အခီပညီ

ပှၤဒီမိၢ်ဝၤ လၢအမၤသကိးတၢ်န့ၣ်​ အလီၤဂာ် ဒ်သိးဒီး ပှၤနီကဘီယူၤ ဒီးအပှၤမၤစၢၤတၢ် လၢအအိၣ်ဒီး တၢ်တိာ်ပာ်တမံၤဃီ. ဖဲတၢ်ဂ့ၢ်ကီ အိၣ်ထီၣ်အခါ အဝဲသ့ၣ်​ ကွၢ်န့ၢ်တၢ်လၢ တဂၤဒီးတဂၤအဂီၢ် ဒီးတကွၢ်တၢ်ထဲ အနီၢ်ကစၢ်အဂီၢ်ဘၣ်.

လံာ်စီဆှံ အတၢ်ဟံးစုနဲၣ်ကျဲ– “အဝဲသ့ၣ်တမ့ၢ် ပှၤခံဂၤလၢၤဘၣ်. မ့ၢ်ဝဲတၢ်တမံၤဃီ.”—မးသဲ ၁၉:၆.

“တၢ်ဆီဟံၣ်ဆီဃီ ကအိၣ်ဒီး တၢ်သးခုအဂီၢ် တမ့ၢ်ထဲ ပှၤတဂၤ အမူဒါဘၣ်. ပှၤဒီမိၢ်ဝၤ ခံဂၤလၢာ် ကဘၣ်မၤသကိးတၢ်.”—ခရံာ်စတိဖၢၣ်.

ဘၣ်မနုၤအဃိ အရ့ဒိၣ်လဲၣ်

ဖဲတၢ်ဂ့ၢ်ကီ အိၣ်ထီၣ်အခါ ပှၤဒီမိၢ်ဝၤခံဂၤ လၢအတမၤသကိးတၢ်ဘၣ်န့ၣ်​ အဝဲသ့ၣ်​ ကပာ်ဒ့ၣ်ပာ်ကမၣ်လိာ်သး ဒီးတမၤဘၣ်ဂီၢ်က့ၤ တၢ်ဂ့ၢ်ကီဘၣ်. အဃိ တၢ်ဂ့ၢ်ဆံးဆံးဖိန့ၣ်​ ကဲထီၣ်က့ၤလၢ တၢ်ဂ့ၢ်ဖးဒိၣ်.

“တၢ်မၤသကိးတၢ်န့ၣ်​ အရ့ဒိၣ်လၢ တၢ်ဆီဟံၣ်ဆီဃီအဂီၢ်. ယၤဒီးယဝၤ မ့ၢ်တမၤသကိးတၢ်ဘၣ်န့ၣ်​ ပတလီၤဂာ် ဒ်သိးဒီး ပှၤဒီမိၢ်ဝၤဘၣ်. ပကလီၤဂာ်လၢ ပှၤဒီသကိးလၢ အအိၣ်ဟံၣ်တဖျၢၣ်ဃီ. ပမ့ၢ်လီၤဂာ် ဒ်န့ၣ်န့ၣ်​ ဖဲပဘၣ်ဆၢတဲာ် တၢ်လၢအရ့ဒိၣ်အခါ ကကီဒိၣ်မး.”—အဲးလဲစါဒြၤ.

တၢ်လၢနမၤသ့

သမံသမိးလီၤနသးဒ်အံၤ

• ကျိၣ်စ့တၢ်ဟဲနုာ် လၢယမၤန့ၢ်န့ၣ်​ မ့ၢ်ယထံၣ်အီၤဒ် “ယစ့ခဲလၢာ်” လီၤဧါ.

• ယမ့ၢ်အိၣ်ယံၤဒီး ယသးသမူတံၤသကိးမး ယကသးဖှံဧါ.

• ယသးသမူတံၤသကိး အဘူးအတံၢ် ဒီးအသကိးလၢ အရ့ဝဲဘူးဘူးန့ၣ်​ မ့ၢ်ယတအဲၣ်ဒိး ရ့ဒီးအဝဲသ့ၣ်ဘၣ်ဧါ.

တဲသကိးဒီး နသးသမူတံၤသကိး

• တၢ်လၢ ယၤဒီးယသးသမူတံၤသကိး မၤသကိးအီၤ သ့ဂ့ၤဂ့ၤန့ၣ်​ မ့ၢ်မနုၤလဲၣ်.

• တၢ်လၢ ယၤဒီးယသးသမူတံၤသကိး ကဘၣ်မၤဂ့ၤထီၣ်န့ၣ်​ မ့ၢ်မနုၤလဲၣ်.

• ဒ်သိး ပကအဲၣ်ဒိး မၤသကိးတၢ် အါထီၣ်အဂီၢ် ပကဘၣ်​ မၤဒ်လဲၣ်.

တၢ်ဟ့ၣ်ကူၣ်

• ထံၣ်တမှံကွၢ်လၢ ဖဲနၤဒီးနသးသမူတံၤသကိး လိာ်ကွဲထဲနံးအခါ ဒ်သိးသုတပြၢလိာ်သး တခီတဂၤတဂ့ၤ ဒီးသုကအိၣ်ဘၣ်​ တဖုဃီအဂီၢ် သုမၤမနုၤသ့လဲၣ်.

• ‘ယကမၤနၢၤတၢ်ဒ်လဲၣ်’ န့ၣ်​ တဘၣ်ဆိကမိၣ်တဂ့ၤ. ဆိကမိၣ်လၢ ‘ပဝဲခံဂၤ ကမၤနၢၤတၢ်ဒ်လဲၣ်.’

“မတဂၤဘၣ်လဲၣ်​ မတဂၤကမၣ်လဲၣ်န့ၣ်​ အရ့တဒိၣ်ဘၣ်. တၢ်လၢအရ့ဒိၣ်န့ၣ်​ မ့ၢ်ဝဲ တၢ်ဆီဟံၣ်ဆီဃီ ကအိၣ်ဒီး တၢ်ဃူတၢ်ဖိး ဒီးတၢ်မုာ်တၢ်ခုၣ်.”—အံသဲ.

လံာ်စီဆှံ အတၢ်ဟံးစုနဲၣ်ကျဲ– “တဘၣ်ကွၢ်လီၤထဲလၢ သုနီၢ်ကစၢ် အဘျုးတဂ့ၤ. ဆိကမိၣ်န့ၢ်တၢ်လၢ ပှၤဂၤအဂီၢ် စ့ၢ်ကီးတက့ၢ်.”—ဖံလံးပံၤ ၂:၃, ၄.