LE SABU I CHO SUƐI SƆVƐ WO

Mɛɛ ŋ cho muli yɛ cho tosa ni mi suɛi bɛnda ɔɔ mii kui.

YƐƐ Ŋ CHO YƐ TOSA?

Yiyaŋndɔ a taamaseliiyo hoo. Tɔmɔsi yeema hau lakɔ o sukuu le. Siɔdii bɛɛ. O yeema lɛ pɛɛŋ sukuu le. O paŋguŋ biŋgi hiou woŋ bɛŋgu, mi chaaŋaa nduaa dimi choola wɔɔŋ wɔŋndaŋ a ndu okɔɔ. Ma ke ndu pɛɛŋ diola mamaa laŋ. Lepum mi waŋndo kundu Tɔmɔsi yaula ndɔlaŋ o ba mbo tosa naŋ chaa o ve pɛɛŋ kɔl te, ɔɔ mi wana pilɛ o kunda mamaa koŋ tɛɛŋ nyasu ndu amakɔɔ, te o muliŋ pɛ, o chi lɛ wana nyasu ndu wo le. Chiɛi ma hiau ba a Tɔmɔsi sɔɔŋ wɔɔŋndoŋ tosallo, ma kɔŋgɔlaŋ ndu o Intanɛtiiyo choo . . .

Te ndoo yɔŋ pɛ maa num cho Tɔmɔsi ni, yɛɛ ŋ wa yɛ tosa?

SIM KPƐ MA YIYAŊ!

O kpeekpei niŋ, a cho wana i siɛlɛi le! Nduyɛ pɛɛŋ, a tiuba ma sɔŋga a wana cho num mamɔɔ wo kɛ o ve a bɔta le. Vɛɛ ŋ tosa yɛ keŋ?

  •   DUAUNUŊ TUMBE LE. Baabuiyo dimi aa, “Diɔmndo te o dɔɔnuŋ tumbe pɛ, o nɔla mbo tiu kɔl ndɔɔ ba le, kɛ wana kɔl kaloo ndu ndu, o dɔɔnuŋ bɛɛ tumbe, o nɔla mbo tiu kɔl ndɔɔ ba.” (Pulɔwaa 29:​11) Te a meinuŋ pɛ ma dounuŋ tumbe le, naapum wanaa cho num mamɔɔ wa cho wu ŋdial.

  • MIŊGI MAA LE. Baabuiyo dimi aa, “A yɔŋ bɛɛ mi waŋndo tosa i wɔɔŋnde a nya, la miŋgul ndu a i wɔɔŋ te.” (Luomaŋnda 12:​17) Te a miŋgi maa pɛ, mɛɛ a kui suɛi.

  • KUA O FONDA KPUNDƆƆ CHO WO LE. Baabuiyo dimi aa, “Wana kɔl kaloo, mbo nɔla mbo che kpundɔɔ ndu lachi, mbo kpɛkpɛla ndu.” (Pulɔwaa 22:​3) Kindiŋ o nɛi o nɛi niŋ ma fafaŋ wanaa tosa ma luɛi o kpundɔɔ niŋnda, nduyɛ ma fafaŋ kɔlaŋ o fonda nda mam num ndo.

  • MULI O NƐI LEBƐƐ NIŊ. Baabuiyo dimi aa, “Diomndo waŋndo mulioo o sondo o kɛndɛ, o nɔla mbo nyulul waŋndo kɔllo.” (Pulɔwaa 15:​1) A tiuba ma miŋgi ndi pɛɛŋ o sɔɔŋ mamaa niŋ. Le taamaseliiyo, te wana cho num mamɔɔ wo dimi pɛ maa a chelul bɔɔ, a heelu choŋgulaŋ ma dimi aa, “I yeema pɛɛŋ mi tol nyɛɛmbɔ!”

  • FAŊAŊ LOŊ. Mi chuaambɔ nɔ wɔsilaŋ 19 wo diolaŋ Nolua dimi aa, “Meinɔŋndo o suɛi niŋ chɔm maa a cho lɛ chuaambɔ le, nduyɛ maa a nɔ kpaayaa mbo hiau wana cho num mamɔɔ wo. Mi hei chɔm maa a nɔla ma tiu kɔl numndo ba, kɛ wana cho num mamɔɔ wo ndu nɔ suliŋ koŋ te.”—Timoti Diiŋ Ndɔɔ 2:​24.

  • LAALAŊ A NUMPILA. Mi wanaa mam waŋnda wa sina wanaa nɔ yiyaŋ wɔɔŋndo a ndapila okɔɔ wa, nduyɛ maa a tiuba ma sɔŋga le ndapila le. Kɛ te a che pɛ maa a cho nda chɛlɔɔ ma nɔ num kpaayaa choo le, a cho num kiolɔŋ kɔɔli.

  • DIMUL WAŊNDO. Mi wana pɛɛkaa paandoo dimi aa, “Mi yaa dimul wana o wana nda cho mamɔɔ le mbo soo. Nyɛ bɛnda le tosaa wo cho koŋ ni. Nduyɛ o mala wana cheleŋ bɛɛ a mem ndu le.”

Laalaŋ ŋ nɔ o numpila niŋndo cho num mala ma sɔla kpaaya wana cho num mamɔɔ wo nɔla sɔla le wo