Kani bɛɛ a che niŋ ndi i kala le yooŋgu kɛndɔɔ dimioo? Naa bɔɔbɔɔ miŋ muli nyuna koŋ aa ei. Le yɛɛ? Naapum lɔɔlɔɔ mi waŋnda kɛɛ naa nilaŋ yaŋɔɔ, ɔɔ ma tul naa leyɛ o tanda naa niŋ ɔɔ mi siooŋnde wa naa le suɛi o mialla lo. O kpeekpei niŋ, sɔɔŋ muŋ tosa ŋ ve a nyaale le. Kɛ, Mɛlɛka nyaaloo naŋ cho piɛiyo ni nduyɛ o yeema naa miŋ wa ndu piɛiyo a nyaale. (Sam 100:​2; 1Timo 1:​11) Ɔɔ sabula kɛndɛlaŋ layaa le miŋ wa a nyaale o yooŋgu kɛndɔɔ dimioo niŋ?

O tasoo, yooŋgu ke wana tiindaŋndo wo naŋ cho dimioo ni. Mi che bɛɛ naa waŋnda nɔ lɛ hau tiindaŋ te, miŋ nɛŋi nda kɔl a “yooŋgu kɔl kɛndɔɔ, yooŋgu cho a kɔl nyuloo okɔɔ wo.” (Ai 52:​7) Kɛ yooŋgu kɛndɛ cho a Masale Mɛlɛkaleŋ okɔɔ wo ke naa vɛlɛ kɔl nyuloo. Tuupa ma fula o wali pollo niŋ, yiyaŋndɔ a salala Masale Mɛlɛkaleŋ le cho hunɔɔ o chieeŋndo choo wo.

O diiŋndɔɔ, yooŋgu kɛndɛ naŋ dimi wo cho waŋnda tɔnɔɔ kioo o dialloŋ niŋ a o Mɛlɛka piɛiyo niŋ. Ma pɛɛku le ma mal kaala wɔɔŋndaŋ nduyɛ ma nɔ tiindaŋndo le yoomu fafɛɛŋndo sɔlaa. (Ai 48:​17, 18; Luom 1:​16) Ŋ yiyaŋndɔ maa ŋ cho wali piŋi yoomulaŋ ndo tosaa. Mi che bɛɛ naa waŋnda apum yeema pioŋɔɔ sɔla le, miŋ hiou lachi a wanaa yeema pioŋɔɔ sɔlaa wa nuuviaa.—Mat 10:​11-14.

O yaa ndɔɔ, o hiou wa o sɔvɛ kpou wo cho ni, wali naa dimiaa yooŋgu kɛndɔɔ ke Chɛhowa bɛɛleŋ. Chɛhowa che bɔɔ wallo hoo nyɛ sɔvɛ bɛndu. (Ai 43:​10; Hibu 6:​10) O fulawɔ okoŋ kɔɔli, o ke naa nyina ndɔ diandaa le naa malaa le wallo hoo tosaa. Lelaŋ, nyɔɔlu Chɛhowa le mbo ke num kɔl kɛndɛ kpeekpeiyo, kɔmnde nyina ndɔ diandaa. (Kal 5:​22) A mala ndɔɔ, ŋ tiuba miŋ chɔulaba bahawɛila naalaŋ nduyɛ miŋ dimi yooŋgu kɛndɔɔ a dialuŋ fulaa (Walta 4:​31) Okoŋ, o yɔŋ bɛɛ mi waŋnda kɛɛ naa nilaŋ yaŋɔɔ o tanda naa niŋ, ŋ nɔla miŋ wa a nyaale o wali naa dimiaa yooŋgu kɛndɔɔ niŋ.—Isi 3:​3.

Kaa yɛɛ ŋ yeema yɛ ma nɔ o wali pollo niŋ? Vɛɛ ŋ chɔm yɛ maa a cho a kɔl kɛndɛ?

TOFA VIDUEIYO HOO NYAALOO MIŊGIOO SƆLAA SANAA O PƐƐKOO NIŊ VƐLƐ A YIYAŊNDO, OKOŊ MI LA MULI NYUNALAŊ NDAŊ:

  • O yɔŋ bɛɛ miŋ wa lɛɛlɛlaŋ tosaa tau o wali dimiaa yooŋgu kɛndɔɔ niŋ ipaŋgu o ipaŋgu, le yɛɛ naŋ nɔ yɛ miŋ handu pɛɛkɔŋ ipilayaa nyɛ tase peŋ?

  • O nɛi kuɛɛ choo naŋ tuallɛ taamasi Meele wo kɔɔli?

  • A teleŋ kuɛɛ ŋ yiyaŋ yɛ o Diom Mɛlɛkaa choo?

  • Yɛɛ ke yɛ num nyaaloo te a wa pɛ yooŋgu kɛndɔɔ dimioo?