“Naa naa nyina Mɛlɛkaa naŋ sɔla ni, le mbo tosa miŋ sina nyɛm Mɛlɛka ke naa woŋ pɛŋgu.”—KƆL. TASOO 2:12, NW.

1. Yɛɛ waŋnda apum dimi yɛ teleŋndaŋ lapum?

WANAA bɔɔbɔɔ tuei niŋ waŋnda dimioo aa, ‘A sina mɔnɛi viiyo le mɛɛ mi kala num vi.’ A yiyaŋ niŋ pa lende teleŋndaŋ lapum? Te waŋndo sɔla pɛ nyɔɔŋ pum o chuaambɔyɛi nduɛi niŋ, lepum, o chi muŋ maa nyɛm sɔvɛ le. Le tamaseliiyo, wana sul hoo o yuŋgu nyɛsɔlaa niŋndo, o chi nyɛm nda nɔ tau woŋ maa nyɛm sɔvɛ le. Hei yɔŋnuŋ a feleŋguaa apum ni. Le mɛɛ nda nɔ taasi le yɛ, a sina kpeekpei nyɛm sɔviɔŋ o yoomoo niŋ te.

2, 3. (a) Yɛɛ Kilisiɔŋaa feleŋguaa nɔ yɛ ma wa yekeŋ le kpakpalaa? (b) Yɛɛ mala yɛ naa miŋ bii nyɛ naŋ sɔla wo nyɛkɛndɛi?

2 Te feleŋgɔnɔ fuuluu wɔ wɔsilaŋ 20 te wo ŋ cho ni, ɔɔ a hiouwɔ ko wɔsilaŋ 20 choo, yɛɛ ŋ che yɛ o sɔvɛ o yoomu numndo niŋ? Feleŋguaa tau o chieeŋndo niŋ, yoomu nyɛm kiɔɔ nda yeema ni. Wali nda sɔla sala bɛndoo wo, chiɛi kɛndɔɔ, a nyɛm mapuuluŋ kɛndɛ kɛndɔŋ nda yeema ni. Kɛ te muŋ cho nyɛm sɔviɔŋ o yoomu naa niŋ ni, mɛɛ ŋ bendu nyɛ sɔvɛ bɛndoo opum. Ndu cho sul iMɛlɛkayaa ni. I cho suɛi imɔnɔ maa waŋnda o miiliɔŋndaŋ niŋ kendu wɔ hei nuuviaa hau le. Nya feleŋguaa, te o tonyaa ikɛi wanaa nyaa velu nya ni, la wa yekeŋ  yɔŋi nya kɛɛ nyɛmkɛŋ iMɛlɛkayaŋ sɔvɛ nya sɔla nda o ba woŋ. (Mat. 5:3) Ke sɔviɔɔ hoo kiɔɔ biyɔɔ nyɛkɛndɛi nɔla mbo chuu num fulamakɔɔli wɔɔŋndo o yoomoo niŋ.

3 A nɔla ma kɛɛlu hei yɔŋnɔŋndo. Yɛɛ mala yɛ num le ma kaala nyɛmkɛŋ iMɛlɛkaya ŋ sɔla woŋ? Ŋ yaasiaŋndɔ tamasilaŋ lapum o Baabuiyo niŋ miŋ che le sabu icho suɛi taasi le biyɔɔ nyɛkɛndɛi nyɛmkɛŋ naŋ sɔla Mɛlɛka o ba woŋ. O cho ko feleŋguaa le tamasilaŋ ndaŋ la cho mala le, kɛ le mi Kilisiɔŋnɔ kɛ kɛ kaala nyɛ o sɔla o Mɛlɛka piɛiyo niŋndo.

A BII NYƐ NDA SƆLA WO NYƐKƐNDƐI LE

4. Yɛɛ Samiɔŋ Tasoo 8:1-5 chɔm yɛ a puaa Samiɔŋ nda okɔɔ?

4 Ŋ cha nyɛ Baabuiyo dimi a wanaa ndaa sɔla nyɛ kɛndɛ kɛndɔɔ o Mɛlɛka piɛiyo niŋnda, kɛ a bii ndu nyɛkɛndɛi le. Wana ndoo suaa le Mɛlɛka wo Samiɔŋ wa ni. Teleŋ o wa o pɔmbɔ wo o kandu Chɛhowa piɛiyo ni. Nduyɛ mbo kɛsi tamasi kɛndɔɔ o Mɛlɛka piɛiyo niŋ, kɛ yuŋgu ndɔɔ kɛsi tamasi kɛndɛ le. (1 Sam. 12:1-5, NW) Puaa Samiɔŋnda, Choɛl nda Abaicha ndaa nɔ ma tol tamasi finya ndaa kɔɔli. Kɛ a tosa lende le, nduyɛ ma simnuŋ wanaa wɔɔŋ. Baabuiyo dimul naa maa, a wa waŋnda yamaŋ lakafaŋ kilullo.—Nuawɔ Samiɔŋ Tasoo 8:1-5, NW.

5, 6. Yɛɛ yɔŋnuŋ yɛ a puaa Choosayaa, vɛlɛ a po ndɔ mamaa?

5 Puaa Choosayaa bɛɛ lende koni i yɔŋnuŋ a nda ni. Tamasi kɛndɔɔ pila Choosaya kɛsi o Chɛhowa piɛiyo niŋ ni. Mɛɛ nda saaluŋ yau sawa Mɛlɛkaa, ma veelul ndu diomndaŋ leniŋ, mbo kindiŋ kpoke le Sawala Chɛhowalaŋ tolɔɔ kɔɔli. Mbo tosa wallo le piɛile ŋpiɔmndeŋ, a le nyinaa wɔɔŋnda faŋaa o lɛŋndeŋ niŋ. Nduyɛ mbo dɛɛniaa waŋnda le ma diikuŋ Chɛhowa. (Masaa Diiŋ Nduaa 22:8; 23:2, 3, 12-15, 24, 25, NW) Nuawɔ ke kɛndɛ bɛndu puaa nduaa sɔla o Mɛlɛka piɛiyo niŋndo! O teleŋndo opum bɛŋgu, mi puaa nduaa yaa wa, a po ndɔ mamaa opilɛ simnuŋ masaa. Kɛ opilɛ bɛɛ bii nyɛ o sɔla wo nyɛkɛndɛi le.

6 Po Choosayaa diolaŋ Chɛhowahas fɛŋ miiŋgu o masale finya ndɔleŋ choo. Kɛ “mbo tosa i wɔɔŋnde Chɛhowa o hɔl.” Paŋgoŋ ŋgaa o chua o masaleŋ choo ni malaŋ masaa Felo o Ichipi niŋ duau ndu o chiɛi mayumndo niŋ. Nduyɛ, o biyɔɔ bɛŋgu Chɛhowahas lo ni mbo wu. (Masaa Diiŋ Nduaa 23:31-34, NW) O koŋ kɔɔli, mi pɔmbɔ ndɔ, Chɛhowakim chua o masaleŋ choo wɔsilaŋ 11. Ndu bɛɛ o bii nyɛ o sɔla finya ndɔ o ba wo nyɛkɛndɛi le. Le suɛi wɔɔŋ Chɛhowakim tosa keŋ nde, mi Chɛlimaya dimi a ndu okɔɔ aa, “Mɛɛ nda sasu sofɛlɛ vilɛiyo ma viou ndu yɛ, lende o cho kumbɔɔ sɔla ni.” (Chɛ. 22:17-19, NW) Wanaa cheleŋaa sul o masale Choosaya leŋ kɔɔli wa bɛɛ, po ndɔɔ Sɛdikaya, a po ndɔ mamaa Chɛhowakiŋ, ve wanaa kɛndɛ kposoŋ te. Nduyɛ, a tul tamasi Choosayaa kɔɔli le.—Masaa Diiŋ Nduaa 24:8, 9, 18, 19, NW.

7, 8. (a) O nɛi kuɛɛ choo Sɔlɔmɔŋ kɛɛ yɛ nyɛ sɔvɛ o sɔla wo biyɔɔ nyɛkɛndɛi? (b) Yɛɛ naŋ pɛɛku yɛ a tamasilaŋ o Baabuiyo niŋ okɔɔ a wanaa tɛɛmbuu nyɛ sɔvɛ nda sɔla wo wa?

7 Mi Deeve, finyaa masaa Sɔlɔmɔŋ kɛsul ndu tamasi kɛndɔɔ mbo hiau masaa cheleŋnda. Mi che bɛɛ naa o tonyaa ikɛi Sɔlɔmɔŋ ndoo veluŋ ni, nduyɛ mbo kandu tosaa nyɛkɛndɛi, kɛ mbo kɛɛ nɛi sɔviɔɔ tolɔɔ kɔɔli. “O yuuwɛi Sɔlɔmɔŋnde niŋ, mi laandaa nduaa muli ndu kɔllo le mɛlɛkaa cheleŋnda sooluuwo. Nduyɛ o dou tiindaŋ ndɔɔ o Chɛhowa niŋ maa Deeve finya ndɔ le.” (Masaa Tasiaa 11:4, NW) Le hei, mi Chɛhowa faŋa Sɔlɔmɔŋ hɔlteŋ kɔɔli.

8 O kɔɔlima kɛndiaŋ pila laŋgbaa haa fula ni, nduyɛ ma sɔla fondaa le tosaa nyɛ cho o kɛndɔɔ wo. Kɛ nuawɔ se suɛi imɔnɔ le mɛɛ nda tɛɛmbuu di kɛndɛ koŋ yɛ! Kɛ o cho feleŋguaa o sindɛ koŋ niŋ fau le  simnuŋ wanaa wɔɔŋ te. Hau bɛɛ o cho fau le. Ŋ yaasiaŋndɔ tamasila kɛndɛ feleŋguaa pum la Kilisiɔɔŋaa feleŋguaa nɔ ma tol kɔɔli laŋ.

MA BII NYƐ NDA SƆLA WO NYƐKƐNDƐI

9. Vɛɛ puaa Nuuwaa wa kɛsi yɛ tamasi kɛndɛ kɛndɔɔ? (Tofa fotueiyo o peele naŋ kandu leŋ choo.)

9 Mi puaa Nuuwaa wa kɛsi tamasi kɛndɛ kɛndɔɔ pila. Mi Mɛlɛka ke finya nda wallo le dɛndɔɔ taŋgullo, mbo luei yɔŋgu ndɔɔ leniŋ. Mi puaa nduaa chɛl ndu diom le hɛnaŋ Chɛhowaa tosaa nyɛkɛndɛi. Okoŋ, ma mala ndu dɛndɔɔ taŋgul, nduyɛ ma luɛi leniŋ. (Kan Ch. 7:1, 7) Kpeleŋ kuɛɛ nda kɛsiŋ yɛ o kɔl? Kandɔŋ Chieeŋndo 7:3 dimi maa ma luei visiaa o dɛndɔɔ niŋ. “Ma lo nyaa yoomaa yɛ yiaa haa mandaa le ma huŋ va yɛiye o chieeŋndo choo kpou.” Mi waŋchieeya bɛɛ sɔla pioŋɔɔ. Le mɛɛ puaa Nuuwaa wa bii nyɛ nda sɔla finya nda o ba wo nyɛkɛndɛi yɛ, ma sɔla dioo le waŋchieeya piŋioo, nduyɛ a piɛile tonyaleŋ miŋgioo o lɛŋnde o dindi leŋ choo.—Kan Ch. 8:20; 9:18, 19.

10. Vɛɛ feleŋguaa hiɔɔluaa Hibuluiyaa wa Babilɔŋ nda bii yɛ tonya nda pɛɛku wo nyɛkɛndɛi?

10 Wɔsila kɛmɛla bɔɔbɔɔ hiouwɔɔ, mi puaa Hibuluiya a hiɔɔlu, Hananaya, Mishɛl, Asalaya, a Daniɛl chɔm maa nyɛ nda pɛɛku wo wa nyɛ sɔvɛ bɛndu. Ma kua a nda Babilɔŋ o wɔsi 617 niŋ tuupa mi Chiisu vialuŋ. Puaa haa ndaa naŋ bɔɔ nua, nduyɛ kɔlkaloo pila ndaa nɔ vɛlɛ ni. Le hei, ndii wa suɛi tɛtɛlɛ le mi ndaa yiŋnuŋ o kaa maBabiloniaŋndo niŋ. Kɛ a tosa lende le. Mi kaala ndalaŋ la chɔm kpendekele maa ma loonuŋ nyɛ nda sɔla wo. Ndu cho ni, nyɛ nda pɛɛku a Mɛlɛka okɔɔ wo. Mi puaa hiɔɔluaa haa sɔla salaa tau le mɛɛ nda bii nyɛ nda pɛɛku a Mɛlɛka okɔɔ wo nyɛkɛndɛi teleŋ nda wa a pɔmbɔ wo.—Nuawɔ Daniɛl 1:8, 11-15, 20, NW.

11. Vɛɛ acheleŋnda sɔla yɛ tɔnɔɔ o nyɛ sɔvɛ Chiisu sɔla wo niŋ?

11 Ŋ chii tamasila kɛndɛlaŋ chɔm o Baabuiyo miŋ kɛɛ Chiisu, Po Mɛlɛkaa diolaŋ piɔlɔɔ le. Mbo mbo bii nyɛ o sɔla finya ndɔ o ba wo nyɛkɛndɛi. Le mɛɛ o bii nyɛ nda pɛɛku ndu wo nyɛkɛndɛi yɛ, mbo dimi aa, “Nyɛ Mɛlɛka Finyaa o pɛɛku ya wo, ndu ko ya I dimi ni.” (Chɔŋ 8:28) Nduyɛ yeemɛi nduɛi wa ni le mi wanaa cheleŋ bɛɛ de nyɛ o sɔla wo tɔnɔ. Mbo dimul faŋga bɛndoo aa, ‘O chiooŋ ŋ pilɔŋ bɛɛ, I nɔ mi kuɛ mi kɔ dimi yooŋgu kɛndɔɔ a Masale Mɛlɛkaleŋ okɔɔ. Kani fondole, le keŋ Mɛlɛka vem ya ni.’ (Luk. 4:18, 43) Mbo mala wanaa wa ndu nilaŋ yaŋɔɔ wa le ma sina maa o bɛnda ma wa lɛ le chieeŋndo le. O dimi niŋ, waa le chieeŋndo tosa a chi sɔɔŋ cho a Mɛlɛka okɔɔ woŋ nyɛ sɔvɛ le.—Chɔŋ 15:19.

BII NYƐ Ŋ SƆLA WO NYƐKƐNDƐI

12. (a) Vɛɛ Timoti Diiŋ Ndɔɔ 3:14-17 piiliaŋ yɛ feleŋguaa bɔɔbɔɔ hau? (b) Nyuuniaala yɛɛ feleŋguaa Kilisiɔŋnda nɔ yɛ ma kɛsiŋ o kɔl?

12 Maa puaa feleŋguaa naŋ laŋga soo a nda okɔɔ wa, kɛlɛŋgaa num bɛɛ wanaa velu numnda kaala bɔɔ Chɛhowa Mɛlɛka. Te o yɔŋ pɛ aa lende, mɛɛ nyɛ Baabuiyo dimi a Timoti okɔɔ wo vel num. (Nuawɔ Timoti Diiŋ Ndɔɔ 3:14-17.) Wanaa velu numnda o ba ŋ pɛɛku a Mɛlɛka okɔɔ ni, vɛlɛ a mɛɛ ŋ nɛŋi ndu kɔl lɛ. Kɛlɛŋgaa a wa wɔ o lende ma kandu num pɛɛkoo. Hoo kɛsɛ mala num ni ma sɔla “kɔl kaloo o chɔm num nɛiyo le pioŋɔɔ sɔlaa sanaa o Kiliti niŋ” ndo. Nduyɛ le num malaa ma “va o bɛɛndiaŋ le wali o wali kɛndɛ tosaa,” o Mɛlɛka piɛiyo niŋ. Nyunaa cho niko hoo ni, A bii niŋ pa nyɛ ŋ sɔla wo nyɛkɛndɛi? Hei mala num ma yaasiaŋ numpila. Tofawɔ nyunalaŋ ndaŋ, ‘Vɛɛ ya yiyaŋ yɛ le waa o pulale seiyaa laalaŋnda tɛɛŋ? Vɛɛ ya yiyaŋ yɛ le waa wanaa pɔmbuii nii Mɛlɛka sina hau o lɛŋndeŋ choo wa tɛɛŋ? I nɔ pa balika  melaa le di sɔvɛ bɛndu ya sɔla hoo le tonyaa sinaa wo?’

Vɛɛ ŋ yiyaŋ yɛ le waa waŋndo opilɛ o seiyaa dɔu tiindaŋndo o Mɛlɛka niŋnda tɛɛŋ? (Tofa pɛlta 9, 10, a 12)

13, 14. Tɔɔndaŋ kuɛɛ komal lɛ feleŋguaa Kilisiɔŋnda apum, kɛ leyɛɛ o wa yɛ idiɔm le bolleŋ lueiyo lebɛŋgu? Chɔmndɔ tamaseliiyo.

13 O tonyaa ikɛi feleŋguaa apum a veluŋ ni. Le hei, a chi teŋgeŋ bɛndu cho hɛnɛkɛyɛi o Mɛlɛka piɛiyo niŋ hau ve tɛɛŋ a chieeŋ Setana cho o nyumndaŋ niŋndo le. Apum pɛŋ mi yeemɛi bii nda le tofaa mɛɛ yoomoo cho o chieeŋndo niŋ yɛ. Kɛ a bii pa kɔllo ma kelu nyɛ nyaanaŋndo lachi a kiltaŋ le ma che te kundɔɔ ndɔɔ nɛi pɛ, ɔɔ mbo dii? Sako mbɔ! Lende koni, sabu o sabu cho le miŋ dembi “sɔɔŋ yeemaŋ wɔɔŋ ŋwana chieeyaŋ” o chieeŋndo hoo niŋ te, le sinaa kinɛi te kpundɔɔ a kɔl tambɛiyo o chuu naa ni.—Pitɛ Tasoo 4:4.

14 Puaapilɛnɔ pum o cho o lɛŋnde Eesiaa leŋ niŋ diolaŋ Chɛna. O tonyaa ikɛi wanaa nduaa velu ndu ni. O wa wɔsilaŋ 12 mbo yiŋ. O viu bɛɛ le, mbo luei balaŋ o kaa chieeŋndo hoo niŋ. Mbo dimi aa, “Yaa yeema mi dembi ‘hɛnɛkɛyɛi’ cho o chieeŋndo niŋndo.” Mi Chɛna kandu simndaŋ o peloŋ muuŋ choo. Mɛɛ o fuuluu wɔsilaŋ 15, mbo kandu kaala chaaŋaa nduaa nɔ laŋ lapum tolɔɔ kɔɔli. O wa keiyo kolɔɔ, a yiou yioulaŋ maa nda. Ndoo yala hunɔɔ o bɛɛ le. Pisulta nda chuku bulloŋ a siondeŋ o tibiiyo choo wo, a pisulta niilu latandaa o kɔmpitɛiyo (ɔdinatɛɛloo) choo laŋ ndoo tosaa nda chaaŋaa nduaa ni tei mbo piu. Kɛ mɛɛ nyɔɔ viou kpɛɛ, mbo kandu hunɔɔ o ndupila niŋ, maa yeemaŋ chieeŋndo hoo ke wana kɔl hiniaa kposoŋ te. Yoomu fondo fuu wo o wa choo ni. Mɛɛ o miiŋgu o kundaa niŋ, mbo dimi aa, “Simulta cheleŋ la cho wɔ ya tuŋ paaliaŋndo, kɛ salala Chɛhowalaŋ la hiou laŋ poloŋ.”

15. A yɛɛ okɔɔ feleŋguaa viluŋ o tonyaa ikɛi le wa nɔ yɛ ma yiyaŋ?

15 Kɛ, feleŋguaa cheleŋ cho o kundaa niŋ a viluŋ o tonyaa ikɛi le wa. Te wana waa lende ŋ cho ni, mɛɛ kɛsiŋ o kɔl maa di kɛndɛ bɛndoo pila ŋ cho naa tueiyɔɔ yeela ni, kanifuule a sina Mɛlɛka nduyɛ ma wa ndu piɛiyo! Waŋnda o biiliɔŋndaŋ niŋ cho hau o chieeŋndo choo ni. Lelaŋ, sala bɛndoo pila icho ni le waa wanaa Chɛhowa naŋnuŋ haa ndupila o ibuŋnda tɛɛŋ, nduyɛ mbo chɔm nda tonya cho o Baabuiyo niŋndo. (Chɔŋ 6:44, 45) A chɔm pɛ waŋnda 1,000, waŋndo opilɛ kpe nda tɛɛŋ sɔla kɔlkalu kpeekpeiyo a tonyaa okɔɔ ni. Nduyɛ num cho waŋndo opilɛ. Vɛ, naa kpou ŋ niŋ kɔl le hei, mi che bɛɛ naa ŋ  pɛɛku tonyaa o nɛila teŋgeŋndaŋ niŋ te? (Nuawɔ Kɔliŋtiaŋ Tasoo 2:12, NW.) Mi Chɛna dimi aa, “Mi dialloŋ kuendiŋ ya te I yiyaŋ pɛ a hei okɔɔ. Wana maa vɛɛ ya cho yɛ le Chɛhowa sinaa, wana nɔ chieeŋndo kpede wo?” (Chon. 8:4, NW) Mi yema naa Kilisiɔŋnɔ fula o fonda pilɛ koŋ kpe wo dimi aa, “Mi sukuuwa naŋ kɔl tau te wana cho nda pɛɛkoo wo sina nda pɛ. Ɔɔ niŋ dikeŋnaŋ bɛndu naŋ nɔ wo te Chɛhowa, Wana Pɛɛkaa Bɛndoo sina naa pɛ!”

YƐƐ Ŋ NƆ YƐ MA TOSA?

16. Ɔɔ chuaŋ chua sɔvɛ feleŋguaa Kilisiɔŋnda nɔ ma tosa hau wo?

16 Te a yiyaŋ pɛ a di keŋnaŋ bɛndu ŋ sɔla wo, o bɛnda ma kindiŋ le hiouwɔɔ lachi a waa diompilɛ a wanaa pɔmbuaa tosa kɛɛsiaa kɛndɔɔ a yoomu ndaa wa le? O hei niŋ, a nɔla ma sim o pulale vilɛileŋ a wanaa dɔu tiindaŋndo o Mɛlɛkaa niŋnda. O cho suɛi taasi le keŋ tosaa mbo hiau feleŋguaa kaakuuwa tolɔɔ kɔɔli. Nduyɛ wana che pɛ aa o nɔŋndeŋ nda cho a chieeŋndo hoo latulu ni le kɔlaŋ tambei sɔlaa.—Kɔl. Diiŋ Ndɔɔ 4:3, 4.

17-19. Yɛɛ mala yɛ num le ma nɔ yiyaŋ kɛndɔɔ le waa teŋgeŋ a chieeŋndo?

17 Hoo chɔm naa maa lɔɔlɔɔ i wa suɛi tɛtɛlɛ le waa teŋgeŋ a chieeŋndo le. Kɛ te a yiyaŋ pɛ a ndi okɔɔ, taasioo cho naa dimul maa ŋ nɔ miŋ wa teŋgeŋ. Le tamaseliiyo, yiyaŋndɔ a wana nyaanuŋndo. O nɔ mbo wa teŋgeŋ le mbo simnuŋ wana waa lende. O nɔ mbo kɛɛ sɔɔŋ pum tosaa ŋ dia ndu teleŋndo o ba, miŋ kelu pɛɛku ndɔɔ lechoo wo. O baa pilɔɔ choo, te o chɛl pɛ le mbo wa teŋgeŋ a chaaŋaa nduaa, o mala ndu mbo sɔla teleŋndo tau le kpeleŋ ndɔɔ komallo.

18 Mɛɛ chieeŋndo ndu che yoomoo yɛ cho teŋgeŋ. Kɛ te num tofa ndu pɛ o nɛi cheleŋ choo, ma wa teŋgeŋ a chieeŋndo nduyɛ ma kpeeŋaŋ kaala nɔɔlɛilaŋ a sɔɔŋ tɛɛmbuu chaŋyɛi numnde nya Mɛlɛka tɛɛŋ ndo, “a nɔla ma sɔla yoomu cho yoomu kpeekpeiyo wo.” (Tim. Tasoo 6:19) Mi ndepilɛnɔ naŋ soo suŋ a ndu okɔɔ wo dimi aa, “Te a sim pɛ o kala kpiŋ le nyɛ ŋ laalaŋndo, ma naŋ kɔl tau o mɛɛlulaŋ. Ma che maa a sɔla yoomuaŋ le keekoo o chieeŋ Setana wo niŋ. O hiou kpou wo cho ni, mbo wa maa a che Chɛhowa bolleŋ lɔɔ dɛ dɛ a mamɔɔ o numndo muɛɛŋ le nyɛ ŋ tosa wo! Koŋ sim maa te a naŋ pɛ kɔl le mɛɛ ŋ cho teŋgeŋ yɛ!”

19 Nyɛ fondoo fuu yoomoo cho ni, te waŋndo handu pɛ kɔllo o nyɛ o sɔla suŋ suŋndo choo. (Ikil. 9:2, 10, NW) Te feleŋgɔnɔɔ ŋ cho ni, nduyɛ ma keela kɔllo o sabu yoomoo choo nyɛkɛndɛi, vɛlɛ a mɛɛ kpɛ yoomu numndo bandu niŋ bu yɛ, o ve suɛi taasi le ma kpakpala “kaala wanaa tuii Mɛlɛka diom te wa” okoŋ ma tuei yoomu sɔviɔɔ yeela le?—Mal. 3:18, NW; Ɛfi. 4:17.

20, 21. Te ŋ tosa pɛ kɛɛsiaala kɛndɛlaŋ, le yɛɛ naŋ sim yɛ o pulaleŋ, kɛ yɛɛ naŋ nɔ yɛ miŋ tosa?

20 Te ŋ tosa pɛ kɛɛsiaa kɛndɔɔ, ŋ sɔla yoomu hɛnɛkiɔɔ suŋ suŋ, nduyɛ miŋ sim o pulaleŋ le hunɔɔ lɛŋndeŋ sɔlaa, ndu cho ni, le yoomu fafɛɛŋndo sɔlaa. Salalaŋ la cho bɔɔ la kɛsiaa le naa o chilaŋ niŋ. Ŋ chii pɛŋ yiyaŋ o laŋ choo le. (Mat. 5:5; 19:29; 25:34) Kɛ o wa bɛɛ lende, Mɛlɛka yɔŋgu ko naa nyɔɔŋ lende o nyulu vili le. O yeema naa miŋ tosa nyɛ. (Nuawɔ Chɔŋ Tasoo 5:3, 4.) Kɛ o kpeekpei niŋ, o bɛnda bɔɔ miŋ piɛi ndu o laalaŋndo choo.

21 Nuawɔ dikeŋnaŋ bɛndu se le nyɛ naŋ sɔla Mɛlɛka o ba o hɔbɛi yo! Ŋ nɔ kɔlkalu walaŋndo a Diom ndɔɔ okɔɔ, vɛlɛ a tonya cho a sabu ndɔɔ okɔɔ wo. Ŋ cho dikeŋnaŋ naŋ sɔla le suɛi a diola ndɔlaŋ okɔɔ wo tueiyɔɔ yeela. Mɛlɛka mɛi lediom maa o cho wa naa ikɛi. (Chon. 118:7, NW) Maa naa kpou, chuaambɔ ni, bɛndu ni, chɔm balika melaa a mɛɛ naŋ cho yoomu naa biyɔɔ yɛ. Nduyɛ, miŋ chɔm maa ŋ nɔ yeemɛi i kala kala le Chɛhowa bɛɛleŋ kioo lefafɛɛŋ.—Luom. 11:33-36; Chon. 33:12.