‘Ŋ cho machuaa maa faluŋ yɛyɔŋ o dialuŋ pilɔŋ niŋ.’—ƐFI. 4:25.

1, 2. Yɛɛ Mɛlɛka yeema yɛ le wanaa cho ndu piɛiyo wa, chuaambɔ ni bɛndu ni?

FELEŊGƆNƆƆ ŋ cho ni? Te o yɔŋ pɛ aa lende, mɛɛ kɛsiŋ o kɔl maa a cho wana sɔvɛ le waa waŋndo opilɛ o kunda Chɛhowaa tɛɛŋ chieeŋndo balɔɔ silɔ. O lɛŋii bɔɔbɔɔ niŋ, o wanaa sɔla yiŋɔɔ wa tɛɛŋ, feleŋguaa hiau. Nuawɔ suɛi kɔl kɛndɛ se le chɔɔ feleŋguaa a hɔbɛi Chɛhowa piɛiyo diompilɛ nda wanaa yɔŋguŋ o Chɛhowa lo le ndu piɛiyo wa!

2 Num feleŋgɔnɔɔ, a naŋ pa kɔl le waa diompilɛ a feleŋguaa cheleŋ? Kɛlɛŋgaa dɔɔ ma naŋ kɔl. Lepum nyaale naŋ sɔla wo fula o chuuŋgiaŋ naŋ chuuŋgiaŋ a lambila naalaŋ ndo. Kɛ, o yɔŋ bɛɛ aa feleŋguaa naŋ cho ni ɔɔ yuuwa, nduyɛ mɛɛ mɛɛ kɔɔlima naŋ ma wa, Mɛlɛka yeema naa miŋ wa diompilɛ o ndu piɛiyo niŋ. Mi kiilanɔɔ Pɔɔl poonyiaa maa hɛnaŋ Mɛlɛkaa cho ni maa, “waŋnda kpou a sɔla pioŋɔɔ, nduyɛ, ma sina tonya cho a ndu okɔɔ wo.” (Tim. Tasoo 2:3, 4) Sɔɔŋ Chɔɔmaŋndoŋ 7:9 dimul naa mɛɛ wanaa cho Mɛlɛka piɛiyo wa cho “fula o lelɛŋ o lelɛŋ, a lekaa o lekaa, a waŋnda suu o suu, a isɔɔ o isɔɔ maŋgalaa” niŋ yɛ.

3, 4. (a) Kaa suu kuɛɛ cho yɛ hau feleŋguaa bɔɔbɔɔ tɛɛŋ? (b) O kuɛɛ chɛlaŋ yɛ a Ɛfisiaŋnda 4:25?

3 Nuawɔ teŋgeŋ bɛndu se feleŋguaa cho Chɛhowa piɛiyo wa  tɛɛŋ a haa o chieeŋndo niŋ! Wanaa bɔɔbɔɔ a cho Chɛhowa piɛi le wa nɔ kaayei. O nyɛ nda yeema wo choo kinɛi nda handu kɔllo ni. Wanaa yaasiaa ŋsɔɔŋ wa veelu waŋnda teleŋndo hoo aa, “Ya Koni.” Mɛɛ nda suaa yɛ, a mɛɛ nda chuɛɛnuŋ yɛ, chɔm maa teleŋ wanaa velu nda wa wa o nyumndaŋ niŋ, nduyɛ ma dimul nda maa “teleŋ ndaa hiounuŋ.”

4 Kaa suu waa naa balu naa silɔ. Le hei, mi feleŋguaa cho Chɛhowa piɛiyo wa che ndi ikala kpoke le kaa hoo kpeeŋaŋndo le yiyaŋ Mɛlɛkaa chɛlɔɔ. O wɔsiŋ kɛmɛ tasoŋ niŋ bɛɛ, mi Pɔɔl cha ndi suɛi sɔvɛ le chaaŋaa nduaa laalaŋnda silaa le ma kpakpala sɔɔŋ tosaa “mɛɛ waŋnda o chieeŋndo niŋ a tosa sɔɔŋ yɛ.” Nduyɛ, lende ‘nda wa ni.’ (Nuawɔ Ɛfisiaŋnda 2:1-3.) Feleŋguaa che ndi maa icho suɛi kɛndɛ le kaa koŋ kpakpalaa, okoŋ ma tosa wallo a puaapiliaa ndaa diompilɛ wa, nɔ ma sɔla chandɔɔ. Kaa suu waa naa chɛlaŋ a nyɛ Pɔɔl dimi wo aa, ‘Naa fau ŋ cho machuaa maa faluŋ yɛyɔŋ o dialuŋ pilɔŋ niŋ.’ (Ɛfi. 4:25) Mɛɛ naŋ cho niŋ naa o mɛɛlula chieeŋ paandoo hoo kpɛɛluŋ yɛ, icho bɔɔ suɛi sɔvɛ le miŋ tosa wallo diompilɛ. Ŋ yaasiaŋndɔ tamaseliilaŋ o Baabuiyo niŋ lapum. La cho naa mala miŋ sina maa icho suɛi sɔvɛ le miŋ wa diompilɛ.

A WA DIOMPILƐ

5, 6. Yɛɛ naŋ pɛɛku yɛ a diompilɔɔ okɔɔ, a mɛɛ naŋ che kpendekele o bundɛi Lɔtu ve a chuaa nduaa laanduaa yɛ?

5 O sindɔɔ niŋ, Chɛhowa wa a kɔl kɛndɛ le wanaa nduaa mandaa. O teleŋ nyɛ kindilaa bɛŋgu, a wa diompilɛ ma wa maaliaŋndo vellaa velle. Wanaa Mɛlɛkaa hau bɛɛ, chuaambɔ ni bɛndu ni, pɛɛku isɔɔ o tamaseliila cho o Baabuiyo niŋndaŋ. Opilɛ cho Lɔtu ni.

6 Lɔtu nda yuŋgu ndɔɔ wa o kpundɛ bɛndu niŋ kanifuule, chiee bɛndu nda wa niŋndo Sodɔm, ndoo nɔ le tambei sɔlaa. Mi maalikɛiya a toolu Lɔtu le ma nyaanuŋ ma kuɛ kɛ o pemboŋ yɔŋi nda sɔla piɔmndo. Ma dimul nda aa, “La nyaanuŋ, yɔŋi nya sɔla piɔmndo!” (Kan Ch. 19:12-22, NW) Mi Lɔtu diikuŋ, nduyɛ mi chuaa nduaa laanduaa chɛl ndu diom le fulaa o chiee koŋ niŋ. Kɛ aa ya, wanayaŋ ndaŋ ŋpum tui nda diom te. Kɛ lefuaa nduaa ndaa nɔ le chuaawaa nduaa chuaa o nɔɔ niŋnda, “nda aa cha ko bɛɛ aa mamɔɔlaŋ o va dimioo ni.” Mi hei tosa ma sɔla piɔmndo. (Kan Ch. 19:14) Lɔtu nda chuaa nduaa laanduaa wa diompilɛ wa koni kinda ni.

7. Vɛɛ Chɛhowa mala yɛ wanaa wa diompilɛ wa teleŋ Isɔluɛiya wa fulaa Ichipi wo?

7 Ŋ yaasiaŋndɔ tamaselii cheleŋ. Mɛɛ Isɔluɛiya mal Ichipi, a diinuŋ a lakunda le kɔŋndaŋ a ba nda le. Nduyɛ mɛɛ Muuse ‘yulu tinda ndɔɔ o pee mɛŋma siaŋaa choo,’ mi Chɛhowa piɔu pioo tɛɛŋ, Muuse kue ndu pilɛ kpe, ɔɔ a Isɔluɛiya nyɛɛmbɔ koni le. Kɛ o manda Chɛhowaa bɛŋgu, mi kunda bɛndu koŋ kpou keeku pee koŋ tɛɛŋ. (Ɛs. 14:21, 22, 29, 30, NW) Ma chɔm kaa diompilɔɔ, nduyɛ mi “wanaa bɔɔbɔɔ cheleŋ” a ve Isɔluɛiyaa le wa tual nda kɔɔli. (Ɛs. 12:38, NW) Ŋ dimi wɔ maa mi waŋnda apum, kɛlɛŋgaa le feleŋguaa, ndaa kuɛŋnuŋ a ba nda, mi ndaa keekuŋ a nɛi cheleŋ maa ndu hiou bɛnda. Baa hei ndii vil idiɔm te, te ndaa chua pɛ nɛiyo a ba nda le fulaa o manda Chɛhowaa bɛŋgu le?—Kɔl. Tasoo 10:1.

8. O teleŋ Chɛhosiafa wo niŋ, vɛɛ wanaa Mɛlɛkaa chɔm yɛ maa a wa diompilɛ?

8 O teleŋ Masaa Chɛhosiafa wo niŋ, mi wanaa chɔuwaa dialuŋ kala kalaa, “faŋga bɛndoo” a fula o fondala yɛyɛlaŋ nda huŋ balu wanaa Mɛlɛkaa le nda delɔɔ cho a chɔuwo (Koloniku Diiŋ Ndɔɔ 20:1, 2, NW) Wanaa Mɛlɛkaa nɔ ma sɔla chandɔɔ, kanifuule a kindiŋ ma chɔulaba wanaa kaŋ o kpaaya ndapila niŋ te. Kɛ, ma muliŋ o Chɛhowa lo le malaa. (Koloniku Diiŋ Ndɔɔ 20:3, 4, NW) Nuyɛ a tosa vɛlɛ lende a pilɛŋ pilɛŋ te, mi wana o wana fee tosa mɛɛ o yiyaŋ yɛ le. Mi  Baauiyo dounuŋ naa kona aa, “Puaa kpou o lɛŋnde Chudaleŋ niŋ, kɔ bii a chuauwaa ndaa, a laandaa ndaa, wa isisi Chɛhowa lachi.” (Nuawɔ Koloniku Diiŋ Ndɔɔ 20:13, NW.) Chuaambɔ ni bɛndu ni, wa diompilɛ le tiindaŋndo dɔuwɔɔ o Chɛhowaa niŋ le nɛi chɔmaa ndɔɔ tolɔɔ kɔɔli, nduyɛ mbo piŋi nda yaamɔɔwaa ndaa o ba. (Koloniku Diiŋ Ndɔɔ 20:20-27, NW) Vɛ, hoo cho tamasi kɛndɛ le naa chɔmndo mɛɛ naa wanaa Mɛlɛkaa nɔ miŋ chɔulaba simultaŋ yɛ le?

9. Yɛɛ naŋ pɛɛku yɛ a diompilɔɔ okɔɔ o nyɛ, a kaa Kilisiɔŋnda sindɛ tosa wo niŋ?

9 Kilisiɔŋnda sindɛ bɛɛ a wa wallo o diompilɔɔ niŋ. Le tamaseliiyo, mɛɛ Chuuwa a wanaa ve ŋChuu le wa simnuŋ Kilisiɔŋnda, ma “hiau lachi a tosaa nyɛm wanaa Chiisu vem hɔlte ndɔ wa pɛɛku nda wo. Ma piɔviaŋ nyɛm nda nɔ woŋ, nyɛdiaa dioo latulu, a Mɛlɛka piɛiyo diompilɛ.” (Walta Wa. 2:42, NW) O teleŋ nda wa o tɔɔndaŋndo bɛŋgu wo kpeekpei nda chɔm diompilɔɔ hoo ni. Nduyɛ, o boondii keŋ bɛŋgu kɛsɛ ndaa yeemaŋ vellaa velle ni. (Walta Wa. 4:23, 24) A chɛl maa, o bɛnda miŋ tosa wallo diompilɛ o teleŋnda nyɛ kindilaa niŋ te?

Ŋ WAŊNUŊ DIOMPILƐ MƐƐ PAALE CHƐHOWALEŊ LE CHO NIŊ NAA KPƐƐLUŊ YƐ

10. A boondii kuɛɛ kpeekpei diompilɔɔ bɛnda yɛ mbo wa?

10 Boonduŋ nyɛ kindilaa komal waŋchieeya woŋ ipilɛ cho niŋ kpɛɛluŋ. Mi wana suaa le Mɛlɛka wo Choɛl tɛɛsiaa paaleŋ ndeŋ maa, “paale nyumndaŋ ma tual niŋ kpiŋgbi leŋ” le cho ni. (Choɛl 2:1, 2; Sɛf. 1:14, NW) Le wanaa Mɛlɛkaa nda, paale nda wa niŋ diompilɛ leŋ le cho ni. Loonuŋndɔ diomnda Chiisu dimi laŋ, “Masale o masale piɔuwaŋ pɛ tɛɛŋ, le sɔla tambei.”—Mat. 12:25, NW.

11. Yɛɛ nda tuu yɛ o Chondei 122:3, 4 (NW) niŋ, o wanaa Mɛlɛkaa hau duau o wali niŋndo? (Tofa fotueiyo o peele naŋ kandu leŋ choo.)

11 Boondii chieeŋndo hoo fuuluu niŋ le tambei sɔlaa ve, o bɛnda bɔɔ miŋ wa diompilɛ. Diompilɛ naŋ yeema o Mɛlɛka piɛiyo niŋndo nɔ mbo wa mɛɛ ndaa taŋgul naa chiɛilaŋ o Chulusalɛm niŋ sindɛ chikpi chikpi yɛ. Lelaŋ wana ŋchondoo veelu Chulusalɛm ni maa, “chiee taŋguluŋ naapilɛ wo.” Keŋ tosa ni mi wanaa wa o chiee koŋ niŋnda wa maaliaŋndo, a maandiaŋndo vellaa velle. Le handɔɔ lechoo, diompilɛ ndaa cho ko mɛɛ “yuŋgula Chɛhowalaŋ” kpou o kaaleŋ Isɔluɛi niŋ ndaa chuuŋgiaŋ le ndu piɛiyo yɛ. (Nuawɔ Chondei 122:3, 4, NW.) Hau, vɛlɛ a teleŋ palɛi nyɛpalaa fuuluu niŋndo, naa bɛɛ nɔ miŋ wa maa “chiee taŋguluŋ naapilɛ wo.”

12. Yɛɛ cho yɛ naa mala le miŋ sɔla pioŋɔɔ te Kɔɔki chiŋalaŋ pɛ wanaa Mɛlɛkaa?

12 Le yɛɛ icho yɛ wa suɛi sɔvɛ le waa diompilɛ maa “chiee taŋguluŋ naapilɛ wo” a boondii keŋ? Mi Ɛsikiɛl bolle 38 suaa a “Kɔɔki cho o lɛŋnde Mekɔɔkileŋ niŋndo” okɔɔ maa, o cho wanaa Mɛlɛkaa chiŋalaŋ. Ŋ nɔ miŋ chɛl mi nyɛ o nyɛ piɔu naa tɛɛŋ a teleŋ koŋ te. O bɛnda vɛlɛ miŋ muliŋ o chieeŋndo lo le malaa le. Kɛ, ŋ yeema miŋ holnuŋ chaŋaa naa laalaŋnda kpɔleŋ. Hoo chɔm naa maa ŋ wa pɛ kunda ŋ sɔla pioŋɔɔ le. Chɛhowa nda Po ndɔɔ, wanaa veelu diola Chɛhowalaŋ nda kinɛi nda cho piŋi ni o boondii nyɛpalaa keŋ bɛŋgu. (Choɛl 2:32, NW; Mat. 28:20) Kɛ, o bɛnda pa miŋ yiyaŋ maa wanaa cho diompilɛ a wanaa Mɛlɛkaa le wa, a choŋnuŋ o ba ndaa choo wa, sɔla niŋ pioŋɔɔ le?—Mai. 2:12, NW.

13. Yɛɛ feleŋguaa nɔ siooŋii Mɛlɛkɛi ya pɛɛku yɛ o sɔɔŋ naŋ yaasiaa muŋ ndoŋ niŋ?

13 Vɛ, hei cho kpendekele le sinaa maa i wa idiɔm le miŋ tol feleŋguaa mal wanaa Mɛlɛkaa wa kɔɔli ma waŋnuŋ a ba nda o chieeŋndo niŋnda le? Naa kpou, chuaambɔ ni bɛndu ni, ŋ cho niŋ kpɛɛluŋ o teleŋ i yeemaŋ le miŋ wa diompilɛ wo. A tonya kɛsɛ, teleŋndo fuuluu hoo ni le miŋ pɛɛku wallo tosaa diompilɛ, le miŋ nuuviaa diompilɛ yeemaŋ le palɛi cho naa lachi ve.

 ‘Ŋ CHO MACHUAA MAA FALUŊ YƐYƆŊ O DIALUŊ PILƆŊ NIŊ’

14, 15. (a) Yiyaŋ yɛɛ cho yɛ Chɛhowa o kɔl mbo wa hau feleŋguaa a kaasoŋnda pɛɛkoo? (b) Sila yɛɛ Chɛhowa cho yɛ naa kioo le naa dɛɛniaa miŋ wa diompilɛ?

14 Chɛhowa cho naa malaa “le miŋ piɛi ndu o diompilɔɔ niŋ.” (Sɛf. 3:8, 9, NW) O cho naa pɛɛkoo le miŋ bɛnda o sabu ndɔ fɛɛŋ fɛɛŋndo niŋ. Yɛɛ cho yɛ sabu koŋ? Sabu ndɔɔ cho ni, le “mbo chuuŋgiaa muŋ diom pilɛ mi Kiliti va muŋ bolleŋ kpou.” (Nuawɔ Ɛfisiaŋnda 1:9, 10.) O yeema kɛsɛ mbo chuuŋgiaa wanaa yeema diompilɔɔ o chieeŋndo choo wa kpou diompilɛ. Nduyɛ, o cho hei ba tiu. Num feleŋgɔnɔɔ, hei mala num le sinaa maa o bɛnda ma tosa wallo diompilɛ a kɔɔna Chɛhowaa le?

15 Chɛhowa cho naa pɛɛkoo le miŋ sɔla diompilɔɔ suŋ suŋ, nduyɛ miŋ nɔ o kɔl le waa diompilɛ lefafɛɛŋ. Mi Baabuiyo miŋgi sondoo lechoo daandi daandi le miŋ wa “maandiaŋndo . . . vellaa velle,” miŋ “kaaliaŋ vellaa velle,” miŋ “dɛɛniaŋ kɔltaŋ vellaa velle,” nduyɛ miŋ “va maaliaŋndo vellaa velle.” (Kɔl. Tasoo 12:25; Luom. 12:10; 1 Tɛs. 4:18; 5:11) Chɛhowa sina maa wanaa lahakiaa Kilisiɔŋnda cho ni. Le hei, mi i kendu teleŋndo opum kpoke le waa diompilɛ. Lelaŋ, ŋ nɔ miŋ tosa wallo kalaŋ le miŋ “malnaŋ lahaki vellaa velle.”—Ɛfi. 4:32.

16, 17. (a) Ɔɔ saboo opilɛ le bɔŋaŋnda leKilisiɔŋndaŋ? (b) Yɛɛ feleŋguaa pɛɛku yɛ a Chiisu okɔɔ teleŋ o wa feleŋgɔnɔ wo?

16 Chɛhowa ke naa vɛlɛ kundala leKilisiɔŋndaŋ le naa malaa miŋ pɛɛku le waa diompilɛ. Teleŋnda bɔɔbɔɔ ŋ nua niŋ diomnda kɔl dɛɛniaala cho o Hibuluiya 10:24, 25 niŋndaŋ. Sabu chuuŋgiaŋ ndaŋ opilɛ cho ni, le miŋ “nuuviaŋ nɛila naa ŋ nɔla mi ŋ kpeeŋiaa chaaŋaa naa vellaa velle le waŋnda kaalaa a sɔɔŋ kɛndɔŋ tosaa laŋ.” Lelaŋ icho suɛi sɔvɛ le bɔŋaŋndaŋ biyɔɔ, le halikpeŋ miŋ “dɛɛniaŋ vellaa velle a tiindaŋ naa ŋ nɔ o Mɛlɛka niŋ ndo okɔɔ.” ‘Taama naapila cho niŋ chɔɔ maa paale Masanɔɔ nɔ le miiŋgoo naŋ ndeŋ le cho niŋ kpɛɛluŋ.’

17 Mi Chiisu kɛsul naa tamasi kɛndɔɔ o feleŋgɔyɛi nduɛi niŋ a kɛɛsiaa hoo okɔɔ. Mɛɛ o wa wɔsilaŋ 12, o wa a wanaa velu ndu wa latulu o bɔŋaŋ bɛndoo choo le Mɛlɛka piɛiyo. Teleŋndo opum, mbo luusiaŋ. Kɛ o cho kelaŋ te ndoo kuɛ o chaaŋaa nduaa feleŋguaa lo le. Mɛɛ Choosɛ nda Meele saaluŋ ndu, o wa baltaŋ a sɔɔŋ Mɛlɛkaŋ okɔɔ nda wanaa bɛnduaa pɛɛku waŋnda o maaŋndo niŋnda.—Luk. 2:45-47.

18. Vɛɛ piɛile naaleŋ le mala yɛ naa miŋ wa diompilɛ?

 18 O cho ko kaaliaŋndo vellaa velle, a kɔlaŋ o bɔŋaŋnda naala leKilisiɔŋndaŋ te hivi diompilɛ naa lachi le. Kɛ ŋ nɔ vɛlɛ miŋ piɛi le chaaŋaa naa laalaŋnda vellaa velle. Te ŋ wa pɛ piɛileŋ o Chɛhowa lo a chaaŋaa naa laalaŋnda okɔɔ, ŋ nɔ miŋ dimul ndu nyɛ nda hau ba wo. Koŋ chɔm ni maa ŋ buulaŋ le naapila vellaa velle. O cho ko kaasoŋaa Kilisiɔŋnda le nɔ kuee ma tosa hei le. Te feleŋgɔnɔɔ ŋ cho ni, a cho pa teleŋ numndo chuaa le sɔɔŋ muŋ tosaa le yuŋgu num leKilisiɔŋndo naŋnɔŋndo ikɛi kpɛɛluŋ? Te a tosa lende pɛ, o cho num mala le kiɔɔ waa o naa chieeŋ paandoo hoo cho lebɛŋgu wo.

Naa kpou, ŋ nɔla miŋ piɛi le chaaŋaa naa laalaŋnda (Tofa pɛl 18)

CHƆMNDO MAA ‘FALUŊ YƐYƆŊ’ NAŊ CHO ‘O DIALUŊ PILƆŊ NIŊ’ NI

19-21. (a) O nɛi kuɛɛ choo naŋ chɔm yɛ maa ‘faluŋ yɛyɔŋ o dialuŋ pilɔŋ niŋ’ naŋ cho ni? Chɔmndɔ tamaseliilaŋ. (b) Yɛɛ ŋ pɛɛku o mala puaapiliaa yɔŋgu o teleŋ lakpundɔɔ niŋndo?

19 Wanaa Chɛhowaa cho niŋ tosaa nyɛ dimiŋ o Luomaŋnda 12:5 niŋndo. ‘Wanaa laalaŋaa cho a chiŋaa vellaa velle o dialuŋ pilɔŋ niŋ nda naŋ cho ni.’ Ŋ cha hei tonya te kpundɔɔ del pɛ. A Yindimiiyo o wɔsi 2011 niŋ, mi hueiyii bɛndu bɛnduei hɔŋ mii tosa mi mɛŋndaŋ ma huŋ tau o lɛŋnde ibuŋgaleŋ diolaŋ Miŋdanawo o Filipiŋ niŋ. O nyumndaŋ ma pilɛ niŋ kpe, chiɛilaŋ 40,000 la mɔɔva ni, a la puaapiliaa naa la hɔbɛi. Kɛ, mi lɛuve duaunuŋ kona maa “tuupa mi kunda yɔŋgu malaa wo kandu wali ndaa tosaa, puaapiliaa o fondala cheleŋ wa niŋ malaa yɔŋndo.”

20 Lende koni, mɛɛ lɛŋndeŋ le nyiiya Chepaŋ ba paaleŋ le chaŋndo, nduyɛ mi hueiyii wɔɔŋ wɔɔŋnde hɔŋ, puaapiliaa a ndepiliaa bɔɔbɔɔ mi nyɛm ndaŋ tambu. Apum mi nyɛ o nyɛ basuŋ fɛl. Ndepilɛnɔ naa pilɛ diolaŋ Yoshiko, mi chiɛi ndɔɔ tambu. Chɔŋ naa chiɛi ndɔɔ wa wa le kɔlaŋ o Toŋgo Lepiɛiyo, o wa suɛi kilola 40. Mbo dimi aa, “Diimandɔɔ pilɔɔ, mi kɔndɔfillo bii naa mɛɛ naŋ che buɛi ibuŋgaa nda puaapilɛnɔ cheleŋ naa nuuviaa.” Mbo mam muɛɛŋ mbo chɔɔlu dimi aa, “Ŋ naŋ bɔɔ kɔl le mɛɛ naŋ sɔla nyɛm mala le chaŋyɛi nɛi a Mɛlɛka wo ŋ hɔbɛi o kundaa niŋ yɛ. Le handɔɔ lechoo, miŋ sɔla domalaŋ, samtalaŋ, a bɔlɔlaŋ.” Mi waŋndo opilɛ o wanaa yɔŋgu malaa wa tɛɛŋ dimi aa, “Mi puaapiliaa o Chepaŋ niŋ kpou duau balaŋ diompilɛ ma wa maaliaŋndo vellaa velle. Mi puaapiliaa fula Amɛlika pɔ ma huŋ le malaa. Mɛɛ nda nyuna nda le sabu nda fula naa levilaa kaŋ ndo, ma muli aa, ‘Ŋ cho diompilɛ naa chaaŋaa naa laalaŋnda Chepaŋ, nduyɛ a yeema malaa.’” Vɛ, a kilu yoŋgaa le mɛɛ ŋ cho o kɔɔna waa ndoo niŋ o buulaŋ le opilɛ a cheleŋndo wo le? Numpila bɛɛ chɛl kɛsɛ maa Chɛhowa naŋ kɔl le kaa diompilɛ waa naa chɔɔ.

21 Kaa waa naa nɔɔ suŋ suŋ mala naa miŋ bɛɛndiaŋ le nyɛpalaa cho o chilaŋ niŋndo simullo diompilɛ, o yɔŋ bɛɛ miŋ ve lɛ puaapiliaa o lɛŋii cheleŋ niŋ tueiyɔɔ tɔɔ le. Te ŋ chɔm pɛ kaa suu waa naa, mɛɛ pɛɛkoo naŋ cho koŋ ni le simulta komal niŋ naa laŋ te chieeŋndo hoo wa pɛ chuwɔɔ. Mi wana kinda o hueiyii wɔɔŋ wɔɔŋnde bɛŋgu Chepaŋ ndo diolaŋ Fumiko dimi aa, “Mɛɛlulaŋ la cho niŋ kpɛɛluŋ. Ŋ nɔ miŋ hiou lachi a puaapiliaa naa malaa haaa mi teleŋ kpundɛla ve lɛ niŋ te wo fuuluu.”

22. Tɔnɔ kuɛɛ cho yɛ o chilaŋ niŋ le Kilisiɔŋaa cho diompilɛ wa?

22 Chuaambɔ ni bɛndu ni, a cho kindiŋndo suŋ suŋ le waa diompilɛ. O kpeekpei niŋ, bɛɛndiaŋndo nda cho hoo ni le pioŋɔɔ sɔlaa o chieeŋ dɛnɛ wɔɔŋ nɔ hoo diompilɛ le wo niŋ. Maa sindɛ, Mɛlɛka cho wanaa nduaa kiindiaa. (Ais. 52:9, 10, NW) Lɔɔlɔɔ kɛsiŋ o kɔl maa a wa niŋ wanaa cho kindaa sɔla wa tɛɛŋ, te a kindiŋ pɛ le waa diompilɛ a wanaa Mɛlɛkaa. Nyɛ cheleŋ mala wo cho ni, chɔɔloo balika melaa chɔmndo le nyɛ naŋ sɔla wo. Buŋgɛi cho lachi ve cho naa hei tɛɛsial.