WANAA ndaa suaa le Mɛlɛka sindɛ wa ndaa nɔ tiindaŋndo o Mɛlɛka niŋ. Ndaa nɔ tiindaŋndo o mɛila Mɛlɛkalaŋ niŋ nduyɛ ma handu kɔlta ndalaŋ kpou o laŋ choo. Yɛɛ wa yɛ mɛilaŋ ndaŋ?

Dimioo naa mi Adama nda Ifi tosal Mɛlɛka nila kalulaŋ Idɛŋ, mi Mɛlɛka mɛi lediom maa o cho waŋndo viomɔɔ mbo lɔwa ‘kɛuwo’ bolleŋ. Kɛu koŋ sim yɛ ni, “tambalaka bɛndoo . . . , o nda veelu aa, Masa Nyinaa Wɔɔŋnda wo, ma veelu ndu vɛlɛ aa, Setana.” O cho ndu tɛɛmbuu le fɛɛŋ a fɛɛŋ. (Chɛnɛsee 3:​14, 15; Sɔɔŋ Chɔɔmaŋndoŋ 12:​9, 12) Nɛɛ cho yɛ wa Wana Mɛlɛka cho koŋ viomɔɔ wo?

Mɛɛ wɔsioŋ hiou le 2,000 chɔŋ a teleŋ nyɛ dimiŋ hoo o diom Mɛlɛkaa niŋndo, mi Chɛhowa mɛi lediom a wana ndɔ suaa Ebilaham maa o pulale ndɔleŋ choo sanaa Wana o cho koŋ viomɔɔ wo cho fula ni. Mi Mɛlɛka dimul Ebilaham aa, “O sabu chuaa num a mamaa niŋ ya I duau niŋ lɛŋnde kpou o chieeŋndo choo sala ni, kani fuule, le mɛɛ ŋ tosa nyɛ ya dimul num ndo yɛ.”—Chɛnɛsee 22:​18.

O wɔsi 1473 B.C.E. niŋ, mi Mɛlɛka chɔɔlu vɛlɛ wana ndɔ suaa Muuse tɛɛsial a kulle hei okɔɔ. Mi Muuse dimul Isɔluɛiya aa, “Mɛlɛka Yaawɛɛ, Mɛlɛkaa nyaa, o cho waŋndo hɛli yuŋgula nyalaŋ o pilɛ tɛɛŋ, le mbo wa wana suaa le Mɛlɛka wo, mɛɛ ya cho nuaa yɛ. Nduyɛ nyɛ o nyɛ wana koŋ o dimul niŋ nya, la tuei ndu diom.” (Ditɔnɔmii 18:​15) Wana suaa le Mɛlɛka maa Muuse huŋ niŋ koŋndo, cho fula o chuauwaa Ebilahamnda tɛɛŋ.

Wana suaa koŋ le Mɛlɛka wo wa niŋ chuaamamaa Masaa Deeve wa opilɛ nduyɛ, ndu bɛɛ wa niŋ masa bɛndu. Mi Mɛlɛka dimul Masaa Deeve aa, “I cho waŋndo hɛli o pulale num ndeŋ choo, . . . nduyɛ I cho tosa mi masale ndɔleŋ le hiou lachi a waa o yuŋgu ndɔɔ choo le fɛɛŋ a fɛɛŋ.” (Saamiɛɛ Diiŋ Ndɔɔ 7:​12, 13) Mi Mɛlɛka dimi vɛlɛ maa a cho po mamaa Deevioo hoo veelu aa, “Masa Kɔl Nyuloo.” Mbo  chɔɔlu dimi aa, “Masale ndɔleŋ, le wa niŋ kpaayaa sɔlaa le teleŋ o teleŋ, nduyɛ, mi kɔl nyuloo o wa hiouwɔɔ lachi a waa o Masale ndɔleŋ bɛŋgu le pɛŋgu o pɛŋgu, mɛɛlula bɛɛ la ve niŋ te. Ndu cho wa Masaa o foofo Deeve wo ni, mbo chal o kpeŋgbei lemasa Deevioo choo. O cho tosa mi Masale ndɔleŋ le simnuŋ Masale kpaaya, fondole, o wa niŋ Masa sakpo, nduyɛ mbo wa Masa dimi tonyaa waŋnda tɛɛŋ, chɔŋ teleŋndo hoo haaa mbo kuɛ a le fɛɛŋ a fɛɛŋ.” (Aisaya 9:​6, 7) A tonya, Masa sandaa koŋ cho tosa mi kɔl nyuloo a sandei tiu o chieeŋndo choo silɔ. Kɛ teleŋ kuɛɛ o cho yɛ hunɔɔ?

Kulii Mɛlɛka mɛi lediomnde cho . . . fula o pulale Ebilahamndeŋ choo wa wana suaa le Mɛlɛka wo maa Muuse fula o pulale Deeveleŋ choo hunɔɔ o wɔsi 29 C.E. niŋ cho Setana bolleŋ lɔwa

Mi maalikɛinɔɔ Keebilɛ dimul vɛlɛ wana suaa le Mɛlɛka wo Daaniɛɛ aa, “I yeema num ma sina hei pɛŋgu maa, chɔŋ a teleŋ [i cho dimiŋ, NW] le Chulusɛlɛm miŋgi taŋgullo wo, wɔsilaŋ la cho hiouwɔɔ bele-hiɔɔlu a la ŋɔmahiɔɔlu, nduyɛ mi wɔsilaŋ la hiou vɛlɛ kɛmɔɔ le hiɔɔlu a bele-yaa a la hiɔɔlu (434), malaŋ wana Mɛlɛka chua buŋgɛi maa o cho viomɔɔ le waŋnda piŋioo wo o huŋ.” (Daaniɛɛ 9:​25) Wɔsila 49 ndaŋ a wɔsila 434 laŋ ndaŋ ke num wɔsilaŋ 483. Wɔsilaŋ ndaŋ la kanduŋ chɔŋ 455 B.C.E tei 29 C.E. *

Baa o wɔsi 29 C.E. niŋ Mɛsaya, wana suaa le Mɛlɛka maa Muuse wo, kulii nda wa chumndo ve hiŋ ni? Ŋ yaasiaŋ ndɔ.

^ pɛl. 8 Tofa yauwo hoo Yɛɛ Kpeekpei Baabuiyo Pɛɛku Yɛ? pei 197-199. Seiyaa Chɛhowaa soli ndu ni.