Kɔ o sɔɔŋ lebolloŋ sakpo

Kɔ o sɔɔŋ lebolloŋ sakpo

 BUŊGƐI 5

Chaaŋaa Mɛlɛkaa Cho Wa Achal o Kpele Hɛnɛkiɔɔ Niŋ

Chaaŋaa Mɛlɛkaa Cho Wa Achal o Kpele Hɛnɛkiɔɔ Niŋ

Kpele Hɛnɛkiɔɔ ve niŋ maa chieeŋ naŋ cho hau niŋndo le. Mɛlɛka ndoo yeema kposoŋ mi kpundɛlaŋ, mɔnɛi, nyɛ nɛiyaa a nyɛ palaa wa o lɛŋndeŋ choo le. O chilaŋ niŋ, Mɛlɛka cho hunɔɔ leŋndeŋ tosa kpele hɛnɛkiɔɔ. Vɛɛ Kpele Hɛnɛkiɔɔ wa yɛ niŋ? Ŋ tofawɔ nyɛ Baabuiyo dimi wo:

Wanaa kɛndiaa. Kpele Hɛnɛkiɔɔ cho wa chaltaŋ le chaaŋaa Mɛlɛkaa. A cho wa sɔɔŋ kɛndɔŋ tosaa le opilɛ a o cheleŋndo. A cho wa achal o nɛila sakpo la Mɛlɛkalaŋ choo.—Pulɔwaa 2:​21.

Nyɛdiaa hɔbɛiyo. O Kpele Hɛnɛkiɔɔ niŋ, yima cho wa le. Baabuiyo dimi aa, ‘Nyɛdiaa wa niŋ tau tau o lɛŋndeŋ’ choo.—Sam 72:​16.

Chiɛila kɛndɛlaŋ a walta kɛndɛlaŋ. O Kpele Hɛnɛkiɔɔ niŋ o lɛŋndeŋ choo, yuŋgu kɛ kɛ nɔ niŋ chiɛi kɛndɔɔ. Wana o wana tosa niŋ wali chuu ndu niŋ nyaale kpeekpeiyo wo.—Aisaya 65:​21-23.

 Kɔl nyuloo cho wa o chieeŋndo choo kpede. Waŋchieeya chɔulaba lɛ niŋ, nduyɛ ma vi o chɔu niŋ te. Mi Diom Mɛlɛkaa dimi aa, “[Mɛlɛka cho] tosa mi chɔulaŋ la chuu.”—Sam 46:​8, 9.

Kɛndiaa kɛndɔɔ. Baabuiyo mɛi diomndeŋ aa, “Waŋndo bɛɛ dimi niŋ [o Kpele Hɛnɛkiɔɔ niŋ] maa nyɛ waa nuaa o cho ndu nɛi le.” (Aisaiya 33:​24) Vɛlɛ, bɛva cho lɛ wa le, kɛlɛŋgaa sumaa, kɛlɛŋgaa nila baŋulɛilaŋ, kɛlɛŋgaa bobuaa.—Aisaiya 35:​5, 6.

Nyɛ nɛiyaa, mɔnɛi, vɛlɛ a piɔmndo cho chuwɔɔ. Diom Mɛlɛkaa dimi aa, “Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa, kanifuule, nyɛ o nyɛ paandu chuu faŋaŋ.”—Sɔɔŋ Chɔɔmaŋndoŋ 21:​4.

Wanaa dɛnɛ wɔɔŋnda cho hunɔɔ faŋaŋ. Chɛhowa mɛi le diom maa, “Wanaa dɛnɛ wɔɔŋnda kinɛi, a cho nda hunɔɔ faŋa o lɛŋndeŋ ndeŋ niŋ bau. Wanaa yɔŋ wɔɔŋnda kinɛi, a cho nda hunɔɔ tɛɛmbuu kpou.”—Pulɔwaa 2:​22.

Waŋchieeya nɔ niŋ kaalaa a bɛɛleŋ le opilɛ a o cheleŋndo. Kafala ve lɛ niŋ kposoŋ te, nyɛ kindilaa, hɔlteŋ, vɛlɛ a yaamɔɔleŋ. Waŋnda cho wa o diompilɔɔ niŋ nduyɛ a cho wa sakpo o nɛila Mɛlɛkalaŋ choo.—Aisaya 26:​9.