OLƐŊNDE mɛŋma Mɛditalueeniaŋ ndaŋ ma balu leŋ niŋ Panayota sul ni. Teleŋ o wa chuaambɔ feleŋgɔnɔ wo, ndoo yeema bɔɔ a sɔɔŋ lemasaŋ chieeŋndo hoo. Nduyɛ ma chua ndu maa wana poonyiaa le kunda wanaa ndaa luei balaŋ o sɔɔŋ lemasaŋ niŋ o sɔndɔkɔlɔ o wa wo. Mi kuɛ pɛŋ chiɛiyo a chiɛiyo le chuuŋgiaa biyɔɔ le kunda koŋ. Kɛ mɛɛ wɔsioŋ ŋpum hiou, mi Panayota tambul kɔl. Mi hɛliaŋ lekaawo, chɔulaba lafoofoo, sɛɛŋgiaŋndaŋ, a paŋaliaŋndo piɔl bosi nda tɛɛŋ mi che bɛɛ a wa chɔmndo maa chaŋyɛi cho nda tɛɛŋ.

O lɛŋnde Aililaŋndeŋ niŋ Daaniɛɛ sul ni, o yuŋgu ndoo hɛnaŋ a kaŋndeŋ tau wo niŋ. Kɛ mi kɔllo tambu ndu te o yiyaŋ pɛ a sondo yeelɛi simlachiaa lekaaŋnda ndaa nɔ wo. A wa muɛiyaŋ kolɔɔ bɛɛtambɛiyo, pisultaŋ tosaa o kanioŋ choo, a kaniŋ waŋnda ndaa chuuŋgiaa woŋ chiimboo. A wa kaalaŋ ndaŋ tosaa ma wa Daaniɛɛ pɛɛkoo maa wanaa lahakiaa cho ŋɔ o yiŋndeŋ niŋ.

Wanaa ndaa nɔ dɛndɛla kua o mɛŋndaŋ choo a yulaleŋ o lɛŋii cheleŋnde niŋnda wa o lɛŋnde Amɛlika a Bilitiŋndeŋ niŋ. Nduyɛ mi Chɛfili tosa yulaleŋ le wɔsila bɔɔbɔɔ le waŋnda haa. Chɛfili loonuŋndɔ maa mi wanaa piandaa a yulaa ndaa tosa sondo yeelɛiyo o masaa waa lo. Mi ndaa tosa sondo yeelɛi suu o suu le mi masaa waa chɛl nda le yulale ndaleŋ tosaa.

I cho suɛi kɔl tambɛi le sinaa maa o cho ko sɔɔŋ lakafaŋ naŋ chɔm muŋ ndoŋ te yɔŋnuŋ te. Waŋchieeya cho hau sondo yeelɛiyo tosaa ba o ba fee. Sondo yeelɛiyo cho hau o sɔɔŋ lemasaŋ niŋ, kaŋndeŋ, a yulaleŋ. O kpeekpei niŋ, diomndo hoo “sondo yeelɛiyo” fula o diom maKilikiiyo niŋ. Nduyɛ diomndo hoo sim le wanaa siŋga hɔlaa ndaa le pisultaŋ tosaa o biŋndo choo wa. O teleŋndo opum niŋ, mi diomndo hoo sim le wana o wana tosa sondo yeelɛiyo le wanaa cheleŋnda huiyo le nyɛm nda yeema woŋ sɔlaa.

Mi wanaa nda tosal sondo yeelɛiyo wa tuulu kɔl, nduyɛ ma dɔunuŋ tumbe tau. Ma bii vɛlɛ wanaa tosal nda sondo yeelɛiyo wa o kɔl. Mi wanaa hei piiliaŋnda dimi lepum a kɔl tambɛiyo aa, “Sondo yeelɛiyo! O chuu niŋ pa?” Ŋ naŋ kɔl le sinaa maa Diom Mɛlɛkaa ke naa sabulaŋ le laalaŋndo maa sondo yeelɛiyo cho chuwɔɔ.

VƐƐ MƐLƐKA NDA PO NDƆƆ CHE YƐ SONDO YEELƐIYO?

Baabuiyo chɔm maa o cho waŋchieeya le kandu sondo yeelɛiyo le, kɛ nyɛ yoomaa toosiaŋ o inyinaya wo kandu ndu ni. O bundɛi waŋchieeya kandɔŋndo niŋ, mi Setana Nyina Wɔɔŋndo soliŋ kɛuwo kpeku le suɛi maa wanachiee le wana lanɔ tasoo, Ifi huiyo. (Chɛnɛsee 3:1-5) Chɔŋ a teleŋ koŋ, waŋchieeya bɔɔbɔɔ cho balaŋ lueiyo o sondo yeelɛiyo niŋ. Nduyɛ a cho acheleŋnda huiyo le sɔlaa nyɛm nda yeema woŋ.

Mɛɛ kaaleŋ Isɔluɛi del sindɛ o yaŋɔɔle piɛile lachoowaleŋ niŋ a sondo yeelɛiyo o Mɛlɛka piɛiyo niŋ, mi Mɛlɛka sila nda daandi daandi a fulamakɔɔli wɔɔŋ nda cho sɔla wo okɔɔ. Mi Mɛlɛka dimul Aisaya  aa, “Waŋnda haa a dimi a sondala ndalaŋ maa ya nda cho sooluuwo ni. Nduyɛ bɛɛle nda cho ya kioo leŋ, a sondo koni, kɛ kɔlta ndalaŋ la choŋnuŋ landaŋ a ya.” (Aisaya 29:13) Mɛɛ Isɔluɛiya kɛɛ le siŋgaŋndo, mi Mɛlɛka chɛl lɛŋii cheleŋ nɔ kpaayaa ve le Chulusɛlɛm a toŋgo lepiɛi Isɔluɛiya tɛɛmboo. Babiloniaŋnda fɛŋ o chɛl le Chulusɛlɛm tɛɛmboo o wɔsi 607 ve niŋ tuupa mi Chiisu vialuŋ. Nduyɛ o wɔsi 70 ve niŋ a boondii Chiisu ve, mi Mɛlɛka chɛl vɛlɛ puaa chɔuwaa Luomaŋnda le Chulusɛlɛm a toŋgo ndɔ lepiɛiyo tɛɛmboo. Ŋ che kpendekele maa Mɛlɛka chɛl sondo yeelɛiyo le mbo wa lefafɛɛŋ te.

O baa pilɔɔ choo, Mɛlɛka nda Po ndɔɔ hɛnaŋ a wanaa sandu wa tau. Le tamaseliiyo, teleŋ Chiisu ndoo kandu wali ndɔ dimiaa yooŋgu kɛndɔɔ wo, mɛɛ o che Nataniɛl hunɔɔ naa ndu cha, mbo dimi aa, “Isɔluɛinɔ kpeekpeiyo cho hoo ni, o hui wana o wana le wo.” (Chɔŋ 1:47) Nataniɛl ndoo nɔ vɛlɛ diolaŋ ni aa Batɔlɔmiu. Nduyɛ o wa waŋndo opilɛ o kilaa 12 Chiisuaa tɛɛŋ.—Luku 6:13-16.

Mi Chiisu ndoo chua teleŋndo latulu a buɛiyaa nduaa, nduyɛ mbo pɛɛku nda le ma nɔ yiyaŋ Mɛlɛkaa. Ndaa nɔ ma nɔ sondo yeelɛi le. Mi Chiisu ke nda sila o kala kala maa o yeema a sondo yeelɛi simlachiaa lepiɛiya wa tosaa o teleŋ koŋ niŋndo le. Ŋ yaasiaŋndɔ sɔɔŋ ndaa tosa woŋ ŋpum.

A wa sɔɔŋ tosaa le chɔmndo maa “wanaa Mɛlɛkaa” nda cho ni. Mi Chiisu dimul wanaa wa ndu nilaŋ yaŋɔɔ wa aa, “Sɔɔŋ nya tosa le cho nya cho wanaa Mɛlɛkaa woŋ, la mandaŋ a mɛɛ nya tosa muŋ yɛ. La tosa muŋ le halikpeŋ mi waŋnda che nya le.” Mi Chiisu dimul nda vɛlɛ le waŋnda kɛndɛi tosallo “sɔɔ sɔɔ.” Maa a nɔ kuee ma piɛi o chiɛila ndalaŋ niŋ wana cha nda le. Okoŋ, piɛile ndaleŋ le cho bɛnda nduyɛ mi Finya ndɔ hini kɔl a leŋ.—Maatiu 6:1-6.

A wa chɔ chɔ le waŋnda pɛɛsaa. Mi Chiisu dimi aa, “A cho wana sondo yeelɛi bɛndu! Soli wɔ fɛlɛŋ yɔm bɛndu cho num pila o lehɔl lo. O koŋ, a nɔla ma soli bilteŋ chaaŋ num o lehɔl, kani fondole, a wa niŋ chɔɔ nyɛ kɛndɛ walaŋ.” (Maatiu 7:5) Te waŋndo kɛɛ pɛ yɔm cho ndu o hɔllo chɔɔ mbo wa bilte cho chaaŋ ndɔ o lehɔl lo chɔɔ, sondo yeelɛiyo cho koŋ ni. O kpeekpei niŋ, wanaa lahakiaa waŋchieeya kpou cho Mɛlɛka o hɔl ni.—Luomaŋnda 3:23.

A nɔ yiyaŋnda kɛndɛ o lakɔl te. Teleŋ pilɛ, mi buɛiyaa Falesiiya a waŋnda o kunda Hɛlɔɔ wo choo huŋ naa Chiisu cha le ndu nyunaa a pawaa (muloo) okɔɔ. Ma dimul Chiisu a kaŋgalaa aa, ‘Wana pɛɛkaa, ŋ sina maa a cho sakpo. Nduyɛ, a cho waŋnda pɛɛkoo a tonya kpeekpei a mɛɛ Mɛlɛka yeema waŋnda le ma wa yɛ.’ Okoŋ, ma yeŋ ndu yaŋɔɔleŋ a nyunaa hoo aa, “Baa ŋ nɔ pa mi ŋ mal pawaa masa bɛndoo o ba, o cho masaa kpede bolleŋ o lɛŋii Luomaŋnde niŋ ndo, baa ŋ nɔ mi ŋ mal te?” Mi Chiisu mulul nda aa, “Wanaa sondo yeelɛiyaa bɛndu nya cho ni. Yaŋɔɔleŋ nya cho ya yeŋndo ni.” Chiisu ndoo chaa nda bɔɔ diolaŋ ke maa wanaa sondo yeelɛiya nda cho ni. Kanifuule, o cho le mulioo sinaa le nda wa Chiisu nyunaa le, kɛ a wa kindiŋndo le Chiisu “yaŋɔɔleŋ yeŋndo a nyuuniaalaŋ.”—Maatiu 22:15-22.

Kilisiɔŋaa tonyaa nɔ ma chɔm “kaalaa o chaŋ o kɔl diandaa niŋ, a yiyaŋ kɛndɔɔ, a tiindaŋndo o Mɛlɛka niŋ ndo.”—TIMOTI TASOO 1:5

Mɛɛ kunda leKilisiɔŋndo kilaŋ o paale Pɛŋtikɔɔsileŋ choo o wɔsi 33 ve niŋ boondii Chiisu ve, mi fondaa sɔlaŋ le mi tonyaa a sandei hiou lachi. Mi Kilisiɔŋaa tonyaa tosa wallo kekelee le kaa sondo yeelɛi ndaa nɔ wo faŋaŋndo kɔɔli. Le tamaseliiyo, mi Pitɛ, o wa waŋndo opilɛ o kiilaa 12 Chiisuaa tɛɛŋndo dɛɛniaa chaaŋaa nduaa Kilisiɔŋnda le ‘ma tosa nyɛ tonya Mɛlɛkaa o dimul nda le tosaa wo, . . . ma kaaliaŋ vellaa velle nyɛ kɛndɛ kɛndɛi a kɔlta ndalaŋ kpou.’ (Pitɛ Tasoo 1:22) Mi kiilanɔɔ Pɔɔl dɛɛniaa wanaa ndaa tosa wallo latulu wa le ma chɔm “kaalaa o chaŋ o kɔl diandaa niŋ, a yiyaŋ kɛndɔɔ, a tiindaŋndo o Mɛlɛka niŋ ndo.”—Timoti Tasoo 1:5.

KPAAYA DIOM MƐLƐKAA NƆ WO

Pɛɛkula Chiisulaŋ a kiilaa nduaa la cho o Baabuiyo niŋ. Nduyɛ pɛɛkulaŋ ndaŋ la nɔ hau kpaayaa mɛɛ laa nɔ kpaayaa o wɔsiŋ kɛmɛ tasoŋ niŋ yɛ. Lelaŋ, mi kiilanɔɔ Pɔɔl poonyiaa a hei okɔɔ aa, “Diom Mɛlɛkaa cho machuaa maa nyɛ cho yoomu. Nduyɛ o nɔ kpaayaa mbo tosa wali o nɔ le tosaa wo. Nduyɛ o luɛi o hiou muɛi sondola tiɔɔŋ nde. O nɔla mbo luɛi wana chioo niŋ mbo fuuluu di naa yoomu ndɔɔ . . . cho wa. O nɔla mbo fuuluu naa boondoŋ a yooyoovaŋ ma cho wa. O nɔla mbo chɔm yɛ yɔɔ yiyaŋndaŋ a  yeemaŋ wana chioo o kɔl, ŋ wɔɔŋ ni, ŋ kɛndɛ ni.” (Hibuluiya 4:12) Pɛɛkula cho o Baabuiyo niŋndaŋ sinaa a kindiŋndo le laŋ tolɔɔ kɔɔli o yoomu naa niŋ mala niŋ wanaa bɔɔbɔɔ le sondo yeelɛiyo kɔɔ mulullo, nduyɛ ma wa sandei chɔmndo. Ŋ tofaŋndɔ vɛlɛ tamaseliila naŋ yaasiaa a waŋnda a yaa okɔɔ o buŋgɛi hei kandɔŋndo wo.

“Loŋ ya che kaalaa a yeemɛi kpeekpeiye chɔmndo le chaaŋ nda wanachioo ni.”—PANAYOTA

Mi yoomu Panayota wo siŋgaŋ mɛɛ o chɛl veeloo le bɔŋaŋndaŋ biyɔɔ o Toŋgo leMasa Seiyaa Chɛhowaa niŋ. O chi Chɛhowɛinɔ kɛ kɛ sɔɔŋ tosaa le chɔmndo maa a bɛnda ma hiau acheleŋnda le. Mi chuaa hoo dimi aa, “Loŋ ya che kaalaa a yeemɛi kpeekpeiye chɔmndo le chaaŋ nda wanaa chioo ni. Nduyɛ a wɔsiŋ ya chua fau o chɔulaba lemasaa niŋndoŋ, paale pilɛ bɛɛ I chi kaala waa lende le.”

Mi Panayota kandu Baabuiyo pɛɛkoo nduyɛ mbo tosa hiouwɔɔ lachioo le mbo yiŋ. O cho niŋ wɔsilaŋ 30 teleŋ hei yɔŋnuŋndo. Mi chuaa hoo dimi vɛlɛ aa, “Mi saaluŋ sabu kpeekpeiyo o yoomu nuu niŋ. Nduyɛ o cho teleŋ ya wa kɔlaŋ chiɛiyo a chiɛiyo le kunda lemasaa hivioo lachi wo le ya saaluŋ ndu le, kɛ teleŋ ya kandu yooŋgu kɛndɔɔ dimioo a Masale Mɛlɛkaleŋ okɔɔ wo, Masale pilɛ kpe chuu niŋ naa chieeŋ sandaa wo.”

“Yaa nɔ mi hiou lachi a chaaŋaa niaa Kilisiɔŋnda huiyo maa I sandu, nduyɛ I ve wana sandaa le.”—DAANIƐƐ

Mi Daaniɛɛ tosa hiouwɔɔ lachioo o kunda leKilisiɔŋndo niŋ nduyɛ ma ke ndu nyɔɔŋ pum le tosaa. Kɛ mɛɛ wɔsioŋ hiou ŋ tiŋ, mbo bianduŋ. Nduyɛ mi kɔl iyama ndɔɔ kandu ndu paaliaŋndo. Mbo dimi aa, “A sondo yeelɛi ya che paandu o kaaŋnde ya wa niŋndeŋ ndo, mi cha maa o bɛnda mi hiou lachi a tosaa walta nda ke ya o kunda niŋndaŋ te. Yaa nɔ mi hiou lachi a chaaŋaa niaa Kilisiɔŋnda huiyo maa I sandu, nduyɛ I ve wana sandaa le.”

Mi Daaniɛɛ tosa siŋgaŋndo, mbo kandu vɛlɛ tosaa walta o wa tosaa paandu o kundaa niŋndaŋ a nyaaloo nduyɛ a kɔl iyama walaŋndo. Wanaa kɛɛ sondo yeelɛiyo o Mɛlɛka piɛiyo niŋnda chɔm sandii waa naa ni. A cho pɛɛkoo le ma ‘soli wɔ fɛlɛŋ yɔm bɛndu cho nda pila o lehɔl lo,’ tuupa ma “soli bilteŋ” puaapilɛnɔ ndaa o lehɔl.

“Mi sina maa I nɔ lɛ mi tosa kafalaŋ le halikpeŋ mi chɔɔlu fondaa sɔla le yulale nileŋ tosaa le. . . . Mi hei piiliaŋ kɔl iyama nuu.”—CHƐFILI

Mi Chɛfili tosa yulaleŋ o yoomu ndɔɔ niŋ le wɔsila bɔɔbɔɔ wo dimi aa, “Mɛɛ ya tosa hiouwɔɔ lachioo o Baabuiyo pɛɛkoo niŋ, mi sina maa I nɔ lɛ mi tosa kafalaŋ le halikpeŋ mi chɔɔlu fondaa sɔla le yulale nileŋ tosaa le.” Mi bolii Baabuiye mɛɛ Pulɔwaa 11:1 cho naa yɛ piiliaŋ kɔl iyama nuu. Le dimul naa aa “Mɛlɛka Yaawɛɛ o tul wanaa tosal waŋnda kafalaŋ o wɔŋgulaŋ niŋ a sekeleilaŋ nda leyɛ.” A tonya, mi Chɛfili pɛɛku le mbo mal sondo yeelɛiyo chaaŋaa nduaa Kilisiɔŋnda tosallo, a wanaa cheleŋnda. O ve maa wanaa nyuna Chiisu a kaŋgalaa wa le.

Seiyaa Chɛhowaa o miiliɔŋndaŋ niŋ chieeŋndo balɔɔ silɔ cho kindiŋndo le nyɛ nda pɛɛku o Baabuiyo niŋndo tolɔɔ kɔɔli. A cho kindiŋndo o nɛi o nɛi niŋ le wounɔŋndo ‘wana chieeyɛi sɛnɛi Mɛlɛka toosiaa hei le waa maa ndu pila ve. . . . Le ma simnuŋ wanaa cho sakpo, nduyɛ, ma wa a yɔŋgaŋ o Mɛlɛka lo’ wa. (Ɛfisiaŋnda 4:24) Ŋ cho num dɛɛniaa le ma sina wanaa Seiyaa Chɛhowaa cho wa, nyɛ nda laalaŋndo, nduyɛ a mɛɛ nda looku num mala le pɛɛkoo a chieeŋ sɛnɛi Mɛlɛka dimi le naa kioo wo yɛ. Nyɛ o nyɛ fee cho wa “kɔlaŋ o nɛi sakpo” nduyɛ niilu sondo yeelɛi cho lɛ wa o chieeŋ sɛnɛi koŋ niŋ kposoŋ te.—Pitɛ Diiŋ Ndɔɔ 3:13.