Vɛɛ ndaa soliŋ yɛ poutaŋ kpeku o sindɔɔ niŋ le nyɔŋ chuiyo?

Ndaa soliŋ poutaŋ ndaŋ kpeku le kolo ndaa luam beediiyo wo chuiyo. Waŋ laanduaa o chiɛi o chiɛi niŋ ndaa soliŋ pouta chuiyaa laŋ ndaŋ kpeku tau ni. O sindɔɔ niŋ, ba o ba ŋ kɔ, ma tuei waŋnda nyɔŋ chuiyo.—Ɛsodɔɔ 11:5; Chɛlimaya 25:10, NW.

Nyɛm masindɛŋ nda kala lɛŋ Ichipi woŋ chɔm mɛɛ ndaa tosa hei yɛ. O pou cho maa hɛŋgɛi iyɔmndo choo ndaa duau kulloŋ ni le muŋ chuiyo, okoŋ, mi wana cho chuiyo wo baŋ wulaŋ. O baŋ pɛ wulaŋ, o saa pou o cho chuiyo wo a bala tiɔɔŋ, okoŋ, o kandu kulloŋ susaa mɛɛ waŋndo susa naa yambɛi yɛ. A mɛɛ yau tɛɛsiaa ŋsɔɔ pum dimi yɛ, pou susaa koŋ ndoo lusul le kilolaŋ la tiɔɔŋ, ɔɔ la hiɔɔlu. Pouwo hoo nɔla mbo dii waŋndo te a vɛ ndu pɛ a ndu.—Wanaa Kialaa Ŋyamaa 9:50-54.

O yuŋgula wa sindɛ laŋ niŋ, kulloŋ chuiyo wa bɔɔ nyɛ sɔvɛ bɛndu. Nyɛ koŋ sawa Baabuiyo ndoo kuuna waŋndo pouta chuiyaa laŋ ndaŋ biyɔɔ o ba o landei niŋ ni. Mi Baabuiyo dimi o Ditɔnɔmii 24:6, NW aa, “Te chaaŋ num Isɔluɛinɔɔ o bii num kuoo o ba pɛ, pouta tiɔɔŋnda o chuii witiiŋ ndɔŋ le kolo toosiaa beediiyo toosiaa laŋ, bii ndu opilɛ bɛɛ o ba o ilandu niŋ te. Kani fondole, poutalaŋ la mala ndu ni mbo sɔla nyɛdiaa.”

Te a dimi pɛ aa waŋndo “ihini o ibuŋ” yɛɛ koŋ sim yɛ?

Baabuiyo dimi maa Chiisu cho Finya ndɔ ikɛi. (Chɔŋ 1:18) Hoo chɔm foofu Chiisu nɔ finya ndɔ ikɛi kpɛɛluŋndo, nduyɛ, o chɔm vɛlɛ mɛɛ kpɛ Mɛlɛka che ndu nyina yɛ. Diomndo hoo chɔm naamu Chuuwa ndaa tosa wo te ndaa wa pɛ nyɛdiaa dioo.

Boondii Chiisu wa o chieeŋndo choo ve, o kpeŋgbeila difiɛɛlaŋ choo waŋnda ndaa chal ni mi ndaa balu tibiiyo silɔ. Wana o wana chal le nyɛdiaa dioo, bolle ndɔleŋ le wa o tibiiyo ikɛi, kɛ, peloŋ wa ŋ landaŋ a tibiiyo. Te o tosa pɛ lende, o sɛɛŋuu ndupila o pileiyo choo a duŋ miallo. Hei mala ndu mi ba ndɔ kɛndɔɔ wa ndu fɛɛsɛŋ. Wana o wana chal chaaŋ ndɔ ikɛi o kpeŋgbei koŋ choo, o ba miallo choo o sɛɛŋuŋ ni. Mi yau pilɛ tɛɛsiaa a chalii waa naa aa, “Mi wana o wana sɛɛŋuu bolleŋ wana chal ndu kɔɔli wo o takpa. Te hei yɔŋnuŋ pɛ, mɛɛ a dimi maa wana koŋ cho ihini chaaŋ ndɔ o ibuŋ.”

Le ma hini wana cho bolle yuŋgoo wo, ɔɔ wana ŋ kuɛ o bɛŋgu choo wo o takpa, o cho bɛɛle bɛɛŋ bɛɛŋ te le cho leŋ te. I cho maa teleŋ Chiisu wa bɔŋaŋ loonaŋndo a hiouwɔɔ choo ndɔ mɛɛlaa biyɔɔ wo, ‘buɛi ndu oo kaala kaala bɛndoo’ wo, ndu cho maa Chɔŋ ni, ndu oo sɛɛŋuŋ Chiisu o takpa ni. I cho maa Chiisu o takpa Chɔŋ ndoo sɛɛŋuŋ ni le ndu nyunaa.—Chɔŋ 13:23-25; 21:20.