မးသဲ ၁၂:၁-၅၀
-
ယ့ၣ်ၡူးမ့ၢ်ဝဲ “မုၢ်အိၣ်ဘှံးနံၤအကစၢ်” (၁-၈)
-
ပှၤလၢအစုတဂ့ၤဘၣ်တဂၤ အစုဂ့ၤထီၣ်က့ၤဝဲ (၉-၁၄)
-
ကစၢ်ယွၤ အခ့အပှၤလၢအအဲၣ်ဝဲ (၁၅-၂၁)
-
နီဟးထီၣ်ကွံာ် တၢ်ဝံတၢ်နါ ခီဖျိလၢသးစီဆှံ (၂၂-၃၀)
-
တၢ်ဒဲးဘးလၢ တၢ်တပျၢ်ကွံာ်အီၤဘၣ် (၃၁, ၃၂)
-
သ့ၣ်န့ၣ် ပှၤသ့ၣ်ညါအီၤလၢ အသၣ်တဖၣ်အဃိ (၃၃-၃၇)
-
ဝံယိၤနါအတၢ်လီၤလး (၃၈-၄၂)
-
ဖဲတၢ်ဝံတၢ်နါ က့ၤကဒါက့ၤလၢ အဟံၣ်အခါ (၄၃-၄၅)
-
ယ့ၣ်ၡူးအမိၢ် ဒီးအဒီပုၢ်ဝဲၢ်တဖၣ် (၄၆-၅၀)
၁၂ ဖဲန့ၣ်အဆၢကတီၢ် ယ့ၣ်ၡူးလဲၤခီဂာ်ဝဲ စံာ်ပျီတဖၣ်လၢ မုၢ်အိၣ်ဘှံးနံၤလီၤ. ဒီးအပျဲၢ်အဘီၣ်တဖၣ် အဲၣ်ဒိးအီၣ်တၢ်အဃိ အဝဲသ့ၣ်ဒဲးဝဲဘုဒီးအီၣ်ဝဲလီၤ.+
၂ ဖဲပှၤဖၤရံၤၡဲတဖၣ် ထံၣ်ဝဲအခါ အဝဲသ့ၣ်တဲယ့ၣ်ၡူးလၢ “ကွၢ်တထံၣ်, ဘၣ်မနုၤအဃိ နပျဲၢ်နဘီၣ်တဖၣ် မၤတၢ်လၢ အတကြၢးမၤဝဲလၢ မုၢ်အိၣ်ဘှံးနံၤဘၣ်လဲၣ်.”+
၃ ယ့ၣ်ၡူး တဲအဝဲသ့ၣ်လၢ “ဖဲစီၤဒၤဝံး ဒီးပှၤလၢ အိၣ်ဒီးအီၤတဖၣ် လီၤဘဲအခါ စီၤဒၤဝံး မၤတၢ်မနုၤလဲၣ်န့ၣ် သုတဖးဘၣ်ဧီၤ.+
၄ စီၤဒၤဝံးလဲၤနုာ်လီၤလၢ ကစၢ်ယွၤ အဟံၣ်ပူၤ ဒီးအဝဲသ့ၣ် အီၣ်ဝဲကိၣ်လၢ တၢ်လုၢ်ထီၣ်တၢ်အဂီၢ်လီၤ.+ နီၢ်ကီၢ်န့ၣ် စီၤဒၤဝံးဒီး ပှၤလၢအအိၣ်ဒီးအီၤတဖၣ် တကြၢးအီၣ်ဝဲ ကိၣ်အံၤဘၣ်. ပှၤအီၣ်န့ၢ်ဒၣ်ထဲ ပှၤလုၢ်တၢ်ဒိၣ်တဖၣ်လီၤ.+
၅ ဒီးလၢ မုၢ်အိၣ်ဘှံးနံၤန့ၣ် ပှၤလုၢ်တၢ်ဒိၣ်တဖၣ် လၢအအိၣ်လၢ တၢ်လုၢ်ဟံၣ်အပူၤန့ၣ် မၤကမၣ်ဝဲ မုၢ်အိၣ်ဘှံးနံၤ အတၢ်သိၣ်တၢ်သီ ဘၣ်ဆၣ် အတၢ်ကမၣ် တအိၣ်ဘၣ်န့ၣ် သုတဖးဘၣ်လၢ စီၤမိၤၡ့ အတၢ်သိၣ်တၢ်သီ အပူၤဧီၤ.+
၆ ယကတဲဘၣ်သုလၢ ပှၤလၢအရ့ဒိၣ်န့ၢ်ဒံး တၢ်လုၢ်ဟံၣ်န့ၣ် အိၣ်ဖဲအံၤ တဂၤလီၤ.+
၇ ဒီးသုမ့ၢ်နၢ်ပၢၢ် တၢ်ကတိၤလၢအမ့ၢ် ‘လၢပှၤကလုၢ်ထီၣ် တၢ်လုၢ်တၢ်ပာ်အလီၢ်+ ယအဲၣ်ဒိးလၢ ပှၤသးကညီၤတၢ်’+ န့ၣ် တမ့ၢ်လၢ သုကပာ်ဒ့ၣ်ပာ်ကမၣ် ပှၤလၢ အတၢ်ကမၣ်တအိၣ်ဘၣ်တဖၣ်ဘၣ်,
၈ မ့ၢ်လၢ ပှၤကညီဖိခွါအံၤမ့ၢ်ဝဲ မုၢ်အိၣ်ဘှံးနံၤ အကစၢ်အဃိလီၤ.”+
၉ ယ့ၣ်ၡူးဟးထီၣ် ဖဲန့ၣ် ဒီးလဲၤနုာ်ဝဲလၢ ဘူၣ်ဘျီၣ်အပူၤလီၤ.
၁၀ ဒီးပှၤလၢ အစုတဂ့ၤဘၣ်တဂၤ အိၣ်ဝဲဖဲန့ၣ်လီၤ.+ အဃိ ဒ်သိးပှၤကပာ်ဒ့ၣ်ပာ်ကမၣ် ယ့ၣ်ၡူးအဂီၢ် ပှၤတနီၤ သံကွၢ်အီၤလၢ “ပှၤမ့ၢ်မၤဘျါက့ၤတၢ်လၢ မုၢ်အိၣ်ဘှံးနံၤန့ၣ် မ့ၢ်အကြၢးစ့ၢ်ကီးဧါ.”+
၁၁ ယ့ၣ်ၡူး တဲဆၢက့ၤ အဝဲသ့ၣ်လၢ “သုသိ မ့ၢ်လီၤတဲာ်လၢတၢ်ပူၤ လၢမုၢ်အိၣ်ဘှံးနံၤန့ၣ် သုတလဲၤ ထုးထီၣ်က့ၤအီၤဧီၤ.+
၁၂ ပှၤဟီၣ်ခိၣ်ဖိတဂၤန့ၣ် အလုၢ်အပှ့ၤဒိၣ်န့ၢ်ဒံး သိတဒု စၢၢ်တလၢၢ်လီၤ. အဃိ ပှၤမ့ၢ်မၤဂ့ၤတၢ်လၢ မုၢ်အိၣ်ဘှံးနံၤန့ၣ် တကမၣ်ဘၣ်.”
၁၃ ဒီးယ့ၣ်ၡူးတဲဘၣ် ပှၤတဂၤန့ၣ်လၢ “မၤဘျၢထီၣ်နစု” ဒီးပှၤတဂၤန့ၣ်မၤဘျၢထီၣ်ဝဲ ဒီးအစုဂ့ၤထီၣ်က့ၤ ဒ်အဝဲတခီ အသိးလီၤ.
၁၄ ပှၤဖၤရံၤၡဲတဖၣ် ဟးထီၣ်ကွံာ်ဝဲဖဲန့ၣ် ဒီးကူၣ်ထီၣ်ဖးလီၤဝဲလၢ ကမၤသံ ယ့ၣ်ၡူးလီၤ.
၁၅ ဖဲယ့ၣ်ၡူး သ့ၣ်ညါဝဲတၢ်ဂ့ၢ်အံၤအခါ အဝဲဟးထီၣ်ကွံာ်ဝဲဖဲန့ၣ်လီၤ. ပှၤအါဂၤပိာ်ထီၣ်အခံ+ ဒီးအဝဲမၤဘျါက့ၤ အဝဲသ့ၣ်ခဲလၢာ်လီၤ.
၁၆ ဘၣ်ဆၣ် ယ့ၣ်ၡူးမၤလိာ် အဝဲသ့ၣ် လီၤတံၢ်လီၤဆဲး ဒ်သိးအသု တတဲဖျါထီၣ်အဂ့ၢ် တဂ့ၤအဂီၢ်လီၤ.+
၁၇ အဝဲမၤဝဲဒ်န့ၣ် ဒ်သိး ကမၤလၢထီၣ်ပှဲၤထီၣ် ဝံယၡါယၤ အတၢ်ကတိၤလၢအမ့ၢ်
၁၈ “အဝဲအံၤ မ့ၢ်ယခ့ယပှၤလၢ+ ယဃုထၢအီၤ, ယအဲၣ်အီၤ ဒီးယဘၣ်သူၣ်ဘၣ်သးအီၤလီၤ.+ ယကလူလီၤ ယသးစီဆှံလၢအလိၤ+ ဒီးအဝဲကပာ်ဖျါထီၣ် တၢ်စံၣ်ညီၣ်တီအဂ့ၢ်လၢ ပှၤကလုာ်တဖၣ် အမဲာ်ညါလီၤ.
၁၉ အဝဲ တအ့ၣ်လိာ်သးဘၣ်,+ တကိးထီၣ်လၢ အကလုၢ်ဒိၣ်ဒိၣ်ဘၣ် ဒီးပှၤတနၢ်ဟူ အကလုၢ်သီၣ်လၢ ကျဲမုၢ်ပူၤနီတဂၤဘၣ်.
၂၀ တပိၢ်တဘိလၢ အသဘှံးန့ၣ် အဝဲ တမၤတဲာ်ကွံာ်ဝဲဘၣ် ဒီးမ့ၣ်အူဒၢအပှံာ်လၢ အကဲၤဒံး ထဲတစဲးဖိန့ၣ် အဝဲ တမၤလီၤပံာ်ဝဲဘၣ်+ တုၤလၢ အဒုးအိၣ်ထီၣ် တၢ်စံၣ်ညီၣ်တီတစုလီၤ.
၂၁ အဃိ ပှၤကလုာ်တဖၣ် ကမုၢ်လၢ်တၢ်လၢ အမံၤလီၤ.”+
၂၂ ပှၤဟဲစိာ် ပှၤလၢတၢ်ဝံတၢ်နါ အိၣ်လၢအလိၤတဂၤ ဆူယ့ၣ်ၡူးအအိၣ်လီၤ. ပှၤတဂၤန့ၣ် တထံၣ်တၢ်ဘၣ် ဒီးတဲတၢ်တသ့စ့ၢ်ကီးဘၣ်. ဒီးယ့ၣ်ၡူး မၤဘျါက့ၤအီၤအဃိ ပှၤလၢအတဲတၢ် တသ့ဘၣ်တဂၤန့ၣ် တဲတၢ်သ့ထီၣ်က့ၤ ဒီးထံၣ်ထီၣ်က့ၤတၢ်လီၤ.
၂၃ အဃိ ပှၤဂီၢ်မုၢ်ခဲလၢာ် ကမၢကမၣ်ဝဲ ဒီးတဲဝဲလၢ “ပှၤတဂၤအံၤ ဘၣ်သ့ၣ်သ့ၣ်ကမ့ၢ် စီၤဒၤဝံးအဖိခွါဧါသၢၤ.”
၂၄ ဖဲပှၤဖၤရံၤၡဲတဖၣ် နၢ်ဟူဘၣ်ဝဲအခါ အဝဲသ့ၣ် တဲဝဲလၢ “မ့တမ့ၢ်ဘၣ်လၢ ဘၤဧၤလစဘူာ်* လၢအမ့ၢ် တၢ်ဝံတၢ်နါတဖၣ်အခိၣ် အစိကမီၤ အဃိဘၣ်န့ၣ် ပှၤတဂၤအံၤ နီဟးထီၣ် တၢ်ဝံတၢ်နါတဖၣ်တန့ၢ်ဘၣ်.”+
၂၅ ယ့ၣ်ၡူးသ့ၣ်ညါ အဝဲသ့ၣ် အတၢ်ဆိကမိၣ်အဃိ အတဲဘၣ်အဝဲသ့ၣ်လၢ “ကယဲၢ်ဘီမုၢ်လၢ အက့ၤထီဒါလိာ်က့ၤ အသးန့ၣ် ကဟးဂီၤဝဲလီၤ. လၢဝ့ၢ်တဖျၢၣ်အပူၤ မ့တမ့ၢ် ဟံၣ်တဖျၢၣ်အပူၤန့ၣ် ပှၤမ့ၢ် က့ၤထီဒါလိာ်က့ၤအသးန့ၣ် အကလီၤပှီၢ်ဝဲလီၤ.
၂၆ ဒ်န့ၣ်အသိး မုၣ်ကီၤလံၢ်* မ့ၢ်နီဟးထီၣ်ကွံာ် မုၣ်ကီၤလံၢ်န့ၣ် မ့ၢ်ဒၣ် အထီဒါလိာ်က့ၤအသးလီၤ. မ့မ့ၢ်ဒ်န့ၣ်န့ၣ် အဘီအမုၢ် အိၣ်ဂၢၢ်ကျၢၤဝဲ ကသ့ဒ်လဲၣ်.
၂၇ အဂၤတမံၤန့ၣ် ယမ့ၢ်နီဟးထီၣ်ကွံာ် တၢ်ဝံတၢ်နါတဖၣ်လၢ ဘၤဧၤလစဘူာ် အတၢ်စိတၢ်ကမီၤန့ၣ် မ့ၢ်သုဖိခွါတဖၣ် နီဟးထီၣ်ကွံာ် တၢ်ဝံတၢ်နါလၢ မတဂၤ အစိအကမီၤအဃိလဲၣ်. လၢတၢ်ဂ့ၢ်အံၤအဃိ အဝဲသ့ၣ်ကကဲထီၣ် ပှၤလၢအစံၣ်ညီၣ်သုလီၤ.
၂၈ ယမ့ၢ်နီဟးထီၣ်ကွံာ် တၢ်ဝံတၢ်နါတဖၣ်လၢ ကစၢ်ယွၤအသးစီဆှံအဃိန့ၣ် ကစၢ်ယွၤအဘီမုၢ်ဟဲတုၤလံ ဘၣ်ဆၣ် သုတပာ်သူၣ်ပာ်သးဘၣ်.+
၂၉ ပှၤမ့ၢ် တစၢဃာ်ဆိ ပှၤလၢ အဂံၢ်ဆူၣ်တဂၤဘၣ်န့ၣ် ပှၤလဲၤနုာ်လီၤလၢအဟံၣ် ဒီးဟံးန့ၢ် အတၢ်ဖိတၢ်လံၤ ကသ့ဒ်လဲၣ်. ပှၤစၢဃာ်အီၤမ့ၢ်ဝံၤမး ပှၤဂုာ်န့ၢ် အတၢ်ဖိတၢ်လံၤ လၢအဟံၣ်ပူၤ ကသ့ဝဲလီၤ.
၃၀ ပှၤလၢ အတအိၣ်လၢ ယအိၣ်တကပၤဘၣ်န့ၣ် မ့ၢ်အထီဒါယၤလီၤ. ဒီးပှၤလၢ အတပာ်ဖှိၣ်တၢ်ဒီးယၤဘၣ်န့ၣ် မ့ၢ်အမၤ လီၤပြံလီၤပြါတၢ်လီၤ.+
၃၁ “လၢတၢ်န့ၣ်အဃိ ယကတဲဘၣ်သုလၢ ကယဲၢ်တၢ်ကတိၤထီဒါတၢ် ဒီးတၢ်ဒဲးဘး လၢပှၤမၤဘၣ်ဝဲန့ၣ် ကစၢ်ယွၤကပျၢ်န့ၢ်အီၤလီၤ. မ့မ့ၢ် ပှၤလၢအကတိၤထီဒါ သးစီဆှံန့ၣ် ကစၢ်ယွၤတပျၢ်ကွံာ် အတၢ်ကမၣ်ဘၣ်.+
၃၂ ပှၤလၢ အကတိၤထီဒါ ပှၤကညီဖိခွါန့ၣ် တၢ်ကပျၢ်ကွံာ် အတၢ်ကမၣ်လီၤ.+ ဘၣ်ဆၣ် ပှၤလၢ အကတိၤထီဒါ သးစီဆှံန့ၣ် ဆၢကတီၢ်ခဲအံၤမ့ၢ်ဂ့ၤ* ခါဆူညါမ့ၢ်ဂ့ၤ တၢ်တပျၢ်ကွံာ် အတၢ်ကမၣ်ဘၣ်.+
၃၃ “သုမ့မ့ၢ် သ့ၣ်လၢအဂ့ၤန့ၣ် သုကသၣ်ထီၣ် တၤသၣ်လၢအဂ့ၤလီၤ. သုမ့မ့ၢ် သ့ၣ်လၢအတဂ့ၤဘၣ်န့ၣ် သုကသၣ်ထီၣ် တၤသၣ်လၢ အတဂ့ၤဘၣ်လီၤ. သ့ၣ်အံၤဂ့ၤဧါ တဂ့ၤဧါန့ၣ် ပှၤသ့ၣ်ညါအီၤ ခီဖျိလၢ အသၣ်လီၤ.+
၃၄ ဂုၢ်အၢ အဖိအလံၤသ့ၣ်ဧၢ,+ သုမ့ၢ် ပှၤအၢအဃိ သုတဲတၢ်လၢအဂ့ၤ ကသ့ဒ်လဲၣ်. ဒ်တၢ်အိၣ်လၢ ပသးပူၤအသိးန့ၣ် ပတဲထီၣ်အီၤလီၤ.+
၃၅ ပှၤလၢ အဂ့ၤတဂၤန့ၣ် အသးပှဲၤဒီး တၢ်လၢအဂ့ၤအဃိ အကတဲတၢ်လၢအဂ့ၤလီၤ. မ့မ့ၢ် ပှၤလၢအအၢတဂၤန့ၣ် အသးပှဲၤဒီး တၢ်အၢတၢ်သီအဃိ အကတဲတၢ်လၢ အအၢအသီလီၤ.+
၃၆ ယကတဲဘၣ်သုလၢ ဖဲမုၢ်စံၣ်ညီၣ်အနံၤန့ၣ် ပှၤကဘၣ်ၡဲစရီလၢ+ ကယဲၢ် တၢ်ကတိၤလၢ အဘျုးတအိၣ်ဘၣ်လၢ ပှၤတဲတ့ၢ်တဖၣ်အဃိလီၤ.
၃၇ နကဘၣ်တၢ်ပာ်တီပာ်လိၤနၤ လၢနတၢ်ကတိၤတဖၣ်အဃိ မ့တမ့ၢ် နကဘၣ်တၢ်စံၣ်ညီၣ်နၤ လၢနတၢ်ကတိၤတဖၣ်အဃိလီၤ.”
၃၈ ပှၤကွဲးလံာ်ဖိဒီး ပှၤဖၤရံၤၡဲတနီၤ တဲဘၣ်ယ့ၣ်ၡူးလၢ “သရၣ်ဧၢ, ပအဲၣ်ဒိးထံၣ် နမၤတၢ်လီၤလးတခါလီၤ.”+
၃၉ ယ့ၣ်ၡူး တဲဆၢက့ၤအဝဲသ့ၣ်လၢ “ပှၤအၢပှၤသီလၢ အတတီဒီးယွၤ တစိၤအံၤန့ၣ်* အဲၣ်ဒိးထံၣ်တၢ်လီၤလး ဘၣ်ဆၣ် တၢ်တဒုးထံၣ် အဝဲသ့ၣ်ဘၣ်. တၢ်ကဒုးထံၣ် အဝဲသ့ၣ်ထဲဒၣ် ဝံယိၤနါ အတၢ်လီၤလး တမံၤလီၤ.+
၄၀ ဒ်စီၤယိၤနါ အိၣ်လၢညၣ်ဖးဒိၣ် အဟၢဖၢပူၤ သၢနံၤဒီးသၢနၤ+ အသိးန့ၣ် ပှၤကညီဖိခွါစ့ၢ်ကီး ကအိၣ်လၢ တၢ်သွၣ်ခိၣ် သၢနံၤဒီးသၢနၤလီၤ.+
၄၁ ဖဲမုၢ်စံၣ်ညီၣ်အနံၤန့ၣ် ပှၤနံၤနဝ့ဖိတဖၣ် ကဂဲၤဆၢထၢၣ်ဃုာ်ဒီး ပှၤတစိၤအံၤလီၤ. ဒီးအဝဲသ့ၣ်န့ၣ် ကပာ်ဒ့ၣ်ပာ်ကမၣ် ပှၤတစိၤအံၤ မ့ၢ်လၢဖဲစီၤယိၤနါ စံၣ်တဲၤတဲလီၤတၢ်အခါ အဝဲသ့ၣ် ပီၢ်ယၢ်လီၤက့ၤအသး အဃိလီၤ.+ ဘၣ်ဆၣ် ပှၤလၢအဒိၣ်န့ၢ်ဒံး စီၤယိၤနါ အိၣ်ဖဲအံၤတဂၤလီၤ.+
၄၂ ဖဲမုၢ်စံၣ်ညီၣ်အနံၤန့ၣ် ကလံၤထံး အနီၢ်ပၤမုၣ် ကဂဲၤဆၢထၢၣ်ဃုာ်ဒီး ပှၤတစိၤအံၤလီၤ. ဒီးအကပာ်ဒ့ၣ်ပာ်ကမၣ် အဝဲသ့ၣ်, မ့ၢ်လၢ အဝဲဘၣ်ဟဲလၢ တၢ်လီၢ်ဖးယံၤ ဒ်သိးအကနၢ်ဟူဘၣ် စီၤၡလိၤမိၤ အတၢ်ကူၣ်သ့အဂီၢ်အဃိလီၤ.+ ဘၣ်ဆၣ် ပှၤလၢအဒိၣ်န့ၢ်ဒံး စီၤၡလိၤမိၤန့ၣ် အိၣ်ဖဲအံၤတဂၤလီၤ.+
၄၃ “ဖဲတၢ်ဝံတၢ်နါတဒု ဟးထီၣ်လၢ ပှၤတဂၤအလိၤအခါ ဒ်သိးအကဃုဝဲ တၢ်အိၣ်ဘှံးအလီၢ်အဂီၢ် အလဲၤခီဂာ်ဘၣ်ဝဲ တၢ်လီၢ်ဃ့ထီတဖၣ်လီၤ. ဘၣ်ဆၣ် အဃုဝဲတဘၣ်ဘၣ်.+
၄၄ အဃိ အတဲဝဲလၢ ‘ယကက့ၤကဒါက့ၤလၢ ပှၤလၢ ယအိၣ်လၢအပူၤ လၢညါတဂၤအအိၣ်လီၤ.’ ဖဲအက့ၤတုၤအခါ အထံၣ်ဘၣ်ဝဲလၢ ပှၤတဂၤန့ၣ် လီၤဂာ်ဒ်သိးဒီး ဟံၣ်လၢအ အိၣ်ခီလီလီ ဒီးဘၣ်တၢ်ခွဲသိၣ်ခွဲပျီအီၤ ဒီးဘၣ်တၢ် မၤဃံမၤလၤထီၣ်အီၤလီၤ.
၄၅ ဒီးအလဲၤကိးန့ၢ်ဝဲ တၢ်ဝံတၢ်နါအဂၤနွံဒုလၢ အအၢဒိၣ်န့ၢ်ဒံးအီၤ ဒီးက့ၤနုာ်လီၤဝဲလၢ ပှၤတဂၤန့ၣ်အပူၤဝံၤဒီး အိၣ်ဝဲဖဲန့ၣ်လီၤ. ပှၤတဂၤန့ၣ် အတၢ်အိၣ်သး လၢအလီၢ်ခံကတၢၢ်န့ၣ် နးဒိၣ်န့ၢ်ဒံးလၢ အခီၣ်ထံးလီၤ.+ ဒ်န့ၣ်အသိး ပှၤအၢပှၤသီ တစိၤအံၤ တၢ်ကမၤအသးဒီးအဝဲသ့ၣ် ဒ်န့ၣ်စ့ၢ်ကီးလီၤ.”
၄၆ ဖဲယ့ၣ်ၡူးတဲတၢ်ဒီး ပှၤဂီၢ်မုၢ်ဒံးအခါ အမိၢ်ဒီး အဒီပုၢ်ဝဲၢ်ခွါတဖၣ်+ ဆၢထၢၣ်လၢတၢ်ချၢ ဒီးအဲၣ်ဒိးတဲတၢ်ဒီးအီၤလီၤ.+
၄၇ အဃိ ပှၤတဂၤ တဲဘၣ်ယ့ၣ်ၡူးလၢ “နမိၢ်ဒီး နဒီပုၢ်ဝဲၢ်ခွါတဖၣ် ဆၢထၢၣ်လၢတၢ်ချၢ ဒီးအဲၣ်ဒိးတဲတၢ်ဒီးနၤလီၤ.”
၄၈ ဒီးအဝဲတဲဆၢက့ၤ ပှၤတဂၤန့ၣ်လၢ “ယမိၢ် မ့ၢ်မတဂၤလဲၣ် ဒီးယဒီပုၢ်ဝဲၢ်ခွါ မ့ၢ်မတၤတဖၣ်လဲၣ်.”
၄၉ အဝဲယူာ်ဃီၤအစုလၢ အပျဲၢ်အဘီၣ်တဖၣ် အအိၣ်ဒီး တဲဝဲလၢ “အဝဲသ့ၣ် မ့ၢ်ဝဲယမိၢ် ဒီးယဒီပုၢ်ဝဲၢ်ခွါတဖၣ်လီၤ.+
၅၀ ပှၤလၢအမၤ ယပၢ်အိၣ်လၢမူခိၣ် အတၢ်ဘၣ်သးန့ၣ် မ့ၢ်ဝဲ ယဒီပုၢ်ဝဲၢ်မုၣ်, ယဒီပုၢ်ဝဲၢ်ခွါ ဒီးယမိၢ်လီၤ.”+
