Pɔɔl nɔ lanɔɔ a chuauwa a ŋiɔɔŋ. Mbo dimi aa “Mɛɛ nyɔŋ kendu baa kiondɔɔ bɛndoo o lɛŋnde naaleŋ niŋ, nyɛdiaa bɔɔ ve le. O pulaleŋ naŋ sim ni le nyɛdiaa. Kɛ tuupa miŋ fuuluu lachi, ŋ komal niŋ nyɛdiaa chuu. Mi yiaŋ ma tɛɛmbuu waŋnda bɛɛlaŋ tau. Apum, o nɛi ndaa kei deli ni. Mi baa hel helɔɔ pila le nyɛm naŋ soliŋ kpeku lɔɔlɔɔ woŋ. Mi nyɔɔŋ hel baa o miiliɔŋndaŋ niŋ. Lepum, biiliɔŋndaŋ. O mɛɛlulaŋ kpɔŋ, kaniŋ naŋ soliŋ kpeku woŋ muŋ nɔ lɛ kpeku le. Mi nyɛsɔlaa ya wa kɛsioo o chiɛi kɛsiaa nyɛsɔlaa niŋndo tambu. Mi nyɛ o nyɛ tambu ya o ba.”

Pɔɔl

Pɔɔl ndoo sina maa le mi yuŋgu ndɔɔ kinda, mɛɛ mbo soliŋ “kɔlkalu ndɔ iwana chieeyaa kpeku” (Talelaŋ 3:21, NW) Mi Pɔɔl dimi vɛlɛ aa, “Ya ndaa veelu le yiŋnde chɛnɛwɛileŋ toosiaa ni. Kɛ wali o wali ya che pɛ, ndu ya tosa ni, o yɔŋ bɛɛ mbo nɔ paawa bɔɔ le.” Mbo hiau lachi a dimioo aa, “Apum, a nyɛdiaa ndaa paawa ya ni. Apum yɛ, a nyɛm yɔŋaŋ muŋ. Te a ke ya pɛ sɛŋndaŋ kpuŋkpaŋ ŋhiɔɔlu, I soliŋ ŋmuuŋ kpeku, okoŋ, I pisi ŋ pilɔŋ. Mi sɔla sɔɔwa 40. Mɛɛ kaŋ sul, mi pisi nda, okoŋ, mi piandu acheleŋ 300. Okoŋ kɔɔli, mi siŋga sɔɔwa 50 a kɔɔmii labɔlɔɔ. A kɔɔmiiyo hoo yaa duau yuŋgu nuu a yuŋgula cheleŋndaŋ balo ni.

Pɔɔl ndoo sina vɛlɛ maa taasioo icho ni le mi wana o wana dɔu tiindaŋndo o Mɛlɛka niŋ. Te ŋ tosa pɛ nyɛ Mɛlɛka dimi wo, koŋ mala naa. Mɛɛ Chiisu wa suɛi a nyɛm naŋ yeema woŋ okɔɔ, mbo dimi aa, “La va a kɔl landaŋ kɛlɛŋgaa mi la buulaŋ le nyɛ nya dia wo a nyɛ nya kol lo le. . . . Mɛlɛka finya nya ndu sina maa la nɔ le nyɔɔŋ muŋ sɔlaa.”—Luku 12:29-31.

Setana, o cho yaamɔɔnɔ Mɛlɛkaa wo tosa hau mi waŋnda duau yiyaŋ ndaa kpou o bahawɛilaŋ solioo niŋ. Hei cho nyɛ kɛndɛ le. Waŋnda landuŋ bɔɔ hau kɔl le bahawɛila ndalaŋ. A landuŋ kɔl le nyɛm nda hau ba woŋ, a nyɛm nda yiyaŋ maa a nɔ kuee ma nɔ woŋ. O hei niŋ, a cho kindiŋndo lakalu tei le nyɛm nda heu ba kpeekpei le woŋ piondɔɔ. Wanaa bɔɔbɔɔ luɛi hau o kuoo niŋ. A sina ndi niŋ kɛsɛ maa ‘wana bii kuoo wo, ndu cho chiɔɔ le wana wuu ndu kuoo wo ni’—Talelaŋ 22:7, NW.

 Mi Pɔɔl Chɔɔlu dimi aa, “Mi waŋnda apum tosa kɛɛsiaala wɔŋndaŋ. Mi wanaa naŋ chiɛɛliaŋ bɛɛlaŋ nda a bɔɔbɔɔ faŋaŋ yuŋgula ndalaŋ a chaaŋaa ndaa ikɛi le kɔlaŋ o lɛŋii nɔ nyɛsɔlaa vɛ niŋ. Apum, ma kua, kɛ ndaa nɔ yau kpeekpei ke nda dioo le kɔlaŋ ndo le. Nduyɛ, a sɔla baala le. Teleŋ o teleŋ nda che pɛ polisiiya hunɔɔ, a veŋnuŋ. Nduyɛ, o bilioo choo ndaa lɔl ni. A chɛl Mɛlɛka mbo chɔm nda mɛɛ o mala wana yɛ le. Kɛ le naa, miŋ kialu yamɛi o kɔl le bahawɛi nyɛsɔlaa hoo biuwɔŋndo a mala Mɛlɛkaa.”

SILA CHIISU YƆŊGU WO TOLƆƆ KƆƆLI

Mi Pɔɔl hiau lachi a dimioo aa, “Chiisu dimi aa, ‘Lelaŋ la landuŋ kɔl le siɔdii le. Sɔɔŋ kɔl landaŋ ndoŋ le siɔdii ŋ cho tau. Kɛ, muŋ muŋ, ŋ va le siɔdii.’ * Nyɛ yaa nyuna Mɛlɛka lɔɔlɔɔ o piɛileŋ niŋndo cho ni maa, o ke naa ‘nyɛdiaa naŋ dia le paale hauleŋ ndo’ halikpeŋ miŋ kinda. Nduyɛ, mi Mɛlɛka mala naa a mɛɛ Chiisu dimi yɛ koni. O cho nyɛ naŋ yeema lɔɔlɔɔ wo le naŋ sɔla le. Paale pilɛ, mi sim o pulaleŋ le nyɛdiaa piondɔɔ. Mɛɛ ya fuuluu lachi, mi cha maa nɔnɔɔ nda cho pisioo ni. I hɛnaŋ a nɔnɔɔ kposoŋ te. Kɛ, ndu bɛɛ nyɛdiaa o cho ni. Ndu naŋ de ichɔl koŋ ni. I mel Mɛlɛka balika bɛndoo pila, kani, tei mi boondii wɔɔŋii keŋ hiau naa choo, yuŋgu nuu lɔl a ma yi le.

Mɛlɛka dimul naa aa, “I feŋaŋ nya ikɛi le, nduyɛ, o nyɛ palaa niŋ bɛɛ I mel nya nya kpeele le.”—Hibuluiya 13:5

“Suŋ suŋ, te o hiŋ pɛ a nɛi nyɛsɔlaa okɔɔ, nyɛ o nyɛ cho niŋ nyɛkɛndɛi. Kɛ, nyɛ kei naa choo wo pɛɛku naa maa, te a yeema pɛ ma pɛŋgi buulaŋndo, mɛɛ ma tiindaŋ o Mɛlɛka niŋ. Chɛhowa * cho loŋ le naa malaa lɔɔlɔɔ te o yɔŋ pɛ miŋ lo hɛnaŋ ndɔɔ tosaa. Ŋ che tonyaa o nyɛ Baabuiyo dimi o Chondei 34:8, (NW) niŋndo. Loŋ Baabuiyo dimi ni aa, ‘La huŋ naa Chɛhowa cha, mi la che mɛɛ o cho wana kɛndɛ yɛ. Wanaa huŋ naa ndu cha le nda mandaa wa a pɛl tɔnɔ.’ Le hei, siooŋii o siooŋii cho naa te bahawɛi nyɛsɔlaa komal naa vɛlɛ pɛ lee.”

Mɛlɛka mala wanaa tiindaŋ o ndu niŋnda le ma sɔla ‘nyɛdiaa nda dia le paale hauleŋ ndo’

“Ŋ sina niŋ kpendekele maa nyɛ kɛsi wana chioo yoomu wo cho nyɛdiaa ni, o cho wallo a nyɛsɔlaa le. Ŋ cho lehɔl o nɛi le teleŋ Mɛlɛka cho hunɔɔ tosa nyɛ o mɛi lediom le tosaa wo. Ndu cho ni maa ‘Nyɛdiaa wa niŋ o hɔbɛi o chieeŋndo choo.’ Kɛ le suŋ suŋ ndu, te ŋ sɔla pɛ ‘nyɛ diaa naa ŋ dia wo pɛ, nduyɛ mi ŋ sɔla nyɛ chuɛyaŋndo pɛ, mɛɛ ŋ nɔ mi ŋ hini kɔl.’ Mi Baabuiyo dimi aa, ‘La duau kɔlta nyalaŋ o kaala ŋkanioo le. Nduyɛ, la hini kɔl a nyɛ nya nɔ wo. Kani fuule, Mɛlɛka dimi aa, “I feŋaŋ nya ikɛi le, nduyɛ, o nyɛ palaa niŋ bɛɛ I mel nya nya kpeele le.” Lelaŋ, la ŋ nɔŋnuŋ kɔlta simulaalaŋ mi ŋ dimi aa, “Masanɔɔ Mɛlɛka ndu mala ya ni. siooŋii bii ya le. Nduyɛ, wana nɔla ya nyɛ o nyɛ yɔŋ te.”’” *

Le ma Tiindaŋ Mɛlɛka mɛɛ Pɔɔl a yuŋgu ndɔɔ tosa yɛ, mɛɛ ma nɔ laalaŋndo o kala poŋ. (Kandɔŋ Chieeŋndo 6:9) O yɔŋ bɛɛ miŋ nɔ hau bahawɛi ikanioo tau ɔɔ o chilaŋ niŋ, tamasi Pɔɔl kɛsul naa le tiindaŋndo a kɔlkalu iwana chieeyaa nɔɔ wo nɔla mbo pɛɛku naa sɔɔŋ tau.

Kɛ te o wa yɛ niŋ mi bahawɛila yuŋgoo la wa naa kɔl landɛiyo kioo tau?

^ pɛl 10 Diola Mɛlɛkalaŋ la cho Chɛhowa ni a mɛɛ Baabuiyo dimi yɛ.