1. Diom nɛɛ cho yɛ o Baabuiyo niŋ?

Yooŋgu kɛndɔɔ maa waŋnda cho wa achal lefafɛɛŋ o lɛŋndeŋ choo cho o poonyiaa o Baabuiyo niŋ. (Sam 37:29) Yaula pɔmbɔlaŋ 66 la cho o Baabuiyo niŋ ni. Waŋpiaanduaa 40 Mɛlɛka soliŋ kpeku ni le laŋ poonyiaa. Muuse poonyiaa yaula ŋuɛɛnula taselaŋ ni. O cho niŋ hau suɛi wɔsila 3,500. Chɔŋ, wana Chiisu vem holte ndo wo poonyiaa yau mɛɛlaa kpɔŋ o Baabuiyo niŋ ni. O cho niŋ hau suɛi wɔsila 1,900. Kɔlkalu nɛɛ waŋnda haa poonyiaa yɛ? Mɛlɛka ke nda nyina ndɔ diandaa ni ma nɔla Baabuiyo poonyiaa. (Saamiɛɛ Diiŋ Ndɔɔ 23:​2) Nyɛ Mɛlɛka dimul nda wo nda poonyiaa ni. O cho yiyaŋ nda le. Lelaŋ, diom Chɛhowaa kpeekpei Baabuiyo cho ni.​—Nuawɔ Timoti Diiŋ Ndɔɔ 3:​16; Pitɛ Diiŋ Ndɔɔ 1:​20, 21.

2. Yɛɛ chɔm yɛ maa diom Mɛlɛkaa Baabuiyo cho ni?

Baabuiyo tɛɛsiaa vɛ vɛ a chilaŋ okɔɔ. Nyɛ koŋ chɔm ni maa diom Mɛlɛkaa o cho ni. Wana chiee tiuba mbo tosa keŋ te. (Chɔɔsuaa 23:​14) Mɛlɛka nɔ Kpaayaa Kpou wo ndupilɛ kpe nɔla ni mbo sina chila wanachioo.​—Nuawɔ Aisaya 42:​9; 46:​10.

Yau o yau cheleŋ cho maa Baabuiyo le. O cho o toosiaŋ o kɛmɛ chuu chɔm te laŋ niŋ. Nduyɛ, o cho o poonyiaa o sɔɔŋ maŋgalaŋ bɔɔbɔɔ niŋ. Baabuiyo viou niŋ tau. Kɛ a koŋ kpou, o cho o chɛlaŋ a nyɛm Mɛlɛka toosiaa woŋ. Nduyɛ vɛlɛ nyɛ o nyɛ ŋwaŋ 40 haa poonyiaa, o cho o chɛlaŋ. * O chɔm naa vɛlɛ maa Mɛlɛka nɔ kaalaa. Nduyɛ Baabuiyo nɔ kpaayaa le mbo siŋga yoomu wanachioo mbo miŋgi ndu o kɛndɛ. Hei tosa mi wanaa bɔɔbɔɔ laalaŋ maa Diom Mɛlɛkaa Baabuiyo cho ni.​—Nuawɔ Tɛsaloniaŋ Tasoo 2:⁠13.

 3. A yɛɛ okɔɔ Baabuiyo soo yɛ?

A yooŋgu kɛndɔɔ okɔɔ Baabuiyo soo ni. O dimul naa maa Mɛlɛka nɔ tuu kɛndɔɔ le waŋchieeya. Baabuiyo dimul naa nyɛ tosa ŋ cho o kpele hɛnɛkiɔɔ niŋ te wo. Nduyɛ o dimul naa mɛɛ Mɛlɛka miŋgi niŋ vɛlɛ kpele hɛnɛkiɔɔ le waŋchieeya yɛ.​—Nuawɔ Sɔɔŋ Chɔɔmaŋndoŋ 21:​4, 5.

Diom Mɛlɛkaa nɔ vɛlɛ sawalaŋ a silalaŋ. Le handɔɔ lechoo, Baabuiyo dimul naa mɛɛ Mɛlɛka ndoo bii sindɛ waŋchieeya yɛ. Bundɔŋ cho o Baabuiyo niŋndoŋ chɔm naa Mɛlɛka suu Chɛhowa cho wo. Baabuiyo mala num le ma sina Mɛlɛka. O tɛɛsial naa vɛ vɛ mɛɛ naŋ looku simnɔŋ chaaŋ o Mɛlɛka yɛ.​—Nuawɔ Sam 19:​7, 11; Chemisi 2:​23; 4:8.

4. Vɛɛ ŋ looku yɛ ma bii Baabuiyo bila?

A mɛɛ Chiisu ndoo soliŋ Baabuiyo kpeku yɛ, yauwo hoo cho num mala ma bii Baabuiyo bila. Mi Chiisu soliŋ bolii Baabuiye kpeku, okoŋ, mbo tɛɛsial waŋnda “ma sina nyɛ suɛi Mɛlɛkɛi dimi wo pɛŋgu.”​—Nuawɔ Luku 24:27, 45.

Yooŋgu kɛndɛ chɛŋ o Mɛlɛka lo wo sulaŋ a nyɛ o nyɛ cheleŋ te. A koŋ kpou, waŋnda apum yeema ma tuei le. Apum pɛŋ mi suɛi nɛi nda. Kɛ keŋ tɛɛmbuu num kɔl te. Le ma sɔla yoomu fafɛɛŋndo, mɛɛ ma sina fɛŋ a Mɛlɛka tonyaa okɔɔ.​—Nuawɔ Chɔŋ 17:⁠3.

 

^ pɛl. 3 Tofa yauwo hoo o Puuluei niŋ A Book for All People.