Kɔ o sɔɔŋ lebolloŋ sakpo

Kɔ o sɔɔŋ lebolloŋ sakpo

 SUƐI LEBOLLE O KƆƆ | LE YƐƐ NAŊ CHƆM YƐ SANDEI?

Tɔnɔ Cho o Sandei Chɔmndo Niŋndo

Tɔnɔ Cho o Sandei Chɔmndo Niŋndo

“Naa pila sina maa kɔlta naalaŋ la cho walaŋ naa Mɛlɛka waa tɛɛŋ, kani fuule, ŋ hɛnaŋ mi ŋ [chɔm sandei, NW] o nɛi o nɛi niŋ.”—Hibuluiya 13:​18.

O Baabuiyo niŋ, diom makilikii nda hivi lepum le “sandei” yo sim le nyɛ hiou ba a naŋɔɔ wo. O sim vɛlɛ le “nyɛ nɔ kaa o kaa nɔɔlɛi le wo.”

Kilisiɔŋnda nɔ ma che diomnda Mɛlɛka dimul kiilanɔɔ Pɔɔl le poonyiaalaŋ nyɛ sɔvɛ. Laŋ la cho ni, “Ŋ hɛnaŋ mi ŋ [chɔm sandei, NW] o nɛi o nɛi niŋ.” (Naapila piimiaa ndu diki diki ni.) Yɛɛ keŋ sim yɛ?

KAA WƆƆŊ NAŊ NƆ MIŊ CHƆULABA WO

Mi wanaa bɔɔbɔɔ mɛɛndaŋ fɛŋ ndapila idii o idii o tofaŋndo niŋ tuupa ma kuɛ waŋnda tɛɛŋ. Le yɛɛ? Kanifuule, a yeema mi waŋnda che nda nyɛkɛndɛi. Kɛ nyɛ pum cho o sɔvɛ mbo hiau sendi kɛndɔɔ nɔɔ ɔɔ nyɛla kɛndɛlaŋ wounɔŋndo. A tonya, kaa naŋ nɔ wo tosa miŋ naŋ ɔɔ miŋ wɔu nua.

Diom Mɛlɛkaa dimi kpendekele maa miŋ yiyaŋ le iwɔɔŋnde tosaa. Chɛnɛsee 8:​21 dimi aa, “Chɔŋ a wana chioo chuaambɔyɛi nduɛi bɛɛ, maa yiyaŋnda wɔɔŋndaŋ koni la huŋ ndu o kɔl ni.” Lelaŋ, tonya i cho ni maa ŋ nɔ miŋ chɔulaba yiyaŋnda wɔɔŋnda naŋ nɔ le hakioo tosaa laŋ. Mi kiilanɔɔ Pɔɔl tɛɛsiaa kpendekele mɛɛ ndu bɛɛ wa chɔulabaa le kiɔɔ hakioo tosaa yɛ. Mbo dimi aa, “I cho o chɛlaa . . . le nyɛ sawala Mɛlɛkalaŋ la dimi wo tosaa. Kɛ nduyɛ I saaluŋ maa nyɛ cheleŋ cho wallo o ya niŋ mbo wa sɔŋgɔɔ a sawa Mɛlɛkaa o kɔl nuu cho hoo o chɛlaa le tosaa wo. Nyɛ koŋ tosa ni mi I wa o biyɔɔ niŋ yeemɛi tosaa yɔŋ wɔɔŋ i cho o ya niŋ nde o ba bɛŋgu.”—Luomaŋnda 7:​22, 23.

Le tamaseliiyo, te kɔl naa wa pɛ naa nyindɔɔ le iwɔɔŋnde tosaa nduyɛ miŋ nɔ yeemɛi ikala kala le kafalaŋ tosaa, ŋ nɔ miŋ simnuŋ chiaa le nyɛ kɔl naa dimul naa wo le. Ŋ nɔ wɔ chuaŋ chuaa o hei niŋ. Te ŋ hɛli pɛ le yiyaŋ wɔɔŋndo kiɔɔ, ŋ nɔla miŋ chɔm sandei mi che bɛɛ naa niilu lakafaa balu naa silɔ.

Ŋ SƆLA BATIUWAA

I cho tonya maa ŋ yeema sawa dendu walaŋndo. Kɛ i cho suɛi imɔnɔ le chɔɔ maa wanaa bɔɔbɔɔ cho teleŋ ndaa soliŋndo kpeku tau le ‘chuɛiyɔŋ kɛndɔɔ’ mbo hiau yiyaŋndo mɛɛ kaa ndaa cho yɛ. Nduyɛ fulamakɔɔlioo cho ni, a chi maa i cho suɛi wɔɔŋ le kafalaŋ tosaa o sɔɔŋ pum niŋ te. Mi yauwo hoo, “The (Honest) Truth About Dishonesty” dimi aa, “O kpeekpei niŋ, miŋ tosa kafalaŋ, kɛ ŋ chɛl mi bɛɛle naalaŋ le fula o baa niŋ te. Nduyɛ miŋ nɔ laalaŋndo maa ŋ sandu.” Kɛ, baa nyɛ cho pa o mala naa le kɛɛsiaa tosaa a mɛɛ kpɛ naŋ nɔ miŋ tosa kafalaŋ yɛ? Ŋ naŋ kɔl le sinaa maa nyɛ cho.

Waŋnda o miiliɔŋndaŋ niŋ chieeŋndo balɔɔ silɔ saaluŋ maa Baabuiyo cho nda malaa a hei okɔɔ. Baabuiyo nɔ sawala diandaa laŋ, nduyɛ wana tuu laŋ a nyɛ o nyɛ le. (Sam 19:​7) Baabuiyo ke naa nɛi chɔmaa sɔviɔɔ a yoomu leyuŋgoo okɔɔ, wali suu naŋ nɔ miŋ tosa wo, kaa suu naŋ nɔ miŋ tol kɔɔli wo, nduyɛ a mɛɛ wana looku kaa iMɛlɛkayaa nɔ yɛ. Nyɛ o nyɛ cho ma tuu ndu a Baabuiyo le. Sawalaŋ a sawala mandaala ndɔlaŋ la cho le wanaa suu o suu, a lekaa o  lekaa. Te ŋ yaasiaa pɛ Baabuiyo nyɛkɛndɛi, miŋ yiyaŋ o nyɛ o dimi wo choo, nduyɛ miŋ tol sila ndɔɔ kɔɔli, o nɔla mbo pɛɛku naa le miŋ chɔm sandei, nduyɛ miŋ wa sakpo.

Tau cho le tosaa o niilu lakafaa chɔulabaa niŋ mbo hiau kɔlkalu Baabuiyo nɔɔ nyɛkɛndɛi. O fulawɔ okoŋ kɔɔli, o chieeŋ nɔ kaa nɔɔlɛiyo wo niŋ naŋ cho ni, o cho naa kindilaa le kaala ndɔla nɔɔlɛilaŋ chɛlɔɔ wo. Lelaŋ, ŋ nɔ miŋ piɛi Mɛlɛka le mbo mala naa. (Filipiaŋnda 4:​6, 7, 13) Te ŋ tosa hei pɛ, ŋ nɔla miŋ sim a kɔllo sikpa le nyɛ cho o kɛndɔɔ wo nduyɛ miŋ chɔm sandei o nɛi o nɛi niŋ.

TƆNƆLA SANDEI CHƆMNDO KE NAA LAŊ

Mi Hitoshi naŋ soo a ndu okɔɔ o buŋgɛi tasei niŋndo sɔla tɔnɔɔ le sandii o wa chɔmndo o wali ndɔɔ niŋndo. O cho niŋ wallo tosaa le wana hɛnaŋ a sandii nduɛi yo. Mi Hitoshi dimi aa, “I mel Mɛlɛka balikaa le wali ke ya kɔl iyama walaŋndo wo sɔlaa.”

Wanaa cheleŋnda bɛɛ che maa tonya Hitoshi dimi ni. Ŋ soonuŋndɔ a tɔnɔla wanaa tol sawala mandaala Baabuiyo kɔɔli le ‘sandei chɔmndo o nɛi o nɛi’ niŋndo okɔɔ.

  • Kɔl Iyama Walaŋndo

    “Mɛɛ ya wa wɔsilaŋ 13, mi fulaŋ o sukuu le wallo tosaa a wiiya. I dimi maa o wiileŋ niŋ ya wa nyɛ ni sɔlaa kpou sɔlaa ni. Okoŋ kɔɔli, mi chal o nɔɔ. Nduyɛ mi naa pɔnɔ nuu kandu Baabuiyo pɛɛkoo a Seiyaa Chɛhowaa. Miŋ pɛɛku maa Chɛhowa * tul niilu lewiiyo leyɛ. Nduyɛ miŋ kɛɛsiaa le yoomu naa siŋgaa. O wɔsi 1990 ve niŋ, miŋ yɔŋgu yoomula naalaŋ o Chɛhowa lo nduyɛ miŋ sɔla yiŋɔɔ maa Seiyaa Chɛhowaa.”—Pulɔwaa 6:​16-19.

    “O paandoo niŋ, chiɛi nuu wa o piaa cha a nyɛm lewiiyoŋ. Kɛ nyɔɔŋ muŋ cho lɛ o yalo chiɛiniŋ suŋsuŋ te. Nduyɛ hei ke ya kɔl iyama walaŋndo. Te I yiyaŋ pɛ a wɔsila bɔɔbɔɔ ya chua o niilu lakafaa niŋndo, I mel Chɛhowa balikaa le nyɛiyii nduɛi bɛnduii o tuinuŋ ya ve. Te I wa pɛ luaŋ ichɔl, mi kɔllo nyulul la fɛɛ le mɛɛ ya sina maa Chɛhowa hini niŋ kɔl a ya yɛ.”—Shɛlil, Aililaŋ.

    “Mɛɛ wana ni bɛndoo che maa mi kɛɛ luɛiyɔɔ niŋndo wana ndoo yeema yulaleŋ tosaa a naa wo o ba, mbo dimul la aa, ‘Mɛlɛka numndo tosa num ma wa wana sandaa! I cho bɔɔ sala bɛndu le num nɔɔ o fondaŋ naa baalaa.’ Sandei chɔmndo o nɛi o nɛi niŋ mala ya le kɔl iyama walaŋndo nɔɔ Chɛhowa Mɛlɛka o hɔl. Hei cho tosaa le mi mala yuŋgu nuu a wanaa cheleŋnda le mi nda bɛɛ chɔm sandei.”—Soni, Hɔŋ Kɔŋ.

  • A Sɔla Kɔl Nyuloo

    “I cho wallo wana bɛndoo ikɛi o chiɛi nda kɛsi nyɛsɔlaa le lɛŋii bɔɔbɔɔ ve. Ma nyindu sandei ikɛi o fonda ni baalaa hoo le sullo chɔ chɔ. Mi wanaa bɔɔbɔɔ dimi aa, ‘I cho suɛi wɔɔŋ le kafalaŋ tosaa nyɛɛmbɔ le sullo ɔɔ le pɛŋnde nyɛsɔlaa solioo le.’ Kɛ sandei chɔmndo ke ya kɔl nyuloo. I kɛɛsiaa le hiouwɔɔ lachi a sandei chɔmndo mɛɛ mɛɛ la wa. Nduyɛ wanaa chua ya le baalaa wa sina maa I dimul nda lachoo, ɔɔ mi dimi choolaŋ le nda le.”—Tɔm, Amɛlika.

  • Bɛɛle Numpila Leŋ

    “Mi wana ni banaa dɛɛniaa ya le choolaŋ dimioo le nyɛm nda chiimbuu o naa niaa baalaa wa, kɛ mi kɛɛ kpoŋ. Mɛɛ nda saaluŋ wiyaa chiimbuu nyɛm muŋ nda, mi wana chua ya le baalaa wo yil la nuwalioo le mɛɛ ya sandu yɛ. Kɔl sikpaa yeemaŋ le sandei chɔmndo o chieeŋ lakafaa hoo niŋ. Kɛ o mɛɛlulaŋ kpɔŋ, mi wanaa cheleŋnda duau laalaŋndo o naa niŋ, nduyɛ ma ke naa bɛɛleŋ.”—Kaoli, Chepaŋ.

Kɔl iyama walaŋndo, kɔl nyuloo, a bɛɛle numpila leŋ cho tɔnɔla sɔvɛla ŋ sɔla le sandei chɔmndo wo ni. Baa a chɛl pa maa tonya hei cho ni?

^ pɛl 18 Mɛlɛka nɔ diolaŋ ni aa Chɛhowa, a mɛɛ Baabuiyo chɔm yɛ.