Nɛɛnɛ naŋ demul lɛ a dialuŋ fulaa? Wana o wana hiŋ pɛ o bɔŋaŋ nda naala leKilisiɔŋndaŋ, chɔŋ a wanaa sɛnɛiya mbo kɔ bii a chaaŋaa naa paanduaa. (Luom 15:7; Hibu 13:2) O wa chaaŋaa naa laalaŋaa fula o lɛŋnde cheleŋ niŋnda ɔɔ Kilisiɔŋnɔ kiolo hunɔɔ o bɔŋaŋndaŋ a wali pollo le wɔsiŋ bɔɔbɔɔ mbo huŋ paale taseleŋ o bɔŋaŋndo wo. Te o wa pɛ a num, baa a yeema ma yil num a dialuŋ fulaa le? (Mat 7:12) Lelaŋ, woo yoomuaŋ ma yil acheleŋnda o Toŋgo leMasaa tuupa mi bɔŋaŋndo kanduŋ nduyɛ te o chuu pɛ. Hei chɔm kaala cho naa tɛɛŋndo nduyɛ miŋ wa wuye wuye, okoŋ mi Chɛhowa sɔla bɛɛleŋ. (Mat 5:16) Wana dimi isɔɔ a tonya, ŋ nɔla miŋ suukaŋ a wanaa huŋ o bɔŋaŋndo wa kpou le. Kɛ o wa bɛɛ lende, te ŋ kindi kindiŋ pɛ miŋ tosa kpeŋgii nɛi, wana o wana cho yiyaŋ maa o sɔla demullo a dialuŋ fulaa. *

O cho ko o teleŋnda teŋgeŋndaŋ choo mɛɛ Loonuŋyaa cho naa yɛ le naŋ bii waŋnda nyɛkɛndɛi le, kɛ teleŋ o teleŋ. Te ŋ chɔm pɛ wanaa sɛnɛiya kaalaa nduyɛ ma che ndu naa tɛɛŋ, naapum koŋ cho nda nyindɔɔ ma saŋgala Mɛlɛka nduyɛ ma tol naa kɔɔli o piɛile tonyaleŋ niŋ—Chɔŋ 13:35.

^ pɛl. 3 Sawala mandaala Baabuiyo la hendul naa kpeleŋndo maa ŋ nɔ miŋ yil wanaa soliaa ɔɔ wanaa dimi maa a cho lɛ ŋChɛhowɛi le wa kɛ naapum ma hiŋ o bɔŋaŋndaŋndo.—1Kɔl 5:11; 2Chɔŋ 10.