LE SABU I CHO SUƐI SƆVƐ WO

Mɛɛ ŋ bii wanaa velu numnda bila fau, lende koni yoomu numndo hiau lachi a naŋɔɔ ni.

YƐƐ Ŋ CHO YƐ TOSA?

Yiyaŋndɔ a taamaseliiyo hoo. O Kpekedoo choo ichɔllo, Fɔɔyɔɔ chii walta nda ke ndu laŋ tosa. O cho niko o bɛɛndiaŋ le mbo pɛŋgi nyɛkɛndɛi! O handu tɛlivisiɔŋndo le nuaa okoŋ mbo chal o siɛi ndɔ o kaala wo niŋ wɔyɔŋ.

A teleŋ koŋ kinɛi, mi finya ndɔ luɛi mbo sim a kɔl tuuwo.

“Fɔɔyɔɔ! Le yɛɛ a kue ma mala pɔmbɔ num wali ndɔ sukuuwo tosaa le, ma huŋ chal teleŋ numndo tɛɛmboo le tɛlivisiɔŋndo nuaa? Lɔɔlɔɔ a tosa nyɛ nda dimul num le tosaa wo le!”

Mi Fɔɔyɔɔ ŋɔɔchiaŋ choo choo le mi wana o wana tuei. Mbo dimi aa, “Hei ya nɔ dimioo ni!”

Mi finya ndɔ yɛŋgbaŋ lachi mbo dimi aa, “Poo aa yɛɛ ŋ dimi yɛ?”

Mi Fɔɔyɔɔ yoomu fuu, mbo nua ŋau okoŋ mbo dimi aa, “I suu le Kɛkɛ.”

Finya ndɔ chɔɔlu niko tumboo dɔunɔŋ. Mbo dimi a hɔlla ndu a tuu kpɛi aa, “Fɛɛŋ bɛɛ suaa lɛ o ya lo lende le!”

Te ndoo wa pɛ aa num cho Fɔɔyɔɔ ni, vɛɛ ŋ wa yɛ chiŋalaŋndo hoo kpakpala?

SIM KPƐ MA YIYAŊ!

Suukaŋndo a wanaa velu numnda cho ko maa kɔlaŋ a mɔmbillo. Te a komal pɛ nɛiyo o hauwaa, a nuuviaa nɛi cheleŋ.

 LE TAAMASELIIYO:

Mi chuaambɔ pum diolaŋ Leya dimi aa, “I che ndi bɔɔ i kala le suukaŋndo a finya nuu. Lepum I wa suɛi o ndu lo, o yeŋ ya lani le. Te I chii pɛ suɛi, o nyuna ya aa, ‘O yalo ŋ wa suɛi ni?’”

LEYA NƆ CHUAŊ CHUALAŊ LA YAA.

  1. O deŋul finya ndɔ.

    O deŋul ndu aa, “Suɛi sɔvɛi pila cho hei ni! Yaŋ nilaŋ!”

  2. O kɛɛ suɛi o finya ndɔ lo.

    Leya kiolu suukaŋndo a finya ndɔ a bahawɛi ndɔɔ okɔɔ.

  3. Leya chum le teleŋ bɛnda wo okoŋ mbo dimul vɛlɛ finya ndɔ nyɛ o wa dimioo wo.

    Lɔɔ cheleŋ, Leya yeema pɛ suɛi o finya ndɔ lo, o nua ndu hɔlla tom tom, ɔɔ mbo poonyial ndu yauwo a bahawɛi ndɔɔ okɔɔ.

Chuaŋ chua kuɛɛ ŋ cho yɛ Leya dimul le chuaa?

KƐSIŊ HEI OKƆL: Finyaa Leya cho kpɔndi kpɔndi. Le hei, o sina maa Leya cho suɛi o ndu lo le. Lelaŋ te Leya chua pɛ Chuaŋ Chua 1, finya ndɔ sina niŋ le sabu o cho ndu deŋullo wo le. Nduyɛ chuaŋ chuaa hoo tosa niŋ mi finya ndɔ mulul ndu le, nduyɛ hei chɔm lebɛɛ le finya ndɔ kposoŋ te. (Ɛfisiaŋnda 6:​2) Lelaŋ, nda ŋiɔɔŋ kpou, chuaŋ chuaa hoo chuu nda niŋ tɔnɔ kposoŋ te.

O cho ko mɛɛ ŋ komal naa nɛiyo o hauwaa kɛ o kuuna num kɔlaŋ te yɛ, mɛɛ lende koni ŋ nuuviaa nɛiyo ni le suukaŋndo a wanaa velu numnda

Mi che bɛɛ Chuaŋ Chua 2 wa tɛtɛlɛ le tosaa ni, kɛ o cho chuaŋ chua taasi le. Le yɛɛ? Kanifuule, le mi Leya sɔla nɛiyo le bahawɛila ndɔlaŋ solioo, o nɔ mbo suukaŋ a finya ndɔ. Nduyɛ finya ndɔ yeema bɛɛ le ndu mala, mɛɛ mbo sina nyɛ cho yɔŋnɔŋndo o yoomu ndɔɔ niŋndo. Kiɔɔ suukaŋndo a finya ndɔ mala ndu kposoŋ te.

O Chuaŋ Chua 3 niŋ, Leya chɛl mi simullo hoo kɛɛlu ndu suukaŋndo a finya ndɔ le. Kɛ mbo kɛɛsiaa le suukaŋndo vɛlɛ a finya ndɔ o hei choo a teleŋ cheleŋ. Nduyɛ te Leya kɛɛsiaa pɛ le finya ndɔ yauwo poonyiallo, Leya cho kɔllo naŋɔɔ o foofo koŋ choo.

Yauwo poonyiaa mala ndu vɛlɛ mbo dimi nyɛ kpeekpei o yeema finya ndɔ dimullo wo. Te finyaa Leya veelu pɛ diomndaŋ o yau koŋ niŋ, o cho sina nyɛ Leya yeema ndu dimullo wo, naapum mi keŋ mala ndu pɛɛŋ mbo bii nyɛ chua ndɔɔ ndoo yeema ndu dimullo wo bila nyɛkɛndɛi. Chuaŋ chua yaa ndɔɔ mala Leya nda finya ndɔ. A chal diompilɛ ma suukaŋ ɔɔ a suukaŋ o yauwo choo. Chuaŋ chuaa hoo cho o chɛlaŋ a nyɛ Baabuiyo dimi wo. Ndu cho ni, “Sɔɔŋ huŋ a kɔl nyuloo, nduyɛ mi ŋ luei chaaŋaa nyaa kpaayaa woŋ, muŋ nya dɔu kɔllo o tosaa ni.”—Luomaŋnda 14:​19.

Chuaŋ chuala cheleŋ kuɛɛ Leya nɔ yɛ?

Tofawɔ te a nɔla pɛ ma yiyaŋ a opilɛ okɔɔ. Okoŋ ma poonyiaa naa chuaŋ chua koŋ yaa num nda.

 KPAKPALA SƆƆŊ MUULIAŊNDO

Loonuŋ maa, nyɛ ŋ dimi wo a nyɛ wanaa velu numnda yiyaŋ maa a dimi wo, lɔɔlɔɔ o ve nyɛ pilɛ le.

LE TAAMASELIIYO:

Mi wanaa velu numnda nyuna num le sabu ŋ cho a kɔl tambɛiyo wo. Ma dimi aa, “I yeema mi soo a ndi okɔɔ le.”

Kɛ mi wanaa velu numnda tuei num dimioo aa, “I laalaŋ a nya le mi dimul nya isɔɔ le. I cho chaaŋaa niaa dimul a bahawɛi nuu okɔɔ, kɛ o cho nya le.”

Yiyaŋndɔ maa bahawɛi kalaa komal num okoŋ mi kala num ɔɔ finya num dimi maa o cho num mala. Kɛ ma dimi aa, “Buulaŋ te, yapila cho nɛiyo nuuviaa.”

  • Mi wanaa velu numnda tuei num dimioo aa?

  • Mi muli numndo wa dɔɔ aa?