“Puaa niaa . . . la yaŋ nilaŋ o silaa nduyɛ mi la sɔla taasioo.”​—PULƆWAA 8:​32, 33, NW.

CHONDOŊ: 56, 89

1. Vɛɛ naŋ sɔla yɛ taasioo, nduyɛ vɛɛ o mala yɛ naa?

CHƐHOWA o ba taasioo fula ni, nduyɛ mbo ke acheleŋnda taasioo fondo fuu. Chemisi 1:​5 dimi aa, “Te wana o wana wa nya tɛɛŋ pɛ mbo nɔ taasi le, mɛɛ wana koŋ o nyuna Mɛlɛka diom le mbo ke ndu taasioo. Wana ikɛndɔɔ Mɛlɛka cho naa wana o wana chua ni. O ke wana a ŋɔɔchiaŋ te.” Nɛiyo opilɛ o naŋ sɔla taasioo wo cho sila Mɛlɛkaa chɛlɔɔ ni. Mi hei tosaa manda naa le kiɔɔ balaŋ lueiyo o sɔɔŋ wɔɔŋndoŋ tosaa niŋ, nduyɛ mbo mala naa le loo Chɛhowa ikɛi kpɛɛluŋ. (Pulɔwaa 2:​10-12) Vɛlɛ ŋ cho nɔ tiindaŋ sɔvɛ sɔviɔɔ le yoomu fafɛɛŋndo sɔlaa.—Chudi 21.

2. Vɛɛ naŋ pɛɛku yɛ le sila Mɛlɛkaa kaalaa?

2 Le mɛɛ naŋ cho wanaa lahakiaa yɛ, ɔɔ mi mɛɛ nda manda naa yɛ tosa ndi ikala kpoke lepum le silaa chɛlɔɔ, ɔɔ le ndu chɔɔ maa o bɛnda. Kɛ te ŋ sɔla pɛ tɔnɔlaŋ o sila Mɛlɛka ke naa wo niŋ, miŋ bii bila mɛɛ kpɛ o kaala naa yɛ. Pulɔwaa 3:​11, 12 dimul naa aa, “Po nuu, te Mɛlɛka Yaawɛɛ miŋgi num o nɛi pɛ, kɛsiŋ ndi o kɔl nyɛkɛndɛi.” Mbo dimi vɛlɛ aa, “Mɛlɛka Yaawɛɛ ndu ndu, wana o kaalaa wo, num o miŋgi o nɛi ni.” Ŋ nɔ tiindaŋndo maa Chɛhowa yeema o kɛndɔɔ le naa. (Nuawɔ Hibuluiya 12:​5-11.) Le  mɛɛ Chɛhowa sina naa nyɛkɛndɛi yɛ, lelaŋ sila ndɔɔ bɛnda lɔɔlɔɔ le naa ni, nduyɛ ndu kpeekpei naŋ yeema ni. O buŋgɛi hei niŋ, ŋ cho yaasiaa nɛilaŋ la hiɔɔlu a silaa okɔɔ. (1) Mɛɛ naŋ duau naapila o mandaa bɛŋgu yɛ, (2) sila kalaŋ chuauwa nɔ ma ke chuauwaa ndaa wo, (3) sila naŋ sɔla o kundaa niŋndo, nduyɛ (4) nyɛ nɛiyaa wɔu mbo hiau o naŋ sɔla te a sila naa pɛ wo.

LE YƐƐ NAŊ WA YƐ A TAASI TE Ŋ DƆU PƐ NAAPILA O MANDAA BƐŊGU?

3. Vɛɛ chuaambɔɔ pɛɛku yɛ le ndupila dɔwɔɔ o mandaa bɛŋgu? Chɔmndɔ taamaseliiyo.

3 Te ŋ dɔu pɛ naapila o mandaa bɛŋgu, miŋ chua teleŋndo mɛɛ naŋ tosa sɔɔŋ yɛ, a mɛɛ naŋ yiyaŋ yɛ. Ŋ viluŋ a kaa le naapila dɔwɔɔ o mandaa bɛŋgu le, kɛ ŋ nɔ miŋ pɛɛku ndu. Le taamaseliiyo, te chuaambɔɔ wa pɛ pɛɛkoo le nɛɛsoo nyaanɔŋndo, mi wana velu ndu wo saa nɛɛsoo yɔŋi o del. Kɛ o teleŋ biŋgi bɛŋgu, mi chuaambɔ koŋ chaa challe yi o nɛɛsoo choo, nduyɛ mi kala chuaa wa ndu malɔɔ le kɔlaŋ a ba ndɔ o pɔm pɔmbɔ. Te kala chuaa che pɛ maa o chaa kɔlaŋ a ndu, o mal ndu niko le kɔlaŋ a ba ndɔ. O nɛi pilɛ koŋ choo, te kalaŋ chuauwa wa pɛ biuwɔŋndo le chuauwaa ndaa pɛɛkoo, a nɔ ma ‘pɛɛku nda pɛɛkula Masanɔɔ Mɛlɛkalaŋ, nduyɛ, ma sila nda silala ndɔlaŋ.’ Te a tosa lende pɛ, mɛɛ a cho chuauwaa ndaa malaa le ndapila dɔwɔɔ o mandaa bɛŋgu a taasioo nɔɔ.—Ɛfisiaŋnda 6:​4.

4, 5. (a) Le yɛɛ naapila dɔwɔɔ o mandaa bɛŋgu cho yɛ kaa sɔviɔɔ o “wana chieeyɛi sɛnɛiye” niŋ? (b) Le yɛɛ ŋ nɔ miŋ tambu kɔl te, o yɔŋ bɛɛ miŋ tosa biondɔŋndaŋ?

4 Nyɛ pilɛ koŋ yɔŋnuŋ a wanaa huŋ sina Chɛhowa o kaasoŋyɛi ndɛi niŋnda ni. Mi che bɛɛ a dɔu niŋ ndapila o mandaa bɛŋgu, kɛ a cho wɔ Kilisiɔŋaa nɔ kaasoŋyɛi o Mɛlɛka piɛiyo niŋnda le. Kɛ te a kandu pɛ “wana chieeyɛi sɛnɛiye” wounɔŋndo nduyɛ ma wa kindiŋndo le waa maa Kiliti, ma chɔɔlu kaasoŋyɛi sɔla o Mɛlɛka piɛiyo niŋ. (Ɛfisiaŋnda 4:​23, 24) Dɔwɔɔ naapila o mandaa bɛŋgu mala naa “mi ŋ mal kaalaŋ la simul suɛi Mɛlɛkɛi laŋ, nduyɛ, mi ŋ mal kɔl landaŋndo le nyɔɔŋ chieeŋ naŋ. Nduyɛ, i cho naa pɛɛku le mi ŋ wa wanaa kɛsiŋ lebɛɛ, mi ŋ wa sakpo nduyɛ, mi ŋ nɔ kaala Mɛlɛka hɛnaŋ maa ŋ tosa o chieeŋndo hoo choo laŋ.”—Taitɔɔ 2:​12.

5 Kɛ, naa kpou wanaa lahakiaa naŋ cho ni. (Ikilisiaatii 7:​20) Lelaŋ, te ŋ tosa pɛ biondɔŋndo, baa koŋ sim ni maa ŋ dou naapila o mandaa bɛŋgu lapi le, ɔɔ kɛlɛŋgaa pesiŋ bɛɛ ŋ tosa wɔ keŋ te? Sako bɛɛ. Pulɔwaa 24:​16 dimul naa aa, “Wana cho o tonyaa choo wo, mɛɛ o mɛɛ nyɛ palaa o yisila ndu komallo, miiŋgoo o miiŋgu vɛlɛ ni mbo sim yi.” Yɛɛ mala yɛ naa le ‘miiŋgoo simndaŋ yi’? O cho a kpaaya naa le, kɛ nyina Mɛlɛkaa tosa keŋ ni. (Nuawɔ Sam 46:​1.) Nyɛm nyina Mɛlɛka koŋ opilɛ cho kɔl numndo baa tiuwo ni, o velaŋ a numpila dɔwɔɔ o mandaa bɛŋgu wo.

6. Vɛɛ naŋ looku yɛ simnɔŋ sukuwaa kɛndɛ le Diom Mɛlɛkaa? (Tofa fotueiyo o peele naŋ kandu leŋ choo.)

6 Piɛileŋ, Baabuiyo pɛɛkoo, a yiyaŋndo mala naa le naapila dɔwɔɔ o mandaa bɛŋgu. Kɛ te Baabuiyo pɛɛkoo wa yɛ o kala le num, ɔɔ a hɛnaŋ pɛɛkoo le? Tambu kɔl te. Te a chɛl pɛ, Chɛhowa cho num mala le ma ‘dɔu kɔllo’ o Diom ndɔɔ. (Pitɛ Tasoo 2:​2) Nyuna Chɛhowa le mbo mala num le numpila dɔwɔɔ o mandaa bɛŋgu, le halikpeŋ ma sɔla teleŋndo le Baabuiyo pɛɛkoo. Naapum a kandu pɛɛkoo o chemchemma pɔmbɔ bɛŋgu. Mɛɛ teleŋndo hiau fau, i cho wa tɛtɛlɛ le pɛɛkoo, nduyɛ ma tuei ndu yeela. A cho kaala teleŋ ŋ cho wa numpilɛ kpeele le yiyaŋndo o sɔɔŋ sɔvɛ Chɛhowa woŋ choo wo.—Timoti Tasoo 4:​15.

7. Vɛɛ naapila dɔwɔɔ o mandaa bɛŋgu mala yɛ naa le kpeleŋnda naalaŋ komallo o Chɛhowa piɛiyo niŋ?

 7 Dɔwɔɔ naapila o mandaa bɛŋgu mala le kpeleŋnda naalaŋ komallo o Chɛhowa piɛiyo niŋ. Le taamaseliiyo, mi finya pilɛ yiyaŋ maa dialuŋ fulaŋ ndɔŋ wa tolɔɔ toolo. Okoŋ, mbo kɛsi kpeleŋndo le simnɔŋndo kɔɔfanɔ lɔɔlɔɔ wo. Vɛɛ ndupila dɔwɔɔ o mandaa bɛŋgu mala yɛ ndu? Mbo veelu diomndaŋ o buŋgaŋ soo a kɔɔfaleŋ okɔɔ woŋ o yau Bandu Mɛŋgɛlaa a “Tiondoo!” niŋ, nduyɛ mbo piɛi a ndi okɔɔ. Mi hei tosaa kindi chaŋyɛi nduɛi poŋ nda Chɛhowa tɛɛŋ. Mi ndoo tosa vɛlɛ kɔɔfale malalaŋndeŋ a teleŋ ndoo sɔla fondaa wo. O chɛl mi nyɛ o nyɛ kuuna ndu le. Kɛ, mbo handu kɔllo o kpeleŋ ndɔɔ choo. Mɛɛ teleŋ tiŋ hiou, mbo simnuŋ kɔɔfanɔ lɔɔlɔɔ wo.

SOLIŊ SILA CHƐHOWAA KPEKU LE CHUAUWAA NUMNDA MANDAA

Te chuauwa veluŋ pɛ, a sina ikɛndɛi tɛɛŋ a iwɔɔŋnde le. Lelaŋ, a nɔ ma sɔla pɛɛkoo (Tofa pɛl 8)

8-10. Yɛɛ mala yɛ kalaŋ chuauwa le chuauwaa ndaa mandaa ma piɛi Chɛhowa? Chɔmndɔ taamaseliiyo.

8 Chɛhowa ke kalaŋ chuauwa kalaŋndo le ma pɛɛku chuauwaa ndaa ‘pɛɛkula Masanɔɔ Mɛlɛkalaŋ, nduyɛ, ma sila nda silala ndɔlaŋ.’ (Ɛfisiaŋnda 6:​4) Hei cho bɔɔ ikala le tosaa o chieeŋndo hoo niŋ hau. (Timoti Diiŋ Ndɔɔ 3:​1-5) Te chuauwa veluŋ pɛ, a sina ikɛndɛi tɛɛŋ a iwɔɔŋnde le, nduyɛ kɔl nda iyamaa sɔla wɔ pɛɛku le. Lelaŋ, silaa yeemaŋ le kɔl nda  iyamaa pɛɛkoo. (Luomaŋnda 2:​14, 15) Mi wana pɛɛkaa Baabui pilɛ tɛɛsiaa maa diom maKilikiiyo le “silaa” sim vɛlɛ le “hɔɔ solioo leniŋ” ɔɔ hɔɔ mandaa le mbo chua kalaŋndaŋ o kaasoŋyɛi niŋ.

9 Te kalaŋ chuauwa sila pɛ chuauwaa ndaa a kaalaa, mi chuauwa wa hɛnɛkɛ. Ma pɛɛku maa hɛnɛkɛyɛi nɔ kpeleŋndaŋ, nduyɛ maa nyɛ o nyɛ nda tosa o yoomu ndaa niŋ pɛ nɔ fulamakɔɔlioo. Lelaŋ, i cho suɛi sɔvɛ le mi kalaŋ chuauwaa Kilisiɔŋnda dɔu tiindaŋndo o taasi Chɛhowaa niŋ le nda malaa ma manda chuauwaa ndaa. Kɔl kalula mandaa chuaa o fondaŋ waŋndo wa wo wa teŋgeŋ, nduyɛ kɔl kalulaŋ ndaŋ la cho hiouwɔɔ lachi a siŋgaŋndo. Kɛ kalaŋ chuauwaa yaŋ Mɛlɛka nilaŋ nda nɔ ma nyɛɛsuu lebol le sinaa nyɛ nda nɔ ma tosa wo le, ɔɔ le kɔl kalu wanachioo tiindaŋndo le.

10 Taamasi Nuuwa wo nɔla mbo pɛɛku naa. Mɛɛ Chɛhowa dimul Nuuwa le dɛndɔɔ baŋɔɔ, ndoo sina le keŋ tosaa le. Ndoo nɔ mbo dɔu tiindaŋndo o Chɛhowa niŋ. Nduyɛ Baabuiyo dimul naa maa mbo tosa “mɛɛ o mɛɛ Mɛlɛka dimul ndu.” (Chɛnɛsee 6:​22) Yɛɛ wa yɛ fulamakɔɔlioo? Mi dɛndɔɔ piŋi Nuuwa nda yuŋgu ndɔɔ! Kala chua ndoo sɔla vɛlɛ batiuwaa wo Nuuwa wa ni. Le yɛɛ naŋ dimi yɛ lende? Kanifuule, mbo duau tiindaŋndo o taasi Mɛlɛkaa niŋ. Mi Nuuwa pɛɛku chuauwaa nduaa nyɛkɛndɛi nduyɛ wana taamasi kɛndɔɔ o wa le nda ni. Vɛlɛ i ve bɛɛŋ o teleŋ dɛnɛ wɔɔŋ koŋ niŋ tuupa mi Mɛŋma Koŋgi Bɛnduaŋ ma huŋ te.—Chɛnɛsee 6:​5.

11. Le yɛɛ kalaŋ chuauwa nɔ yɛ ma tosa wallo kekelee le chuauwaa ndaa pɛɛkoo?

11 Te kala chuaa ŋ cho ni, vɛɛ ŋ tosa yɛ ‘mɛɛ o mɛɛ Mɛlɛka dimul num’? Yaŋ Chɛhowa nilaŋ. Chɛl mbo mala num chuauwaa numnda manda. Soliŋ sila cho o Diom ndɔɔ niŋndo kpeku a o kɔɔna ndɔɔ cho yɔŋgoo wo. O mɛɛlulaŋ, kɛlɛŋgaa chuauwaa numnda cho num balikaa mel le keŋ tosaa! Mi puaapilɛnɔ pilɛ poonyiaa aa, “Balika melaa cho ya o kɔllo niŋ o piaa cha a mɛɛ wanaa velu ya wa manda ya yɛ. Ma kindiŋ kpoke le ya kɔllo pilaŋndo.” Mbo dimi maa wanaa velu ndu wa mala ndu ni le sɔɔŋgoo Chɛhowa ikɛi kpɛɛluŋ. I cho tonya maa, o yɔŋ bɛɛ mi kalaŋ chuauwa kindiŋ o nɛi o nɛi niŋ le hɔɔ ndaa pɛɛkoo, mi hɔɔ ndaa kɛɛ Chɛhowa. Kɛ mi kala chua kindiŋ nyɛkɛndɛiyo nɔ kɔl iyama walaŋndo, nduyɛ mbo nɔ tiindaŋndo maa o wa niŋ o lepaa niŋ mi hɔɔ ndɔɔ miiŋgu Chɛhowa o ibuŋ.

12, 13. (a) Te hɔɔ sɔla solioo pɛ, vɛɛ kalaŋ chuauwa chɔm yɛ maa a diikuŋ Mɛlɛka? (b) Tɔnɔ yɛɛ yuŋgu pilɛ sɔla yɛ le mɛɛ kalaŋ chuauwa diikuŋ Chɛhowa yɛ?

12 Le kalaŋ chuauwa apum, teleŋ nda sɔla simul kala kalaa le kaa diikaŋndo chɔmndo wo cho teleŋ hɔɔ ndaa sɔla solioo wo ni. Mi ndepilɛnɔ ndoo nɔ chua soliaa mal chiɛiyo wo dimi aa, “Mi nuuviaa naa kɔɔsaa o yaula naalaŋ niŋ le halikpeŋ mi sɔla teleŋndo le waa latulu a chua nuu vɛlɛ a chua ni mamaa.” Kɛ mi pɔnɔ ndɔ mala ndu le sinaa maa kalaŋ chua ndaa ve lɛ nda choo le, nduyɛ ndaa nɔ ma chɔm lo lechoo wo o Chɛhowa lo.

13 Mɛɛ wɔsioŋ hiou ŋ tiŋ, mi chua ndaa sɔla miŋgioo. Mi kalaa dimi aa, “Chua nuu cho ya niŋ veeloo nduyɛ mbo wa ya yooŋgulaŋ yɔŋndo lepaa o lepaa! Nduyɛ o nɔ bɛɛle yiŋgoloŋndeŋ le ya a finya ndɔ, kanifuule, o sina maa miŋ diikuŋ Chɛhowa. Chaŋyɛi kɛndɛi pila cho naa tɛɛŋ ni.” Te po numndo ɔɔ chua numndo sɔla pɛ solioo, a cho pa dɔwɔɔ “tiindaŋ numndo kpou o Mɛlɛka Yaawɛɛ niŋ”? A cho pa Ndu chɔm maa a “tiindaŋ sina numndo le”? (Pulɔwaa 3:​5, 6) Loonuŋ maa mi sila Chɛhowaa chɔm naa mɛɛ o cho wana taasi yɛ, nduyɛ a mɛɛ kpɛ o kaala naa yɛ. Puɛɛnuŋ te maa mbo yɔŋ Po ndɔɔ le waŋchieeya  kpou, nduyɛ po numndo a chua numndo bɛɛ cho wanaa kaŋ tɛɛŋ. Mɛlɛka yeema mi wana o wana sɔla yoomu fafɛɛŋndo. (Nuawɔ Pitɛ Diiŋ Ndɔɔ 3:​9.) Lelaŋ, kalaŋ chuauwa, la hiou lachi a tiindaŋndo nɔɔ maa sila Chɛhowaa a nɛi ndɔ chɔmaa bɛnda, nduyɛ o yɔŋ bɛɛ mi diikɔŋ numndo chuu num saŋgaa. Yaŋ nilaŋ o sila Mɛlɛkaa, nduyɛ simul ndu le.

O KUNDAA NIŊ

14. Vɛɛ naŋ sɔla yɛ tɔnɔɔ o pɛɛku Chɛhowa cho naa kioo sanaa a “buɛi cho sakpo” wo?

14 Chɛhowa chua buŋgɛi maa o cho kunda leKilisiɔŋndo manda, nduyɛ mbo pɛɛku ndu. O cho keŋ tosaa o nɛila bɔɔbɔɔ niŋ. Le taamaseliiyo, mbo yulu Po ndɔɔ iso le mbo manda kundaa. Nduyɛ mi Chiisu ke “buɛi cho sakpo” wo wallo le naa kioo nyɛm mala naa le pɛɛkoo a Mɛlɛkaa okɔɔ woŋ, ŋ mala naa le hiouwɔɔ lachi a tiindaŋndo dɔwɔɔ o Mɛlɛka niŋndo. (Luku 12:​42) “Buɛi” koŋ cho naa pɛɛku sɔviɔɔ kioo a silaa. Kɛlɛŋgaa a yiyaŋ niŋ teleŋndaŋ lapum a suɛi ŋ yaŋ nilaŋ nde, ɔɔ a buŋgɛi ŋ veelu diomndaŋ o Bandu Mɛŋgɛlaa ɔɔ “Tiondoo!” niŋndo, i mala num le yiyaŋ numndo siŋgaa ɔɔ mɛɛ ŋ tosa sɔɔŋ yɛ. Naŋ kɔl le mɛɛ ŋ tosa siŋgaŋnda waa lende yɛ, kanifuule, o chɔm maa a cho Chɛhowa chɛlɔɔ le num silaa.—Pulɔwaa 2:​1-5.

15, 16. (a) Vɛɛ naŋ sɔla yɛ tɔnɔɔ o wali bɛnduaa cho tosaa wo niŋ? (b) Yɛɛ naŋ nɔ yɛ miŋ tosa le mi bɛnduaa tuei wali ndaa yeela?

15 Mi Kiliti yɔŋgu vɛlɛ bɛnduaa le ma manda kundaa a kaalaa. Baabuiyo dimi maa kioo puaapiliaa haa cho ni. (Ɛfisiaŋnda 4:​8, 11-13) Vɛɛ naŋ looku yɛ tɔnɔɔ sɔla o wali bɛnduaa cho tosaa wo niŋ? Ŋ nɔ miŋ tol tiindaŋ ndaa kɔɔli a taamasi nda kɛndɔɔ, nduyɛ miŋ dɔu sila nda cho naa kioo o Baabuiyo niŋndo o wali niŋ. (Nuawɔ Hibuluiya 13:​7, 17, NW.) Bɛnduaa kaala naa nduyɛ a yeema naa miŋ sɔɔŋguu Mɛlɛka ikɛi kpɛɛluŋ. Te a che pɛ maa ŋ cho bɔŋaŋndaŋ biondɔɔ, nduyɛ maa dialuŋ fulaŋ naŋ cho tolɔɔ toolo, ma kindiŋ chɔ chɔ le naa malaa. Ma yaŋ naa nilaŋ, ma ke naa kɔl dɛɛniaa, ma chɔm naa kaalaa, vɛlɛ ma ke naa sila taasioo o Baabuiyo niŋ. A cho pa mala ndaa chɔɔ maa kaala Chɛhowa cho num chɔmndo wo cho koŋ ni?

16 Loonuŋ maa i ve lepum suɛi bɛɛŋ le mi bɛnduaa ke naa silaa le. Vɛɛ ŋ yiyaŋ yɛ mɛɛ Netaŋ, wana ndoo suaa le Mɛlɛka wo ndoo yiyaŋ yɛ, teleŋ ndoo nɔ le suɛi o Masaa Deeve lo wo, teleŋ masaa tosa haki wɔɔŋ wɔɔŋndo nduyɛ mbo kindiŋ le ndu vioŋɔɔ wo? (Saamiɛɛ Diiŋ Ndɔɔ 12:​1-14) Yiyaŋndɔ vɛlɛ a Pɔɔl, wana Chiisu vem hɔlte ndɔ wo. Vɛɛ ndoo yiyaŋ yɛ teleŋ ndoo nɔ le Pitɛ silaa wo, o wa waŋndo opilɛ o wanaa 12 Chiisu vem hɔlte ndɔ wa tɛɛŋndo, le Chuwaa Kilisiɔŋnda biyɔɔ maa nda hiou bɛnda a Kilisiɔŋaa ve ŋChuu le wa? Kɔl sikpaa pila Pɔɔl ndoo yeema le keŋ tosaa ni. (Kaleesiaŋnda 2:​11-14) Lelaŋ, vɛɛ ŋ looku yɛ ma tosa ndi tɛtɛlɛ le mi bɛnduaa ke num silaa? Wa wana tusiaŋ, wana balika melaa, a wana kindu isɔɔ dimul te wo. Chɔ mala ndaa maa Mɛlɛka cho num koŋ kaalaa chɔmndo ni. A cho tɔnɔɔ sɔla, nduyɛ mi bɛnduaa tuei wali ndaa tosaa yeela.

17. Vɛɛ bɛnduaa mala yɛ ndepilɛnɔ pilɛ?

17 Mi ndepilɛnɔ pilɛ dimi maa mi sɔɔŋ muŋ yɔŋnuŋ ndu o paandoo niŋndoŋ tosa ndi ikala le mbo kaala Chɛhowa, nduyɛ mbo tambu kɔllo tau. Mbo dimi aa, “Mi sina maa yaa nɔ le suɛi o bɛnduaa lo. A chue ya chɔdɔ ɔɔ ma pɛɛsa ya le, kɛ ma dɛɛniaa ya kɔllo nduyɛ ma luei ya yoomuaŋ. Te naŋ chii pɛ bɔŋaŋ kɛ kɛ, o yɔŋ bɛɛ mi ndaa nɔ teleŋ te, mɛɛ mi opilɛ o nda tɛɛŋ nyuna ya mɛɛ ya wa sinaŋndo yɛ. Le sɔɔŋ ya tosa o paandoo niŋndoŋ, mi cha ndi ikala maa I bɛnda mi sɔla  kaala Mɛlɛkaa le. Kɛ teleŋ o teleŋ, Chɛhowa wa kundaa a bɛnduaa soliŋndo kpeku le ya chɔmndo maa o kaala ya. I cho piɛileŋ maa pesiŋ bɛɛ I faŋaŋ ndu kɔɔli le.”

NYƐ NƐIYAA KUƐƐ WƆU YƐ MBO HIAU O NAŊ SƆLA TE A SILA NAA PƐ WO?

18, 19. Nyɛ nɛiyaa kuɛɛ wɔu yɛ mbo hiau o naŋ sɔla te a sila naa pɛ wo? Chɔmndɔ taamaseliiyo.

18 Mi silaa ke naa lepum nyɛ nɛiyaa, kɛ nyɛ nɛiyaa naŋ sɔla le sila Mɛlɛkaa kiɔɔ wo hiou poloŋ. (Hibuluiya 12:​11) Taamasi Keŋ a Masaa Sɛdikaya wo nɔla mbo pɛɛku naa. Mɛɛ Mɛlɛka che maa Keŋ tul pɔmbɔ ndɔ leyɛ nduyɛ mbo yeema le ndu diyɔɔ, mbo sila ndu aa, “Kɔl tuu yɛɛnɛ ŋ cho yɛ? Vɛ hɔlla tɛɛmbuuwo? Te a tosa suɛi bɛnda le tosaa ve pɛ, num bɛɛ I hini kɔl a num. Kɛ te a tosa suɛi bɛnda le tosaa ve le, mɛɛ mandaŋ kani, yɔŋ wɔɔŋndo cho num mɛŋgɛlaa. O yeema mbo tiu num ba, mbo kuumbuŋ num choo kpulu. Kɛ nduyɛ nɔ ndu kpaayaa choo.” (Chɛnɛsee 4:​6, 7) Mi Keŋ kɛɛ sila Chɛhowaa, mbo dii pɔmbɔ ndɔ, nduyɛ mi saŋgaa tual ndu choo haaa a yoomu ndɔɔ mɛɛlulaŋ. (Chɛnɛsee 4:​11, 12) Te Keŋ ndoo yaŋ pɛ Mɛlɛka nilaŋ, o ve saŋga waa lende sɔla le.

19 Wana dialuŋ vilɛiyo a masa dɛnɛ wɔɔŋndo Sɛdikaya wa ni. Teleŋ o wa masa wo, waŋnda Chulusɛlɛm wa o saŋgaa niŋ. Mi Chɛluimaya, wana ndoo suaa le Mɛlɛka wo sila Sɛdikaya daandi daandi maa o nɔ mbo si-ŋgaŋ. Kɛ mbo kɛɛ sila Chɛhowaa, nduyɛ mbo sɔla fulamakɔɔlila wɔɔŋ wɔɔŋndaŋ. (Chɛluimaya 52:​8-11) Chɛhowa yeema naa miŋ sɔla saŋga fondo fuu waa lende le!—Nuawɔ Aisaya 48:​17, 18 *.

20. Yɛɛ cho yɛ yɔŋnɔŋ a wanaa cho sila Mɛlɛkaa chɛlɔɔ wa nduyɛ a wanaa cho ndu kiɔɔ wa?

20 Hau, mi wanaa bɔɔbɔɔ o chieeŋndo niŋ pɛɛsa sila Mɛlɛkaa nduyɛ ma kɛɛ ndu. Kɛ teleŋndo bendu lɛ le, wana o wana cho sila Mɛlɛkaa kiɔɔ, saŋgaa cho nda tolɔɔ choo. (Pulɔwaa 1:​24-31) Lelaŋ, ŋ “yaŋ nilaŋ o silaa nduyɛ miŋ sɔla taasioo.” Pulɔwaa 4:​13 dimi aa, “Sila o sila ya I cho num, kɛsiŋ ndu o kɔl ma wa loonɔŋndo a ndu. Kɛsiŋ ndu o kɔl nyɛ kɛndɛ kɛndɛ, fondole, yoomu numndo o cho ni.”

[Tɛɛsiaa amatou]

^ pɛl. 19 Aisaya 48:​17, 18 (NW): “Ya Chɛhowa, Mɛlɛka diandaa le Isɔluɛi, ya cho Mɛlɛka nyaa ni. Ya cho nya pɛɛkoo ni le tɔnɔla nyalaŋ. Ya cho nya nɛi nya nɔ mi la kuɛ choo wo chɔmndo ni. Oo, te o yɔŋ pɛ mi la yaŋ nilaŋ o sawala nilaŋ, mɛɛ kɔl nyulu nyaa cho wa maa pee bɛndu! Nduyɛ, mi sandii nyɛi wa mɛɛ pee mɛŋma ihɛllo o muuluŋ naa yɛ.”