1, 2. Kuɛɛ naŋ sɔla yɛ hau naa viaŋnaŋnda?

YIYAŊNDƆ maa a cho kɔlaŋ o tiŋndo tɛɛŋ mi hueiyii wɔɔŋ wɔɔŋnde suŋgu hɔŋndo. Choo piimiaa kpilo, mi nyɛ ŋualalɛiyo kandu kioloo, mi taŋndaŋ bɛɛ ma kandu deŋioo. Nduyɛ o viu bɛɛ le mi piɔɔ tual yɛm. Ma nuuviaa fondaa le vioŋnɔŋndo. Nuawɔ se mɛɛ ŋ wa a kɔl kɛndɛ yɛ te a saaluŋ pɛ fonda vesɛi kpundɛ nɔla mbo komal num te wo!

2 Lende chieeŋ naŋ cho hau niŋndo cho ni. Hiouwɔɔ tuŋ kpundɛlaŋ la cho lachi a kuiyo ni. Mi kɔndɔfillo bii num dɔɔ ma nyunaŋ aa, ‘Kuɛɛnɛ ya sɔla yɛ fondaa le vioŋnɔŋndo?’ Mi wana soliaa ŋchondoo poonyiaa o Baabuiyo niŋ aa, “Mɛlɛka Yaawɛɛ . . . ‘Num cho wana chiɔu yoomu nuu, nduyɛ ma manda ya wo ni. Num cho Mɛlɛka nuu ni, num ya I tiindaŋ ni.’” (Sam 91:​2) A tonya, Chɛhowa nɔla mbo soli naa o bahawɛila naalaŋ niŋ suŋ suŋ, nduyɛ o ke naa tiindaŋ kɛndɛ kɛndɔɔ le chilaŋ.

3. Vɛɛ naŋ siiŋguu yɛ Chɛhowa fondaŋ naa viaŋnaŋndo?

3 Vɛɛ Chɛhowa manda yɛ naa? Bahawɛi kɛ kɛ naŋ nɔ hau, o mala naa miŋ chɔulaba ndu, nduyɛ o nɔ kpaayaa mbo hiau wana o wana kindiŋ le naa nyɛpalaa tusioo choo. O yɔŋ bɛɛ mi suɛi wɔɔŋnde komal naa suŋ suŋ, Chɛhowa nɔla mbo miŋgi ndi bɛɛndiaa o chilaŋ niŋ. Baabuiyo dɛɛniaa naa aa, “La hiou lachi a waa o kaala Mɛlɛkaa bɛŋgu.” (Chudi 21) Ŋ nɔ miŋ lo Chɛhowa ikɛi kpɛɛluŋ le mala ndɔɔ sɔlaa o teleŋnda kala kalalaŋ bɛŋgu. Kɛ vɛɛ naŋ tosa yɛ keŋ?

 CHƆM BALIKA MELAA LE KAALA MƐLƐKAA

4, 5. Vɛɛ Chɛhowa chɔm yɛ naa kaala ndɔɔ?

4 Le miŋ lo Chɛhowa ikɛi kpɛɛluŋ, ŋ nɔ miŋ sina mɛɛ kpɛ o kaala naa yɛ. Yiyaŋndɔ a nyɛ o nyɛ Chɛhowa tosal niŋ naa. O ke naa chieeŋ kɛndɛ kɛndɔɔ nduyɛ mbo pei ndu cha a tɔlɔɔla kɛndɛ kɛndɛlaŋ vɛlɛ a visiaa. O ke naa vɛlɛ nyɛmdiaŋ yeelɛiyoŋ a mɛŋma kɛndiaŋ le kolɔɔ. Chɛhowa pɛɛku naa diola ndɔlaŋ a suliŋnda ndɔla kɛndɛ kɛndɛlaŋ o Baabuiyo niŋ. I hiou kpou ve, mbo chɔm naa kaalaa, mbo yɔŋ Chiisu, Po ndɔ pilɔɔ kpe o chieeŋndo choo le yoomu ndɔɔ yɔŋgoo le naa. (Chɔŋ 3:​16) Nduyɛ le sala o fula koŋndo, ŋ nɔ tiindaŋ sɔvɛ sɔviɔɔ le chilaŋ.

5 Chɛhowa kila Masaleŋ o choo choo niŋ, Masale cho suŋ nyɛpalaa kpou chii yo. Masaleŋ ndeŋ le cho tosa chieeŋndo kpele hɛnɛkiɔɔ. Kɔl nyuloo a nyaaloo cho wa loŋ lefafɛɛŋ le wana o wana fee. (Sam 37:​29) Nɛi cheleŋ Chɛhowa chɔm naa kaalaa wo cho ni, o cho naa pɛɛkoo mɛɛ naŋ looku miŋ bii yoomu naa suŋ suŋ yɛ. O dimul naa vɛlɛ le miŋ piɛi o ndulo. Nduyɛ o cho lɔɔlɔɔ o bɛɛndiaŋ le nilaŋ yaŋɔɔ o piɛile naaleŋ. Naa kpou Chɛhowa chɔm naa kaala ndɔɔ.

6. Vɛɛ naŋ chɔm yɛ balika melaa le kaala Chɛhowaa?

6 Vɛɛ naŋ chɔm yɛ balika melaa le kaala Chɛhowaa? Chɔm balika melaa le nyɛ o nyɛ o tosal num. Kɛ wanaa bɔɔbɔɔ hau sina ikɛndɛ le. Lende koni i wa teleŋ Chiisu wa o chieeŋndo choo wo ni. O teleŋ pilɛ niŋ, mi Chiisu siŋgi wanaa ndaa nɔ naa ŋlɛlɔɔ wa ŋwaŋ tɔ. Kɛ opilɛ kpe mel ndu balikaa ni. (Luku 17:​12-17) Ŋ yeema miŋ wa maa po mel ndu koŋ balikaa wo. Lɔɔlɔɔ ŋ yeema miŋ mel Chɛhowa balikaa.

7. Vɛɛ kpɛ naŋ nɔ yɛ miŋ kaala Chɛhowa?

7 Naa bɛɛ nɔ miŋ chɔm kaala naa le Chɛhowa. Mi Chiisu dimul buɛiyaa nduaa maa a nɔ ma kaala Chɛhowa a kɔl  ndaa kpou, a yoomu ndaa kpou, vɛlɛ a yiyaŋ ndaa kpou. (Nuawɔ Maatiu 22:​37.) Yɛɛ keŋ sim yɛ?

8, 9. Vɛɛ naŋ chɔm yɛ Chɛhowa maa ŋ kaala ndu?

8 Baa a sondo ko naŋ nɔ ni miŋ kaala Chɛhowa? Sako. Te ŋ kaala pɛ Chɛhowa a kɔl naa, yoomu naa, a yiyaŋ naa kpou, ŋ cho kaala naa chɔm le ndu o nyɛ naŋ tosa wo niŋ. (Maatiu 7:​16-20) Baabuiyo pɛɛku nyɛkɛndɛi maa te ŋ kaala Mɛlɛka pɛ, ŋ cho sawala ndɔlaŋ diikɔŋ. Baa keŋ kendu pa? Sako, kanifuule, “nyɛ o dimul naa le tosaa wo, o cho nyɛ kendu maa mi ŋ bumba ndu tosa le.”—Nuawɔ Chɔŋ Tasoo 5:​3.

9 Te ŋ diikuŋ pɛ Chɛhowa, ŋ cho nyaaloo a kɔl hiniaa sɔla o yoomoo niŋ. (Aisaya 48:​17, 18) Kɛ yɛɛ mala yɛ naa miŋ lo Chɛhowa ikɛi kpɛɛluŋ? Ŋ tofaŋndɔ.

HIOU LACHI A CHƐHOWA SƆƆŊGUUWO IKƐI KPƐƐLUŊ

10. Le yɛɛ ŋ nɔ yɛ ma hiou lachi a pɛɛkoo a Chɛhowa okɔɔ?

10 Vɛɛ ŋ looku yɛ simnɔŋ chaaŋ o Chɛhowa? O pɛɛku ŋ wa Baabuiyo wo niŋ, ma chɔɔlu Chɛhowa sina nduyɛ ma kila chaŋyɛi a ndu. Chaŋyɛi hei cho ko mɛɛ yiŋndeŋ le wa naa sandei wule wule yɛ. Mɛɛ yɔmnde yeemaŋ naa le mi yiŋndeŋ le hiou lachi a sandei yɛ, lende koni ŋ nɔ ni ma hiou lachi a pɛɛkoo a Chɛhowa okɔɔ le mi chaŋyɛi nyɛi kendu poŋ.—Pulɔwaa 2:​1-5.

Maa leyiŋ, kaala ŋ nɔ le Chɛhowa wo yeema yɔmnde le mbo hiou lachi a sandei

11. Vɛɛ pɛɛkula cho o Baabuiyo niŋndaŋ la piiliaŋ yɛ num?

11 Te a hiou pɛ lachi a Baabuiyo pɛɛkoo, a cho pɛɛku sɔɔŋ pilaŋ num kɔllo kpeekpeiyoŋ. Tofawɔ mɛɛ buɛiyaa Chiisuaa a ŋiɔɔŋ sinaŋ yɛ mɛɛ Chiisu wa nda sɔɔŋ Baabuiyo pɛɛku woŋ tɛɛsiallo. “Mɛɛ o wa suɛi naa naa cha o nɛi, nduyɛ mbo wa naa suɛi Mɛlɛkɛi tɛɛsiallo, mi kɔltaŋ la yɔŋnuŋ naa nyɛ kɛndɛ wuye wuye.”—Luku 24:​32.

12, 13. (a) Yɛɛ yɔŋnuŋ yɛ a kaala naŋ nɔ le Mɛlɛka wo? (b) Vɛɛ naŋ hiau yɛ lachi a Chɛhowa kaalaa?

12 Mɛɛ buɛiyaa Chiisuaa sina nyɛ Diom Mɛlɛkaa dimi  wo pɛŋgu nyɛkɛndɛi, mbo pilaŋ nda kɔltaŋ. Num bɛɛ kɛlɛŋgaa lende koni num oo fula ŋdial ni mɛɛ ŋ kandu Baabuiyo biyɔɔ bila. Hei mala num ni ma sina Chɛhowa nduyɛ ma kaala ndu. A yeema mi kaalaa hoo nyulul te.—Maatiu 24:​12.

13 Te a simnuŋ pɛ chaaŋ o Mɛlɛka, a nɔ ma tosa wallo kalaŋ le chaŋyɛi nyɛi kindioo poŋ. A nɔ ma hiou lachi a pɛɛkoo a ndu okɔɔ nduyɛ ma yiyaŋ a nyɛ ŋ cho pɛɛkoo wo, a mɛɛ ŋ duau ndu o wali niŋ o yoomu numndo niŋ le Mɛlɛka chɔɔloo kaalaa yɛ. (Chɔŋ 17:​3) Te a wa pɛ diomndaŋ veeloo o Baabuiyo niŋ ɔɔ ma wa ndu pɛɛkoo, nyunaŋndɔ aa, ‘Yɛɛ buŋgɛi hei pɛɛku yɛ ya a Chɛhowa Mɛlɛka okɔɔ? Le yɛɛ ya nɔ yɛ mi kaala ndu a kɔl nuu vɛlɛ a yoomu nuu kpou?’—Timoti Tasoo 4:​15.

14. Vɛɛ piɛileŋ le mala yɛ mi kaala naŋ nɔ le Chɛhowa wo kendu poŋ?

14 Te a nɔ pɛ chaaŋ num kɛndɔɔ, ma suukaŋ a ndu lɔɔlɔɔ. Hei tosa mi chaŋyɛi nyɛi hiou lachi a kaloo. Mɛɛ  lende koni, te ŋ wa pɛ suɛi o Chɛhowa lo lɔɔlɔɔ, keŋ tosa mi kaala naŋ nɔ le ndu wo hiou lachi a kaloo. (Nuawɔ Tɛsaloniaŋ Tasoo 5:​17.) Ke sɔvɛ chɛŋ o Finya naa o choo choo niŋndo lo piɛileŋ le cho ni. Ŋ nɔ miŋ wa suɛi o ndulo lɔɔlɔɔ fulaa o kɔl naa niŋ di. (Sam 62:​8) Ŋ nɔ miŋ wa sondoo miŋgioo o nyɛ pilɔɔ choo lɔɔlɔɔ le. Kɛ ŋ nɔ miŋ laalaŋ kɛsɛ a nyɛ naŋ cho piɛiyo le ndu wo. A tonya, te ŋ hiou pɛ lachi a Baabuiyo pɛɛkoo nduyɛ mi piɛile naaleŋ le chɛŋ naa o kɔl di, ŋ cho tosa mi kaala naŋ nɔ le Chɛhowa wo kendu poŋ.

SUƐI O ACHELEŊNDA LO A CHƐHOWA OKƆƆ

15, 16. Vɛɛ ŋ che yɛ wali dimiaa yooŋgu kɛndɔɔ?

15 Te ŋ yeema pɛ miŋ lo Chɛhowa ikɛi kpɛɛluŋ, ŋ nɔ vɛlɛ miŋ dimul acheleŋnda a nyɛ naŋ cho pɛɛkoo o Baabuiyo niŋndo okɔɔ. Acheleŋnda dimullo a Chɛhowa okɔɔ cho bɔɔ dikeŋnaŋ bɛndu. (Luku 1:​74) Nduyɛ kalaŋndo hoo Chiisu ke Kilisiɔŋaa tonyaa kpou ni. Naa pilɛŋ pilɛŋnda nɔ miŋ dimi yooŋgu kɛndɔɔ a Masale Mɛlɛkaleŋ okɔɔ. A tosa niŋ pa hei?—Maatiu 24:​14; 28:​19, 20.

16 Mi kiilanɔɔ Pɔɔl yiyaŋ maa wali dimiaa yooŋgu kɛndɔɔ cho bɔɔ nyɛ sɔvɛ. Mbo veelu ndu aa “sullo.” (Kɔliŋtiaŋ Diiŋ Ndɔɔ 4:​7) Waŋnda dimullo a Chɛhowa okɔɔ vɛlɛ a sabu ndɔɔ cho wali sɔvɛ bɛndu ŋ tosa wo ni. Nɛi ŋ piɛi Chɛhowa wo cho koŋ ni, nduyɛ o che nyɛ ŋ tosa le ndu wo o sɔvɛ. (Hibuluiya 6:​10) Yooŋgu kɛndɔɔ dimioo mala num vɛlɛ a wanaa yaŋ num nilaŋ nda kanifuule, ma mala acheleŋnda vɛlɛ a numpila le mi la sɔɔŋguu Chɛhowa ikɛi kpɛɛluŋ, nduyɛ mi la sɔla yoomu fafɛɛŋndo. (Nuawɔ Kɔliŋtiaŋ Tasoo 15:​58.) Wali cheleŋ cho pa o ke num kɔl hiniaa tau wo?

17. Le yɛɛ wali dimiaa yooŋgu kɛndɔɔ cho yɛ choŋ choŋ?

17 Wali dimiaa yooŋgu kɛndɔɔ hoo cho bɔɔ choŋ choŋ. Ŋ nɔ miŋ “dimul waŋnda suɛi Mɛlɛkɛi,” nduyɛ  miŋ “ke nda ndi teleŋ o teleŋ.” (Timoti Diiŋ Ndɔɔ 4:​2) Waŋnda nɔ ma tuei a Masale Mɛlɛkaleŋ okɔɔ. Baabuiyo dimi aa, “Paale Mɛlɛka Yaawɛɛ o kɔɔsa niŋ a waŋnda leŋ, le cho niŋ kpɛɛluŋ.” Mɛɛlulaŋ la nɔ le “hunɔɔ chɔ chɔ.” (Sɛfanaya 1:​14; Habakuku 2:​3) Chɛhowa nɔ le chieeŋ dɛnɛwɔɔŋ Setanaa tɛɛmbuuwo suŋ suŋ. Tuupa mi keŋ yɔŋnuŋ, waŋnda nɔ ma sina a leŋ okɔɔ le ma tosa chuaŋ chuaa le Chɛhowa piɛiyo.

18. Le yɛɛ naŋ nɔ yɛ miŋ piɛi Chɛhowa naa Kilisiɔŋaa tonyaa latulu?

18 Chɛhowa yeema miŋ piɛi ndu naa Kilisiɔŋaa tonyaa latulu. Baabuiyo dimi aa, “La ŋ nuuviaŋ nɛila naa ŋ nɔla mi ŋ kpeeŋiaa chaaŋaa naa vellaa velle le waŋnda kaalaa a sɔɔŋ kɛndɔŋ tosaa laŋ. La ŋ mal nuŋ chuuŋgiaŋndo diom pilɛ mɛɛ waŋnda a pum a nɔ kaa a chɛl le hunɔɔ o bɔŋaŋ niŋ te yɛ le. Kɛ, la ŋ dɛɛniaŋ vellaa velle a tiindaŋ naa ŋ nɔ o Mɛlɛka niŋndo okɔɔ. Taama nya pila la cho niŋ chɔɔ maa paale Masanɔɔ nɔ le miiŋgoo naŋ ndeŋ le cho niŋ kpɛɛluŋ.” (Hibuluiya 10:​24, 25) Ŋ nɔ miŋ tosa a sabu le miŋ wa o bɔŋaŋndaŋ kpou. Bɔŋaŋndaŋ ndaŋ la ke naa fondaa le miŋ dɛɛniaŋ nduyɛ miŋ lueyaŋ yoomuaŋ vellaa velle.

19. Yɛɛ mala yɛ naa miŋ kaala puaapiliaa a ndepiliaa naa Kilisiɔŋnda?

19 Te a bii pɛ bɔŋaŋndaŋ, a cho chaŋyaŋ kɛndɔŋ sɔla ŋ mala num le Chɛhowa piɛiyo wo. A cho puaapiliaa a ndepiliaa suu o suu komal, a nɔ kaalaŋ yɛ yɛ nduyɛ ma fula o kɔɔlima yɛ yiaŋ niŋ nda. Nda bɛɛ cho tosaa o nda nɔla wo le Chɛhowa piɛiyo maa num. Wanaa lahakiaa nda cho vɛlɛ ni maa num nduyɛ ma tosa biondɔŋndaŋ. Te a benduŋ pɛ a num, wa o bɛɛndiaŋ le nda malɔɔ haki. (Nuawɔ Kolosiaŋnda 3:​13.) Lɔɔlɔɔ tofa le suliŋnda kɛndɛlaŋ puaapiliaa a ndepiliaa num aa Kilisiɔŋnda o ŋdial. Te a tosa pɛ lende, keŋ cho num mala ma kaala nda nduyɛ ma chɔɔlu Chɛhowa sɔɔŋguu ikɛi kpɛɛluŋ.

 YOOMU KPEEKPEIYO

20, 21. Yɛɛ cho yɛ “yoomu kpeekpeiyo”?

20 Chɛhowa yeema mi chaaŋaa nduaa kpou sɔla yoomu sɔviɔɔ. Baabuiyo pɛɛku naa maa yoomu naa o chilaŋ niŋ cho wa bɔɔ teŋgeŋ a yoomu naa hoo hau.

Chɛhowa yeema num ma tuei “yoomu kpeekpeiyo” yeela. A yeema?

21 O chilaŋ niŋ, ŋ cho wa achal lefafɛɛŋ, o cho ko le wɔsioŋ 70 ɔɔ 80 le. A cho “yoomu kpeekpei nɔ lamɛɛlu le wo” tueiyɔɔ yeela o kɛndiaa walaŋndo niŋ, kɔl nyuloo, a nyaaloo o kpele hɛnɛkiɔɔ niŋ. Hoo Baabuiyo veelu ni aa “yoomu kpeekpeiyo.” Chɛhowa chuel naa buŋgɛi le naa yoomu kpeekpeiyo hoo kioo. Kɛ ŋ nɔ miŋ tosa nyɛ o nyɛ naŋ nɔla le miŋ huŋ “sɔla” ndu.—Timoti Tasoo 6:​12, 19.

22. (a) Vɛɛ naŋ looku yɛ miŋ sɔla “yoomu kpeekpeiyo”? (b) Le yɛɛ ŋ tiuba miŋ sɔla yoomu fafɛɛŋndo a ba naa le?

22 Vɛɛ naŋ looku yɛ miŋ sɔla “yoomu kpeekpeiyo”? Ŋ nɔ miŋ wa “wanaa nɔ kɛndɛi” nduyɛ miŋ wa ‘a chɛlaa le chaaŋaa naa malaa.’ (Timoti Tasoo 6:​18) Hoo sim maa ŋ nɔ miŋ wou nyɛ naŋ pɛɛku o Baabuiyo niŋndo o wali niŋ. Kɛ, o cho sɛmbɛ naa le naŋ nɔ miŋ tiindaŋ le yoomu kpeekpeiyo sɔlaa le. Fɛɛŋ bɛɛ ŋ tiuba miŋ sɔla yoomu fafɛɛŋndo a ba naa le. Ke fula Chɛhowa o ba le buɛiyaa nduaa wo o cho ni. Taamasioo cho hoo a “kɛndɛi Mɛlɛkɛi” okɔɔ ni. (Luomaŋnda 5:​15) Finya naa o choo choo niŋ yeema kɛsɛ mbo ke buɛiyaa nduaa laalaŋnda kioo hoo.

23. Le yɛɛ ŋ nɔ yɛ ma tosa chuaŋ chua kɛndɔɔ suŋ suŋ?

23 Nyunaŋndɔ aa, ‘I cho pa Mɛlɛka piɛiyo o nɛi o chɛllo choo?’ Te a saaluŋ pɛ maa a nɔ ma tosa siŋgaŋndaŋ lapum, tosa laŋ lepilɛ kpe. Te ŋ tiindaŋ pɛ Chɛhowa nduyɛ miŋ tosa nyɛ o nyɛ naŋ tiuba le ndu diikɔŋndo, ndu cho wa fonda naa viaŋnaŋndo ni. O cho buɛiyaa nduaa laalaŋnda manda yɛlɛkɛlɛɛ o palɛi mɛɛlɛi chieeŋ dɛnɛ wɔɔŋ Setanaa hoo niŋ. Okoŋ, Chɛhowa cho tosa a sabu le miŋ  wa o Kpele Hɛnɛkiɔɔ niŋ lefafɛɛŋ, a mɛɛ o mɛi lediom yɛ. A tonya, a nɔla ma sɔla yoomu kpeekpeiyo te a tosa pɛ chuaŋ chua kɛndɔɔ suŋ suŋ!