ်ဟုၣ်တၢ်ဘျၣ်တဂၤလီၤ.+
