A mɛɛ yau tɛɛsiaa ŋsɔɔ pilɛ dimi yɛ, pɛɛku bɛndoo a nyɔɔŋ okɔɔ cho ni, “pɛɛkoo kpɛ kpɛ a nyɛm yoomaŋ, nyɛm cho yoomu le woŋ, chieeŋndo, a halaa okɔɔ. Le hei tosaa, a nɔ ma mɛɛndaŋ muŋ, okoŋ ma tuu le sinaa wali ŋ tosa wo.” O cho suɛi kpɛdɛ le hei kpou tosaa le. Nduyɛ, o cho wali kɔl tambɛi bɛndu. Mi wanaa pɛɛku haa a nyɔŋ muŋ okɔɔ wa fafala tau le lɔɔlaŋ, paŋgoŋ, ɔɔ naapum wɔsioŋ le sinaa a nyɔŋ muŋ okɔɔ. Nduyɛ, lepum mi saŋga ndaa kuɛŋnuŋ o hueiye niŋ. Kɛ lepum, mi pɛɛku ndaa chuu waŋchieeya tɔnɔɔ. Ŋ yaasiaŋndɔ tamaseliilaŋ lapum.

Mi kunda toosiaa nyɔŋ Yulopi wo mɔsɔŋa kpɛɛla kala kala laŋ a nyɛm yuei nyɔŋ ndoŋ naapilɛ le maasiiyo toosiaa yɔŋi waŋndo kol mɛŋma wɔɔŋndaŋ mbo naa. Maasiila waa naa nda soliŋ kpeku ni te kpundɛ bɛndoo yɔŋnuŋ pɛ, mɛɛ lɛŋndeŋ lee nyiiya dɔɔ naa Heti o wɔsi 2010 ve niŋ yɛ.

Nyɛ Tuu Fondaŋnda Yɛyɛlaŋ Ndo cho o halaa niŋ. O kpeekpei niŋ, le puaa chɔuwa nda toosiaa nyɛ tuwaa lafondaŋndo hoo ni. Kɛ, wanaa kua a nyɛm nyaanaŋndoŋ lɛŋnda, wanaa kua a dɛndɛ choo a o mamɛŋndo wa, doosuaa, vɛlɛ a wanaa kuaŋnuŋ kelaŋndo o fondala yɛyɛlaŋ nda bɛɛ soliŋ nyɛ tuwaa hoo kpeku le nda nɛilaŋ chɔmndo. Balika bɛndoo cho le wanaa pɛɛku haa a nyɔŋ okɔɔ wa. Nyɛ tuwaa hoo tosa hau ndi tɛtɛlɛ le fuuloo o fondaŋ ŋ yeema kɔlaŋndo.

A soliŋ pa foŋndo, kɔmpitɛiyo (ɔdinatɛɛloo), ɔɔ Intanɛtiiyo kpeku? A yiyaŋ pa maa kɛndiaa numndo cho hiouwɔɔ lachi le danda kɛndɛ ŋ cho sɔlaa wo? Ma kela pa o dɛndɛ choo niŋ? Te lende icho ni, mɛɛ num bɛɛ cho tɔnɔɔ sɔlaa tau o nyɔŋ pum niŋ, ŋ wanaa sinaa dɛniaa bɛnduaa toosiaa woŋ. Nduyɛ hei piiliaŋ yoomu numndo o nɛila kɛndɛla bɔɔbɔɔ niŋ.

NAA SINA BƐNDOO KUNDUŊ HAU WA

Wanaa pɛɛku a nyɔŋ okɔɔ wa cho kindiŋndo o nɛi o nɛi niŋ le chɔɔloo sinaa a nyɛm yoomaŋ, vɛlɛ a nyɛm cho yoomu le woŋ okɔɔ. Haa cho vɛlɛ a pɛɛku a nyɛm pɔmbuiinii yoŋ okɔɔ wa. Wanaa pɛɛku a looŋ okɔɔ wa nda cho kindiŋndo le sinaa teleŋ halaa kanduŋ ndo. A cho hiouwɔɔ lachi a pɛɛkoo le sinaa nyɛm wana chi le woŋ, a ŋ wana tiuba ma pilaŋ te woŋ. Wanaa pɛɛku haa a nyɔŋ okɔɔ wa apum yiyaŋ maa te Mɛlɛka nɔ Baabuiyo wo cho pɛ, mɛɛ a nɔ ma che ndu.

Wanaa pɛlnuŋ ladio o nyɔŋ muŋ pɛɛkoo niŋnda, a wanaa nɔ yiyaŋnda iwanachieeya laŋ nda apum cho hiouwɔɔ lachi a pɛɛkoo. Mi Amil D. Aksɛl, wana poonyiaa le wanaa pɛɛku a nyɔŋ okɔɔ wa dimi aa, “wanaa pɛɛku a nyɔŋ okɔɔ wa sɛɛŋgiaa maa Mɛlɛka cho le.” Nyɛ o dimi hoo wo nda cho tolɔɔ kɔɔli ni. Le tamaseliiyo, mi wana pɛɛku a nyɔŋ okɔɔ mbo pialnuŋ ladio wo dimi maa “nyɛ o nyɛ cho mbo chɔm maa Mɛlɛka toosiaa chieeŋndo wo cho achal te.” Apum dimi maa walta Mɛlɛka nɔ Baabuiyo wo tosalaŋ “maŋgalaa” la cho ni, ɔɔ “kaamaa wana nɔla tɛɛsiaa le wo.” *

 Kɛ, ŋ nɔ kuee miŋ nyuna aa, ‘Baa wanaa pɛɛku a nyɔŋ okɔɔ wa pɛɛku pa nyɛkɛndɛi le yamɛi waa naa kiolɔɔ?’ Sakombɔ. Wanaa pɛɛku a nyɔŋ okɔɔ wa tosa niŋ hiouwɔɔ lachioo puɛɛ, kɛ a bɔɔbɔɔ che maa sɔɔŋ cho wɔ tau ŋ nda sina le woŋ, a ŋ nda nɔla ma sina le woŋ. Nduyɛ naapum, a tiu niŋ pɛŋ ba ma sina muŋ te. Mi wana sinaa dɛnɛ bɛndu pilɛ diolaŋ Tiiviŋ Wiŋbɛl dimi aa, “Fɛŋfɛŋ bɛɛ ŋ chii nyɛ o nyɛ sina le.” Mi o cheleŋ diolaŋ Matiŋ Lis, a o pɛɛku a looŋ okɔɔ o lɛŋnde Bilitiŋndeŋ niŋndo diolaŋ Lɔyal poonyiaa aa, “Sɔɔŋ pum cho, fɛŋfɛŋ bɛɛ waŋchieeya bii muŋ bila le.” Wana dimi isɔɔ a tonya, chɔŋ a mɛɛ yoomoo kanduŋ yɛ, mbo kɔ bii a halaa, mɛɛ mɛɛ wanaa pɛɛku a nyɔŋ okɔɔ wa kindiŋ a tiuba ma sina muŋ te. Kɛsiŋndɔ tamaseliilaŋ ndaŋ o kɔl,

  • Wanaa pɛɛku a nyaa yoomaa okɔɔ wa biiyɔ bila mɛɛ yoomoo kanduŋ yɛ le. Nduyɛ, kaamaa cho wɔ nda le sinaa mɛɛ nyɛm taaniŋ tosa mi waŋndo wa yoomu wo sɔla kpaayaa yɛ, mɛɛ ŋ yɔŋgu yooyoowaŋ yɛ, a mɛɛ ŋ piɔuwaŋ tɛɛŋ yɛ.

  • Te a huulu pɛ choo choo, mɛɛ ma tol lɛŋ. Nyɛ pum cho o chieeŋndo niŋ o tosa hei yo. Mi kaamaa bii wanaa pɛɛku a nyɔŋ okɔɔ wa mɛɛ hei looku yɔŋnɔŋ yɛ, a mɛɛ kpaayaa hoo bii paŋgei o fondaŋ ndɔɔ choo choo le halikpeŋ mii wa hiŋnɔŋndo o chieeŋndo choo yɛ.

  • Wanaa pɛɛku a chieeŋndo okɔɔ wa tuu maa nyɛm cho o halaa niŋ nduyɛ, mi maasiila ndalaŋ la bumba le muŋ chɔɔ woŋ, muŋ hiou poloŋ a ŋ nda cha woŋ. A piɔu nyɔŋ muŋ kundalaŋ la tiɔɔŋ. Muŋ cho ni, nyɛm naŋ chi a lehɔl te woŋ, a kpaaya wana chi a lehɔl te wo. Nduyɛ nyɛm cheleŋ cho ŋ wanaa pɛɛku a nyɔŋ okɔɔ wa sina wɔ pɛŋ te woŋ.

Nyɛm cheleŋ cho wanaa Pɛɛku a nyɔŋ okɔɔ wa hɔlla hiŋndo. Le yɛɛ hei cho yɛ suɛi sɔvɛ? Mi wana pɛɛku a nyɔŋ okɔɔ wo poonyiaa aa, “Nyɛm naŋ sina le woŋ hiou poloŋ a ŋ naŋ sina woŋ. Le ya, pɛɛku bɛndoo a nyɔŋ okɔɔ tosa mi kaamaa bii num, nduyɛ hei tosa ma chɔɔlu pɛɛku chalaŋ.”

Teleŋndaŋ lapum, mi kɔndɔfillo bii num te wanaa cho haa pɛɛku bɛndoo a nyɔŋ okɔɔ wa miiŋgu niŋ pɛ o foofu Baabuiyo. Nduyɛ, maa te a faŋa niŋ pɛ laalaŋndo o Mɛlɛka niŋ. te hei yɔŋnuŋ pɛ, mɛɛ yiyaŋndɔ o hei choo. Te o yɔŋ pɛ mi wanaa taasiaa bɛnduaa pɛɛku a nyɔŋ okɔɔ wa sɔla sinapɛŋgoo nyɛɛmbuiinii a maasiila ndalaŋ a chieeŋndo hoo okɔɔ, o wa pa suɛi taasi le ma sɛɛŋgiaa nyɛm nda tiuba le ma che le woŋ? A tonya, le sinaa mɛɛ pɛɛkoo looku kandɔŋ a looŋ okɔɔ yɛ, mi yau nda veelu o puuluei niŋ “Encyclopedia Britannica” wo mɛɛlu dimi aa, “O cho niŋ le suɛi wɔsiŋ 4,000, wanaa pɛɛku a looŋ okɔɔ wa cho yaasiaa le sinaa mɛɛ chieeŋndo cho yɛ, kɛ halaa cho wɔ nyɛ kɔndɔfili bɛndu nuawɔ ko mɛɛ o wa nyɛ kɔndɔfili le Babiloniaŋnda yɛ.”

Seiyaa Chɛhowaa nɔ bɛɛleŋ le di wana o wana fee nɔ le kɛɛsiaa tosaa o suɛi hei choo wo. Ŋ nɔ miŋ kindiŋ le tolɔɔ nyɛ Baabuiyo dimi hoo wo kɔɔli, “La nɔ kɔlta biuvaŋndaŋ a wana o wana.” (Filipiaŋnda 4:5) Lelaŋ naŋ yeema ni miŋ numpila tofa ma che mɛɛ pɛɛku waŋnda cho hoo a nyɔŋ okɔɔ wo chɛlaŋ a Baabuiyo yɛ.

^ pɛl 9 Apum kɛɛ nyɛ Baabuiyo dimi wo kanifuule, chɔŋ o sindɔɔ niŋ mbo huŋ bii a hau, kaŋnde cho waŋnda pɛɛkoo maa chieeŋndo sim o halaa tɛɛŋ. Nduyɛ maa, o palɛi naŋ niilu miŋ lɔl le iŋɔmpum niŋ Mɛlɛka toosiaa chieeŋndo ni. Tofa kɔfoo Baabuiyo a Tonya Wanaa Pɛɛku a Nyɔŋ Okɔɔ Wa Dimi Wo.”