“Sɔŋgɔ naa ŋ cho hoo wo, . . . a nyinaa wɔɔŋaa kɔl vesɛiya choo choo, a nda naa ŋ cho sɔŋgɔɔ ni.”—ƐFI. 6:​12.

CHONDII 55 La Wo Nda Le!

SƆƆŊ KULLOŊ O BUŊGƐI HEI NIŊ *

NƐILA sɔvɛlaŋ opilɛ o Chɛhowa chɔm maa o buulaŋ a naa buɛiyaa nduaa wo cho mala o ke naa le yaamɔɔwaa naa simullo wo ni. Yaamɔɔwaa naa kpeekpeiya cho Setana a nyinaa wɔɔŋnda ni. Mi Chɛhowa sila naa a yaamɔɔwa haa okɔɔ, nduyɛ mbo ke naa nyɛ naŋ hau ba wo le nda simullo. (Nuawɔ Ɛfisiaŋnda 6:​10-13.) Te ŋ chɛl pɛ mala Chɛhowaa, nduyɛ miŋ tiindaŋ ndu a kɔllo kpou, ŋ nɔla miŋ sɔla batiuwaa le Masa Nyinaa Wɔɔŋnda simullo. Ŋ nɔla miŋ nɔ tiindaŋ pilɛ kiilanɔɔ Pɔɔl ndoo nɔ wo. Mbo poonyiaa aa, “Te Mɛlɛka wa naa kɔɔli pɛ, wana o wana nɔla naa le.”—Luomaŋ. 8:​31.

2. Yɛɛ naŋ cho yɛ yaasiaa o buŋgɛi hei niŋ?

2 Naa Kilisiɔŋaa tonyaa, ŋ lenduŋ kɔl tau a Setana vɛlɛ a nyinaa wɔɔŋnda le. Kɛ ŋ landuŋ kɔl tau le pɛɛkoo sɔlaa Chɛhowa o ba, vɛlɛ a ndu piɛiyo. (Sam 25:​5) A koŋ kpou, ŋ nɔ miŋ sina mɛɛ Setana tosa sɔɔŋ yɛ. Le yɛɛ? Le halikpeŋ Setana nɔla mbo tiu naa ba le. (2 Kɔliŋ. 2:​11) O buŋgɛi hei niŋ, ŋ cho yaasiaa nɛi kpeekpei Setana a nyinaa wɔɔŋnda kindiŋ le waŋchieeya huiyo wo. Ŋ cho vɛlɛ yaasiaa mɛɛ naŋ simul nda, nduyɛ miŋ sɔla batiuwaa yɛ.

MƐƐ NYINAA WƆƆŊNDA HUI WAŊCHIEEYA YƐ

3-4. (a) Yɛɛ cho yɛ walta nyinaa wɔɔŋnda? (b) Vɛɛ kpɛ laalaŋndo o walta nyinaa wɔɔŋnda niŋ cho yɛ hau o pɛŋgɛlaŋ?

3 Nɛi kpeekpei Setana a nyinaa wɔɔŋnda kindiŋ le waŋchieeya huiyo wo cho sanaa a walta nyinaa wɔɔŋnda ni. Mi wanaa bala ndalaŋ la cho o walta nyinaa wɔɔŋnda niŋnda dimi maa a nɔ kpaayaa le ma tosa ɔɔ ma sina sɔɔŋ kɔndɔfilloŋ. Le taamaseliiyo, mi apum dimi maa a tiuba ma sina a chilaŋ okɔɔ  sanaa a yawaa viomɔɔ ɔɔ pɛɛkoo a looŋ okɔɔ. Naapum, mi acheleŋnda tosa naŋ chaa o waŋvilɛiya lo nda wa suɛi ni. Mi apum luei balaŋ o kueeleŋ niŋ ɔɔ maŋgaliaalaŋ, nduyɛ ma kindiŋ le waŋndo yɔŋullo. * Kɛ o cho Mɛlɛka le ke nda kpaayaa koŋ te.

4 Vɛɛ kpɛ laalaŋndo o walta nyinaa wɔɔŋnda niŋ cho yɛ hau o pɛŋgɛlaŋ? O Latiŋ Amɛlika a Kaliibiaŋ niŋ, mi yaasiaa tosaŋ o lɛŋnde 18 niŋ, nduyɛ ma saaluŋ maa te a chɔm pɛ wanaa yaa, o nda tɛɛŋ, waŋndo opilɛ nɔ laalaŋndo o maŋgalaa niŋ, kueeleŋ, vɛlɛ a wana ŋwaŋvilɛiyo. Nduyɛ, wanaa bɔɔbɔɔ laalaŋ vɛlɛ maa waŋchieeya tiuba ma suukaŋ a nyinaa wɔɔŋnda ɔɔ waŋvilɛiya. O Afilika niŋ, mi yaasiaa cheleŋ tosaŋ o lɛŋnde 18 niŋ. O lɛŋnde hei niŋ, mi wanaa nda nyuuniaa wa a bɔɔbɔɔ dimi maa a laalaŋ o kueeleŋ niŋ. A tonya, ba o ba naŋ wa achal, ŋ nɔ miŋ wa yekeŋ a walta nyinaa wɔɔŋnda okɔɔ. Nduyɛ, ŋ sina maa Setana cho nɛilaŋ nuuviaa le mbo “hui ŋwaŋnda chiee kpou ma tosa yɔŋ wɔɔŋndo.”—Sɔɔŋ. 12:​9.

5. Vɛɛ Chɛhowa yiyaŋ yɛ a walta nyinaa wɔɔŋnda okɔɔ?

5 Chɛhowa cho “Mɛlɛka wana tiindaŋ ndo ni.” (Sam 31:​5) Lelaŋ, vɛɛ o yiyaŋ yɛ a walta nyinaa wɔɔŋnda okɔɔ? O tul laŋ leyɛ! Mi Chɛhowa dimul Isɔluɛiya aa, “La chɛl mi wana o wana nya tɛɛŋ o soli po ndɔɔ kɛlɛŋgaa chua ndɔ wana lanɔɔ sala luamaa le. O koŋ kɔɔli, sɔɔŋ muŋ kinɛi, la chɛl mi wana o wana nya tɛɛŋ o wou laba leniŋ te. Muŋ yɔnuŋ ni maa kɔlaŋ o mandiaa lo, a yawalaŋ viomɔɔ, a sɔɔŋ waa lachioŋ waŋnda dimullo, a kueeleŋ, a niilu piandaŋndo, o koŋ kɔɔli, a suɛi o waŋ vilɛiya lo. Kani fondole, Mɛlɛka Yaawɛɛ o tul wanaa tosa sɔɔŋ wɔɔŋndoŋ muŋ nda leyɛ.” (Ditɔnɔ. 18:​10-12) Kilisiɔŋnda hau cho o Sawala Chɛhowa ndoo ke Isɔluɛiya laŋ bɛŋgu le. Kɛ a koŋ kpou, ŋ sina maa yiyaŋ Mɛlɛkaa a walta nyinaa wɔɔŋnda okɔɔ siŋgaŋ ndɔ le.—Mal. 3:​6.

6. (a) Vɛɛ Setana soliŋ yɛ walta nyinaa wɔɔŋnda kpeku le waŋchieeya yɔŋullo? (b) A mɛɛ Ikilisiaatii 9:​5 dimi yɛ, tonya yɛɛ cho yɛ a waŋvilɛiya okɔɔ?

6 Chɛhowa cho naa silaa a walta nyinaa wɔɔŋnda okɔɔ kanifuule, o sina maa laŋ Setana soliŋ kpeku ni le waŋchieeya yɔŋullo. Setana cho walta nyinaa wɔɔŋnda soliŋndo kpeku le choolaŋ pɛŋgɛlaa. Choolaŋ ndaŋ latiŋ la cho ni maa, waŋvilɛiya cho achal o fondaŋ cheleŋ. (Nuawɔ Ikilisiaatii 9:​5.) Mi Setana soliŋ vɛlɛ walta nyinaa wɔɔŋnda kpeku le waŋchieeya siooŋnde lueiyo, vɛlɛ a nda faŋaa Chɛhowa o ibuŋ. Yeemɛi nduɛi cho ni, le mi waŋnda laalaŋ o nyinaa wɔɔŋnda niŋ, nduyɛ ma kɛɛ laalaŋndo o Chɛhowa niŋ.

MƐƐ NAŊ SIMUL NYINAA WƆƆŊNDA YƐ

7. Yɛɛ Chɛhowa dimullɛ naa?

7 A mɛɛ naŋ laŋga pɛɛku yɛ, Chɛhowa dimul naa nyɛ naŋ nɔ le sinaa wo le halikpeŋ Setana a nyinaa wɔɔŋnda nɔla naa hui le. Ŋ yaasiaŋndɔ sɔɔŋ ŋtiŋ ŋ naŋ tosa le Setana vɛlɛ a nyinaa wɔɔŋnda chɔulabaa wo.

8. (a) Ɔɔ nɛi kpeekpei naŋ simul nyinaa wɔɔŋnda wo? (b) Vɛɛ Sam 146:​4 chɔɔmuu yɛ choola Setanalaŋ a piɔmndo okɔɔ?

8 Veelu diomndaŋ o Baabuiyo niŋ, nduyɛ ma yiyaŋ lechoo. Nɛi kpeekpei naŋ kɛɛ choola nyinaa wɔɔŋnda cho pɛŋgɛlaa wo cho hoo ni. Diom Mɛlɛkaa cho machuaa maa imɔɔ le choola Setana cho pɛŋgɛlaa laŋ kili kilioo. (Ɛfi. 6:​17) Le taamaseliiyo, Diom Mɛlɛkaa chɔɔmuu choola cho dimiŋndo laŋ maa, waŋvilɛiya nɔla ma suukaŋ a wanaa cho  yoomu wa. (Nuawɔ Sam 146:​4.) O chɔm naa vɛlɛ maa Chɛhowa kinɛi nɔla mbo chɔm naa a chilaŋ okɔɔ ni. (Aisaya 45:​21; 46:​10) Te ŋ wa pɛ diomndaŋ veeloo lɔɔlɔɔ o Baabuiyo niŋ nduyɛ miŋ wa yiyaŋndo lechoo, ŋ cho wa a bɛɛndiaŋ le kiɔɔ, nduyɛ miŋ tul choola nyinaa wɔɔŋnda yeema naa miŋ laalaŋndaŋ leyɛ.

9. Sɔɔŋ suu kuɛɛ cho yɛ a nyinaa wɔɔŋnda okɔɔ ŋ naŋ nɔ miŋ fafaŋndoŋ?

9 Kɛɛ le tosaa nyɛ o nyɛ cho o chiɛɛliaŋ a walta nyinaa wɔɔŋnda okɔɔ. Le mɛɛ naŋ cho Kilisiɔŋaa tonyaa yɛ, fɛɛŋ bɛɛ ŋ nɔ miŋ wou laba o walta nyinaa wɔɔŋ kɛ kɛ niŋ te. Le taamaseliiyo, ŋ kue o wana ŋwaŋvilɛiyo lo ɔɔ miŋ kindiŋ le suɛi o waŋvilɛiya lo o nɛi o nɛi niŋ te. A mɛɛ naŋ yaasiaa o buŋgɛi hiou ve niŋ yɛ, ŋ nɔ miŋ fafaŋ laalaŋndo o naamula lachoowala dimi maa, wanaa vi niŋ nda cho wɔ yoomu, nduyɛ ma wa achal o fondaŋ cheleŋndo. Nduyɛ, ŋ nɔ miŋ soliŋ pɛɛkoo a looŋ okɔɔ, vɛlɛ a sɔɔŋ waa lachioŋ dimioo kpeku, le kindiŋndo le sinaa a chilaŋ okɔɔ le. (Aisaya 8:​19) Ŋ sina maa kpundɔɔ sɔɔŋ suu waa naa kpou cho ni, nduyɛ maa ŋ tosa miŋ wou balaŋ o sɔɔŋ Setana woŋ niŋ vɛlɛ a nyinaa wɔɔŋnda.

Tol taamasi Kilisiɔŋaa tasiaa kɔɔli le tɛɛmbuu wo nyɛ o nyɛ ŋ nɔ mbo wa o chiɛɛliaŋ a nyinaa wɔɔŋnda, nduyɛ ma kɛɛ yelelaŋ kɛ kɛ cho a walta nyinaa wɔɔŋnda okɔɔ (Tofa pɛlta 10-12)

10-11. (a) Yɛɛ waŋnda apum o wɔsiŋ kɛmɛ tasoŋ niŋ tosa yɛ mɛɛ nda pɛɛku tonyaa? (b) A mɛɛ Kɔliŋtiaŋ Tasoo 10:​21 dimi yɛ, le yɛɛ naŋ nɔ yɛ miŋ tol taamasi Kilisiɔŋaa tasiaa kɔɔli, nduyɛ vɛɛ naŋ tosa yɛ keŋ?

10 Tɛɛmbuu nyɛ o nyɛ ŋ nɔ mbo wa o chiɛɛliaŋ a nyinaa wɔɔŋnda okɔɔ. Waŋnda apum o Ɛfisɔɔ niŋ sindɛ o wɔsiŋ kɛmɛ tasoŋ niŋ, ndaa nɔ balaŋ o walta nyinaa wɔɔŋnda niŋ. Kɛ mɛɛ nda pɛɛku tonyaa, ma tosa nyɛ sɔvɛ bɛndu pilɛ. “Mi wanaa ka ka a nda aa nɔ kooma wɔɔŋndaŋ nda ma huŋ a yaula ndalaŋ naa pilɛ ma luam ndaŋ waŋnda kpede o hɔl. Kani fondole, yaulaŋ ndaŋ la aa chɔm nda mɛɛ nda toosiaa kooma wɔɔŋndaŋ yɛ ni.” (Walta. 19:​19) Mi waŋnda haa tosa nyɛ o nyɛ ndaa tiuba le tosaa le nyinaa wɔɔŋnda simullo. Kanioŋ pila ndaa pisi ni le yaulaŋ ndaŋ piondɔɔ. Kɛ a ke laŋ wanaa cheleŋ, ɔɔ ma pisi laŋ te, ma tɛɛmbuu laŋ. Ndaa landuŋ kɔl le  Chɛhowa kɔllo nɛŋioo mbo hiau mɛɛ kpɛ yaula laŋ laa nɔ baa yɛ.

11 Vɛɛ naŋ tuallɛ taamasi Kilisiɔŋaa tasiaa o wɔsiŋ kɛmɛ tasoŋ niŋ kɛsi wo kɔɔli? I cho bɔɔ suɛi taasi le miŋ tɛɛmbuu nyɛ o nyɛ naŋ nɔ mbo wa o chiɛɛliaŋ a nyinaa wɔɔŋnda okɔɔ. Muŋ cho ni, kɛiyo baanɔŋndo o chaŋ le kɛndiaa, kelɛi wounɔŋndo le nyinaa wɔɔŋnda ɔɔ nyɛm cheleŋ waŋnda wounuŋndoŋ, ɔɔ ŋ nda nɔ le ndapila mandaa nyinaa wɔɔŋnda o ba woŋ.—Nuawɔ Kɔliŋtiaŋ Tasoo 10:​21.

12. Nyunala kuɛɛ naŋ nɔ yɛ miŋ nyunaŋ a yelelaŋ naa okɔɔ?

12 Hɛli yelelaŋ numndo nyɛkɛndɛi. Nyunaŋndɔ aa, ‘Baa I veelu pa diomndaŋ o yaulaŋ niŋ, ɔɔ buŋgaŋ cho o intanɛtiiyo choo a nyinaa wɔɔŋnda okɔɔ woŋ? Baa nyɛchaa ya yaŋ nilaŋndo, vidueila ya tofalaŋ, buŋgaŋ ya tofa o tɛlivisiɔŋndo choo woŋ, vɛlɛ a pisulta vidueila ya tosalaŋ cho pa a nyinaa wɔɔŋnda okɔɔ? Baa yelelaŋ ni kɛ kɛ cho pa a nyinaa wɔɔŋnda okɔɔ? Baa viduei ya tofa wo cho pa a wanaa sɔɔsiaa acheleŋnda koowaŋ nda, ɔɔ wana vi wo miiŋgoo yoomu o kueeleŋ niŋ? Baa mi viduei ya tofa wo chɔm maa maŋgalaa, waŋndo yɔŋullo, ɔɔ waŋndo sendioo handɔɔ choo cho suɛi wɔɔŋ te?’ A tonya, o cho vidueila naŋ tofalaŋ kpou le cho a nyinaa wɔɔŋnda okɔɔ le. Te a wa pɛ yelelaŋndo hɛlioo, tosa a sabu ma hɛli yelelaŋ mala num ma fafaŋ nyɛm Chɛhowa tul leyɛ woŋ. Ŋ yeema miŋ tosa o naŋ tiuba le tosaa wo. Nduyɛ, miŋ kindiŋ “lɔɔ o lɔɔ maa isɔɔ o isɔɔ wɔɔŋ i wa” naa o kɔl naa Mɛlɛka naa tɛɛŋ te.—Walta. 24:​16. *

13. Yɛɛ naŋ nɔ yɛ miŋ fafaŋ tosaa?

13 Fafaŋ bundɔŋ dimioo a nyinaa wɔɔŋnda  okɔɔ. O hei niŋ, ŋ nɔ miŋ tol taamasi Chiisu kɛsi wo kɔɔli. (1 Pitɛ 2:​21) Tuupa mbo huŋ o chieeŋndo choo, Chiisu wa fɛŋ o choo choo niŋ. Nduyɛ ndoo sina a Setana vɛlɛ a nyinaa wɔɔŋnda okɔɔ nyɛkɛndɛi. Kɛ ndoo dimi ŋbundɔ a nyɛ nyinaa wɔɔŋaa kaŋ ndaa tosa wo okɔɔ le. Chiisu ndoo yeema mbo wa seiyo le Chɛhowa, kɛ o cho le Setana le. Ŋ tiuba miŋ tol taamasi Chiisoo kɔɔli a mɛɛ naŋ kɛɛ bundɔŋ dimioo a nyinaa wɔɔŋnda okɔɔ yɛ. Nduyɛ, ŋ nɔ miŋ chɔm a mɛɛ naŋ suaa yɛ maa “diomnda kɛndɛlaŋ” a tonyaa okɔɔ la cho bɔɔ la piaa o kɔlta naalaŋ niŋ.—Sam 45:​1.

Pesiŋ bɛɛ ŋ nɔ isiooŋ le nyinaa wɔɔŋnda le. Chɛhowa, Chiisu, vɛlɛ a maalikɛiya nɔ kpaayaa mbo hiau nda poloŋ (Tofa pɛlta 14-15) *

14-15. (a) Le yɛɛ naŋ nɔ yɛ miŋ wa a isiooŋ le nyinaa wɔɔŋnda le? (b) Yɛɛ chɔm yɛ hau maa Chɛhowa cho wanaa nduaa mandaa?

14 Yɔŋ isiooŋ le nyinaa wɔɔŋnda le. O chieeŋndo niŋ hau, naapum mi sɔɔŋ wɔɔŋndoŋ yɔŋnuŋ naa. Mi sulɛi, naa, ɔɔ piɔmndo komal naa ŋ ve bɛɛ pɛŋ kɔl te. Kɛ, baa ŋ nɔ pa miŋ yiyaŋ maa nyinaa wɔɔŋnda tosa ni mi sɔɔŋ muŋ kpou komal naa? Baabuiyo dimi maa “sɔɔŋ naŋ ve kɔl te woŋ yɔŋnuŋ a teleŋ naŋ ve muŋ kɔl te wo.” Nduyɛ, ŋ komal wana o wana. (Ikili. 9:​11, NW ) Kɛ le nyinaa wɔɔŋnda, Chɛhowa chɔm niŋ maa o hiou nda kpaayaa poloŋ. Le taamaseliiyo, Mɛlɛka chɛl le mi Setana dii Choobu le. (Choobu 2:​6) O teleŋ Muuse wo niŋ, mi Chɛhowa chɔm maa o nɔ kpaayaa mbo hiau wanaa maŋgalaa o Ichipi niŋ. (Ɛsɔ. 8:​18; 9:​11) Mɛɛ Chiisu miiŋgu o choo choo niŋ, mi Chɛhowa ke ndu kpaayaa Setana a nyinaa wɔɔŋnda choo, nduyɛ mbo soli nda po o choo choo niŋ mbo mal nda o chieeŋndo choo. O chilaŋ niŋ, Chiisu cho nda hunɔɔ wou o sooŋ yiŋgilɛi nɔ lamɛɛlu le wo niŋ naa nda nɔla lɛ niŋ wana o wana yɔŋul te wa.—Sɔɔŋ. 12:​9; 20:​2, 3.

15 Ŋ cho hau chɔɔ kpendekele maa Chɛhowa cho wanaa nduaa mandaa. Yiyaŋndɔ a hei okɔɔ. Ŋ cho hau yooŋgu kɛndɔɔ dimioo vɛlɛ a waŋnda pɛɛkoo ba o ba fee o chieeŋndo choo. (Maa. 28:​19, 20) Fulamakɔɔlioo cho ni, miŋ chɔɔmuu walta wɔɔŋnda Masa Nyinaa Wɔɔŋnda cho tosaa laŋ. A tonya, te Setana ndoo tiu pɛ ba, o wa wali naŋ cho hoo tosaa wo kuuna, kɛ o tiuba kposoŋ te. Lelaŋ, ŋ nɔ miŋ wa a isiooŋ le nyinaa wɔɔŋnda le. Ŋ sina maa “hɔlte Mɛlɛka Yaawɛɛ leŋ le cho ba o ba fee o chieeŋndo hoo choo. Wanaa cho ndu o hɔl sakpo ma tosa nyɛ o dimul nda wo wa, dialluŋ kalaŋ o ke nda ni.” (2 Kolo. 16:​9) Te ŋ chɔm pɛ lo lechoo wo o Chɛhowa  lo, nyinaa wɔɔŋnda nɔla ma yɔŋul naa lefafɛɛŋ te.

SALALAŊ LE WANAA CHƐL MALA CHƐHOWAA WA

16-17. Chɔmndɔ taamaseliiyo mɛɛ kɔl sikpaa yeemaŋ le nyinaa wɔɔŋnda simullo yɛ.

16 Kɔl sikpaa yeemaŋ ni le nyinaa wɔɔŋnda simullo, taama taama te chaaŋaa naa ɔɔ wanayaŋ naŋ simul naa pɛ. Kɛ mi Chɛhowa dɔu wanaa chɔm kɔl sikpaa waa naa wa sala. Chuawɔ taamaseliiyo a ndepilɛnɔ pilɛ okɔɔ diolaŋ Ɛlika, o cho o lɛŋnde Kanaleŋ niŋndo. Ɛlika wa wɔsilaŋ 21 mbo chɛl le Baabuiyo pɛɛkoo. Le mɛɛ finya ndɔ wa mandenɔɔ yɛ, mi ndoo dimul ndu le mbo sɔɔŋguu nda machɛlu le walta nyinaa wɔɔŋnda tosaa, mɛɛ visiŋ lasooluu ndaa ke waŋvilɛiyaa ndaa woŋ dioo cho naa yɛ. Nduyɛ, mɛɛ Ɛlika kɛɛ le muŋ dioo, mi yuŋgu ndɔɔ yiyaŋ maa o yei waŋvilɛiyaa ndaa. Yuŋgu ndɔɔ ndoo laalaŋ maa waŋvilɛiyaa ndaa kaŋ cho tosa mi bolle hiŋnuŋ nda, nduyɛ ma tusi nda naa choo.

17 Mi yuŋgu Ɛlika wo kindiŋ le ndu baŋɔɔ le naamu ndaa tolɔɔ kɔɔli, kɛ mbo kɛɛ kpooŋ, mi che bɛɛ mi keŋ tosa mbo fula o nda lo chiɛiniŋ. Mi Seiyaa Chɛhowaa bɔɔbɔɔ chɛl le mbo wa a nda o la nda lo chiɛiniŋ. O nɛi koŋ choo, mi Chɛhowa duau Ɛlika sala a yuŋgu sɛnɛiyo. Mi chaaŋaa nduaa laalaŋaa kaŋ simnuŋ pɔmbuaa a yemaa le ndu. (Maki 10:​29, 30) Mi che bɛɛ mi wanayaŋ ndɔŋ kɛɛ ndu kpooŋ nduyɛ ma luam pɛŋ nyɛla ndɔlaŋ, kɛ mi Ɛlika hiau lachi a lo lechoo wo chɔmndo o Chɛhowa lo, mbo sɔla yiŋɔɔ, nduyɛ o cho niŋ suŋ suŋ kɔɔfanɔ lɔɔlɔɔ wo. O cho a isiooŋ kposoŋ le nyinaa wɔɔŋnda le. Mi Ɛlika dimi a yuŋgu ndɔɔ okɔɔ aa, “I cho piɛileŋ lepaa o lepaa le mi yuŋgu nuu sina sala wana sɔla wo te a sina pɛ Chɛhowa, vɛlɛ a hɛnɛkɛyɛi wana sɔla o Mɛlɛka naa kaalaa piɛiyo niŋndo.”

18. Salala kuɛɛ naŋ sɔla yɛ te ŋ tiindaŋ pɛ o Chɛhowa niŋ?

18 O cho naa kpou le tiindaŋ naa sɔla tofaa o nɛi waa naa choo le. Kɛ o wa bɛɛ lende, naa kpou nɔ miŋ simul nyinaa wɔɔŋnda, nduyɛ miŋ tiindaŋ o Chɛhowa niŋ. Te ŋ tosa keŋ pɛ, ŋ cho salalaŋ sɔla tau, nduyɛ Setana nɔla mbo hui naa a choola ndɔlaŋ te. Pesiŋ bɛɛ ŋ chɛlnuŋ mi siooŋii nyinaa wɔɔŋnda kɛɛlu naa Chɛhowa piɛiyo le. I hiou kpou ve, ŋ cho chɔɔlu chaŋyɛi nɛi a Chɛhowa kindi poŋ. Mi buɛi Chiisoo Chemisi poonyiaa aa, “La yɔŋguŋ nya pila Mɛlɛka o ba bɛŋgu. La simul Masa Nyinaa Wɔɔŋnda. Te la simul ndu pɛ, o nyaanuŋ nya. La sɔɔŋguu Mɛlɛka ikɛi. Ndu bɛɛ o cho nya sɔɔŋguu ikɛi.”—Chemi. 4:​7, 8.

CHONDII 150 Nuuviaa Mɛlɛka le Pioŋɔɔ Sɔlaa

^ pɛl. 5 Chɛhowa ke naa silaa o nɛi kaalaa niŋ a nyinaa wɔɔŋnda okɔɔ, vɛlɛ a kpundɛ nda chuu naa wo. Vɛɛ nyinaa wɔɔŋnda kindiŋ yɛ le waŋchieeya huiyo? Yɛɛ naŋ nɔ yɛ miŋ tosa le nyinaa wɔɔŋnda simullo? Buŋgɛi hei cho yaasiaa mɛɛ Chɛhowa mala naa nyinaa wɔɔŋnda hui naa le yɛ.

^ pɛl. 3 TƐƐSIAA LE DIOMNDAŊ: Walta nyinaa wɔɔŋnda cho ni, laalaŋndo o sɔɔŋ cho a nyinaa wɔɔŋnda okɔɔ woŋ niŋ nduyɛ a muŋ tosaa. Ndu sim vɛlɛ ni, laalaŋndo maa te waŋchieeya vi pɛ, nyinaa ndaa fulaŋ a kɔ wa achal naa cheleŋ. Nduyɛ maa nyinaa ndaa kaŋ tiuba ma suukaŋ a wanaa cho yoomu wa sanaa a wana ŋwaŋvilɛiyo. Walta nyinaa wɔɔŋnda cho vɛlɛ kueeleŋ a yawaa viomɔɔ ni. O buŋgɛi hei niŋ, maŋgalaa cho suɛi a sɔɔŋ cho a piondɔŋndaŋ okɔɔ woŋ. Naapum o wa le waŋndo sendioo handɔɔ choo, waŋndo yɔŋullo, ɔɔ le wana koŋ siŋgioo. Kɛ o cho pisulta waŋnda apum tosa a laba le yelelaŋndo laŋ te.

^ pɛl. 12 Bɛnduaa kundaa nɔ di kposoŋ le sawalaŋ kɛsioo a yelelaŋndo okɔɔ le. Kilisiɔŋnɔ kɛ kɛ nɔ ni mbo soliŋ kɔl iyama ndɔ Baabuiyo kpeku le hɛlioo nyɛ o veelu diomndaŋndo, nyɛ o nua wo, ɔɔ pisulta o tosalaŋ. Nduyɛ, wana taasi cho yuŋgoo bolleŋndo nɔla mbo tosa a sabu mi sawala mandaala Baabuiyo chɔm yuŋgu ndɔɔ nɛiyo te a wa pɛ yelelaŋndo hɛlioo.—Tofa buŋgɛi hei o jw.org® “Do Jehovah’s Witnesses Ban Certain Movies, Books, or Songs?” o suɛi lebolle hei bɛŋgu, A NAA OKƆƆ > NYUNALA WAŊNDA NYUNA LƆƆ LƆƆ LAŊ.

^ pɛl. 54 TƐƐSIAA LE FOTUEIYO: Fotueiyo hoo cho chɔmndo Chiisu Masa naa kpaaya bɛndoo o choo choo niŋ. O cho isisi maalikɛiyaa chɔuwa lachi.