Ŋ dimi wɔ maa Chɛliko chiee naa ŋ cho ni. O lɛŋnde Kenaŋ ndeŋ niŋ chioo hoo wa ni. Wanaa wa loŋ nda ndaa piɛi Chɛhowa le. O chiee koŋ niŋ Luehab wa ichali ni.

Teleŋ Luehab wa chuaambɔ pɔmbɔ wo, mbo tuɛi bundɔŋ a mɛɛ Muuse piɔu Pee Mɛŋma Siaŋaa tɛɛŋ yɛ vɛlɛ a mɛɛ o looku yuŋgoo Isɔluɛi soli o chɛleŋ niŋ Ichipi yɛ. Mbo tuɛi vɛlɛ a mɛɛ Chɛhowa mala nda ma tiu yaamɔwaa ndaa ba yɛ. O laŋga tuei vɛlɛ maa Isɔluɛitiiya cho Chɛliko ikɛi!

Mi Luehab kiindiaa puaa hiŋ chioo tofaa sɔɔ sɔɔ wa kanifuule, ndoo laalaŋ o Chɛhowa niŋ

Ichɔl pilɛ, mi Isɔluɛitiiya a ŋiɔɔŋ huŋ chioo Chɛliko tofaa sɔɔ sɔɔ. Ma huŋ o chiɛi Luehab wo sakpo. Okoŋ mbo yiya nda o ndu lo chiɛiniŋ. O nyumma maŋ niŋ, mi masaa Chɛliko tuɛi maa waŋnda hiŋ sɔɔ sɔɔ le chiee ndaa tofaa. Nduyɛ maa, a cho o Luehab lo chiɛiniŋ. Okoŋ, mi masaa viam waŋnda le ma kɔ bii nda. Kɛ Luehab ndoo chii niŋ nda vioŋɔɔ kpiŋ o kaa o ndu lo chiɛiniŋ. Mɛɛ puaa masaa vemnda hiŋ, mbo dimul nda aa, ‘A laŋga wa naŋ suŋ suŋ kɛ a kuɛŋnuŋ. Te la tol nda kɔɔli pɛ, la cho nda saalɔŋ!’ A sina pa le sabu Luehab veŋ puaa haa wo?— Kanifuule, ndoo laalaŋ o Chɛhowa niŋ. Nduyɛ, ndoo sina maa Chɛhowa cho Isɔluɛitiiya lɛŋnde Kenaŋ ndeŋ ke.

Tuupa mi puaa haa faŋaŋ o Luehab lo bɛɛ, ma dimul ndu maa ndu ni a yuŋgu ndɔɔ, a cho piɔm sɔla le te a hiŋ pɛ Chɛliko tɛɛmbuu wo. Yɛɛ ndaa dimul lɛ ndu le tosaa?— Ma dimul ndu aa, ‘Chua kɛi siaŋaa ma baa o wundɛiyo. Te a tosa hei pɛ, wana o wana cho o numndo chiɛiniŋ cho kindaa sɔla.’ Mi Luehab tosa nyɛ puaa haa dimul ndu wo. A sina pa nyɛ yɔŋnuŋ okoŋ kɔɔli wo?

Mi Chɛhowa kiindiaa Luehab a yuŋgu ndɔɔ

Mɛɛ palɛi hiou i tiŋ, mi Isɔluɛitiiya balu Chɛliko silɔ. Le palɛi i ŋɔmpum a wa chioo hoo balɔɔ kɛ, a ve isɔɔ le. O paaleŋ niŋ, le pilɛ ndaa balu ni. Kɛ o paale ŋɔmmɛu leŋ choo, ma balu chioo haaa le ŋɔmmɛu. Mi nda kpou deŋi diom pilɛ kpeleŋ. Mi Chɛhowa tosa mi kpaki balu chioo wo koombiaa. Kɛ chiɛi nɔ kɛi siaŋaa wo  ndu, o komba le. A cho pa ndu chɔɔ o fotueiyo niŋ?— Luehab a yuŋgu ndɔɔ sɔla piɔm te.

Yɛɛ tamasi Luehab wo pɛɛku yɛ num?— Mɛɛ Luehab tuei a walta kɔndɔfilta Chɛhowa tosa laŋ okɔɔ, mbo laalaŋ o ndu niŋ. Num bɛɛ cho niŋ pɛɛkoo a walta kɔndɔfilta bɔɔ bɔɔ Chɛhowa tosa laŋ okɔɔ. A nɔ pa laalaŋndo o Chɛhowa niŋ maa Luehab?— Ŋ sina maa a laalaŋ o ndu niŋ!