TUUPA mi Chɛhowa toosiaa chieeŋndo, o toosiaa fɛŋ maalikɛiya o choo choo niŋ. Kɛ mɛɛ teleŋndo hiou tiŋ, mi maalikɛinɔɔ opilɛ yeema piɛile cho le Mɛlɛka kinɛi leŋ. Mɛɛ o chɔm yeemɛi nduɛi keŋ, mbo siiŋguŋ ndupila Setana. Ndu sim ni, “Wana simul waŋndo wo,” koŋ cho ni, wana simul Mɛlɛka wo. Vɛɛ Setana simullɛ Mɛlɛka?

Mi Setana soliŋ kɛuwo kpeku mbo hui Ifi

Mi Setana hui Ifi mbo tosa mi Ifi kɛɛ Mɛlɛka diikɔŋndo. O nɛi chaa niŋ, mi Setana dimul Ifi maa fondo fuu Chɛhowa kuuna ndu ni maa o dia yɔm pum o kpeloo niŋ te. Mbo chɔm kpendekele maa wana lachoowaa Mɛlɛka cho ni nduyɛ maa Ifi nɔ mbo wa Mɛlɛka o ba bɛŋgu le. Mbo dimi aa, “Mɛlɛka dimi lende fondole, o sina maa te la de ndu pɛ hɔlta nyalaŋ la cho kumbiŋ nduyɛ, mi la sina suɛi kɛndɛi a i wɔɔŋnde pɛŋgu maa Mɛlɛka pila.” (Chɛnɛsee 3:​5) Mi Ifi tosa diɔmnde mbo laalaŋ a choola Setanalaŋ. Mbo tɛɛmbuu sawa Mɛlɛkaa nduyɛ mbo tosa vɛlɛ mi pɔnɔ ndɔ bɛɛ tɛɛmbuu sawa Mɛlɛkaa. Sindɛ niŋ pa Setana simnuŋ yaamɔɔnɔɔ le wanaa nɔ laalaŋ kpeekpeiyo wa ni. Nduyɛ o cho wɔ hau hiouwɔ lachi kɛ a waŋnda huiyo. Vɛɛ o cho yɛ hei tosaa?

Laalaŋ Lachoowaa Tiu Silɔ

Setana soliŋ niŋ nyɛm cheleŋndoŋ sooluuwo kpeku vɛlɛ a naamula waŋchieeya le waŋnda huiyo

Mi Setana soliŋ nyɛm cheleŋndoŋ sooluuwo kpeku a naamula waŋchieeya le chuauwa Isɔluɛi huiyo. Mi Chiisu, o cho Mɛsayanɔɔ wo, dimul simlachiaa ndaa lepiɛiya maa nyɛ fondoo fuu piɛileŋ ndaleŋ le cho ni. Kani fuule, “sawala nda pila toosiaa laŋ, laŋ nda pɛɛku waŋnda ni, ma dimi maa sawala nilaŋ ni.” (Maatiu 15:​9) Mɛɛ Isɔluɛiya kɛɛ Mɛsayanɔɔ, mi Mɛlɛka bɛɛ kɛɛ nda. Mi Chiisu dimul nda aa, “Fondaŋ wa le nya o masale Mɛlɛkaleŋ niŋ ndo, Mɛlɛka cho nya fondaŋ koŋ poonda o ba. O poonda pɛ, o ke wanaa cheleŋ a tosa niŋ kaa ndu Mɛlɛka hɛnaŋ ndo wa.” (Maatiu 21:​43) Okoŋ, mi wanaa tol Chiisu kɔɔli wa simnuŋ wanaa Mɛlɛka hɛli wa.

Mi Setana muli vɛlɛ hɔlla le wanaa tol Chiisu kɔɔli wa huiyo. Kɛ ndoo tiu pa ba? Mi Chiisu dimi taloo a nyɛ ndoo yɔŋnɔŋ niŋ o chilaŋ niŋndo. O tale koŋ niŋ, po pilɛ chɛŋ ni mbo saŋ yɛiyii kɛndɛi o chiɛi nduɛi niŋ. Nyuma pilɛ, mi yaamɔɔnɔ ndɔɔ chaŋ mbo kɔ saŋ kulula bil wɔɔŋ pum leniŋ. Kɛ mi wana ichiɔɔ mal ndi mi i hindu latulu a bil koŋ, mbo lo okoŋ, mi i fuuluu teleŋ kuauwaa. Okoŋ mbo suiŋgi fɛlɛŋ bil wɔɔŋndo o kɛndɔɔ tɛɛŋ mbo luam. Okoŋ kɔɔli, mbo kuau yɛiyii kɛndɛi mbo duau o konda.

Mi Chiisu tɛɛsial buɛiyaa nduaa nyɛ taloo hoo simndo. Ndupila cho wana saŋ yɛiyii kɛndɛiyo ni. Mbo hiau lachi a dimioo aa, “Yɛiyii kɛndɛi hei cho machuaa wanaa Mɛlɛka cho choo masaa wa. Kulula bil koŋ laŋ la cho wanaa Masa Nyinaa Wɔɔŋnda cho choo masaa wa ni. Yaamɔɔ saŋ kulula billo wo, ndu cho machuaa Masa Nyinaa Wɔɔŋnda ni. Teleŋ kuauwaa ndu cho machuaa teleŋ chieeŋndo hoo o huŋ niŋ o mɛɛlulaŋ ndo ni. Wanaa kuauwaa nda cho kiilaa Mɛlɛkaa ni.” (Maatiu 13:​38, 39) Mi Chiisu tuu buɛiyaa nduaa tonyaa a yɛiyii kɛndɛi. Kɛ mi Setana luei buɛiyaa lachoowaa, maa bil wɔɔŋndo buɛiyaa tonyaa Chiisuaa tɛɛŋ. O hei niŋ a mɛɛ Chiisu pila dimi yɛ, o wɔsiŋ kɛmɛ tasoŋ niŋ o piɔm ndɔɔ kɔɔli, mi buɛiyaa lachoowaa haa chɔmnuŋ kpendekele. Pɛɛkula nɔ tonya a Mɛlɛka okɔɔ le laŋ nda pɛɛku ni. Le tamaseliiyo, pɛɛku Mɛlɛkaa yaa wa. Koŋ cho ni, waŋnda a yaa o Mɛlɛka pilɔɔ niŋ. Mi buɛiyaa lachoowaa haa kandu vɛlɛ  nyɛm cheleŋndoŋ sooluuwo a balaŋ lueiyo o yalale chieeŋndeŋ niŋ. Waŋnda nyɛɛmbɔ koni ndaa lo o pɛɛkula tonyala Chiisulaŋ choo ni.

Laalaŋ Kpeekpeiyo Sim Yi

A mɛɛ Chiisu ndoo dimi yɛ maa, teleŋ cho fuuluu mi siŋgaŋndo yɔŋnuŋ. Kiilaa Mɛlɛkaa cho wanaa nɔ laalaŋ kpeekpei le wa soli wanaa nɔ laalaŋ kpeekpeiyo wa tɛɛŋ ma tɛɛmbuu nda. Okoŋ, o cho wa tɛtɛlɛ le sinaa wanaa nɔ laalaŋ kpeekpeiyo wa. O mɛɛlulaŋ kpɔŋ, Setana Nyina Wɔɔŋndo, yaamɔɔnɔ tul tonyaa leyɛ paandu pa wo bɛɛ cho tambei sɔla. A tonya, laalaŋ kpeekpeiyo cho batiuwaa sɔla!

Kɛ vɛɛ ŋ tiu yɛ ba ma sina hau wanaa nɔ laalaŋ kpeekpeiyo wa? Ŋ cho muli nyunaa hoo yaasiaa o buŋgɛi cho lachi ve niŋ.

Mɛlɛka cho nuuviaa le wanaa nɔ laalaŋ kpeekpeiyo o ndu niŋnda