O LƐUVE Ɔsiteleesiaa Winston nda Pamela (Pam) Payne cho wallo ni. A tuei niŋ yoomoo yeela tau o nɔ ndaa niŋ, kɛ simulta bɔɔbɔɔ komal nda niŋ. Simultaŋ ndaŋ latiŋ la cho ni, yɛlɛmiaa tosaa le naamula cheleŋndaŋ vɛlɛ a kɔl tambɛi nda sɔla teleŋ laandɔ viikuu wo. Kɛ a koŋ kpou, a cho hiouwɔɔ lachi a kaala ndaa chɔmndo le Chɛhowa vɛlɛ a wanaa nduaa. Nduyɛ, a cho vɛlɛ hiouwɔɔ lachi a nyaaloo sɔlaa o wali dimiaa yooŋgu kɛndɔɔ niŋ. O suukaŋndo hoo niŋ, ŋ cho nda nyuuniaa ma chɔm naa sɔɔŋ ndaŋ yɔŋnaŋndoŋ ŋtiŋ.

Winston, yandii chɔmndɔ naa mɛɛ ŋ looku Mɛlɛka saalɔŋ yɛ.

Naa naŋ tosa chiɛi ya Kuiŋsilaŋ o lɛŋnde Ɔsiteeliaa leŋ niŋ, nda manda ya ni. Yuŋgu nuu ndoo lenduŋ kɔl le suɛi Mɛlɛkɛi le. Le mɛɛ naŋ wa yololɛ yɛ, ndoo wa bɔɔ ikala le chiikaŋndo a wanaa cheleŋnda, mɛɛ yuŋgu nuu kinɛi. I wa wɔsilaŋ 12 mi kandu Mɛlɛka nuuviaa. Mi piɛi o ndu lo, nduyɛ mi nyuna ndu le mbo mala ya mi sina tonyaa a ndu okɔɔ. O mɛɛlulaŋ, mi faŋaŋ naa naŋ tosa chiɛi ya, okoŋ mi sɔla wallo o Adelɛdi niŋ, Ɔsiteeliaa Ba Touwo. I wa wɔsilaŋ 21 miŋ chiikaŋ naa Pam a boondii ya kuɛ pɛŋgi pɔmbɔɔ o Sidni niŋnde. Mbo dimulla a kunda le piɛi Bilitisiiya okɔɔ. Kundaa hoo ndoo laalaŋ maa o kayii laasiaŋ o Isɔluɛi niŋnde Bilitisiiya fula ni. Mi kundaa hoo dimi maa kayii keŋ wa kayii tɔ wa masale wa Isɔluɛi ba luaŋndo leŋ o ba bɛŋgu ni. Nduyɛ maa ma kua a nda o chɛleŋ niŋ a wɔsi 740 B.C.E. Okoŋ, mɛɛ ya miiŋgu Adelɛdi, mi kandu baltaŋ dɔwɔɔ naa chaŋ ni naŋ tosa wallo latulu wo a suɛi hei okɔɔ. Nduyɛ, ndoo kandu niŋ Baabuiyo pɛɛkoo a Seiyaa Chɛhowaa. Mɛɛ ya dɔu baltaŋ a ndu le hawɛila biŋgi a laalaŋnda Seiyaa Chɛhowaa okɔɔ, mi cha kɛsɛ maa Mɛlɛka muli piɛile ya wa ndu o ichuaambɔya wo. Mi kandu tonyaa pɛɛkoo a Wana Toosiaa ya wo okɔɔ, vɛlɛ a Masale ndɔleŋ! Mi saaluŋ “pou baa kala bɛndoo.”—Maa. 13:​45, 46.

Pam, mi num bɛɛ kandu pou koŋ nuuviaa o ichuaambɔya. Vɛɛ ŋ looku yɛ ndu saalɔŋ?

Chiee ya sullo cho Kɔf Habɔ ni, o tanda Niu Saut Welisi wo niŋ. Yuŋgu nuu ndoo landuŋ kɔl le suɛi Mɛlɛkɛi. Wanaa velu ya wa, finya ni mamaa, vɛlɛ a kala ni mamaa ndaa laalaŋ a pɛɛkula  kunda le piɛi Bilitisiiya. Mi yema ni ya chuu okɔɔ wo, bɛ nuu, tooŋgoowaa naa bɔɔbɔɔ vɛlɛ a ya sɔla pɛɛkoo maa Mɛlɛka che wanaa fula o pulale Bilitisiiya wa nyina. Kɛ yaa laalaŋ a pɛɛkulaŋ ndaŋ te, nduyɛ I ve pɛŋ sinaŋ maa I cho a Mɛlɛka kpɛɛluŋ te. Mɛɛ ya fuuluu wɔsilaŋ 14, mi kandu kɔlaŋ o kaaŋii bɔɔbɔɔ niŋ. Kaaŋnde hei ipum cho ni, Anglican, Baptist, vɛlɛ a Seventh-day Adventist. Kɛ pesiŋ bɛɛ kaaŋnde hei mala ya le mi sina Mɛlɛka le.

Okoŋ kɔɔli, mi yuŋgu nuu kua Sidni le challe. Loŋ naŋ chiikaŋ naa Winston ni a boondii ndoo kuɛ o pɛŋgi pɔmbɔɔ niŋnde. A mɛɛ o dimi yɛ, mi suukaŋ naa a Mɛlɛka okɔɔ tosa mbo kandu Baabuiyo pɛɛkoo a Seiyaa Chɛhowaa. Nduyɛ, mi ndoo poonyiaa bolii Baabuiye tau o yaula ndoo yɔŋ ya laŋ niŋ teleŋ naŋ wa nuaŋnaŋndo wo! I dimi maa o kandɔŋndo, I wa buulaŋndo, nduyɛ mi tuulu pɛŋ kɔl a ndu. Kɛ o pɔmpɔmbɔ, mi cha maa tonyaa a Mɛlɛka okɔɔ nyɛ ndoo poonyial la wo wa ni.

O wɔsi 1962 niŋ, mi kua Adelɛdi le challe le mi wa Winston ikɛi kpɛɛluŋ. Mbo tosa kɛɛsiaa le mi kɔ wa a pɔnɔɔ a lanɔ pilɛ diolaŋ Tɔmɔsi nda Chanisi Slomaŋ. Seiyaa Chɛhowaa nda wa ni nduyɛ, ndaa tosa niŋ misiɔnalueileŋ o Papua Niu Kini niŋ. Ma chɔm ya kɛndɛi ya ve bɛɛ kɔl te ve. A teleŋ koŋ, wɔsilaŋ 18 kinɛi ya wa ni, nduyɛ ma mala ya mi chɔɔlu sina tau a Chɛhowa okɔɔ. Okoŋ, mi kandu Diom Mɛlɛkaa pɛɛkoo, nduyɛ o viu bɛɛ le, mi sinapɛŋgu maa I saaluŋ tonyaa. Mɛɛ naŋ chal naa Winston o nɔɔ niŋ, miŋ kandu bɛɛ wali lɔɔlɔɔ Chɛhowaa tosaa, wali chuu wana salalaŋ tau wo. A simulta komal naalaŋ kpou, mi wallo hoo chɔɔlu naa mala le chɔɔ pou kɛndɛ naŋ saaluŋ hoo wo nyɛ sɔvɛ bɛndu.

Winston, yandii chɔmndɔ naa a wɔsila numnda taselaŋ o wali Chɛhowaa niŋ.

A. Mapii (kati) chɔm fondaŋnda naŋ wa wali buɛile ibuŋgaleŋ tosaa wo

B. Stampiilaŋ le lɛŋii mɛŋndaŋ ma balu hei ve ipum. Lɛŋnde hei Kilibati a Tuvalu ndaa veelu paandu ni aa, Kibat a Ɛlisi

C. Lɛŋnde kɛndɛ kɛndɛ mɛŋndaŋ ma balu leŋ Funafuti o Tuvalu niŋ. Le cho lɛŋndeŋ lepilɛ o lɛŋii mɛŋndaŋ ma balu ve tɛɛŋ i naŋ kua yilɔɔ ve tuupa ma yɔŋ misiɔnalueiya loŋ

Mɛɛ naŋ chal o nɔɔ niŋ naa Pam, o viu bɛɛ le mi Chɛhowa kandu naa walta teŋgeŋndaŋ kioo le tosaa o wali ndɔɔ niŋ. (1 Kɔliŋ. 16:​9) Mi Ŋgɔɔ Chak Pɔta o wa buɛi naa ibuŋgaa wo nda laandɔ Losiliŋ dɛɛniaa naa le kɔɔfale lɔɔlɔɔ leŋ tosaa. Nduyɛ miŋ tuɛi kɔɔfaleŋ tosaa yeela tau naa Pam le wɔsilaŋ la ŋuɛɛnu. Suŋ suŋ niŋ, ŋ cho wallo latulu naa Chak o Kunda cho Lɛuve Chilaŋndo o lɛuve Ɔsiteleesiaa. Mɛɛ ya fuuluu wɔsilaŋ 29, miŋ sɔla dikeŋnaŋndo le wali buɛile ibuŋgaleŋ tosaa o lɛŋii mɛŋndaŋ ma balu o Saut Pasifiki niŋnde. Nduyɛ a teleŋ koŋ, lɛuve Fichi wa lɛŋii keŋ kpou chilaŋ chuaa ni. Lɛŋii keŋ cho ni, Amɛlika Samoa, Samoa, Kilibati, Naulu, Niue, Tokelau, Toŋka, Tuvalu, a Vanuatu.

O palɛi keŋ niŋ, wanaa wa o lɛŋii keŋ niŋnda ndaa kɛsi bɔɔ Seiyaa Chɛhowaa hɔlteŋ choo. Le sabu koŋ, naŋ nɔ mi naŋ mandaŋ o nyɛ o nyɛ naŋ wa tosaa niŋ. (Maa. 10:​16) Kundalaŋ la ve la bɔɔ le, nduyɛ lepum puaapiliaa ndaa nɔla naa yiya le. Lelaŋ, mi naŋ nyuna wanaa cheleŋnda le naa yiyaa kioo, nduyɛ teleŋ o teleŋ a wa wanaa ikɛndɛ o naa lo.

A yeema a wali hiviaa tau Winston, yɛɛ tosa yɛ ma yeema a ndu?

A cho sukuuwo le bɛnduaa kundaa tosaa o Samoa niŋ

Mɛɛ naŋ kandu yilɔɔ lɛŋii mɛŋndaŋ ma balu ve o Toŋka niŋ, yaula pɔmbɔlaŋ nyɛɛmbɔ koni puaapiliaa wa loŋ nda ndaa nɔ o Toŋkaŋnde niŋ ni, suɛi maŋgalɛi Polinisiaŋnda dimi ve. O wali pollo niŋ, mi ndaa soliŋ yauwo hoo “The Truth That Leads to Eternal Life” kpeku le waŋnda pɛɛkoo. Kɛ o Iŋkilisiiye niŋ o wa ni. Mɛɛ naŋ wa sukuu bɛnduaa kundaa biyɔɔ le lɔɔlaŋ la hiɔɔlu, mi bɛnduaa kundaa a yaa o Toŋka niŋ a ndaa chiee Iŋkilisiiye tau le wa chɛl le yauwo hoo hivioo o Toŋkaŋnde niŋ. Mi Pam ndoo poonyiaa nyɛ nda hivi wo o maasiiyo choo okoŋ, miŋ yɔŋ nyɛ o poonyiaa koŋ ndo o lɛuve Amɛlika le ma toosiaa ndu. Mi che bɛɛ ndaa chiee hivioo nyɛkɛndɛi le, kɛ ma chii yau koŋ hivi o lɔɔla ŋɔmaa bɛŋgu. Nduyɛ, mi yau koŋ mala wanaa dimi Toŋkaŋnde wa tau le ma pɛɛku tonyaa. Mi che bɛɛ naa Pam ŋ cho wanaa hiviaa le, kɛ mi nyɛ yɔŋnuŋ koŋ ndo mala naa le yeemɛi nɔɔ tau le wallo hoo.

Pam, vɛɛ yoomoo o lɛŋii mɛŋndaŋ ma balu keŋnde niŋ wa yɛ teŋgeŋ a yoomoo o Ɔsiteeliaa niŋ?

Fondaŋnda naŋ lɔl laŋ opilɛ cho hoo ni, teleŋ naŋ wa wali buɛile ibuŋgaleŋ tosaa wo

Yoomoo wa bɔɔ teŋgeŋ! Fondaŋndaŋ lapum laa nɔ muiya, kulu kuloo, bɛlla, naalaŋ, nduyɛ teleŋndaŋ lapum naŋ sɔla nyɛdiaa bɔɔ le. Kɛ lepaa o lepaa, mi naŋ chal pɛŋgioo o bafɛile naaleŋ bɛŋgu a paale yɔŋgaŋndeŋ le kpoowɛiyaŋ  mɛɛndaŋndo. Te paŋgei ndii wa pɛ diondɔɔ, mi naŋ che wauwaŋ. Nduyɛ, mi paŋgeloo ndoo tiu silɔ o kpoowɛiyaŋ choo. Teleŋnda kɛndɛla waa naa laa mala naa ni le yiyaŋndo vɛlɛ a piɛileŋ. Mi hei ndii tosa miŋ handu kɔllo o sɔɔŋ kɛndɔŋ choo kɛ o cho o sɔɔŋ wɔɔŋndoŋ choo le.

Miŋ kaala chuaambuaa tau, nduyɛ ndaa nɔ bɔɔ sɔɔŋ mamaŋ o bii fau te ndaa che pɛ naa puuluaa. Mɛɛ naŋ kuɛ yilɔɔ Niue, mi poombɔ pilɛ pilaŋ Winston yiinde o baa, okoŋ mbo dimi aa, “I kaala bɔɔ yiiŋii numnde, naŋ chaa bɔɔla sɔɔ ni.” O dimi niŋ, lepilɛ bɛɛ ndoo chi wɔ waŋndo a yiiŋii waa lende o balaŋ te, okoŋ mi kɔndɔfillo bii ndu!

Mi mɔnɛi ndii bii naa tau te naŋ che pɛ mɛɛ kpɛ waŋnda wa o tambei niŋ yɛ. Ndaa nɔ bɔɔ fondaŋnda kɛndɛlaŋ, kɛ fondaŋnda chiɔuwaala ve tau le. Nduyɛ, mɛŋma kolaŋ ma ve tau le. Kɛ puaapiliaa ve o buulaŋ niŋ kposoŋ te. A wa yoomu ndaa tueiyɔɔ yeela. A wa a kɔl kɛndɛ le mɛɛ yuŋgula ndalaŋ la wa nda la balaa yɛ, le mɛɛ ndaa nɔ fondaa le Chɛhowa piɛiyo yɛ, vɛlɛ a dikeŋnaŋ ndaa nɔ le Chɛhowa saŋgalaa wo. Mi taamasi ndaa mala naa le kɔllo handɔɔ o nyɛ hiou wa o sɔvɛ wo choo, nduyɛ miŋ tosa yoomu naa tɛtɛlɛ.

Pam, lepum, mi num oo kɔndu mɛŋndaŋ a ba num, nduyɛ mi num oo yau nyɛdiaa o fondaŋ teŋgeŋndo niŋ. Vɛɛ num oo tiu yɛ ba le keŋ tosaa?

Pam cho nyɛla naalaŋ tɔɔ o Toŋka niŋ

I mel finya nuu balika tau le pɛɛku o ke ya wo. Mbo pɛɛku ya sɔɔŋ mala ya woŋ tau. Mɛɛ yiŋndeŋ kiisuu wo o bɛɛ le yauwo cho naa yɛ, vɛlɛ a mɛɛ wana biunuŋ yoomoo yɛ o yɔŋ bɛɛ ma nɔ tau o ba le. Mɛɛ naŋ kuɛ yilɔɔ teleŋ pilɛ o Kilibati niŋ, miŋ kɔ wa o chiɛile puile pɔmbɔleŋ niŋ. A pilaŋndaŋ ndaa taŋgul ndu ni. Le nyɛdiaa yauwo, sooŋndo yaa tuau ni le yiŋnda chieeloo toosiaa okoŋ, mi wou boola ŋkokolaŋ leniŋ le yiŋndeŋ kiisuu wo. Le mɛŋndaŋ sɔlaa, mɛɛ mi yaa kɔ sim o pulaleŋ niŋ a waŋlaanduaa naŋ komal loŋ nda o sooŋ kuandaa mamɛŋndo. Le mɛŋndaŋ nanɔɔ o sooŋndo niŋ, yɔmndo ndaa soliŋ kpeku ni, nduyɛ o wa bandei le nɛiyo le ŋɔmpum. Mi ndaa baa yoole pɔmbɔleŋ o yɔmndo latulu a kpɛiyo maa i doluŋ. Wana teleŋ ndɔɔ fuuluu pɛ, o wuu kpɛileŋ o sooŋndo niŋ, okoŋ o hiiluu yooleŋ le mi mɛŋndaŋ ma luɛi. O tosa dɔɔ lende pɛ, kpɛiyo luɛi o mɛŋndaŋ bɛŋgu okoŋ ma pɛ cha. Yaa che ko maa i cho suɛi tɛtɛlɛ. Mɛɛ teleŋ nuu fuuluu, mi wuu kpɛileŋ teleŋnda bɔɔbɔɔ, kɛ le tul o mɛŋndaŋ bɛŋgu le. I wuu pɛ, le chalnuŋ o mɛŋndaŋ choo. Mɛɛ waŋnda kpou pɛŋgi ya mamɔɔ, mi chua pilɛ yɔŋguŋ le ya malaa. Nduyɛ teleŋ o teleŋ, mi ndaa yɔŋguŋ le ya malaa o nɛi kaalaa niŋ.

Nya ŋiɔɔŋ kpou mi la kaala wali nya wa tosaa wo o lɛŋii mɛŋndaŋ ma balu hei ve niŋ. Yandii la chɔm naa sɔɔŋ yɔŋnaŋ teŋgeŋndoŋ ŋpum ŋ nya loonuŋ ndoŋ?

Winston: Mbo chua tiŋ teleŋndo le miŋ bii naamulaŋ lapum bila. Le taamaseliiyo, teleŋnda bɔɔbɔɔ, te puaapiliaa ndaa veelu naa pɛ o la nda lo bɛɛ le nyɛdiaa, a wou o nda yau le paale leŋ ndo kpou a ke naa. O kandɔŋndo, naŋ sina maa naŋ nɔ miŋ mel nda nyɛdiaa otiŋ te. Lelaŋ, nyɛdiaa kɛ kɛ ndaa ke naa pɛ, naŋ de kpou. Kɛ mɛɛ naŋ sina maa naamu ndaa o wa ni le nyɛdiaa mɛiyo otiŋ, miŋ kandu keŋ tosaa. Mi che bɛɛ mi naŋ benduŋ teleŋndaŋ lapum, kɛ mi puaapiliaa ndaa bii naa bila. Nduyɛ te paŋgoŋ muŋ hiou pɛ ŋɔmpum, mi ndaa wa a kɔl kɛndɛ tau le naa vɛlɛ chɔɔ. O fula naa laanuu kɔɔli, lepilɛ bɛɛ puaapiliaa wa loŋ nda ndaa chi wɔ Seiyaa Chɛhowaa cheleŋ te.

Kundaa cho kɔlaŋ o wali pollo niŋ o lɛŋnde mɛŋndaŋ ma balu leŋ Niue

Mi yilɔɔ naŋ kua nda wo timbi seile kɛndɛleŋ o tanda koŋ niŋ. Mi wanaa wa o sɔndɔkɔlta laŋ niŋnda yiyaŋ maa piɛileŋ puaapiliaa wa loŋ nda kila ni. Kɛ mɛɛ wanaa ŋiɔɔŋ hiŋ puaapiliaa yilɔɔ fulaa lɛŋnde mapuulu, mi kɔndɔfillo bii wanaa wa o sɔndɔkɔlta laŋ niŋnda nduyɛ mi hei pilaŋ nda kɔllo tau.

Pam: Suɛi yɔŋnaŋ ya kaala tau ve cho nyɛ yɔŋnuŋ Kilibati wo ni. Puaapiliaa a ndepiliaa nyɛɛmbɔ koni wa o kunda koŋ niŋ ni. Mi bɛndu kunda wa loŋndo diolaŋ Itinikai Mateela, tosa nyɛ o nyɛ ndoo tiuba le naa biyɔɔ nyɛkɛndɛi. Paale pilɛ, mbo huŋ a kambɛiyo a pelte sɔɔleŋ leniŋ. Mbo dimi aa, “Nya nɔ ni.” A teleŋ koŋ, i wa ikala le pelte sɔɔleŋ sɔlaa. Mi kɛndɛi tɛtɛlɛ o tosal naa keŋnde pilaŋ naa kɔllo tau.

 Pam, wɔsilaŋ hiouwɔɔ okoŋ kɔɔli, ma viikuu. Yɛɛ mala yɛ num ma biunuŋ?

O wɔsi 1973 niŋ, ŋ wa o Saut Pasifiki niŋ naa Winston mi chua folioo. Miŋ kɛɛsiaa le miiŋgoo Ɔsiteeliaa. Nduyɛ mɛɛ naŋ miiŋgu, paŋgoŋ ŋhiɔɔlu okoŋ kɔɔli, mi viikuu. Mi Winston tambu kɔllo tau le mɛɛ naŋ vii chɛlɛkpɛ naa yɛ. Mi kɔl ni tambɛiyo pɔlul tiŋ, kɛ I wa wɔ yiyaŋndo lechoo haaa a teleŋ naŋ sɔla Bandu Mɛŋgɛlaa le Nyaakuɛiyo 15, 2009 wo. Mi nyunaa fula o buŋgɛi hei niŋ “Nyunala Wanaa Nua o Yaula Naalaŋ Niŋnda” aa, “Baa tiindaŋ fulasɛiniŋndo cho pa le chɛlɛkpɛ vi kala ndɔ o dembe wo?” Mi buŋgɛi hei tɛɛsiaa maa Chɛhowa sina nyɛ o cho tosa wo ni, nduyɛ maa le teleŋ o teleŋ, sɔɔŋ kɛndɔŋ o tosa ni. Chɛhowa cho Po ndɔɔ soliŋ kpeku o nɛi kaalaa niŋ le mbo faŋa nyɛ nɛiyaa kɛ kɛ cho naa hau choo o chieeŋ dɛnɛwɔɔŋndo hoo niŋ, nduyɛ mbo tɛɛmbuu ‘nyɛ o nyɛ Setana cho tosaa.’ (1 Chɔŋ 3:​8) Mi buŋgɛi hei chɔɔlu naa vɛlɛ mala le “pou” baa kala bɛndu naŋ nɔ maa wanaa Chɛhowaa wo chua nyɛ sɔvɛ bɛndu! Nuawɔ se tiindaŋ sɔvɛ bɛndu Masale Mɛlɛkaleŋ le ke naa wo!

O viikuu wo hoo kɔɔli, miŋ kandu vɛlɛ wali lɔɔlɔɔ Mɛlɛkaa tosaa. Nduyɛ le paŋgoŋ ŋtiŋ, ŋ wa wallo tosaa o lɛuve Ɔsiteeliaa. Okoŋ kɔɔli, miŋ kandu vɛlɛ wali buɛile ibuŋgaleŋ tosaa. Nduyɛ, miŋ tosa wali buɛile ibuŋgaleŋ le wɔsilaŋ la hiɔɔlu o Niu Saut Welisi a Sidni niŋ. Okoŋ kɔɔli, o wɔsi 1981 niŋ, ma veelu naa le wallo tosaa o lɛuve Ɔsiteeliaa, a mɛɛ ndaa veelu ndi a teleŋ koŋ yɛ. Nduyɛ loŋ naŋ cho wɔ ni chɔŋ a teleŋ koŋ.

Winston, baa mi taasi ŋ sɔla o Lɛŋii mɛŋndaŋ ma balu o Saut Pasifiki niŋndo mala num le wallo o Kunda cho Lɛuve Chilaŋndo Ɔsiteleesiaa?

Ei, o nɛila bɔɔbɔɔ niŋ. O tasoo, ma dimul Ɔsiteeliaa le mbo wa Amɛlika Samoa a Samoa chilaŋ. Okoŋ kɔɔli, ma mɔɔsa lɛuve Niu Silaŋ a lɛuve Ɔsiteeliaa naapilɛ. Suŋ suŋ niŋ, lɛŋnde hei lɛuve Ɔsiteleesiaa cho chilaŋ ni. Ɔsiteeliaa, Amɛlika Samoa, Samoa, Kuk Ailaŋ, Niu Silaŋ, Niue, Timɔ Lɛsti, Tokelau vɛlɛ a Toŋka. Nduyɛ, I sɔla niŋ dikeŋnaŋndo le lɛŋnde hei i bɔɔbɔɔ kɔlaŋ yilɔɔ maa wana lɛuve vem hɔlte ndɔ wo. Taasi ya sɔla o wallo tosaa niŋ latulu a puaapiliaa a ndepiliaa laalaŋnda o lɛŋnde hei niŋndo, mala ya niŋ tau o wali ya cho tosaa suŋ suŋ o lɛuve le nda wo niŋ.

Winston nda Pam o lɛuve Ɔsiteleesiaa

Le suɛi bolleŋ saa, I dimi maa naa Pam miŋ laalaŋ kɛsɛ maa o cho ko kaasoŋnda le nuuviaa Mɛlɛka le. Mi hei yɔŋnuŋ naa. Feleŋguaa bɛɛ yeema ma sɔla “pou baa kala bɛndoo” hoo, o yɔŋ bɛɛ mi acheleŋnda o yuŋgu ndaa niŋ chɔm iyeema kposoŋ te. (2 Masaa. 5:​2, 3; 2 Kolo. 34:​1-3) A tonya, Chɛhowa cho bɔɔ Mɛlɛka kaalaa. O yeema mi wana o wana sɔla yoomoo, o wa kaasoŋnɔ ɔɔ feleŋgɔnɔ!

O hiou niŋ wɔsilaŋ 50 chɔŋ a teleŋ naŋ kandu Mɛlɛka nuuviaa naa Pam ndo. Nyɛɛmbui nii bɛɛ naŋ sina naa sɛmbɛ naa ndoo yaa niŋ naa wa le. Tonya cho a Masale Mɛlɛkaleŋ okɔɔ wo cho bɔɔ pou baa kala bɛndu, nduyɛ nyɛ o nyɛ siimaŋ a ndu le! I cho naa o kɔl le hiouwɔɔ lachi a pou baa kala bɛndoo hoo biyɔɔ kpiŋ a yoomuma naŋ kpou!