1. A yɛɛ okɔɔ ŋ nɔ yɛ ma yiyaŋ te a chii pɛ yauwo hoo pɛɛku nyɛkɛndɛi?

A PƐƐKU niŋ tonya Baabuiyo tau o yauwo hoo pɛɛkoo niŋ, mɛɛ diomnde Mɛlɛka mɛi le yoomu fafɛɛŋndo wo cho naa yɛ, nyɛ yɔŋnuŋ waŋvilɛiya wo, a tiindaŋ fulasɛiniŋndo. (Ikilisiaatii 9:​5; Chɔŋ 5:​28, 29; Sɔɔŋ Chɔɔmaŋndoŋ 21:​3, 4) A kandu niŋ dɔɔ bɔŋaŋnda Seiyaa Chɛhowaa biyɔɔ nduyɛ ma laalaŋ maa nda cho o piɛile tonyaleŋ niŋ ni. (Chɔŋ 13:​35) A kandu niŋ dɔɔ chaŋyɛi kpɛɛluŋnde kilaa nya Chɛhowa tɛɛŋ, nduyɛ ma  kɛɛsiaa maa a yeema ma piɛi ndu. Lelaŋ ma yiyaŋ dɔɔ aa, ‘Yɛɛ ya nɔ yɛ niko mi tosa suŋ suŋ le Mɛlɛka piɛiyo?’

2. Le yɛɛ po Itoopiaanɔɔ ndoo yeema yɛ le yiŋɔɔ sɔlaa?

2 Keŋ po Itoopiaanɔɔ yiyaŋ ni, o wa o boondii Chiisu ve niŋndo. Mɛɛ teleŋ biŋgi hiou o yiŋɔɔ Chiisu wo kɔɔli, mi buɛi Chiisoo Filipi dimul poo hoo yooŋgu kɛndɔɔ. Mi Filipi chɔm ndu maa Chiisu wa Mɛsayanɔɔ ni. Mi nyɛ po Itoopiaanɔɔ hoo pɛɛku wo pilaŋ ndu kɔllo. Le hei mbo dimi o lepilɛ niŋ kpe aa, “Tofaŋ mɛŋndaŋ. Yɛɛnɛ kuuna yɛ ya yiŋɔɔ sɔlaa?”—Walta Wanaa Chiisuaa 8:​26-36.

3. (a) Sawa kuɛɛ Chiisu ndoo ke yɛ tol kɔɔliaa nduaa? (b) Vɛɛ waŋndo sɔla yɛ yiŋɔɔ?

3 Baabuiyo pɛɛku kpendekele maa te a yeema pɛ ma piɛi Chɛhowa, mɛɛ ma sɔla yiŋɔɔ. Mi Chiisu dimul tol kɔɔliaa nduaa aa, “La kɔ o ŋwaŋ chiee lo ba o ba fee mi la siiŋguu nda buɛiyaa ni mi la yiŋ nda.” (Maatiu 28:​19) Mi Chiisu pila bɛɛ yiŋ le naa taamasioo kɛsullo. Mbo sɔla mɔɔvaa o mɛŋndaŋ bɛŋgu pio, o cho vesul te nda vesul ndu maŋ o lebol te. (Maatiu 3:​16) Hau bɛɛ te Kilisiɔŋnɔɔ wa pɛ yiŋɔɔ, a nɔ ma mɔɔva ndu o mɛŋndaŋ bɛŋgu.

4. Yɛɛ yiŋɔɔ numndo chɔm yɛ acheleŋnda?

4 Te a yiŋ pɛ, a chɔm acheleŋnda maa a yeema kɛsɛ ma simnuŋ chaaŋ o Mɛlɛka nduyɛ ma piɛi ndu. (Sam 40:​7, 8) Lelaŋ mi kɔndɔfillo bii num ma nyuna aa, ‘Yɛɛ ya nɔ yɛ mi tosa le mi sɔla yiŋɔɔ?’

KƆL KALOO A TIINDAŊNDO

5. (a) Yɛɛ ŋ nɔ yɛ ma tosa fɛŋ tuupa ma sɔla yiŋɔɔ? (b) Le yɛɛ bɔŋaŋnda leKilisiɔŋndaŋ la cho yɛ nyɛ sɔvɛ?

5 Tuupa ma sɔla yiŋɔɔ, a nɔ ma sina Chɛhowa nda Chiisu. A kandu niŋ hei tosaa o Baabuiyo pɛɛkoo niŋ.  (Nuawɔ Chɔŋ 17:​3.) Kɛ koŋ cho letuu le. Baabuiyo dimi maa a nɔ ma “sɔla kɔl kaloo a sina pɛŋgoo, o nyina Mɛlɛkaa ke waŋnda wo.” (Kolosiaŋnda 1:​9) Bɔŋaŋnda Seiyaa Chɛhowaa la cho num mala ma sɔla chaŋyɛi kpɛɛluŋnde a Chɛhowa. Sabu sɔviɔɔ o pilɛ cho koŋ ni le ma wa kɔlaŋ o bɔŋaŋnda laŋ lɔɔlɔɔ.—Hibuluiya 10:​24, 25.

Tuupa ma sɔla yiŋɔɔ, a nɔ fɛŋ ma pɛɛku Baabuiyo

6. Vɛɛ kpɛ ŋ nɔ yɛ ma sina a Baabuiyo okɔɔ tuupa ma sɔla yiŋɔɔ?

6 A tonya, o cho naa maa Chɛhowa yeema num ma sina nyɛ o nyɛ fee o Baabuiyo niŋ malaŋ ŋ sɔla yiŋɔɔ le. Chɛhowa ve po Itoopiaanɔɔ kɔl le mbo sina nyɛ o nyɛ o Baabuiyo niŋ tuupa mbo sɔla yiŋɔɔ le. (Walta Wanaa Chiisuaa 8:​30, 31) Nduyɛ ŋ cho hiouwɔɔ lachi a pɛɛkoo a Mɛlɛka okɔɔ le fɛɛŋ a fɛɛŋ. (Ikilisiaatii 3:​11) Kɛ le yiŋɔɔ sɔlaa, a nɔ ma sina nduyɛ ma chɛl pɛɛkula kpeekpeila cho o Baabuiyo niŋndaŋ.—Hibuluiya 5:​12.

7. Vɛɛ pɛɛku num Baabuiyo mala yɛ num?

7 Baabuiyo dimi aa, “Le wana o wana ma nɔla ma nɛŋi Mɛlɛka kɔl mɛɛ ma nɔ tiindaŋndo o ndu niŋ.” (Hibuluiya 11:​6) Lelaŋ, mɛɛ ma nɔ tiindaŋndo tuupa ma sɔla yiŋɔɔ. Baabuiyo dimul naa maa mi waŋnda apum o chiee bɛndoo Kɔliŋ niŋ sindɛ tuɛi nyɛ tol kɔɔliaa Chiisuaa pɛɛku nda wo. Fulamakɔɔlioo wa ni, ma laalaŋ, okoŋ ma sɔla yiŋɔɔ. (Walta Wanaa Chiisuaa 18:​8) Lende koni, Baabui ŋ pɛɛku wo mala num ma duau tiindaŋndo o mɛila Mɛlɛkalaŋ niŋ, a o kpaaya sala soliaŋ Chiisoo niŋ, o cho naa piŋi o hakioo niŋ a piɔmndo wo.—Chɔɔsuaa 23:​14; Walta Wanaa Chiisuaa 4:​12; Timoti Diiŋ Ndɔɔ 3:​16, 17.

DIMUL ACHELEŊNDA A TOONYA BAABUIYO OKƆƆ

8. Yɛɛ nyindu yɛ num le acheleŋnda dimullo a nyɛ ŋ pɛɛku wo okɔɔ?

8 Mɛɛ ŋ pɛɛku fau a Baabuiyo okɔɔ nduyɛ ma che mɛɛ o mala num o yoomu numndo niŋ yɛ, tiindaŋ numndo  cho chɔlu kalu poŋ. Ma yeema acheleŋnda dimullo a nyɛ ŋ cho pɛɛkoo wo okɔɔ. (Chɛluimaya 20:​9; Kɔliŋtiaŋ Diiŋ Ndɔɔ 4:​13) Kɛ nɛɛ yaa ŋ nɔ yɛ ma dimul?

Tiindaŋndo nɔ mbo nyindu num le acheleŋnda dimullo nyɛ ŋ laalaŋndo

9, 10. (a) Nɛɛnɛ ŋ kandu yɛ dimullo nyɛ ŋ pɛɛku wo? (b) Yɛɛ ŋ nɔ yɛ ma tosa te a yeema pɛ ma kandu yooŋgu kɛndɔɔ dimioo a kundaa latulu?

9 Naapum a yeema ma dimul yuŋgu numndo, chaaŋaa numnda, wanaa nya chiɛɛliaŋnda, ɔɔ wanaa nya tosa wallo latulu wa a nyɛ ŋ pɛɛku wo okɔɔ. Suɛi kɛndɛi cho keŋ ni. Kɛ lɔɔlɔɔ tosa ndi o nɛi kɛndɛ niŋ vɛlɛ a nɛi kaalaa. Okoŋ, a cho nɔla ma wa yooŋgu kɛndɔɔ dimioo a kundaa latulu. Te a yiyaŋ pɛ maa a bɛɛndiaŋ le keŋ tosaa, a dimul Sei Chɛhowa cho num Baabuiyo pɛɛkoo wo maa a yeema ma kandu yooŋgu kɛndɔɔ dimioo a kundaa latulu. Te wana koŋ yiyaŋ pɛ maa a bɛɛndiaŋ nduyɛ mi kaala numndaŋ la wa la chɛlaŋ a sawala Baabuiyo, okoŋ, bɛnduaa kundaa a ŋiɔɔŋ chal a num nya ndu latulu.

10 Yɛɛ cho yɛ yɔŋnɔŋ o chalii keŋ choo? Bɛnduaa kundaa cho suukaŋ a num le sinaa te a bii bila nduyɛ ma laalaŋ pɛɛkula Baabuiyo, te a diikuŋ pɛ nyɛ Baabuiyo dimi o yoomu numndo niŋ, nduyɛ te a yeema pɛ kpeekpei ma simnuŋ Sei Chɛhowaa. Loonuŋ maa bɛnduaa kundaa cho waŋnda o kundaa niŋ kpou mandaa ni, a num kpede. Lelaŋ yɔŋ isiooŋ le nda le. (Walta Wanaa Chiisuaa 20:​28; Pitɛ Tasoo 5:​2, 3) Te la chii pɛ suukaŋndo hoo, bɛnduaa kundaa cho num dimul te a suliŋ pɛ le kandɔɔ yooŋgu kɛndɔɔ dimioo a kundaa latulu.

11. Le yɛɛ i cho yɛ suɛi sɔvɛ le siŋgaŋndaŋ tosaa tuupa ma kandu yooŋgu kɛndɔɔ dimioo a kundaa latulu?

11 Lepum mi bɛnduaa dimul num maa a nɔ ma chɔɔlu siŋgaŋndaŋ tosa tuupa ma kandu yooŋgu kɛndɔɔ  dimioo a kundaa latulu. Le yɛɛ i cho yɛ suɛi sɔvɛ le siŋgaŋnda laŋ tosaa? Kanifuule, te ŋ wa pɛ suɛi o acheleŋnda lo a Mɛlɛka okɔɔ, le Chɛhowa naŋ cho suɛi ni. Le hei, ŋ nɔ miŋ wa o nɛi ke ndu bɛɛleŋ ndo choo.—Kɔliŋtiaŋ Tasoo 6:​9, 10; Kaleesiaŋnda 5:​19-21.

MAL YƆŊ NUM WƆƆŊNDO NDUYƐ MA MULIŊ

12. Le yɛɛ waŋnda kpou nɔ yɛ ma mal yɔŋnda ndala wɔɔŋndaŋ?

12 Nyɛ cheleŋ cho o num nɔ ma tosa wo tuupa ma sɔla yiŋɔɔ. Mi kiilanɔɔ Pitɛ dimi aa, “La mal yɔŋnda nyala wɔɔŋndaŋ, mi la muliŋ naa Mɛlɛka chua, le mi Mɛlɛka faŋa yɔŋnda nyala wɔɔŋndaŋ nya kɔɔli.” (Walta Wanaa Chiisuaa 3:​19) Yɛɛ o sim yɛ le yɔŋ wɔɔŋndo malɔɔ? Ndu cho ni, mɔnɛi biyɔɔ le suɛi wɔɔŋii naŋ tosa paandu ve. Le taamaseliiyo, te num oo wa pɛ paandu o kaa ihini nɔɔlɛiyo niŋ, mɛɛ a nɔ ma soli balaŋ leniŋ. Nduyɛ o yɔŋ bɛɛ aa chɔŋ a violɔŋ numndo kaala numndaŋ kpou la cho la kɛndɛ, a koŋ kpou a nɔ ma siŋgaŋ kanifuule, naa kpou wanaa lahakiaa naŋ cho ni nduyɛ ŋ yeema malɔɔ hakioo.—Luomaŋnda 3:​23; 5:​12.

13. Yɛɛ o sim yɛ le “muliŋ” ndo?

13 Baa mɔnɛi biyɔɔ le nyɛ num oo tosa paandu wo cho pa letuu? Sako. Mi Pitɛ dimi maa a nɔ vɛlɛ ma “muliŋ.” Hoo sim ni maa a nɔ ma mal kaa o kaa wɔɔŋ ŋ wa paandu tosaa okoŋ ma kandu o kɛndɔɔ tosaa. Ŋ tuuwɔ ndi naa, yiyaŋndɔ maa a cho kɔlaŋ o fondaa pum, kɛ lepilɛ bɛɛ a kue wɔ o fonda koŋ te. Kɛ mɛɛ ŋ kuɛ sii, ma sina maa a bendu nɛiyo. Yɛɛ ŋ cho yɛ tosa? O kpeekpei niŋ, a cho kandɔɔ kɔlaŋ dɛɛnaa, ma sim, ma muliŋ, okoŋ ma chua nɛi kpeekpeiyo. Lende koni, te a wa pɛ Baabuiyo pɛɛkoo, a cho saalɔŋ maa kaalaŋ ɔɔ sɔɔŋ pum cho  o yoomu numndo niŋ ŋ num nɔ ma siŋga woŋ. Chɛl le ma “muliŋ,” koŋ cho ni, ma tosa siŋgaŋnda yeemaŋ ndaŋ, okoŋ ma kandu nyɛ cho o kɛndɔɔ wo tosaa.

YƆŊGUŊ O MƐLƐKA LO

A chuel niŋ pa Chɛhowa buŋgɛi maa a cho ndu piɛi?

14. Vɛɛ ŋ yɔŋguŋ yɛ o Mɛlɛka lo?

14 Suɛi sɔvɛ cheleŋ ŋ nɔ ma tosa tuupa ma sɔla yiŋɔɔ ve cho yɔŋgɔŋndo o Chɛhowa lo ni. Yɔŋgɔŋndo o Chɛhowa lo cho ni, piɛileŋ o ndulo. O piɛile leŋ niŋ, a cho buŋgɛi chua maa ndupilɛ kpe ŋ cho piɛi ni, nduyɛ ma tosa hɛnaŋ ndɔɔ nyɛ sɔvɛ hiou kpou wo o yoomu numndo niŋ.—Ditɔnɔmii 6:​15.

15, 16. Yɛɛ nyindu yɛ waŋndo le yɔŋgɔŋndo o Mɛlɛka lo?

15 Buŋgɛi chuaa le Chɛhowa piɛiyo ndupilɛ kpe cho ko maa buŋgɛi chuaa le waa latulu a wana ŋ kaala wo tei a yoomu numndo mɛɛlulaŋ. Yiyaŋndɔ maa poo nda chuaa cho nuaŋnaŋndo le challe o nɔɔ niŋ. Te poo hiou pɛ lachi a chuaa sinaa nyɛkɛndɛi, o cho ndu kaala nduyɛ mbo yeema ndu chuaa o nɔɔ niŋ. Mi che bɛɛ naa o cho kɛɛsiaa lamamɔɔ le cho hoo le, kɛ mi poo kɛɛsiaa a kɔl ndɔɔ wulee le mbo chɛl kalaŋndo hoo kanifuule, o kaala chuaa.

16 Mɛɛ ŋ pɛɛku a Chɛhowa okɔɔ fau, lende koni ŋ kaala ndu ni nduyɛ ma yeema le tosaa o num tiuba wo le ndu piɛiyo. Hoo cho num nyindɔɔ ni ma chua buŋgɛi o ndulo o piɛileŋ niŋ le ndu piɛiyo. Baabuiyo dimi maa wana o wana yeema le Chiisu tolɔɔ kɔɔli pɛ, mɛɛ “o nɔ mbo tosa hɛnaŋ kɔl ndɔɔ le.” (Maki 8:​34) Yɛɛ keŋ sim yɛ? O sim maa Chɛhowa diikɔŋndo nɔ mbo wa nyɛ tasoo peŋ o yoomu numndo niŋ. Hɛnaŋ Chɛhowaa cho nyɛ sɔvɛ bɛndu mbo hiau yeemaŋ numndoŋ a kpeleŋnda numndaŋ.—Nuawɔ Pitɛ Tasoo 4:​2.

 SIOOŊII BII NUM MAA A CHO DELƆƆ LE

17. Le yɛɛ waŋnda apum kɛɛ yɛ le yɔŋgɔŋndo o Chɛhowa lo?

17 Waŋnda apum a yɔŋguŋ o Chɛhowa lo le kanifuule, mi siooŋnde bii nda maa a lo niŋ o buŋgɛi nda chua ve choo le ndu piɛiyo le. A yeema ma hui Chɛhowa le, ɔɔ ma yiyaŋ maa te a yɔŋguŋ o Chɛhowa lo le, o bii nda tɛɛ le nyɛ nda tosa wo le.

18. Yɛɛ cho yɛ num mala ma tiuba siooŋii kɛ kɛ ŋ nɔ le Chɛhowa huiyo?

18 Te a kaala pɛ Chɛhowa, siooŋii bii num maa a cho ndu hui le. Le mɛɛ ŋ kaala ndu yɛ, a cho tosa o num nɔla wo le loo o buŋgɛi ŋ chuel ndu ve choo. (Ikilisiaatii 5:​4; Kolosiaŋnda 1:​10) Yiyaŋ ve num maa i cho bɔɔ suɛi kala le hɛnaŋ Chɛhowaa tosaa le. Mi kiilanɔɔ Chɔŋ poonyiaa aa, “Mɛlɛka kaalaa cho hoo ni, nyɛ o dimul naa wo tosaa. Nduyɛ, nyɛ o dimul naa le tosaa wo, o cho nyɛ kendu maa mi ŋ bumba ndu tosa le.”—Chɔŋ Tasoo 5:​3.

19. Le yɛɛ siooŋii nɔ mii bii num le yɔŋgɔŋndo o Chɛhowa lo le?

19 A nɔ ma wa wana walaŋ malaŋ ŋ yɔŋguŋ o Chɛhowa lo le. Fɛɛŋ fɛɛŋ bɛɛ o dimul naa le tosaa nyɛ naŋ tiuba le tosaa le wo le. (Sam 103:​14) O cho num mala ma tosa nyɛ cho o kɛndɔɔ wo. (Aisaya 41:​10) Tiindaŋ Chɛhowa a kɔl numndo kpou, nduyɛ “o nɔla mbo tosa mi nyɛ o nyɛ wa o kɛndɛ a num.”—Pulɔwaa 3:​5, 6.

CHƆƆMƆŊNDO LE PIOŊƆƆ SƆLAA

20. Te a chii pɛ yɔŋgɔŋ o Mɛlɛka lo, yɛɛ cheleŋ ŋ nɔ yɛ ma tosa?

20 A yiyaŋ pa maa a bɛɛndiaŋ le yɔŋgɔŋndo o Chɛhowa lo? Te a yɔŋguŋ pɛ o Chɛhowa lo, mɛɛ a bɛɛndiaŋ le pɛllo opilɔɔ solioo. A nɔ ma sɔla yiŋɔɔ.

21, 22. Vɛɛ ŋ ‘chɔɔmuu’ yɛ tiindaŋ numndo kpendekele?

21 Tosa mi bɛndu kɔɔna sɔɔŋ le bɛnduaa kundaa o kunda numndo niŋndo sina maa a yɔŋguŋ o Chɛhowa lo  nduyɛ maa a yeema ma sɔla yiŋɔɔ. Okoŋ, o cho tosa mi bɛnduaa apum tosa miiŋgu makɔɔ a num latulu o sɔɔŋ kulloŋ o Baabuiyo niŋ choo. Te a chɛl pɛ maa a bɛɛndiaŋ, a cho num dimul maa a nɔla ma sɔla yiŋɔɔ o bɔŋaŋ ibuŋgaa ɔɔ bɔŋaŋ bɛndu Seiyaa Chɛhowaa cho o nɛiyo. O bɔŋaŋ koŋ choo, a cho suɛi yɔŋgu i tɛɛsiaa nyɛ yiŋɔɔ simndo. Wana cho suɛi keŋ yɔŋgu  wo cho wanaa bɛɛndiaŋ le yiŋɔɔ wa nyuna nyunala tɛtɛlɛlaŋ latiɔɔŋ. Te a muli pɛ nyunala laŋ, mɛɛ a ‘chɔɔmuu’ tiindaŋ numndo kpendekele.—Luomaŋnda 10:​10.

22 Okoŋ kɔɔli, a cho yiŋɔɔ sɔla. A cho num mɔɔva o mɛŋndaŋ bɛŋgu pio. Yiŋɔɔ koŋ cho wana o wana fee  chɔm maa a yɔŋguŋ o Chɛhowa lo nduyɛ a cho niŋ suŋ suŋ Sei Chɛhowaa.

NYƐ YIŊƆƆ NUMNDO SIMNDO

23. Yɛɛ o sim yɛ le yiŋɔɔ sɔlaa o ‘diola Mɛlɛka Finyaa, a Po ndɔɔ, a nyina Mɛlɛkaa’?

23 Mi Chiisu dimul buɛiyaa nduaa maa a cho yiŋɔɔ sɔla o “diola Mɛlɛka Finyaa, a Po ndɔɔ, a Nyina Mɛlɛkaa.” (Nuawɔ Maatiu 28:​19.) Yɛɛ koŋ sim yɛ? O sim maa a sina kpaaya Chɛhowaa a wali Chiisoo o sabu Mɛlɛkaa niŋ, nduyɛ a mɛɛ Chɛhowa soliŋ nyina ndɔ diandaa kpeku le hɛnaŋ ndɔɔ peeloo yɛ.—Sam 83:​18; Maatiu 28:​18; Kaleesiaŋnda 5:​22, 23; Pitɛ Diiŋ Ndɔɔ 1:​21.

Te a yiŋ pɛ, mɛɛ a chɔm maa a yeema ma tosa hɛnaŋ Mɛlɛkaa

24, 25. (a) Yɛɛ yiŋɔɔ sim yɛ? (b) Yɛɛ naŋ cho yɛ yaasiaa o buŋgɛi mɛɛlɛi niŋ?

24 Yiŋɔɔ sim le nyɛ sɔvɛ sɔviɔɔ. Te a mɛɛya num pɛ o mɛŋndaŋ bɛŋgu, o sim maa a vi, ɔɔ a mal kaala ŋ wa paandu choo laŋ. Te a fula pɛ o mɛŋndaŋ bɛŋgu pusaa, a cho yoomu sɛnɛiyo kandɔɔ le hɛnaŋ Mɛlɛkaa tosaa. O chɔm maa a cho Chɛhowa piɛi chɔŋ a paale leŋ mbo kuɛ kɛ. Loonuŋ maa o cho o wana chiee lo, ɔɔ kɔɔna, ɔɔ o wali niŋ te ŋ yɔŋguŋ te. O Chɛhowa lo ŋ yɔŋgu yoomu numndo ni.

25 Yɔŋgɔŋ numndo cho num mala ma kila chaŋyɛi kpɛɛluŋnde a Mɛlɛka. (Sam 25:​14) Kɛ hoo chɔm naa maa waŋndo cho pioŋɔɔ sɔla le mɛɛ o sɔla yiŋɔɔ yɛ le. Mi kiilanɔɔ Pɔɔl poonyiaa aa, “La hiou lachi a fafalaa, le mi la siou pioŋɔɔ sɔla. La tosa hei o siooŋii Mɛlɛkɛi niŋ, a tusiŋndo ndu o labɛŋgu niŋ.” (Filipiaŋnda 2:​12) Kandɔɔ koni yiŋɔɔ cho ni le pioŋɔɔ sɔlaa. Kɛ vɛɛ ŋ sɔɔŋguu yɛ Chɛhowa ikɛi kpɛɛluŋ? Buŋgɛi mɛɛlɛi o yauwo hoo niŋ cho nyuna koŋ muli.