Tofawɔ poombɔ pɔmbɔɔ hoo o fotueiyo niŋ. Sioonde bii ndu kanifuule, ndu pilɛ kpe cho ni. Lende le? Sioonde bii num niŋ pa lende?— Teleŋndaŋ lapum, mi wana o wana fee yiyaŋ lende. Baabuiyo soo a chaaŋaa Mɛlɛkaa okɔɔ. Ma yiyaŋ maa a nɔ wana le okoŋ, mi sioonde bii nda. O pilɛ wa IIaicha ni. Ŋ pɛɛku wɔ a ndu okɔɔ.

Chɛsibɛl ndoo yeema Ilaicha diyɔɔ

Isɔluɛi Ilaicha wa ichali ni le teleŋ vilɛi, tuupa mi Chiisu vialuŋ. A boodii keŋ, Ehaabi wa masaa le Isɔluɛi ni. Kɛ ndoo piɛi Chɛhowa le. Ehaabi nda Chɛsibɛl laandɔ, mɛlɛka lachoowaa Baal, ndaa sooluu ni. Mi hei tosa mi Isɔluɛitiiyaa bɔɔ bɔɔ kandu mɛlɛka lachoowaa hoo sooluu wo. Dɛnɛ wɔɔŋndo pila Chɛsibɛl ndoo nɔ ni. Nduyɛ, ndoo yeema mi ndoo dii wanaa wa Chɛhowa piɛiyo wa kpou vɛlɛ a Ilaicha! A sina pa nyɛ Ilaicha ndoo tosa wo?—

Mi Ilaicha nyaanuŋ! Mbo kuaŋnuŋ pɔɔli o pollo niŋ mbo kɔ vioŋnuŋ o buuloo  niŋ. Le yɛɛ o tosa yɛ lende?— Kanifuule, sioonde wa ndu ni. Kɛ ndoo nɔ mi ndoo wa a isiooŋ kposoŋ te. Le yɛɛ? Kanifuule, ndoo sina maa Chɛhowa tiuba mbo mala ndu. Chɛhowa ndoo chɔm niŋ Ilaicha kpaaya ndɔɔ paandu. Mɛɛ o wa piɛileŋ paale pilɛ o Chɛhowa lo, mi yiŋndeŋ le fula choo choo. Hei chɔm ni maa Chɛhowa ndoo tiu vɛlɛ ba mi ndoo mala Ilaicha!

Vɛɛ Chɛhowa ndoo mala yɛ Ilaicha?

Teleŋ Ilaicha wa o buuloo niŋndo, mi Chɛhowa suaa o ndu lo. Mbo nyuna ndu aa, ‘Yɛɛ ŋ hiŋ yɛ tosaa naŋ?’ Mi Ilaicha mulul ndu aa, ‘Ya pilɛ kpeele cho ni. Ya koni cho num piɛiyo ni. Nduyɛ, sioonde cho ya ni yɔŋii nda dii ya.’ Mi Ilaicha yiyaŋ maa wanaa wa Chɛhowa piɛiyo wa kpou, a chii nda diyɔɔ. Kɛ mi Chɛhowa dimul ndu aa, ‘O cho tonya le icho le. Waŋnda 7,000 cho wɔ ni ma wa ya piɛiyo. Nɔ kɔl sikpaa. I nɔ wɔ wallo tau le num ma tosa.’ A yiyaŋ pa maa Ilaicha wa a kɔl kɛndɛ le hei tueiyɔɔ?—

Yɛɛ ŋ pɛɛku yɛ a nyɛ yɔŋnuŋ hoo Ilaicha wo?— Siooŋii bii num te. Nduyɛ, o cho num pilɛ le cho le. Chaaŋaa numnda cho. A kaala Chɛhowa nduyɛ, a kaala num. Chɛhowa nɔ kpaayaa tau le num malaa lɔɔ lɔɔ! Vɛ, a niŋ kɔl le hei sinaa le?—

NUA O BAABUI NUMNDO NIŊ