Mi chaŋyaŋ cho kpɛɛluŋ ndoŋ suukaŋ lɔɔlɔɔ. Te a wa pɛ naapilɛ, o foŋndo choo, ma poonyiaŋ yaulaŋ, ma suukaŋ o vidueiyo choo te teleŋndo chɛl nda pɛ. Lelaŋ, le miŋ sɔɔŋguu Mɛlɛka ikɛi kpɛɛluŋ, ŋ nɔ miŋ wa suukaŋndo a ndu lɔɔlɔɔ. Kɛ vɛɛ naŋ tosa yɛ hei?

Ŋ suukaŋ a Mɛlɛka o piɛileŋ niŋ. Piɛileŋ naa Mɛlɛka cha cho nyɛpilɛ a balta yɔŋaa naŋ duau a sulaŋ naa wo le. Ŋ nɔ miŋ sina pɛŋgu maa te ŋ wa pɛ piɛileŋ, o Wana Toosiaa naa wo lo naŋ cho koŋ suɛi ni, Mɛlɛka Kpou Kpou wo. Hoo mala naa miŋ piɛi a bɛɛlɛ bɛnduleŋ pila. Le mi Mɛlɛka tuei piɛile naaleŋ, ŋ nɔ vɛlɛ miŋ komal suiliŋndaŋ lapum. Tofawɔ la yaa.

O tasoo, ŋ nɔ miŋ piɛi o Chɛhowa Mɛlɛka lo sanaa, o cho o Chiisu lo le, kɛlɛŋgaa niŋ te “wanaa diandaa,” ɔɔ velaŋ ndɔɔ. (Ɛsodɔɔ 20:4, 5, NW) Baabuiyo dimi kpendekele aa, “La nɔ buulaŋ o isɔɔ o isɔɔ niŋ te. Nduyɛ isɔɔ o isɔɔ nya va Mɛlɛka piɛiyo le ndi pɛ, la chɔm ndu nyɛ nya hau ba le ndu wo. Nduyɛ pɛŋgu o pɛŋgu nya va ndu nyunaa le nyɛ o nyɛ pɛ, la mel ndu balikaa.” (Filipiaŋnda 4:6) O diiŋ ndɔɔ, ŋ nɔ miŋ piɛi o diola Po Mɛlɛkaa niŋ, Chiisu Kiliti. Mi Chiisu pila tɛɛsiaa aa, “Wana o wana nɔla mbo fuuluu naa Mɛlɛka Finyaa chua le mɛɛ o sabu nuu niŋ.” (Chɔŋ 14:6) Ŋgaa ndɔɔ, piɛile naaleŋ le nɔ mi le chɛlaŋ a hɛnaŋ Mɛlɛkaa. Baabuiyo dimi aa, “Ŋ sina maa pɛŋgu o pɛŋgu te ŋ nyuna ndu le nyɛ o nyɛ pɛ, nduyɛ mbo va o hɛnaŋ ndɔɔ niŋ pɛ, nilaŋ o yaŋ naa ni.” * (Naapila piimiaa ndu diki diki ni.)—Chɔŋ Tasoo 5:14.

Wanaa cho o chaŋyɛi niŋnda tuɛi chaŋyɛi yeela te suukaŋndo wa nda pɛ tɛɛŋ lɔɔlɔɔ

Te wanaa ŋiɔɔŋ wa pɛ o chaŋyɛi niŋ, kɛ waŋndo opilɛ koni suaa o chaaŋ ndɔ lo ni, o wa ikala le mi chaŋyɛi keŋ viou nda tɛɛŋ. Mɛɛ wanaa cho o chaŋyɛi niŋnda tuɛi suukaŋndo yeela yɛ, ŋ nɔ miŋ chɛl mi Mɛlɛka soo o naa lo, nduyɛ miŋ yaŋ ndu nilaŋ te o wa suɛi pɛ. A sina pa mɛɛ Mɛlɛka suaa o naa lo yɛ?

Mɛlɛka suaa hau o naa lo sanaa a Diom ndɔɔ, ndu cho Baabuiyo ni. (Timoti Diiŋ Ndɔɔ 3:16, 17) Le yɛɛ naŋ dimi yɛ naa? Le tamaseliiyo, te o wa pɛ mi chaaŋ num kaala wo poonyial num yauwo ma chii nua leniŋ, ma dimul wanaa cheleŋ a kɔl kɛndɔɔ aa, “I laŋga suukaŋ suŋ suŋ a chaaŋ nuu!” I cho tonya maa o cho suukaŋ lasondo le, kɛ o yauwo niŋ. Lende koni, te ŋ wa pɛ diomndaŋ nuaa o Baabuiyo niŋ, mɛɛ suukaŋndo naŋ cho koŋ a Chɛhowa ni. Le hei, mi China, o naŋ soo a ndu okɔɔ o buŋgɛi tasei niŋndo dimi aa, “I che maa te I yeema pɛ mi Mɛlɛka chua ya maa chaaŋ ndɔ, I nɔ mi yaasiaa ‘yau’ o poonyial naa wo, Baabuiyo.” Mbo chɔɔlu dimi aa, “Diomndaŋ veeloo o Baabuiyo niŋ lepaa o lepaa tosa mi sɔɔŋguu Mɛlɛka ikɛi kpɛɛluŋ.” A cho pa diomndaŋ veeloo o Baabuiyo niŋ lepaa o lepaa le mi Chɛhowa soo o numndo lɔɔlɔɔ? Hei tosaa mala num ma sɔɔŋguu Mɛlɛka ikɛi kpɛɛluŋ.

^ pɛl. 5 Le chɔɔloo sinaa mɛɛ naŋ looku miŋ sɔɔŋguu Mɛlɛka ikɛi kpɛɛluŋ o piɛileŋ niŋ yɛ, tofawɔ buŋgɛi 17 o yauwo hoo niŋ, Yɛɛ Kpeekpei Baabuiyo Pɛɛku Yɛ? Seiyaa Chɛhowaa soli ndu ni.