“Ŋ cho loonɔŋndo lɔɔlɔɔ a nya le mɛɛ nya cho wali Mɛlɛkaa a laalaŋndo yɛ, vɛlɛ a mɛɛ nya cho fafalaa yɛ.”1 TƐS. 1:3, NW.

1. Vɛɛ Pɔɔl yiyaŋ yɛ a wanaa wa fafalaa le Chɛhowa piɛiyo wa?

MI KIILANƆƆ Pɔɔl loonuŋ a wanaa wa fafalaa le yooŋgu kɛndɔɔ dimioo wa. Mbo poonyiaa aa, “Ŋ cho loonɔŋndo lɔɔlɔɔ a nya le mɛɛ nya cho wali Mɛlɛkaa a laalaŋndo yɛ, mɛɛ nya cho fafalaa yɛ, a mɛɛ nya cho biuwɔŋndo yɛ. Kanifuule, la nɔ tiindaŋndo o Masanɔɔ Chiisu Kiliti niŋ a Finya ndɔ.” (1 Tɛs. 1:3, NW) A tonya, Chɛhowa pila bɛɛ cho loonɔŋndo a wanaa cho fafalaa le ndu piɛiyo wa, o yɔŋ bɛɛ ma tiuba le tosaa tau le.—Hibu. 6:10.

2. Yɛɛ naŋ cho yɛ yaasiaa o buŋgɛi hei niŋ?

2 Puaapiliaa naa bɔɔbɔɔ o sindɔɔ niŋ a hau, soliŋ niŋ salala siaama le waa o wali lɔɔlɔɔ Mɛlɛkaa niŋ. Ŋ yaasiaŋndɔ mɛɛ apum soliŋ sala o wɔsiŋ kɛmɛ tasoŋ niŋ yɛ. Nduyɛ, ŋ cho vɛlɛ yaasiaa pɛlta naŋ nɔ hau o wali lɔɔlɔɔ Mɛlɛkaa niŋndaŋ. Okoŋ, miŋ che mɛɛ naŋ loonuŋ chaaŋaa naa kaalaa cho a yɔŋgaŋ le wallo hoo tosaa o nɛila teŋgeŋndaŋ niŋndaŋ.

KILISIƆŊNDA O WƆSIŊ KƐMƐ TASOŊ NIŊ

3, 4. (a) Wali yɛɛ apum tosa yɛ o wɔsiŋ kɛmɛ tasoŋ niŋ? (b) Vɛɛ bahawɛila ndalaŋ la looku yɛ fula?

3 Dimioo naa Chiisu yiŋ, mbo kandu wali ndoo tiu  niŋ chieeŋndo balɔɔ silɔ wo tosaa. (Luku 3:21-23; 4:14, 15, 43) Mɛɛ o vi, mi buɛiyaa nduaa chua chilaŋ le wali dimiaa yooŋgu kɛndɛ Mɛlɛkaa pɛŋgɛlaa. (Walta Wa. 5:42; 6:7) Kilisiɔŋnda apum, mɛɛ Filipi cho naa yɛ, ma simnuŋ wanaa dimiaa yooŋgu kɛndiaa o lɛŋnde Palɛstaiŋndeŋ niŋ. (Walta Wa. 8:5, 40; 21:8) Mi Pɔɔl a acheleŋnda kua o fondaŋnda levilta cheleŋ. (Walta Wa. 13:2-4; 14:26; Kɔl. Diiŋ Ndɔɔ 1:19) Apum, le tamaseliiyo, Silvanɔɔ (Sailaa), Maki, a Luku, ma simnuŋ wanaa poonyiaa. (Pitɛ Tasoo 5:12) Mi yemaa naa o Kiliti niŋ tosa wallo latulu a puaapiliaa laalaŋnda haa. (Walta Wa. 18:26; Luom. 16:1, 2) Sɔɔŋ ndaŋ kɛndɔŋ muŋ tosa ni mi yaula maKilikiilaŋ o Baabuiyo niŋ yeela le pɛɛkoo. Nduyɛ ŋ chɔm kɛsɛ maa Chɛhowa puɛɛnuŋ a buɛiyaa nduaa le.

4 Vɛɛ wanaa ndaa yɔŋguŋ sindɛ le wali lɔɔlɔɔ Mɛlɛkaa tosaa wa sɔla yɛ malaa? Lepum, mi chaaŋaa ndaa Kilisiɔŋnda ndaa tosal nda kɛndɛi. Mi ndaa mala nda vɛlɛ o nɛila cheleŋ niŋ. Kɛ ndaa nyuna le nda malaa le. (Kɔl. Tasoo 9:11-15) Mi waŋnda a kundalaŋ lapum, laa yɔŋgu malaa a kɔllo fɛɛsɛŋ. (Nuawɔ Walta Wanaa Chiisuaa 16:14, 15; Filipiaŋnda 4:15-18.) Mi Pɔɔl a chaaŋaa nduaa buɛiyaa ibuŋgaa ndaa tosa walta pɔmbɔ le bahawɛila ndalaŋ solioo.

WANAA CHO O WALI LƆƆLƆƆ MƐLƐKAA NIŊ HAU WA

5. Yɛɛ pɔnɔɔ a lanɔɔ pum dimi yɛ a yoomu ndaa okɔɔ o wali lɔɔlɔɔ Mɛlɛkaa niŋ?

5 Hau bɛɛ, wanaa bɔɔbɔɔ cho fafalaa o walta lɔɔlɔɔla Mɛlɛkalaŋ niŋ. (Tofa kɔfoo “ Walta Lɔɔlɔɔla Mɛlɛkalaŋ.”) Vɛɛ nda yiyaŋ yɛ a chuaŋ chua nda tosa hoo wo? Nyuna nda nyunaa hoo, a cho tɔnɔɔ sɔla o muli nda cho num ke wo. Chuawɔ tamaseliiyo a puaapilɛnɔ pilɛ okɔɔ. Mbo tosa kɔɔfaale lɔɔlɔɔleŋ, le teŋgeŋndeŋ, mbo kua o lɛŋnde cheleŋ niŋ le yooŋgu kɛndɔɔ dimioo, nduyɛ mbo simnuŋ Bɛtɛlaitiinɔɔ? Mbo dimi aa, “I che maa kɛɛsiaa ya tosa le wali lɔɔlɔɔ Mɛlɛkaa tosaa wo cho bɔɔ nyɛ sɔvɛ le ya. Mɛɛ ya wa wɔsioŋ 18, mi luɛi o yɔm tɛndaa tɛɛŋ. Kɔllo wa ya le dɛnɛ sinaa bɛndoo tolɔɔ kɔɔli, le baala mapuuloo, a kɔɔfale lɔɔlɔɔleŋ tosaa. Nyɛ yɔŋnuŋ niŋ paandu wo chɔm maa Chɛhowa puɛɛnuŋ a sala ŋ soliŋ le wali lɔɔlɔɔ Mɛlɛkaa tosaa wo le. Mi soliŋ kɔlkaloo a taasi Chɛhowa ke ya wo kpeku o nɛi sɔviɔɔ choo. Yaa tiu niŋ ba le hei tosaa le, te yaa wa pɛ wali mapuuloo tosaa.” Mi laandɔ dimi aa, “Walta nda ke naa le tosaa laŋ la mala naa miŋ tosa hiouwɔɔ lachioo. Miŋ sina maa Chɛhowa cho naa mandaa, mbo wa naa nɛi bɛnda wo chɔmndo lɔɔlɔɔ. Te naŋ waŋnuŋ pɛ o chalta naalaŋ, ŋ ve tiuba le hei tosaa le. I mel Chɛhowa balika lɔɔlɔɔ le mɛɛ naŋ yɔŋgu yoomula naalaŋ o wali ndɔ lɔɔlɔɔ wo niŋ yɛ.” A yeema pa mi yoomu numndo wa o nɛiyo hoo choo?

6. Tiindaŋ kuɛɛ naa kpou nɔ yɛ miŋ nɔ a yiyaŋnda Chɛhowalaŋ okɔɔ?

6 A tonya, waŋnda apum nɔ bahawɛila kɛɛlu nda le luɛiyɔɔ o wali lɔɔlɔɔ Mɛlɛkaa niŋndo. Nda bɛɛ Chɛhowa hini kɔl a sɛmbɛ nda cho dɔwɔɔ le wali ndɔɔ tosaa a kɔl ndaa kpou wo. Yiyaŋndɔ a wanaa Pɔɔl pɛl diolaŋ o Filɛmɔŋ 1-3 niŋnda, a wanaa wa o kundaa niŋ Kolose wa. (Nuawɔ.) Mi Pɔɔl naŋ kɔl a nda, nduyɛ Chɛhowa bɛɛ. Mɛɛ lende koni Finya naa o choo choo niŋ naŋ kɔllo a wali naa ni. Kɛ vɛɛ ŋ looku yɛ ma mala wanaa cho o wali lɔɔlɔɔ Mɛlɛkaa niŋnda?

 MALA KƆƆFAA

7, 8. Yɛɛ yeemaŋ yɛ le wali lekɔɔfaa tosaa, nduyɛ, vɛɛ acheleŋnda o kundaa niŋ mala yɛ kɔɔfaa?

7 Maa wanaa dimiaa yooŋgu kɛndiaa o wɔsiŋ kɛmɛ tasoŋ niŋ, sala bɛndoo pila icho ni le kɔɔfaa dialuŋ fulaa nɔɔ o kundalaŋ niŋ hau. A bɔɔbɔɔ dimi yooŋgu kɛndɔɔ le havɛilaŋ (lɛɛlɛlaŋ) 70 o paŋgei niŋ. Vɛɛ ŋ looku yɛ ma mala nda?

8 Mi ndepilɛnɔ kɔɔfanɔ pum dimi aa, “Kɔɔfaa nɔ dialuŋ kalaŋ le waa o wali pollo niŋ lɔɔlɔɔ. Kɛ a koŋ kpou a yeema dɛɛniaa.” (Luom. 1:11, 12) Mi ndepilɛnɔ cheleŋ o tosa niŋ paandu kɔɔfaleŋ le wɔsila bɔɔbɔɔ wo bɛɛ dimi isɔɔ a kɔɔfaa o kunda ndɔɔ niŋ okɔɔ aa, “A tosa bɔɔ wallo, nduyɛ a saŋga le. Te acheleŋnda chua nda pɛ o nyɛm nyaanaŋndoŋ choo le kɔlaŋ o wali pollo niŋ, num veelu nda le nyɛdiaa. Ke nda nyɛsɔlaa pɔmbɔ le bɔnɔla nyɛ nyaanaŋndo, ɔɔ le bahawɛila cheleŋ ndaŋ. Ma naŋ kɔl tau. Hoo chɔm maa la buulaŋ kɛsɛ a nda.”

9, 10. Yɛɛ apum tosa yɛ niŋ le kɔɔfaa malaa o kunda ndaa niŋ?

9 A yeema pa le kɔɔfaa malaa o wali pollo niŋ? Mi kɔɔfanɔ pilɛ diolaŋ Baabi nyɔɔlu aa, “Ŋ yeema malaa tau o lɔɔ bɛŋgu.” Mi chaaŋ ndɔ kɔɔfanɔɔ o kunda pilɔɔ niŋ kpe dimi aa, “Bahawɛiyo pila icho ni le wanaa fula a naa wa sɔlaa ipala.” Mi ndepilɛnɔ cho niŋ o Bɛtɛl Bulukiliŋ ndo dimi sɔɔŋ mamaŋ a kɔɔfale ndɔleŋ okɔɔ aa, “Mi ndepilɛnɔ nɔ mɔmbillo wo dimulla aa, ‘Teleŋ o teleŋ ŋ hau pɛ ma nɔ wana malaa le, a veelu ya, ŋ kuɛ naa num latulu o wali pollo niŋ.’ Ndu kɛsɛ mala ya ni mi tosa kɔɔfaleŋ.” Tofawɔ nyɛ Shali bɛɛ dimi wo, “Te ŋ mal pɛ wali pollo, lɔɔlɔɔ yembuaa kɔɔfaa loŋnuŋ nda kpeele. Lepum, a veelu puaapiliaa ɔɔ ndepiliaa yembuaa o pɛɛku num leyuŋgoo. La tosa walta cheleŋ latulu le ma wa a kala poŋ.”

10 Ndepilɛnɔ pum wa o wali lɔɔlɔɔ Mɛlɛkaa niŋ le wɔsilaŋ 50. Mɛɛ o yiyaŋ a teleŋ o wa kɔɔfaleŋ a ndepiliaa yembuaa cheleŋnda wo, mbo dimi aa, “Te paŋgoŋ hiou pɛ ŋmuuŋ, mi bɛnduaa kundaa kɔ yil kɔɔfaa. Ma nyuna a kɛndiaa naa  okɔɔ, vɛlɛ a walta naalaŋ. A buulaŋ kɛsɛ a naa. Ma kuɛ o chiɛila naalaŋ le sinaa te ŋ yeema pɛ malaa.” Hei loonuŋ num mɛɛ Pɔɔl ndoo chɔm balika melaa le finya mala ndu Ɛfisɔɔ wo yɛ.—Tim. Diiŋ Ndɔɔ 1:18.

11. Yɛɛ yeemaŋ yɛ le kɔɔfale teŋgeŋndeŋ tosaa?

11 Kundalaŋ lapum nɔ kɔɔfaa teŋgeŋnda. O paŋgei niŋ, havɛilaŋ (lɛɛlɛlaŋ) 130 a bɔɔbɔɔ tosa o wali pollo niŋ ni. Le mɛɛ nda chua teleŋndo tau o wali pollo niŋ, a kundaa malaa o nɛila cheleŋ niŋ yɛ, a nɔ teleŋ kposoŋ le wali mapuulu tosa le. Mi lɛuve mala nda a nyɛsɔlaa pɔmbɔ o paŋgei niŋ, halikpeŋ ma muli hɔlla o wali dimiaa yooŋgu kɛndɔɔ.

12. Vɛɛ bɛnduaa a wanaa cheleŋnda mala yɛ kɔɔfaa teŋgeŋnda?

12 Vɛɛ naŋ mala yɛ kɔɔfaa teŋgeŋnda? Mi bɛndu kunda pilɛ o lɛuve, o duau baltaŋ a kɔɔfaa teŋgeŋnda wa dimi aa, “Bɛnduaa nɔ ma dɔu baltaŋ a nda, nduyɛ ma sina bahawɛila ndalaŋ, okoŋ ma sina mɛɛ nda mala nda yɛ. Mi Seiyaa Chɛhowaa pum yiyaŋ maa kɔɔnaa cho kɔɔfaa teŋgeŋnda biyɔɔ nyɛkɛndɛi, kanifuule a cho nda nyɛsɔlaa kioo lumbaŋ. Kɛ puaapiliaa kpou tiuba ma mala nda o nɛila bɔɔbɔɔ niŋ.” Kɔɔfaa lɔɔlɔɔ wa, a a teŋgeŋnda naŋ bɔɔ kɔllo te a sɔla pɛ wanaa nda kua latulu o wali pollo niŋnda. A nɔla ma mala o nɛi koŋ choo?

MALA BUƐIYAA IBUŊGAA

13, 14. (a) Yɛɛ naŋ nɔ yɛ miŋ kɛsiŋ o kɔl a buɛiyaa ibuŋgaa okɔɔ? (b) Yɛɛ ŋ yiyaŋ yɛ maa a tosa le nda malaa?

13 Wanaa bɔɔbɔɔ che buɛiyaa ibuŋgaa a laandaa ndaa maa a kendu o Chɛhowa piɛiyo niŋ. Tonya icho ni. Kɛ, nda bɛɛ yeema dɛɛniaa. A yeema wanaa nda kua o wali pollo niŋnda, vɛlɛ a yelelaŋ pɔmbɔ. Lepum ma del a naa ma kuɛ a nda o naa chiɔwaa, naapum le yambɔɔ. Kɔllo naŋ nda bɔɔ te puaapiliaa a ndepiliaa mala nda pɛ o boondii keŋ bɛŋgu. Nduyɛ ma kɛsi yeemɛi ndɛi nyɛ tase. Ŋ loonuŋ mɛɛ wana chiɔwaa kaalaa Luku, o poonyiaa yau Walta Wanaa Chiisuaa wo, ndoo mala Pɔɔl a chaaŋaa nduaa buɛiyaa ibuŋgaa yɛ.—Kol. 4:14; Walta Wa. 20:5–21:18.

14 Buɛiyaa ibuŋgaa a laandaa ndaa yeema chaŋyaŋ kpɛɛluŋ ndoŋ. Mi buɛi ibuŋga pilɛ poonyiaa aa, “Chaŋyaŋ nuŋ sina teleŋ ya yeema dɛɛniaa wo. Ma nyuna ya a taasi, nduyɛ hei mala ya mi soo a bahawɛila nilaŋ okɔɔ. Ma yaŋ ya nilaŋ nyɛkɛndɛi, nduyɛ ma mala ya.” Buɛiyaa ibuŋgaa a laandaa ndaa naŋ bɔɔ kɔllo le yeemɛi puaapiliaa a ndepiliaa chɔm nda ve.

MALA YUŊGOO BƐTƐL

15, 16. Walta kuɛɛ yuŋgoo Bɛtɛl a wanaa cho o Toŋgola Bɔŋaŋnda Bɛndaŋ nda tosa yɛ, nduyɛ vɛɛ naŋ looku yɛ nda mala?

15 Chieeŋndo balɔɔ silɔ, wanaa cho wallo Bɛtɛl a o Toŋgola Bɔŋaŋndaŋ nda, cho wali leMasa Mɛlɛkaa tooloo o lɛŋii lɛuvii ndɛi cho hɔlteŋ choo ve. Te kunda numndo ɔɔ buŋgɛi numnde nɔ pɛ Bɛtɛlaitiiya, vɛɛ ŋ chɔm yɛ maa a cho loonɔŋndo a nda?

16 Te a kuɛ pɛ Bɛtɛl sɛnɛi, ma yɔŋnuŋ kɔndɔŋ le mɛɛ nda mɛi yuŋgula ndalaŋ a chaŋyaŋ ndaŋ kɔlloŋ yɛ. Nuawɔ se mɛɛ nda naŋ kɔllɛ, te wanaa nda tosa wallo latulu Bɛtɛlla, a haa o kunda nda sɛnɛiyo niŋ bii pɛ nda chaŋyɛi! (Mak. 10:29, 30) Mi wali ndaa chɛl nda le bɔŋaŋndaŋ biyɔɔ, a wali pollo tosaa o lɔɔ bɛŋgu. Lepum, ma nɔ wallo teŋgeŋ le tosaa. Te kundalaŋ la sina pɛ hei, nduyɛ mila chɔm maa la hɛnaŋ a Bɛtɛlaitiiya a wali  nda cho tosaa wo, naa kpou cho tɔnɔɔ sɔla.—Nuawɔ Tɛsaloniaŋ Tasoo 2:9.

MALA WANAA CHO WALI LƆƆLƆƆ MƐLƐKAA O LƐŊII CHELEŊ NIŊNDA

17, 18. Walta kuɛɛ wanaa nda yɔŋ o lɛŋii cheleŋnde niŋnda tosa yɛ?

17 Wanaa chɛl le kɔlaŋ wali Mɛlɛkaa o lɛŋii cheleŋ niŋnda cho siŋgaŋndaŋ komal a nyɛdiaa okɔɔ, sɔɔŋ maŋgalaŋ, a naamulaŋ. Nduyɛ ma komal sɔɔŋ cho teŋgeŋ a muŋ o lɛŋnde ndaleŋ niŋndoŋ. Le yɛɛ nda chɛllɛ siŋgaŋnda waa ndoo?

18 A yɔŋ apum o lɛŋii cheleŋnde niŋ le yooŋgu kɛndɔɔ dimioo. Nduyɛ, mi wanaa bɔɔbɔɔ sɔla tɔnɔɔ o pɛɛku teŋgeŋ nda sɔla hoo wo niŋ. Mi lɛuve ke nda naa hiniaa sɔviaa o lɛŋnde nda yɔŋ ndaleŋ niŋ, a nyɛsɔlaa pɔmbɔ le bahawɛila ndalaŋ solioo. Apum nda tɛɛŋ, ma yɔŋ nda o lɛuve le baalaa. Apum le lɛuwuŋ taŋgullo, fondala hiviaa laŋ naa sɔɔŋ maŋgalaŋ muŋ dimiŋ nda, Toŋgola Bɔŋaŋnda Bɛndaŋ, ɔɔ la pɔmbɔlaŋ. Ma ke nda nyɛdiaa, naa hiniaa, a nyɛm cheleŋndoŋ. Maa yuŋgoo Bɛtɛl, mi nda bɛɛ kuɛ lɔɔlɔɔ o bɔŋaŋndaŋ, a o wali pollo niŋ o lɔɔ bɛŋgu. Tɔnɔɔ pila waŋnda haa cho le naa o nɛila bɔɔbɔɔ choo ni.

19. Yɛɛ naŋ nɔ yɛ miŋ kɛsiŋ o kɔl le wanaa kua yooŋgu kɛndɔɔ dimioo o lɛŋii cheleŋnde niŋnda?

19 Vɛɛ ŋ kɛsiŋ yɛ wanaa fula o lɛŋii cheleŋ niŋ le wali lɔɔlɔɔ Mɛlɛkaa tosaa wa o kɔl? Kɛsiŋ o kɔl maa, o tase ndɔɔ, a hɛnaŋ nyɛdiaa nda komallo le. Lelaŋ, te a wa nda pɛ veeloo le nyɛdiaa, nyuna nda o nda yeema le dioo wo, ɔɔ o nda yeema le tofaa wo. Biunuŋ nda teleŋ nda cho wa suɛi maŋgalɛi a naamulaŋ pɛɛkoo wo. O cho teleŋndo chua nyɛɛmbɔ le ma bii bila nyɛ ŋ cho nda dimullo wo. Kɛ a mala nda diomndaŋ veelu nyɛkɛndɛi. A nɔ yeemɛi le pɛɛkoo!

20. O nɛi sɔvɛ kuɛɛ choo naŋ loonuŋ yɛ wanaa yɔŋguŋ le wali lɔɔlɔɔ Mɛlɛkaa tosaa wa, a wanaa velu nda wa?

20 Mi wanaa cho o wali lɔɔlɔɔ Mɛlɛkaa niŋnda yuuwa, nduyɛ wanaa velu nda wa bɛɛ. Te Seiyaa Chɛhowaa wanaa velu nda wa cho ni, a nɔ yeemɛi le mi chuauwaa ndaa lo o naa nda cho o viomɔɔ bɛŋgu wa. (Chɔŋ Ŋgaa Ndɔɔ 4) Lepum, te wanaa velu nda wa yeema pɛ malaa, wanaa cho o wali lɔɔlɔɔ Mɛlɛkaa niŋnda nɔla ma miiŋgu teleŋ o teleŋ le nda malaa. Kɛ a koŋ kpou, wanaa cho kɔɔli wa bɛɛ nɔla ma ke nda mala yeemaŋ ndo. Kɛsiŋ o kɔl maa wanaa cho o wali lɔɔlɔɔ Mɛlɛkaa niŋnda cho wali sɔvɛ bɛndoo tosaa, o chieeŋndo chi wɔ suu ndɔ bɛɛ loo. (Mat. 28:19, 20) Te wanaa velu nda wa yeema pɛ malaa, num, ɔɔ kundaa nɔla pa mbo mala nda?

21. Vɛɛ wana cho o wali lɔɔlɔɔ Mɛlɛkaa niŋnda yiyaŋ yɛ, te a sɔla pɛ malaa a kɔl dɛɛniaa?

21 O cho le nyɛsɔlaa le nda luɛi o wali lɔɔlɔɔ Mɛlɛkaa niŋ te. Kɛ a yeema ma ke Chɛhowa nyɛ a acheleŋnda. Kɔllo naŋ nda bɔɔ le mala o mala nya yɔŋgu pɛ. Mi ndepilɛnɔ cho wali lɔɔlɔɔ Mɛlɛkaa tosaa o lɛŋnde cheleŋ niŋndo dimi aa, “O yɔŋ bɛɛ aa yauwo kinɛi waŋnda poonyiaa ni, o chɔm maa a cho yiyaŋndo a num, nduyɛ maa a naŋ kɔl a nyɛ ŋ cho tosaa wo.”

22. Vɛɛ ŋ yiyaŋ yɛ a wali lɔɔlɔɔ Mɛlɛkaa?

22 Chɛhowa piɛiyo o wali lɔɔlɔɔ ndɔɔ niŋ ke naa bɔɔ tɔnɔɔ o yoomoo niŋ. O cho wali kala, kɛ o ke naa sinalapɛŋgoo a nyaaloo. Nduyɛ, o bɛɛndiaa naa nyɛkɛndɛi le nyaale fafɛɛŋ cho buɛiyaa laalaŋaa Chɛhowaa chumndo o Masale ndɔleŋ bɛŋgu wo. Naa fau, maa ŋ hiounuŋ lachi a loonɔŋndo lɔɔlɔɔ a wanaa cho laalaŋndo a kaalaa chɔmndo, nduyɛ ma wa fafalaa o wali lɔɔlɔɔ Mɛlɛkaa niŋnda.—1 Tɛs. 1:3.