“Mi Alona dimi aa, “Mɛɛ ya tuei bambɛi suɛi, mi kɔllo kandu ya lɔɔ pum pum. Mi nyaanuŋ o chiɛi chiliŋii yekpandi bii wana le wo niŋ. Kɛ o chiɛi koŋ niŋ bɛɛ, I wa buulaŋndo. Te I wa pɛ o bɛɛ mi nɔ naa ya viaŋnuŋ te, buulaŋndo wa ya bɔɔ. Teleŋ pilɛ, mɛɛ ya wa kɔlaŋ o nɛi, mi kandu chaŋndo, okoŋ mi yoomuaŋ ma kiolu ya. Mi nyɔɔ viau kpɛɛ tuupa mi kɔllo challa. Mi bambɛi mei niŋ suɛi yɔɔfɛɛ.”

Alona

Nyɛm cheleŋndoŋ cho tau ŋ huŋ a kpundɔɔ woŋ. Chɔuwo cho opilɛ. Le tamaseliiyo, te o yɔŋ pɛ ma sina maa num ɔɔ wana num ŋ kaala wo nɔ naa wɔɔŋ wɔɔŋndo, koŋ cho machuaa mɛɛ chiliŋii yekpandioo bii naa wana yɛ. Wanaa cheleŋnda cho buulaŋndo le siɔdii lachioo. Ma buulaŋ aa, ‘Baa chuauwaa naa, ɔɔ chuauwaa naa mamaa wa niŋ pa o chieeŋ chɔuwo niŋ? A wa niŋ pa o chieeŋ sawa tɛɛmbaa, ɔɔ o kpundɛla cheleŋ niŋ?’ Vɛɛ naŋ bii yɛ buulaŋ waa naa?

Ŋ sina niŋ maa kpundɛlaŋ la yɔŋnuŋ. “Wana kɔl kaloo o nɔla mbo cheŋnuŋ kpundɔɔ ndu lachi mbo kpakpala ndu.” (Talelaŋ 27:12, NW) Mɛɛ naŋ kindiŋ le dialuŋ naŋ mandaa yɛ, lende koni naŋ nɔ vɛlɛ miŋ manda yiyaŋnda naalaŋ ni. Konala wɔɔŋ wɔɔŋndaŋ la cho hau. Nduyɛ, waŋnda cho hau nyɛm luei waŋnda siooŋnde woŋ nuaa le yelelaŋndo. Miŋ luei naa a chuauwaa naa siooŋnde. Hei tosa mi chuauwaa naa buulaŋ, nduyɛ, mi naapila bɛɛ luɛi o buulaŋndo niŋ. Te o yɔŋ pɛ miŋ faŋaŋ nyɔŋ muŋ kɔɔli, koŋ chɔm naa maa ŋ sina nyɛ o nyɛ le le. Mɛlɛka toosiaa naa le waa yiyaŋndo o sɔɔŋ wɔɔŋndoŋ choo le. O yeema naa miŋ wa yiyaŋndo o ‘nyɛ o nyɛ cho suɛi  sandaa, . . . nyɛ o nyɛ cho suɛi sakpo, nyɛ o nyɛ cho suɛi diandaa, a nyɛ o nyɛ cho suɛi kaalaa.’ Te ŋ tosa hei pɛ, “Mɛlɛka o ke naa kɔl nyuloo wo” nɔla mbo ke naa kɔl nyuloo o yiyaŋnda naalaŋ niŋ.—Filipiaŋnda 4:8, 9.

LE YƐƐ PIƐILEŊ LE BƐNDA YƐ?

Te ŋ nɔ pɛ tiindaŋndo kpeekpei, koŋ mala naa miŋ pɛŋgi buulaŋndo. Baabuiyo dimul naa aa, “La va a bɛɛndiaŋ. Koŋ tosa mi la nɔla le Mɛlɛka piɛiyo nyɛkɛndɛi.” (Pitɛ Tasoo 4:7) Ŋ nyuna Mɛlɛka o piɛileŋ niŋ le mbo mala naa a bahawɛila naalaŋ. Nduyɛ, le mbo ke naa taasioo a kɔl biyaa o nyɛ o nyɛ niŋ. Mɛɛ ma nɔ tiindaŋndo maa “nyɛ o nyɛ naŋ nyuna ndu pɛ nilaŋ o yaŋ naa ni.”—Chɔŋ Tasoo 5:15.

Nda Avi pɔnɔ ndɔ

Baabuiyo dimi maa Setana cho “masaa le chieeŋndo hoo” ni, o cho Mɛlɛka le. Baabuiyo dimi vɛlɛ maa “chieeŋndo hoo kpede o cho o Masa Nyinaa Wɔɔŋnda o ba bɛŋgu” (Chɔŋ 12:31; Chɔŋ Tasoo 5:19) Lelaŋ Chiisu pɛɛku naa le piɛileŋ ni aa, “Manda naa yɔŋi Masa Nyinaa Wɔɔŋnda o tiu naa ba.” (Maatiu 6:13) Mi Alona dimi aa, “Te bambɛi kandu dɔɔ pɛ suɛi, I nyuna Chɛhowa o piɛileŋ niŋ le mbo mala ya mi bii kɔllo. Nduyɛ, mi pɔnɔ ni kaalaa bɛɛ veelu ya le miŋ piɛi latulu. Piɛileŋ le mala bɔɔ.” Baabuiyo dimi a Chɛhowa okɔɔ aa, “A cho o bɛɛndiaŋ le teleŋ o teleŋ le wanaa nyuna num diomnda malaa, wanaa nyuna num diom o tonyaa choo wa.”—Chondei 145:18, NW.

TIINDAŊ NAA LE CHILAŊ

O piɛile Chiisu pɛɛku buɛiyaa nduaa o pembei choo leŋ, mbo pɛɛku nda le ma piɛi aa, “Masale numndeŋ le huŋ.” (Maatiu 6:10) Masale Mɛlɛkaleŋ le cho buulaŋ o buulaŋ wɔɔŋ hunɔɔ faŋa. Chiisu, o cho “Masa Kɔl Nyuloo” wo, Mɛlɛka cho soliŋ kpeku ni le ‘chɔulaŋ chiiyo ba o ba fee o chieeŋndo choo.’ (Aisaya 9:6; Chondei 46:9, NW) “Ndu Mɛlɛka, o dimi niŋ sɔɔŋ lɛŋii bɔɔbɔɔ tɛɛŋ. . . . A teleŋ koŋ, lelɛŋ o lelɛŋ mel niŋ mi le kɔ saa chaaŋndɔ a sɔŋgɔɔ le. Nduyɛ, lelɛŋ o lelɛŋ pɛɛku lɛ niŋ sɔŋgɔɔ le chaaŋndɔ lakɔ delɔɔ choo le. . . . Wana o wana o dou lɛ niŋ wana isiooŋ te.” (Maika 4:3, 4, NW) Yuŋgulaŋ la cho wa a kɔlta kɛndɛlaŋ, nduyɛ a “taŋgul niŋ chiɛila ndalaŋ mi ndapila wanuŋ leniŋ. A tosa niŋ kpelela ndalaŋ ma de laŋ tɔnɔ.” (Aisaya 65:21, NW) “Wana o wana dimi lɛ niŋ aa, ‘I cho kɛndiaa le le.’”—Aisaya 33:24, NW.

Mɛɛmɛɛ naŋ mandaŋ hau, o cho suɛi bɛɛŋ le “suɛi naŋ ve kɔl tei” kpakpalaa le. Ŋ nɔla vɛlɛ miŋ kpakpala fondaŋ wɔɔŋndo a teleŋ bɛnda le wo le. (Ikilisiate 9:11, NW) Le wɔsila bɔɔbɔɔ niŋ, Chɔulaŋ, niilu latandaa, a naalaŋ la cho hiouwɔɔ lachi a waŋnda diuwo. Tiindaŋ kuɛɛ wanaa nɔ haa tɔɔyaŋ te wa nɔ yɛ?

Mɛlɛka suee sina wanaa faŋga chuu chɔm te wa haa ni, nduyɛ o cho nda miŋgi yoomu. Mi che bɛɛ naa a cho o sɛilaŋ niŋ suŋ suŋ, Mɛlɛka cho loonɔŋndo a nda. Teleŋndo cho fuuluu mi waŋvilɛiya, a cho o loonɔŋ Mɛlɛkaa niŋnda kpou a tuei diom ndɔɔ o koŋ, ma fula o sɛilaŋ niŋ. (Chɔŋ 5:28, 29) Mi Baabuiyo dimul naa a fulasɛiniŋndo okɔɔ aa, “Nyɛ naa ŋ cho koŋ hɔlteŋ o nɛi le ndu wo, ndu bii naa nyɛ kɛndɛ kpiŋ ni mi ŋ hiou lachi a vaa a dialuŋ kala.” (Hibuluiya 6:19) Mi Mɛlɛka miŋgi Chiisu yoomu “le waŋnda kpou chɔmndo kpendekele maa o cho hei tosa.”—Walta Wanaa Chiisuaa 17:31.

Le suŋ suŋ ndɔ, wanaa cho kindiŋndo le Mɛlɛka kɔllo nɛŋioo wa bɛɛ nɔ le buulaŋndo. Mi Pɔɔl, Chanɛt, a Alona tosa wallo, ma sɔɔŋguu Mɛlɛka ikɛi kpɛɛluŋ o piɛileŋ niŋ, nduyɛ, ma duau tiindaŋndo o nyɛ o nyɛ Baabuiyo dimi a chilaŋ okɔɔ wo niŋ. Koŋ tosa ni a hiu buulaŋ te. Maa Mɛlɛka mala num mɛɛ o mala nda yɛ fɔ. Maa Mɛlɛka “tosa mi la va a kɔl kɛndɛ bute, nduyɛ, mi la sɔla kɔl nyuloo fɔ.”—Luomaŋnda 15:13.