Kɔ o sɔɔŋ lebolloŋ sakpo

Kɔ o sɔɔŋ lebolloŋ sakpo

 BUNDƐI 32

Kpundɛla 10

Kpundɛla 10

NUAWƆ niko fotueilaŋ ndaŋ naŋ. O kɛ kɛ fee cho naa chɔmndo a kpundɛla Jɛhowa tuisi Ichipi choo laŋ. Nuawɔ bɛɛ Eelɔŋ Pioo Nail lɔɔ a tindaa o fotuei tasoo hoo niŋ. Mɛɛ o lɔɔ, mi mɛŋndaŋ kpou o peelo ma simnuŋ koowaŋ. Suwaa wa o pee kalaa niŋnda bɛɛ kpou ma wu. Mi mɛŋndaŋ ma fula chuŋ siouwo.

Okoŋ kɔɔli, mi Jɛhowa tosa mi chokaachuaa fula Pioo Nail a hɔbɛi. Ma tiu ba ba fee. Naa luamaa beediiya ni, hɛŋgɛila luamaa beediilaŋ ni, o kpelela waŋnda choo ni, mbɔ ba ba fee a wa. Mɛɛ chokaachuaa haa vi, mi Ichiptiaŋnda diu diu nda bembela bɛndaŋ. Mi lɛŋndeŋ kpou le fula chuŋ siouwo fuŋ.

Mɛɛ koŋ hiou, mi Eelɔŋ boŋa lɛŋndeŋ a tindaa. Mi chundoo kpou simnuŋ tiliaa. Tiliaa yɛ kiolɔɔ pila nda kial ni. Kpundɛ yaandɔɔ Ichipi choo wa hoo ni.

Kpundɛla lo niŋ kɔɔli le yɔŋnɔŋndo laŋ, Ichiptiaŋnda koni la cho paaliaŋ ni. La cho lɛ nda pala latulu nda Isɔluɛitiiya le. Peŋgiaa bɛnduaa wa kpundɛ hiɔɔlundɔɔ ni. O chiɛila Ichiptiaŋnda niŋ kpede, mi peŋgiaa bɛnduaa haa pia doŋgo doŋgo. Chɔluaa Ichiptiaŋnda choo kpundɛ ŋuɛɛnoo del ni. Mi nauwaa ndaa, saa ndaa, a chuiŋaa ndaa wu tau.

Mɛɛ koŋ hiou, mi Muuse nda Eelɔŋ kuandu pultaŋ nyɛɛmbɔ, mɛɛ nda wuu laŋ choo choo, mi pauve deli waŋnda lekɔɔ a visiaa ndaa. Kpundɛ ŋɔmpumndɔɔ wa hoo ni.

Mi Muuse muliŋ vɛlɛ mbo siɛndi baa choo choo, okoŋ mi Jɛhowa yɔŋ taŋndaŋ a looŋ kpuŋgbaŋ Ichipi choo. Kani mi Ichipi wa, looŋ kpuŋgbaŋ waa lende hiŋndɔ loŋ maa muŋ te. Kpundɛ ŋɔmmɛundɔɔ wa hoo ni.

Soonuaa wa kpundɛ ŋɔmaandɔɔ ni. Ŋsoonɔ ni! Chɔŋ a boondii Ichipi kilaŋnde mbo huŋ bii a hau, soonuaa hiŋ ndɔ loŋ maa kaŋ te. Nyɛ o nyɛ pɔmbɔ looŋ kpuŋgbaŋ mɛi, ma dia paku.

Nyumndaŋ ma wa kpundɛ ŋɔmahiɔɔ lundɔɔ ni. Palɛi iyaa lɛŋndeŋ kpou le wa o nyumndaŋ niŋ kpiŋgbi. Kɛ nyɛ wawoŋndo wa kpeŋgii Isɔluɛitiiya.

O mɛɛlulaŋ kpɔŋ, mi Mɛlɛka dimul wanaa nduaa le ma dii saa te koŋ te chuiŋ fɔŋndɔɔ ma chua kooma maŋ ma sui o dio choo. Mi maalikɛinɔ Mɛlɛkaa huŋ keekoo Ichipi choo. Chiɛi o chiɛi o che koowaŋ ma suiyaŋ, o dii wana o wana loŋ te. Kɛ chiɛi o chiɛi o chi koowaŋ ma suiyaŋ te, mi maalikɛinɔ Mɛlɛkaa hoo diu diu nyɛ o nyɛ nda dimi aa chua tasoo, chɔŋ o ŋwaŋ chiee, mbo huŋ bii a visi o visi paku. Kpundɛ tɔndɔɔ wa hoo ni.

Mɛɛ kpundɛ mɛɛlaa hoo hiou fokpi, mi Felo dimul Isɔluɛitiiya le ma mal chioo. Wanaa Mɛlɛkaa wa niŋ a bɛɛndiaŋ le kɔndaŋ. Nduyɛ nyumma maŋ kpeekpei nda fula Ichipi ni.