ခီ​ဆူ​ ​တၢ်​ဂ့ၢ်​မိၢ်​ပှၢ်

ခီပတာ်ဆူ တၢ်အိၣ်လၢအပူၤ

ယ​ဟိ​ဝၤ​ပှၤ​အုၣ်​အ​သး​တ​ဖၣ်

ဃု​ထၢ​ကျိာ် ကညီ(စှီၤ)ကျိာ်

 တၢ်ဂ့ၢ်လၢ အဘၣ်ထွဲလိာ်သးဒီး လံာ်ကုခိၣ် | တၢ်ဃ့ဘါထုကဖၣ်န့ၣ် မ့ၢ်အဘျုးအိၣ်ဧါ

ဘၣ်မနုၤအဃိ ယွၤကွဲမုာ်ပှၤလၢ ပကဃ့ဘါထုကဖၣ် တၢ်ဆူအအိၣ်လဲၣ်

ဘၣ်မနုၤအဃိ ယွၤကွဲမုာ်ပှၤလၢ ပကဃ့ဘါထုကဖၣ် တၢ်ဆူအအိၣ်လဲၣ်

ယွၤကွဲမုာ်ပှၤ ဒ်သိးပကရ့လိာ်ပသး ဒီးအီၤလီၤ.

တံၤသကိးတဖၣ် ဆဲးကျိးလိာ်အသး ထီဘိအဃိ တၢ်အံၤဒုးအိၣ်ထီၣ် တၢ်ရ့လိာ်သး လၢအဂ့ၤလီၤ. ဒ်န့ၣ်အသိး ကစၢ်ယွၤစ့ၢ်ကီး ဒုးအိၣ်ထီၣ်ဝဲကျဲ ဒ်သိးပကကဲထီၣ် အတံၤသကိးအဂီၢ်လီၤ. လၢတၢ်န့ၣ်အဃိ အဝဲစံးဝဲလၢ– “သုကကိးထီၣ်ယၤ, ဒီးသုကလဲၤဘါထုကဖၣ်တၢ်လၢယၤ, ဒီးယကကနၣ်သုကလုၢ်လီၤ.” (ယံးရမံယၤ ၂၉:၁၂) လံာ်စီဆှံစံးဝဲလၢ “သုးဘူးသုသးဆူယွၤအအိၣ်တက့ၢ်, ဒီးကသုးဘူးအသးဆူသုအိၣ်လီၤ.” လၢတၢ်န့ၣ်အဃိ နသုးဘူးနသးဆူ ကစၢ်ယွၤအအိၣ်သ့ခီဖျိလၢ တၢ်ထုကဖၣ်န့ၣ်လီၤ. (ယၤကိာ် ၄:၈) လံာ်စီဆှံ ပာ်ဖျါထီၣ်စ့ၢ်ကီးလၢ– “ကယဲၢ်ပှၤလၢအကိးထီၣ်ယွၤ, ယွၤအိၣ်ဘူးဒီးအီၤလီၤ.” (စံးထီၣ်ပတြၢၤ ၁၄၅:၁၈) ထီဘိ ပမ့ၢ်ဃ့ဘါထုကဖၣ် တၢ်ဆူယွၤအအိၣ်န့ၣ် ပတၢ်ရ့လိာ်သးဒီးအီၤကဂ့ၤထီၣ်ဝဲလီၤ.

“ကယဲၢ်ပှၤလၢ အကိးထီၣ်ယွၤ, . . . ယွၤအိၣ်ဘူးဒီးအီၤလီၤ.” — စံးထီၣ်ပတြၢၤ ၁၄၅:၁၈

ယွၤအဲၣ်ဒိးမၤစၢၤနၤလီၤ.

ယ့ၣ်ရှူးစံးဝဲလၢ– “ပှၤကညီ မ့ၢ်အိၣ်လၢသုကျါ လၢအဖိခွါမ့ၢ် ဃ့ကိၣ်လၢအီၤဒီး, ကဟ့ၣ်အီၤလၢလၢၢ်န့ၣ် မ့ၢ်မတၤတဂၤလဲၣ်, ဒီးမ့ၢ်ဃ့ညၣ်တဘ့ၣ်ဒီး, ကဟ့ၣ်အီၤလၢဂုၢ်တဘိဧါ. မၤသးဒ်န့ၣ်ဒီး သုလၢအမ့ၢ်ပှၤအအၢတဖၣ်န့ၣ် မ့ၢ်သ့ၣ်ညါဟ့ၣ်သုဖိလၢ တၢ်ဟ့ၣ်အဂ့ၤဒီး, သုပၢ်အိၣ်လၢမူခိၣ်န့ၣ် ကဟ့ၣ်တၢ်ဂ့ၤလၢပှၤလၢအဃ့တၢ် လၢအီၤတဖၣ် အါန့ၢ်အန့ၣ်တက့ၢ် ဆံးဒိၣ်လဲၣ်.” (မးသဲ ၇:၉-၁၁) မ့ၢ်လီၤ, ယွၤကွဲမုာ်နၤ ဒ်သိးနကဃ့ဘါထုကဖၣ် တၢ်ဆူအအိၣ် မ့ၢ်လၢ– “အသးအိၣ်” နၤဒီးအဲၣ်ဒိးမၤစၢၤနၤ အဃိလီၤ. (၁ ပ့းတရူး ၅:၇) တကးဒံးဘၣ် ဖဲနအိၣ်ဒီးတၢ်ကီတၢ်ခဲတဖၣ် ဒၣ်လဲာ် ယွၤကွဲမုာ်နၤလၢ နကဃ့ဘါထုကဖၣ် တၢ်ဆူအအိၣ်လီၤ. လံာ်စီဆှံ ပာ်ဖျါထီၣ်န့ၢ်ပှၤလၢ– “သုတဘၣ်ယိၣ်တၢ် နီတမံၤတဂ့ၤ. မ့မ့ၢ် လၢတၢ်ကိးမံၤဒဲးန့ၣ် လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤ တၢ်အဘျုးအဖှိၣ်အပူၤန့ၣ်, ဘိးဘၣ်သ့ၣ်ညါယွၤလၢ သုတၢ်အဲၣ်ဒိးတဖၣ်န့ၣ်တက့ၢ်.”—ဖံလံးပံၤ ၄:၆.

ပှၤဟီၣ်ခိၣ်ဖိတဖၣ် လိၣ်ဘၣ်တၢ်မၤစၢၤလၢ နီၢ်သးတခီလီၤ.

ပှၤကူၣ်ဘၣ်ကူၣ်သ့ လၢအဃုသ့ၣ်ညါ ပှၤဟီၣ်ခိၣ်ဖိအဂ့ၢ်တဖၣ်န့ၣ် စံးဝဲလၢ ပှၤလၢအကကွဲၢ်တဖၣ်န့ၣ် တူၢ်ဘၣ်ဝဲလၢ ကဘၣ်ဃ့ဘါထုကဖၣ်တၢ်လီၤ. ပှၤလၢအတစူၢ် တနာ်ယွၤ ဒၣ်လဲာ်ပၣ်ဃုာ်ဝဲစ့ၢ်ကီးလီၤ. * တၢ်အံၤမ့ၢ် တၢ်အုၣ်အသးတခါလၢ ပှၤဟီၣ်ခိၣ်ဖိတဖၣ် လိၣ်ဘၣ်တၢ်မၤစၢၤလၢ နီၢ်သးတခီလီၤ. လၢတၢ်န့ၣ်အဃိ ယ့ၣ်ရှူးစံးဝဲလၢ– “ပှၤလၢတၢ်သၣ်ဝံၤအသး ဒီးတၢ်သူအသးလၢ တၢ်တီတၢ်လိၤတဖၣ်န့ၣ် ဘၣ်ဆိၣ်ဂ့ၤဝဲလီၤ.” (မးသဲ ၅:၆) ကျဲတဘိလၢ ပကမၤလၢပှဲၤ ပနီၢ်သး အတၢ်လိၣ်ဘၣ်တဖၣ်န့ၣ် မ့ၢ်ဝဲတၢ်ဃ့ဘါထုကဖၣ်တၢ်ဆူ ယွၤအအိၣ်ထီဘိန့ၣ်လီၤ.

ပမ့ၢ်တူၢ်လိာ် ယွၤအတၢ်ကွဲမုာ် လၢပကဃ့ဘါထုကဖၣ် တၢ်ဆူအအိၣ်န့ၣ် ပကဒိးန့ၢ်ဘၣ် တၢ်အဘျုးအဖှိၣ် မနုၤတမံၤလဲၣ်.

^ လံာ်အဆၢ. 8= ဖဲ ၂၀၁၂ န့ၣ် (Pew Reseach Centre) တၢ်ကရၢကရိ ဃုသ့ၣ်ညါဝဲလၢ ပှၤလၢအတနာ်ယွၤတဖၣ် အမျးကယၤ ၁၁ န့ၣ် ဃ့ဘါထုကဖၣ်တၢ် အစှၤကတၢၢ် တလါတဘျီန့ၣ်လီၤ.