LE SABU I CHO SUƐI SƆVƐ WO

Nyɔɔŋ pum cho ŋ sɔvɛ mbo hiau nyɛ ŋ cha o tofaŋndo niŋndo.

YƐƐ Ŋ CHO YƐ TOSA?

Yiyaŋndɔ a taamaseliiyo hoo. Mɛɛ Mata nuanuŋ o tofaŋndo niŋ, mbo cha maa o chelul bɔɔ. Mbo dimuluŋ ndupila aa, “I nɔ mi tol tiŋ,” mi che bɛɛ mi wanaa velu ndu wa a chaaŋaa nduaa dimul ndu maa o cho ko maa “le pilaŋ.”

O viu bɛɛ le, mi Mata kindiŋ le mbo tol tiŋ. Nyɛ o tosa wo cho ni, mbo kɛɛ le nyɛdiaa dioo le palɛi ipum . . .

Te a yiyaŋ pɛ mɛɛ Mata ndoo yiyaŋ yɛ, yɛɛ ŋ cho yɛ tosa?

SIM KPƐ MA YIYAŊ!

Mɛɛ ŋ yiyaŋ a numpila yɛ cho ko mɛɛ ŋ nuanuŋ naa o tofaŋ wɔvi wana wo niŋ yɛ

O cho suɛi wɔɔŋ le buulaŋndo a mɛɛ ŋ cho yɛ le. Nduyɛ pɛɛŋ, mi Baabuiyo suaa nyɛkɛndɛi a puaa vɛlɛ a waŋlaanduaa tau o sindɔɔ niŋ mɛɛ ndaa naŋ yɛ. Mɛɛ Selua cho naa yɛ, Luechɛl, Abikɛɛl, Choosɛ, a Deeve. Mi Baabuiyo dimi maa chuaa pum ndoo nɔ diolaŋ aa Abisiaki. “Naŋɔɔ pila chuaa hoo ndu oo naŋ ni.”—Masaa Bɛnduaa Tasiaa 1:​4.

Kɛ, feleŋguaa bɔɔbɔɔ cho buulaŋndo a mɛɛ nda cho yɛ. Mi keŋ chuu nda bahawɛilaŋ tau. Tofawɔ latiŋ:

  • Mi yaasiaa pilɛ dimi maa o chuaa laanduaa kɛmɛ tɛɛŋ, 58 dimi ni maa a hiu ba a chelullo, kɛ o kpeekpei niŋ, 17 koni chelul ni.

  • Mi yaasiaa cheleŋ dimi maa, waŋlaanduaa 45 o kɛmɛ tɛɛŋ, a ndaa nɔ ŋdial kposoŋ te wa, yiyaŋ maa a chelul bɔɔ!

  • Le mɛɛ feleŋguaa atiŋ yeema dialuŋ ndaŋ tusioo yɛ, mi apum sɔla naa nda nɔ lɛ iyeema kposoŋ le nyɛdiaa dio le wo. Mi dialii nɛyɛi hei tosa ma nyau sɛɛŋ.

 Te a kandu sinaŋndo pɛ maa a nɔ naa ŋ nɔ lɛ iyeema le nyɛdiaa dio le wo ɔɔ dialii nɛyɛi cheleŋ le taunɔŋndo, kindiŋ ma sɔla malaa. A kandu suukaŋndo a wanaa velu numnda ɔɔ kaasoŋnɔ cheleŋ ŋ laalaŋndo. Baabuiyo dimi aa, “Kaalaa cho chaŋyɛi kɛndɛi tɛɛŋ le teleŋ o teleŋ. Nduyɛ, o yɔŋ bɛɛ o teleŋ nyɛpalaa niŋ, a melaŋ te.”—Pulɔwaa 17:​17, NW.

HIOUWƆƆ LACHI KƐNDƐ Ŋ NƆLA MA TOSA WO!

A tonya, naŋɔɔ o kaa niŋ tosa ni mi waŋndo naŋ ɔɔ mbo wɔu. Yiyaŋndɔ a Abisalɔm okɔɔ, po Masaa Deeve wo. Baabuiyo dimi aa,

“Po o po ve loŋ mi ndu oo siimaŋ naŋɔɔ a Abisalɔm te. . . . Sɔŋ o sɔŋ ve ndu le.”—Saamiɛɛ Diiŋ Ndɔɔ 14:​25.

Kɛ, poo hoo ndoo heeluŋ bɔɔ, hɔlteŋ, a kafalaŋ. Baabuiyo suu a kaala kɛndɛla Abisalɔmndaŋ te. Kɛ maa po ndoo nɔ lesiɔmbu le wo o wa ni, mbo kɛɛ lo lechoo wo chɔmndo, nduyɛ wana diyaa o wa ni.

Le saboo hoo Baabuiyo ke naa silaa hoo ni,

“Wana chieeyɛi sɛnɛiye nya nɔ niŋ ni.”—Kolosiaŋnda 3:​10.

‘La duau kɔllo o naŋɔɔ ŋdiallo hoo le. . . . Yɔŋi nya landuŋ kɔl le naŋɔɔ ŋdial waa lende yɛ, la landuŋ kɔl o naŋɔɔ o kaala nyalaŋ niŋ.’—Pitɛ Tasoo 3:​3, 4.

Mi che bɛɛ o cho suɛi wɔɔŋ le miŋ yeema naŋɔɔ le, kɛ suliŋnda kɛndɛlaŋ la tosa ni ma chɔɔlu naŋɔɔ waŋnda o hɔl mbo hiau dialuŋ kɛndɔŋ ɔɔ nyɛla baa kalaŋ chuɛinɔŋndo. Mi chuaa laandoo diolaŋ Filisiaa dimi aa, “Naŋɔɔ ŋdiallo tosa mi waŋnda che num chɔ chɔ, kɛ wana suu ŋ cho wo a suliŋnda numnda kɛndɛlaŋ waŋnda hiau loonɔŋ a num okɔɔ.”

TOFAŊNDƆ MA CHE MƐƐ Ŋ CHO YƐ

Baa a tambu niŋ pa kɔl a mɛɛ ŋ cho yɛ?

Baa a suinuŋ niŋ pa nyɛm mapuuloŋ ɔɔ ma taunuŋ numpila le mi dialuŋ numndoŋ siŋgaŋ?

Yɛɛ ŋ yeema yɛ ma siŋga o dialuŋ numndoŋ niŋ te a tiuba pɛ? (Kila la ŋ yeema laŋ.)

  • BANDEI

  • LUSULLO

  • YIINDE

  • MƐƐ Ŋ YEEMA DIALOŊ YƐ

  • HƆLLA

  • KƆƆLEŊ

Te a muli pɛ aa ei o nyunala tiɔɔŋnda taselaŋ, mɛɛ kila la yaa ɔɔ mbo hiou lende o nyuna yaa ndɔɔ. Kɛsiŋ hei o kɔl. O cho mɛɛ ŋ cha numpila yɛ le acheleŋnda cha num te. I wa tɛtɛlɛ le ma hiu buulaŋ tau a mɛɛ dialuŋ numndoŋ cho yɛ.—Saamiɛɛ Tasoo 16:​7.