Chɛhowa Mɛlɛka hendul waŋchieeya sawaa le ma wa a diandaa o kaa niŋ ni. Le taamaseliiyo, mbo dimi maa wana pɔnɔɔ a wana lanɔɔ chal pɛ o nɔɔ niŋ, a nɔ ma lo diompilɛ lefafɛɛŋ. (Mat 19:​4-6, 9) Mɛlɛka kɛɛ kaa ihini nɔɔlɛi kɛ kɛ. (1Kɔl 6:​9, 10) O chɔm pɛɛŋ sawala mandaalaŋ a chuɛyɔŋndo okɔɔ nduyɛ keŋ tosa ni mi wanaa nduaa waŋnuŋ teŋgeŋ.—Di 22:​5; 1Timo 2:​9, 10.

Wanaa bɔɔbɔɔ o chieeŋndo niŋ hau kɛɛ sawala Chɛhowalaŋ diikɔŋndo le waa o diandaa o kaa niŋ. (Luom 1:​18-32) Ma tol yiyaŋ wanaa bɔɔbɔɔ kɔɔli a chuɛyɔŋndo okɔɔ, vɛlɛ a kaala ndalaŋ. Mi wanaa bɔɔbɔɔ saŋgalaŋ a kaala nda la nɔɔlɛilaŋ nduyɛ ma pɛɛsa wanaa cho o sawa teŋgeŋndo bɛŋgu wa.—1Pitɛ 4:​3, 4.

Naa Seiyaa Chɛhowaa, ŋ nɔ miŋ chɔm kɔl sikpaa miŋ bii sawala Mɛlɛkalaŋ le waa o diandaa o kaa niŋ. (Luom 12:​9) Vɛɛ naŋ tosa yɛ keŋ? Ŋ nɔ miŋ chɔm waŋnda o nɛi taasi niŋ nyɛ Mɛlɛka hɛnaŋndo. Kɛ ŋ nɔ vɛlɛ miŋ bii sawaa le waa o diandaa o yoomu naa niŋ. Le taamaseliiyo, te ŋ wa pɛ nyɛ chuɛyaŋndo hɛlioo, ŋ nɔ miŋ nyunaŋ aa, ‘Baa chuaŋ chua nuu cho pa o chɛlaŋ a sawala Chɛhowalaŋ ɔɔ a chieeŋndo? Baa chuɛɛnɔŋ nuu chɔm pa maa Kilisiɔŋnɔ nɔ siooŋii Mɛlɛkɛiyo ya cho ni?’ Ɔɔ te ŋ wa pɛ chuaŋ chuaa tosaa le yelelaŋndo ɔɔ vidueiyo nuaa, ŋ nyunaŋ ndɔ aa, ‘Baa Chɛhowa naŋ niŋ pa kɔl a yelelaŋndo hoo? A kaala nɛɛnɛ okɔɔ yelelaŋndo hoo cho yɛ? Baa chuaŋ chua ya tosa a yelelaŋndo okɔɔ wo tosa pa mi vi dialloŋ le waa o diandaa o kaa niŋ? (Sam 101:​3) Baa hei paaliaŋ niŋ pa waŋnda o yuŋgu nuu niŋ ɔɔ acheleŋnda?’—1Kɔl 10:​31-33.

Le yɛɛ i cho yɛ suɛi sɔvɛ bɛndu le miŋ bii sawala Chɛhowalaŋ le waa o diandaa o kaa niŋ? Chiisu Kiliti cho hunɔɔ suŋ chieeŋndo tɛɛmbuu a yɔŋnda wɔɔŋndaŋ kpou. (Isi 9:​4-7) Wanaa cho hɛnaŋ Mɛlɛkaa tosaa wa kinɛi cho lo achal ni. (1Chɔŋ 2:​15-17) Lelaŋ, ŋ biinuŋ sawala Chɛhowalaŋ le waa o diandaa o nɛi o nɛi niŋ, okoŋ mi wanaa cho kaa naa kɛndɔɔ chɔɔ wa saŋgala Mɛlɛka.—1Pitɛ 2:​11, 12.

Yɛɛ chuaŋ chuaa a chuɛiyɔŋ nuu okɔɔ chɔm yɛ a kaa nuu?

TOFA VIDUEIYO SIMNUŊ CHAAŊ O CHƐHOWA—WANA PƆNƆƆ OPILƐ, WANA LANƆƆ OPILƐ, OKOŊ MI LA MULI NYUNALAŊ NDAŊ:

  • Le yɛɛ i cho yɛ suɛi sɔvɛ bɛndu le miŋ bii sawala Chɛhowalaŋ?

  • Le yɛɛ kalaŋ chuauwa nɔ yɛ ma kandu chuauwaa ndaa pɛɛkoo sawala Chɛhowalaŋ le waa o diandaa o kaa niŋ teleŋ nda wa a pɔmbɔ wo?

  • Vɛɛ feleŋguaa a kaasoŋnda mala yɛ waŋnda le ma sɔla tɔnɔɔ o kɛndɛi Mɛlɛkɛi niŋ?