TONYAA a yɛɛ okɔɔ? A nyunala sɔvɛlaŋ lapum la waŋchieeya a nyunalaŋ. Naapum kaamaa bii num niŋ a nyunalaŋ:

  • Baa Mɛlɛka buulaŋ pa kpeekpei a naa?

  • Chɔulaŋ a nyɛpalaa chuu niŋ pa?

  • Yɛɛnɛ yɔŋnuŋ yɛ naa te ŋ vi pɛ?

  • Ŋ cha lɛ niŋ pa wanaa naa vi wa?

  • Vɛɛ ya piɛi yɛ mi Mɛlɛka tuei?

  • Vɛɛ ya saaluŋ yɛ nyaaloo o yoomoo niŋ?

Kuɛɛnɛ num nɔla yɛ ma tofa mulilaŋ le nyunalaŋ ndaŋ saa­lɔŋ­ndo? Te o yɔŋ pɛ ma nyuna wanaa teŋgeŋ teŋgeŋnda, a sɔla mulila teŋgeŋndaŋ. O wa bɛɛ ma nyuna wanaa kua o piɛiyii cheleŋ niŋ nda kɛlɛŋgaa simlebolla, a sɔla muli kɔl hiniaa le. Naapum mi mulilaŋ la bɛnda o foofo koŋ choo. Kɛ o boondii biŋgi niŋ, la ve lɛ la bɛndaa le.

Mɛɛmɛɛ fee, yau pilɛ cho o nɔ mulila sɔvɛlaŋndo. Ndu cho yau tonyaa ni. Mi Chiisu Kiliti dimi o piɛileŋ niŋ o Mɛlɛka lo aa, “Diom numndo, ndu cho tonyaa ni.” (Chɔŋ 17:17) Hau, ŋ sina maa Diom koŋ cho Baabui Diandaa ni. O pei cho lachi ve niŋ, a cho sɔla mulila tonyala walaŋndaŋ o Baabuiyo niŋ le nyunalaŋ ndaŋ le choo.

 Baa Mɛlɛka Buulaŋ Pa Kpeekpei A Naa?

LE YƐƐ NYUNAA HOO FULA YƐ?: Ŋ cho a chal o chieeŋ cho o piaa cha a dɛnɛ wɔɔŋndo vɛlɛ a kɔɔsɔ lakafaa wo niŋ. Piɛiyii kaka pɛɛku maa saŋ­gala cho naa choo laŋ maa hɛnaŋ Mɛlɛkaa ni.

NYƐ BAABUIYO PƐƐKU WO: O cho Mɛlɛka le tosa mi dɛnɛ wɔɔŋndo wa le. ­Luomaŋnda 9:14 dimi aa, “Mɛɛ ɔɔ nyɛ naa ŋ nɔ mi ŋ dimi o suɛi hei niŋ ndo? Baa dimioo naa ŋ cho ni maa Mɛlɛka nɔ kafalaŋ? Sako. Mɛlɛka nɔ lakafa le.” Mɛlɛka nɔ sabu kaalaa le waŋchieeya. Lelaŋ Chiisu pɛɛku naa piɛileŋ ni aa, “Mɛlɛka Finya naa, num cho hoo ɛchɛnɛ wo, . . . wa niko masaa ŋwaŋnda chiee choo kpou. Tosa a sabu maa ­waŋnda kpou o chieeŋndo choo a tosa nyɛ ŋ hɛnaŋ ndo.” (Maatiu 6:9, 10) Mɛlɛka ­buulaŋ yiŋgoloŋ a naa. Lelaŋ o kei o nɛi o nɛi niŋ ni le mi sabula ndɔlaŋ la peeluŋ.—Chɔŋ 3:16.

Tofa vɛlɛ Chɛnɛsee 1:26-28; Chemisi 1:13; a Pitɛ Tasoo 5:6, 7.

Chɔulaŋ A Nyɛpalaa Chuu Niŋ Pa?

LE YƐƐ NYUNAA HOO FULA YƐ?: Chɔulaŋ la tɛɛmbuu niŋ yoomula bɔɔbɔɔ, nduyɛ lacho hiowɔɔ lachi kɛ a laŋ tɛɛmboo. Nyɛ palaa wanachioo piiliaŋ niŋ hau naa kpou.

NYƐ BAABUIYO PƐƐKU WO: Mɛlɛka dimi maa teleŋ huŋ niŋ mbo hiŋ a kɔl nyuloo o lɛŋndeŋ choo kpede. O Masale ndɔleŋ bɛŋgu, waŋchieeya “bɛɛndiaŋ ndɛ le lako o chɔu le.” Kɛ a huŋ niŋ ma huŋ “chɔu mɔɔŋ ndaaŋ faŋndoŋ dɛndɛla waalaŋ.” (Aisaya 2:4) Mɛlɛka chii niŋ kɔɔsɔ lakafaa a ­nyɛpalaa. Baabuiyo mɛi le diom, “[Mɛlɛka] cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛnɛiyaa wa, kani fuule, nyɛ o nyɛ paandu [handɔɔ le choo kɔɔsɔ lakafaa a nyɛpalaa] chuu faŋaŋ.”—Sɔɔŋ Chɔɔmaŋndoŋ 21:3, 4.

Tofa vɛlɛ Sam 37:10, 11; 46:9; a Makal 4:1-4.

Yɛɛnɛ Yɔŋnuŋ Yɛ Naa Te Ŋ Vi Pɛ?

LE YƐƐ NYUNAA HOO FULA YƐ?: Piɛiyii bɔɔbɔɔ o chieeŋndo niŋ hau pɛɛku maa nyinaa cho naa niŋ o fulaŋ mbo wa achal lo te ŋ vi pɛ. Apum bii dimulo maa waŋvilɛiya yɔŋul wanaa cho a challa ɔɔ maa mi Mɛlɛka tuisi wanaa yɔŋ wɔɔŋnda saŋga fɛɛŋ fɛɛŋndo choo o yiŋndeŋ niŋ.

NYƐ BAABUIYO PƐƐKU WO: O piɔmndo kɔɔli, waŋchieeya nɔ yoomu le. Ikilisiaatii 9:5 dimi aa, “Wanaa vi niŋ nda, nda nɔ yiyaŋ . . . te.” Le mɛɛ waŋvilɛiya nɔ sinapɛŋgu, nɔ yiyaŋ, ɔɔ sinaŋ nyɛ o nyɛ le yɛ, a nɔla wanaa cho a challa yɔŋul ɔɔ mala le.​—Chɔŋ 11:​11-14.

Tofa vɛlɛ Chɛnɛsee 3:19 a Ikilisiaatii 9:6, 10.

 Ŋ Cha Lɛ Niŋ Pa Wanaa Naa Vi Wa?

LE YƐƐ NYUNAA HOO FULA YƐ?: Ŋ yeema miŋ wa achal vɛlɛ miŋ tuei yoo­moo yeela a wanaa naŋ kaala wa. I cho naa a iyeema miŋ che vɛlɛ wanaa naa kaalaa a vi niŋnda.

NYƐ BAABUIYO PƐƐKU WO: Wanaa bɔɔbɔɔ a vi niŋnda cho hunɔɔ fula­sɛiniŋndo sɔla. Chiisu dimi maa “wanaa vilɛiya kpou . . . ma fula o sɛilaŋ niŋ.” (Chɔŋ 5:28, 29) O chɛlaŋ a tuu Mɛlɛkaa wo, waŋchieeyaa sɔla niŋ fulasɛiniŋndo wa nɔ niŋ dikenaŋndo le waa achal o kpele hɛnɛkiɔɔ niŋ o lɛŋndeŋ choo le fɛɛŋ. (Luku 23:43) Diomnda mɛyaalaŋ le chilaŋ kpou cho ni, kɛndiaa walaŋndo a yoomu fafɛɛŋndo le wanaa tuisiaŋnda. Baabuiyo dimi aa, “Wanaa cho sakpo Mɛlɛka o hɔl la, nda nda ma sɔla yoomu kpeekpeiyo o nɔ lamɛɛlu le wo.”—Maatiu 25:46.

Tofa vɛlɛ Choobu 14:14, 15; Luku 7:11-17; a Walta Wanaa Chiisuaa 24:15.

Vɛɛ Ya Piɛi Yɛ Mi Mɛlɛka Tuei?

LE YƐƐ NYUNAA HOO FULA YƐ?: O kpeekpei niŋ, waŋchieeya o piɛiye niŋ kpou ma piɛi. Kɛ, mi a bɔɔbɔɔ sinaŋ maa piɛile ndaleŋ le sɔla muli le.

NYƐ BAABUIYO PƐƐKU WO: Chiisu pɛɛku naa le malɔɔ piɛile miŋgiaa sondo lechoo leŋ. Mbo dimi aa, “Te la wa piɛiyo pɛ, dimi diomndaŋ le dimioo leŋ te.” (Maatiu 6:7) Te ŋ yeema pɛ mi Mɛlɛka tuei piɛile naaleŋ, ŋ nɔ miŋ piɛi o hɛnaŋ ndɔɔ choo. Le hei tosaa, ŋ nɔ miŋ pɛɛku nyɛ cho hɛnaŋ koŋndo nduyɛ miŋ piɛi lende sanaa. Baabuiyo dimi o Chɔŋ Tasoo 5:14 aa, “Kiisaŋ cho naa le hunɔɔ naa Mɛlɛka chua le. Kani fuule ŋ sina maa pɛŋgu o pɛŋgu te ŋ nyuna ndu le nyɛ o nyɛ pɛ, nduyɛ mbo wa o hɛnaŋ ndɔɔ niŋ pɛ, nilaŋ o yaŋ naa ni.”

Tofa vɛlɛ Sam 65:2; Chɔŋ 14:6, 14; a Chɔŋ Tasoo 3:22.

Vɛɛ Ya Saaluŋ Yɛ Nyaaloo O Yoomoo Niŋ?

LE YƐƐ NYUNAA HOO FULA YƐ?: Wanaa bɔɔbɔɔ laalaŋ maa nyɛsɔlaa, tɔɔ, kɛlɛŋgaa naŋɔɔ tosa nda ma wa a nyaale. Le hei nda cho nyɔɔŋ muŋ kiltaŋ kɔɔli ni maa muŋ ke nda nyaaloo ni.

NYƐ BAABUIYO PƐƐKU WO: Mi Chiisu chɔm kpendekele nyɛ chuu naa nyaaloo wo mɛɛ o dimi aa, “Wanaa cho haa ma sina maa a nɔ tiindaŋ o tiindaŋ cheleŋ te, mɛɛ Mɛlɛka ma tiidaŋ nda, wanaa kaŋ a pɛl tɔnɔɔ.” (Maatiu 5:3) Ŋ wa a nyaale te o yɔŋ pɛ miŋ tosa nyɛ Mɛlɛka yeema wo, nduyɛ miŋ landuŋ kɔl le pɛɛkoo tonyaa a Mɛlɛka okɔɔ vɛlɛ a sabula ndɔlaŋ le naa. Ŋ saaluŋ tonya koŋ o Baabuiyo niŋ. Sinaa tonya koŋ mala naa miŋ sina teŋgeŋndo o kɛndɔɔ tɛɛŋ a o wɔɔŋndo. Chɛlɔɔ tonya Baabuiyo mala yamaŋ naŋ kialu woŋ a walta naalaŋ. Hei ke naa yoomu sɔviɔɔ.—Luku 11:28.

Tofa vɛlɛ Pulɔwaa 3:5, 6, 13-18 a Timoti Tasoo 6:9, 10.

 Muli pɔmbɔ ka naŋ sɔla o Baabuiyo niŋ ni le nyunala ŋɔmpumndaŋ. A yeema ma chɔɔlu sina? Te o wa pɛ ma wa wanaa chɔm maa “mɛɛ Mɛlɛka ma tiindaŋ nda” tɛɛŋ, i cho a kɔndɔfili le, a yeema. Naapum mi kaamaa bii num a nyunala cheleŋ, laŋ lacho ni, ‘Te Mɛlɛka buulaŋ pɛ a naa, le yɛɛ o chɛllɛ dɛnɛ wɔɔŋndo vɛlɛ a nyɛpalaa o yoomu wanachioo niŋ? Yɛɛ ya tosa yɛ mi yuŋgu nuu sɔla nyaale sɔviɔɔ?’ Baabuiyo yɔŋgu mulila kɔl hiniaalaŋ le nyunalaŋ ndaŋ a la cheleŋndaŋ tau.

Kɛ wanaa bɔɔbɔɔ kiisaŋ hau le nuaa o Baabuiyo niŋ. A che ndu maa o cho bɔɔ yau bɛndu, nduyɛ maa o kendu bɔɔ sina. A yeema malaa le ma sina mulilaŋ o Baabuiyo niŋ? Seiyaa Chɛhowaa ke num nyɛm walloŋ sala tiɔɔŋ le num malaa.

O tasoo cho ni, Yɛɛ Kpeekpei Baabuiyo Pɛɛku Yɛ? O toosiaŋ le malaa wanaa cho a yeemɛi tau le mulilaŋ sɔlaa o Baabuiyo niŋ le nyunalaŋ ndaŋ ndo. O diiŋndɔɔ cho ni, pɛɛku Baabuiyo o num­ndo bɛɛ o cho nyɛ paawaa le. Chaaŋ num kɛndɛ nya chiɛɛliaŋ mbo suiliŋ le Baabuiyo pɛɛkoo wo huŋ o numndo bɛɛ kɛlɛŋgaa ma nua fondaŋ kɛndɛ cheleŋ le mi la chua teleŋ biŋgi o paale nya cho chɛlaŋndeŋ choo o lɔɔ bɛŋgu le pɛɛku Baabuiyo tosaa. Waŋnda o ­miiliɔŋndaŋ niŋ chieeŋndo balɔɔ silɔ sɔla niŋ hau tɔnɔɔ o pɛɛkoo hoo niŋ. Mi a bɔɔbɔɔ duaŋ nyaale ma dimi aa, “I saaluŋ tonyaa!”

Tɔnɔ cheleŋ cho lɛ hiowɔɔ o hoo choo le. ­Tonya Baabuiyo soli naa o laalaŋnda wɔɔŋndaŋ niŋ, sɛɛŋgiaŋndaŋ vɛlɛ a siooŋndoŋ. O ke naa tiindaŋndo, sabu sɔviɔɔ vɛlɛ a nyaaloo. Mi ­Chiisu dimi aa, “La cho tonya cho a Mɛlɛka okɔɔ wo sina, nduyɛ, mi tonya cho koŋ a Mɛlɛka okɔɔ wo o baŋa nya.”—Chɔŋ 8:32.