တၢ်ကူးလီၤ နီၢ်ကစၢ်ဖံးညၣ်န့ၣ်မ့ၢ်ဝဲ ပှၤသူတၢ်ပီးတၢ်လီ လၢအခိၣ်စူတမံၤမံၤ ဒ်သိးကမၤဆါလီၤ နီၢ်ကစၢ်သး. ဘၣ်ဆၣ် ပှၤမၤဆါလီၤ နီၢ်ကစၢ်သးန့ၣ် တမ့ၢ်ထဲ ပှၤကူးလီၤ နီၢ်ကစၢ်ဖံးညၣ်ဘၣ်. အပၣ်ဃုာ်စ့ၢ်ကီးဒီး ပှၤထိးလီၤအညၣ်ဒီး မ့ၣ်အူ, မၤဆါလီၤအသး တုၤအထီၣ်လုးထီၣ်လါ မ့တမ့ၢ် ဒိလီၤတီၢ်လီၤအသး. လၢတၢ်ဂ့ၢ်အံၤ ပကထံၣ်ဘၣ် လံာ်စီဆှံ အတၢ်ဟံးစုနဲၣ်ကျဲ ဘၣ်ဃးဒီး တၢ်ကူးလီၤ နီၢ်ကစၢ်ဖံးညၣ်. ဘၣ်ဆၣ် လံာ်စီဆှံ အတၢ်ဟံးစုနဲၣ်ကျဲ တဖၣ်အံၤန့ၣ် အဘၣ်ထွဲစ့ၢ်ကီးဒီး တၢ်မၤဆါလီၤ နီၢ်ကစၢ်သး ကိးကလုာ်ဒဲး.

 နဆိကမိၣ်ဒ်လဲၣ်– တၢ်ထံၣ်လၢအဖီလာ်အံၤ အဘၣ်ဧါ မ့တမ့ၢ် အကမၣ်ဧါ.

1.  ၁. ပှၤလၢအကူးလီၤ အနီၢ်ကစၢ်ဖံးညၣ်န့ၣ် အိၣ်ထဲဒၣ် ပှၤပိာ်မုၣ်.

2.  ၂. တၢ်ကူးလီၤ နီၢ်ကစၢ်ဖံးညၣ်န့ၣ် အထီဒါဒီး လံာ်စီဆှံ အတၢ်မၤလိာ် ဖဲ ၃ မိၤၡ့ ၁၉:၂၈ လၢအတဲဝဲလၢ ‘သုတဘၣ်ကူးလီၤ သုဖံးသုညၣ် တဂ့ၤ.’

 နဆိကမိၣ်ဒ်လဲၣ်–

 ဘၣ်မနုၤအဃိ ပှၤကူးလီၤ နီၢ်ကစၢ်ဖံးညၣ်လဲၣ်.

1.  ၁. ပှၤကူးလီၤ နီၢ်ကစၢ်ဖံးညၣ် ခီဖျိလၢ ပှၤအဲၣ်ဒိး မၤလီၤမၢ်ကွံာ် သးတၢ်တူၢ်ဘၣ် လၢအတမုာ်ဘၣ်.

2.  ၂. ပှၤကူးလီၤ နီၢ်ကစၢ်ဖံးညၣ် ခီဖျိလၢ ပှၤအဲၣ်ဒိး မၤသံလီၤနီၢ်ကစၢ်သး.

 ပှၤသးစၢ်တနီၤလၢ အကူးလီၤ နီၢ်ကစၢ်ဖံးညၣ်န့ၣ် အဝဲသ့ၣ် တဲဘၣ်ဃးဒီး တၢ်ဂ့ၢ်အံၤဒ်လဲၣ်.

 စံလံၤယး– “ယမ့ၢ်ကူးလီၤ ယဖံးယညၣ်န့ၣ် ယသးအတၢ်တူၢ်ဘၣ် ကိညၢ်ထီၣ်က့ၤ.”

 ထမါရၤ– “ဖဲယကူးလီၤ ယဖံးယညၣ်အခါ လီၤဂာ်ဒ်သိးဒီး ယပူၤဖျဲးထီၣ်လၢ ယသးတၢ်တူၢ်ဘၣ် လၢအဆါ. ယလိၤဆါန့ၣ် ယတူၢ်အီၤ ကဲဒိၣ်န့ၢ်ဒံး ယသးဆါ.”

 ခဲရံၤ– “ယသးအုးထီဘိအဃိ ယသးလီၤဘှံးညါ. ဘၣ်ဆၣ် ဖဲယကူးလီၤ ယဖံးယညၣ်အခါ ယသးစၢၢ်ဆၢလၢ တၢ်ဆါလၢယတူၢ်ဘၣ် လၢယလိၤအဃိ ယတဆိကမိၣ် ဘၣ်ဃးဒီး ယတၢ်သးအုး အဂ့ၢ်လၢၤဘၣ်.”

 ကၠၢၤရ့– “ဖဲယကူးလီၤ ယဖံးယညၣ် တဘျီဂ့ၤ တဘျီဂ့ၤအခါ ယတၢ်ကီတၢ်ခဲတဖၣ်န့ၣ် ယတဆိကမိၣ်အီၤ အါအါလၢၤဘၣ် ဒီးလီၤဂာ်ဒ်သိးဒီး ယသးမုာ်ထီၣ်က့ၤ.”

 ဒ်သိးနပတုာ်ကွံာ် တၢ်ကူးလီၤ နီၢ်ကစၢ်ဖံးညၣ် ကန့ၢ်အဂီၢ် နမ့ၢ်ဃ့ထုကဖၣ်လၢ ယဟိဝၤယွၤအအိၣ်န့ၣ် ကကဲထီၣ် တၢ်မၤစၢၤလၢနဂီၢ်. လံာ်စီဆှံ တဲဝဲလၢ “မ့ၢ်လၢ ကစၢ်ယွၤ သးအိၣ်သုအဃိ ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်တက့ၢ်.”​—၁ ပ့းတရူး ၅:၇.

 မၤကွၢ်ဒ်အံၤ– ဃ့ထုကဖၣ်ဖုၣ်ဖုၣ်ဖိ ဒီးတဲယဟိဝၤယွၤလၢ “ဝံသးစူၤ မၤစၢၤယၤမီၤ.” ဒီးနမ့ၢ်ဆဲးဃ့ထုကဖၣ် ထီဘိန့ၣ် လၢခံကယီကယီ နကသးအိၣ် တဲဖျါထီၣ် နတၢ်တူၢ်ဘၣ် ခဲလၢာ်လၢ “တၢ်မၤမုာ်ခဲလၢာ် အကစၢ်” အအိၣ်.—၂ ကရံၣ်သူး ၁:၃, ၄.

 ပဃ့ထုကဖၣ်န့ၣ် တမ့ၢ်ထဲလၢ ပသးကမုာ်ထီၣ်က့ၤ အဂီၢ်ဘၣ်. ဖဲပဃ့ထုကဖၣ်အခါ နီၢ်ကီၢ်န့ၣ် ပတဲတၢ်ဒီး ပပၢ်အိၣ်လၢမူခိၣ်. ဒီးအဝဲအၢၣ်လီၤပှၤလၢ “ယကမၤစၢၤသု သပှၢ်တၢၢ်လီၤ. ယကဖီၣ်ဃာ်သုဒီး ယစုထွဲလၢ အတီအလိၤ ကျၢၤကျၢၤလီၤ.”​—ယၡါယၤ ၄၁:၁၀.

 ပှၤအါဂၤလၢ အကူးလီၤ အနီၢ်ကစၢ်ဖံးညၣ်န့ၣ် အဝဲသ့ၣ် တဲသကိးတၢ်ဒီး အမိအပါ မ့တမ့ၢ် ပှၤသးပှၢ်လၢ အနာ်န့ၢ်ဝဲသ့ တဂၤဂၤအဃိ ကဲဘျုးလၢ အဝဲသ့ၣ်အဂီၢ်ဒိၣ်မး. ပကကွၢ်သကိး ပှၤသးစၢ်သၢဂၤလၢ အမၤဝဲဒ်န့ၣ်.