Kɔ o sɔɔŋ lebolloŋ sakpo

Kɔ o sɔɔŋ lebolloŋ sakpo

 BUNDƐI 84

Kiilanɔ Mɛlɛkaa Hiŋ Naa Meele Cha

Kiilanɔ Mɛlɛkaa Hiŋ Naa Meele Cha

CHUAA hoo naŋ bɔɔ. Meele cho hoo ni. Isɔluɛinɔɔ o cho ni. Nduyɛ, Naasaluɛi chiee o wa ichali ni. Mɛlɛka sina maa wana kɛndɔɔ o cho ni. Le sabu koŋ o vem kiilanɔ ndɔɔ naa ndu cha ni. Diola kiilanɔɔ hoo la cho Kebilɛl ni. A sina nyɛ Kebilɛl hiŋ Meele dimullo wo? Ŋ tofaŋndɔ.

Mɛɛ Kebilɛl hiŋ, mbo yil ndu aa: ‘Isɛ chuaa, num Mɛlɛka che hoo nyina wo. Jɛhowa cho a num latulu.’ Kani bɛɛ Meele chi wɔ wana suu waa naa le. Le hei, mbo saa kɔllo keelaa kanifuule o sina yilɔɔ suu cho hoo wo le. Mɛɛ mi Kebilɛl dimul ndu chɔ chɔ maa kɔndɔfili bii ndu le.

Mɛɛ mi kiilanɔ Mɛlɛkaa dimul ndu aa: ‘Yɔŋ isiooŋ te Meele, Jɛhowa hini kɔl a num tau. Le saboo hoo, o cho num suɛi kɔndɔfille tosal. A cho suŋ hunɔɔ poo violɔɔ ma ke ndu diolaŋ aa Chiisu.’

Mi Kebilɛl hiau lachi a ndu tɛɛsiallo aa: ‘Chɛlɛkpɔɔ hoo wa niŋ wana bɛndu, nduyɛ a veelu ndu niŋ aa Po Mɛlɛka Bɛndoo. Jɛhowa siiŋguu ndu niŋ masa o foofo Deeve finya ndɔ mamaa. Kɛ Chiisu wa niŋ masaa lefafɛɛŋ. Nduyɛ, masaleŋ ndɔleŋ le nɔ niŋ lamɛɛlu le.’

Mi Meele mulul ndu aa: ‘I chellɔ o nɔ le, nduyɛ I sina wɔ suɛi wana pɔnɔ le. Vɛɛ ya looku yɛ niŋ violɔɔ nɛ?’

Okoŋ mi Kebilɛl mulul ndu aa: ‘Kpaaya Mɛlɛkaa cho num wa choo. Le sabu koŋ, chɛlɛkpɛ ŋ cho violɔɔ wo sɔla niŋ veelɔŋndo ni aa Po Mɛlɛkaa.’ Mbo hiau lachi a Meele dimullo aa: ‘Sina pɛŋgu maa wanayɛi numnde Lisabɛɛ o ndaa dimi maa o vilu loo, o cho bɛɛ o yuwɛi ni, o cho a yollo. O cho suŋ hunɔɔ poo violɔɔ. Nyɛ o nyɛ cho mi Mɛlɛka bumba tosa le.’

Mi Meele dimi aa: ‘Buɛi Jɛhowaa ya cho ni. I yɔŋnuŋ mɛɛ ŋ dimi yɛ fɔ.’ Okoŋ kɔɔli, mi kiilanɔ Mɛlɛkaa kuaŋnuŋ.

Mɛɛ o kuɛŋnuŋ, mi Meele bɛɛndiaŋ mbo bii nɛiyo chɔ chɔ le kɔlaŋ o Lisabɛɛ lo. Mɛɛ Lisabɛɛ tuei Meele diomndo, mi chɛlɛkpɔɔ ndu o dembe kpeeŋiaŋ a nyaaloo. Mi nyina diandaa Mɛlɛkaa tual Lisabɛɛ choo, mbo dimi choo choo aa: ‘Num Meele, Mɛlɛka dɔu num sala mbo hiau waŋ laanduaa kpou.’ Mi Meele chua paŋgoŋ ŋgaa nda Lisabɛɛ. Okoŋ, mbo miiŋguŋ o ndulo Naasaluɛi.

Meele nda Choosɛ aa chii niŋ chɛlaŋ le challe o nɔɔ niŋ. Kɛ mɛɛ Choosɛ sina maa Meele cho a yollo, mbo kɛɛsiaa le mbo soli balaŋ o suɛi nduɛi niŋ yɛlɛŋ. Kɛ mi kiilanɔ Mɛlɛkaa dimul ndu o lɔmasɔlaŋ niŋ aa: ‘Choosɛ, kiisaŋ le Meele chuaa o nɔɔ niŋ te. Kanifondole, o sabu nyina Mɛlɛkaa niŋ o chua yol o nɔ koŋ ndo ni.’ Mɛɛ mi Meele nda Choosɛ chal niko o nɔɔ niŋ. Okoŋ, ma chal chumndo le mi Chiisu veluŋ.