Kɔ o sɔɔŋ lebolloŋ sakpo

Kɔ o sɔɔŋ lebolloŋ sakpo

 BUŊGƐI 11

A Poonyiaa a Chiisu Okɔɔ

A Poonyiaa a Chiisu Okɔɔ

A cho pa puaa haa chɔɔ o fotueiyo niŋ?— Diola nda laŋ aa, Maatiu, Maki, Luku, Chɔŋ, Pitɛ, Chemisi, Chiud, a Pɔɔl. Nda kpou wa achal teleŋ Chiisu wa o lɛŋndeŋ choo wo nduyɛ, ma poonyiaa a ndu okɔɔ. Ŋ chɔɔluwɔ pɛɛku a nda okɔɔ.

Yɛɛ ŋ sina yɛ a puaa haa okɔɔ?

Wanaa poonyiaa haa a Chiisu okɔɔ wa, kiilaa wa nda tɛɛŋ a yaa a dimi yooŋgu kɛndɔɔ a ndu latulu wa. Nɛɛ yaa cho yɛ Kiilaa haa?— Nda cho, Maatiu, Chɔŋ, a Pitɛ ni. Kiilanɔɔ Maatiu a Chɔŋ, ma sina Chiisu nyɛkɛndɛi nduyɛ, mi o kɛ kɛ poonyiaa yauwo a yoomu Chiisu  wo okɔɔ. Kiilanɔɔ Chɔŋ bɛɛ, mbo poonyiaa yauwo o Baabuiyo niŋ. Ndu cho Sɔɔŋ Chɔɔmaŋndoŋ ni a yaula pɔmbɔlaŋ la yaa. Laŋ la cho ni, Chɔŋ Tasoo, Chɔŋ Diiŋ Ndɔɔ, a Chɔŋ Ŋgaa Ndɔɔ. Mi kiilanɔɔ Pitɛ poonyiaa yaulaŋ la tiɔɔŋ o Baabuiyo niŋ. Laŋ la cho Pitɛ Tasoo a Pitɛ Diiŋ Ndɔɔ ni. O yau ndɔ diiŋ ndɔɔ niŋ, mbo poonyiaa a teleŋ Chɛhowa soo o choo choo niŋ a Chiisu okɔɔ wo aa, ‘Po ni kaalaa cho hoo ni. I hini kɔl a ndu tau.’

Puaa a piliaa o fotueiyo niŋ bɛɛ pɛɛku naa a Chiisu okɔɔ o yaula nda poonyiaa laŋ niŋ. O pilɛ wa Maki ni. Wana che pɛ maa o wa o foofo a teleŋ nda bii Chiisu wo nduyɛ, mbo cha nyɛ o nyɛ yɔŋnuŋ. O pilɔɔ wa Luku ni. Ndu wana chiɔuwaa o wa ni. Naapum, o piɔm Chiisu wo kɔɔli o simnuŋ Kilisiɔŋnɔɔ ni.

Pɔmbuaa Chiisu wa a ŋiɔɔŋ cho o fotueiyo niŋ o wanaa poonyiaa Baabuiyo wa tɛɛŋ. A sina pa nda diolaŋ?— Diola nda laŋ la cho Chemisi a Chiud ni. O kandɔŋndo, ndaa laalaŋ o Chiisu niŋ te. Ma yiyaŋ pɛŋ maa wana seemɛiyo Chiisu cho ni. Kɛ o mɛɛlulaŋ, ma laalaŋ o Chiisu niŋ ma simnuŋ Kilisiɔŋnda.

Pɔɔl cho o fotueiyo hoo niŋ. Ndu mɛɛlu poonyiaa a yoomu Chiisu wo okɔɔ ni. Tuupa mbo simnuŋ Kilisiɔŋnɔɔ, diola ndɔlaŋ la wa Sɔɔl ni. Mbo tul Kilisiɔŋnda leyɛ nduyɛ dɛnɛ wɔɔŋndo pila ndoo tasal nda ni. A sina pa nyɛ tosa mi Pɔɔl yeema simnɔŋndo Kilisiɔŋnɔɔ wo?— Paale pilɛ, Pɔɔl wa kɔlaŋ o nɛi le fuuluu wo Damasikɔɔ chiee, o le pilɛ niŋ kpe, mbo tuɛi waŋndo suɛi naa ndu cha o choo choo niŋ. Chiisu wa suɛi ni! Mbo nyuna Pɔɔl aa, ‘Le yɛɛ ŋ cho yɛ wanaa laalaŋ o ya niŋnda dɛnɛ wɔɔŋndo tosallo?’ Mɛɛ keŋ hiou, mi Pɔɔl siŋgaŋ mbo simnuŋ Kilisiɔŋnɔɔ. Yaulaŋ 14 Pɔɔl poonyiaa o Baabuiyo niŋ ni. Chɔŋ o Luomaŋndaŋ mbo kɔ bii o Hibuluiya.

Paale o paale, miŋ nua o Baabuiyo niŋ lende le?— Te ŋ nua pɛ o Baabuiyo niŋ, miŋ pɛɛku tau a Chiisu okɔɔ. A yeema pa ma chɔɔlu pɛɛku a Chiisu okɔɔ?—