Tuupa ma kandu nyɔɔ pum tosaa, ma nyunaŋ numpila aa, ‘Tɔnɔ yɛɛ cho yɛ o hei niŋ?’ Baa kaayei i cho ni, le miŋ nyuna hei a piɛileŋ okɔɔ? I cho tonya le. Ŋ yeema miŋ sina te le tosal pɛ naa nyɛ sɔvɛ. Mi Choobu po kɛndɔɔ nyuna aa, “A yɔŋ bɛɛ mi bii sei ndɔɔ o tongo kɔɔsɔɔ niŋ nduyɛ mbo kuɛ, I laalaŋ bɛɛ te o yaŋ ya lani le?”—Choobu 9:16.

O buŋgaŋ naŋ hiou woŋ niŋ, miŋ yaasiaa maa piɛileŋ le cho ko suɛi le kaaŋnde ɔɔ kooma wana chua le bolle hiŋnaŋ ndeŋ ndo le. Mi Mɛlɛka tonyaa yaŋ nilaŋ kɛsɛ kɛsɛ o piɛileŋ. Te ŋ piɛi pɛ o nɛi bɛnda wo choo nduyɛ le nyɛm sɔviɔŋ, o cho nilaŋ yaŋɔɔ. Lelaŋ, o cho naa dɛɛniaa le miŋ sɔɔŋgu ndu ikɛi. (Chemisi 4:8) Nduyɛ, tɔnɔla yɛɛ naŋ cho yɛ sɔla te ŋ chua pɛ piɛileŋ o yoomu naa niŋ maa kaa naa? Ŋ tofaŋndɔ tɔnɔlaŋ lapum.

Kɔl nyuloo.

Te bahawɛilaŋ a simultaŋ la komal naa o yoomoo niŋ pɛ, ma yiyaŋ pa maa buulaŋndo mel num bolleŋ kpulukɔ? O teleŋnda waa naa bɛŋgu, Baabuiyo dɛɛniaa naa le “Mɛlɛka piɛiyo teleŋ o teleŋ” nduyɛ le miŋ ‘chɔm ndu nyɛ naŋ hau ba le ndu wo.’ (Tɛsaloniaŋ Tasoo 5:17; Filipiaŋnda 4:6) Baabuiyo ke naa tiindaŋndo maa te ŋ muliŋ pɛ o Mɛlɛka lo o piɛileŋ niŋ, ‘kɔl nyulu Mɛlɛka yɔŋgu wo o wana chiee nɔla mbo sina pɛŋgu le wo nɔla mbo manda kɔlta naa laŋ, a yiyaŋnda naa laŋ.’ (Filipiaŋnda 4:7) Ŋ nɔla miŋ sɔla kɔl hiniaa o tiŋ te ŋ chɔm pɛ Finya naa o choo choo niŋ bahawɛila naalaŋ. Lelaŋ, o cho naa dɛɛniaa le miŋ tosa keŋ. Sam 55:22 dimi aa, “Chɔm Mɛlɛka ba num havɛiyo, o nɔla mbo mala num.”

“Chɔm Mɛlɛka ba num havɛiyo, o nɔla mbo mala num.” —Sam 55:22

 Waŋnda o miiliɔŋndaŋ niŋ chieeŋndo balɔɔ silɔ sɔla niŋ kɔl nyulu waa naa. Mi Hii Laŋ o lɛŋnde Kenyaleŋ niŋ dimi aa, “Mi che bɛɛ naa I nɔ bahawɛila kala kalalaŋ, kɛ te I piɛi dɔɔ a laŋ okɔɔ pɛ, kalaŋ ya nɔ wo yɔŋnuŋ fefele, nduyɛ mi sɔla fondaa le biunɔŋndo.” Mi Sisiliaa o lɛŋnde Filipiŋndeŋ niŋ dimi aa, “Maa kala chua, I cho bɔɔ buulaŋndo le chuaa niaa laanduaa a kala nuu, o tiu lɛ pɛŋ ba le ya sinaa le wo. Kɛ piɛileŋ le cho ya malaa le makola nilaŋ tosaa lepaa o lepaa I hiu lɛ buulaŋ te. I sina maa Chɛhowa cho ya mala le mi manda nda.”

Kɔl dɛɛniaa a yoomuaŋ sɔlaa o nyɛkindilaa bɛŋgu.

Baa a cho pa o kɔl landɛi bɛndoo niŋ, kɛlɛŋgaa o cho yoomu numndo paaliaŋndo ɔɔ lueiyo o kpundɔɔ  niŋndo? Piɛileŋ o “Mɛlɛka o nyɔɔlu naa kɔltaŋ niŋ ndo” lo nɔla mbo ke naa kɔlnyulu hɔbɛiyo. Baabuiyo dimi maa o “nyɔɔlu naa kɔltaŋ niŋ o dɛnɛ o dɛnɛ palaa niŋ.” (Kɔliŋtiaŋ Diiŋ Ndɔɔ 1:3, 4) Le tamaseliiyo, teleŋ pilɛ mɛɛ Chiisu tambu kɔl tau, mbo “baŋ wulaŋ, mbo piɛi Mɛlɛka.” Yɛɛ wa yɛ fulamakɔɔlioo? “Mi kiilanɔɔ chaŋ o ɛchɛnɛ mbo huŋ naa ndu chua. Mbo luei ndu kpaayaa.” (Luku 22: 41, 43) Wana ndoo tiindaŋ vɛlɛ o Mɛlɛka niŋndo wa Nɛhimaya ni. Mi wanaa dɛnɛ wɔɔŋnda luei ndu siooŋnde ma kindiŋ le ndu kuunaa wali Mɛlɛkaa tosaa. Mbo piɛi aa, “Oo Mɛlɛka, ke ya kpaayaa mi hiou lachi a wallo.” Nyɛ yɔŋnuŋ o koŋ kɔɔli wo chɔm kɛsɛ maa mi Mɛlɛka mala ndu. Mi siooŋnde fula ndu nduyɛ mbo tiuba le wali Mɛlɛkaa tosaa. (Nɛhimaya 6:9-16) Mi Luechinad o lɛŋnde Kanaleŋ niŋ tɛɛsiaa nyɛ yɔŋnuŋ ndu a piɛileŋ okɔɔ wo. Mbo dimi aa, “Te I piɛi pɛ, taama taama a teleŋnda bahawɛilaŋ la mial la bolleŋ kpulukɔ wo, mi sinaŋ maa I dimul wana nɔla mbo mala ya wo bahawɛi nuu, nduyɛ, o ke ya tiindaŋndo maa I nɔ mi buulaŋ te wo.” A tonya, Mɛlɛka nɔla mbo dɛɛniaa naa te ŋ piɛi pɛ o ndu lo.

Taasi chɛŋ o Mɛlɛka lo wo.

Kɛɛsiaala naŋ tosa lapum ndaŋ nɔla mi la paaliaŋ naa a wanaa naŋ kaala wa le fɛɛŋ. Vɛɛ naŋ looku yɛ kɛɛsiaala kɛndɛlaŋ tosa? Baabuiyo dimi aa, “Lelaŋ, te wana o wana wa nya tɛɛŋ pɛ mbo nɔ taasi le, [taama taama a wa pɛ o nyɛpalaa bɛŋgu], mɛɛ wana koŋ o nyuna Mɛlɛka diom le mbo ke ndu taasioo. “Wana ikɛndɔɔ Mɛlɛka cho naa wana o wana chua ni. O ke wana nyɛ a ŋɔɔchiaŋ te. Wana o wana nyuna ndu le taasioo pɛ, kioo o ke ndu ni.” (Chemisi 1:5) Te ŋ piɛi pɛ le taasioo, Mɛlɛka nɔla mbo soliŋ nyina ndɔ diandaa kpeku le naa nɛi chɔmaa kioo le kɛɛsiaalaŋ tosaa a taasi. A tonya, Chiisu ke naa tiindaŋndo maa, Mɛlɛka Finyaa naa o choo choo niŋ yɔŋgu nyina ndɔ diandaa o wanaa piɛi le ndu wa lo.—Luku 11:13.

“I wa piɛileŋ lɔɔlɔɔ o Chɛhowa lo le ya malaa mi tosa kɛɛsiaa sɔviɔɔ.”—Kuabɛna, Kana

Mi Chiisu bɛɛ cha maa ndoo nɔ mbo nyuna Finya ndɔ le malaa teleŋ o wa kɛɛsiaala sɔvɛlaŋ tosaa wo. Baabuiyo dimul naa maa teleŋ ndoo yeema puaa 12 hɛlioo le ma wa kiilaa nduaa wo, “le nyumndaŋ kpulukuu o cho Mɛlɛka piɛiyo.”—Luku 6:12.

Maa Chiisu, waŋnda tau tiindaŋ niŋ hau Mɛlɛka mɛɛ nda che maa o muli piɛile ndaleŋ le kɛɛsiaala kɛndɛlaŋ tosaa. Mi Luechina o lɛŋnde Filipiŋndeŋ niŋ suaa a bahawɛila siaama komal ndu laŋ okɔɔ. Mɛɛ pɔnɔ ndɔ vi, nduyɛ mi baalaa mɛi ndu, ndoo nɔ wana malaa le yuŋgu ndɔɔ le. O wa fafalaa le chuauwaa nduaa mandaa. Yɛɛ ndoo mala yɛ chuaa hoo le kɛɛsiaalaŋ tosaa a taasi? Mbo dimi aa, “Mi tiindaŋ Chɛhowa o piɛileŋ niŋ.” Mi Kuabɛna o lɛŋnde Kanaleŋ niŋ dimi le sabu o nyuna Mɛlɛka le malaa wo. Mbo dimi aa, “Mi baala ni taŋgulaa ndaa paawa ya tau wo mɛi ya.” Mɛɛ o wa kɛɛsiaa le nyɛ o cho tosa wo, mbo dimi aa, “I wa piɛileŋ lɔɔlɔɔ o Chɛhowa lo le ya malaa mi tosa kɛɛsiaa sɔviɔɔ.” Mbo chɔɔlu dimi aa, “Mi cha kɛsɛ maa mi Chɛhowa mala ya le hɛlioo wali ke ya teleŋndo le sɔɔŋ iMɛlɛkayaŋ tosaa a bahawɛila nilaŋ solioo wo.” Num bɛɛ nɔla ma sɔla nɛi chɔmaa Mɛlɛkaa te a wa ndu pɛ piɛiyo le bahawɛila paaliaŋ chaŋyɛi numnde nya ndu tɛɛŋndaŋ okɔɔ.

Sɔɔŋ nyɛɛmbɔ koni naŋ chɔm ŋ piɛileŋ le mala num a muŋ okɔɔ woŋ ni. (Le tamaseliilaŋ chɔɔloo sinaa, tofa kɔfoo “ Tɔnɔla Piɛileŋ.”) Kɛ le ma sɔla tɔnɔlaŋ ndaŋ, a nɔ fɛŋ ma sina Mɛlɛka a sabu ndɔɔ. Te hei ŋ yeema ni, ŋ cho num dɛɛniaa le ma nyuna Seiyaa Chɛhowaa le num malaa ma pɛɛku Baabuiyo. * Nɛi tasoo cho hoo ni le sɔɔŋgoo kpɛɛluŋ “Wana muli piɛileŋ ndo” ikɛi.—Sam 65:2.

^ pɛl 14 Le chɔɔloo sinaa, nyuna Seiyaa Chɛhowaa cho num ikɛiya ɔɔ kɔ o tɛɛŋgii nɛi, www.jw.org.