DIOM Mɛlɛkaa chɔm a suiliŋnda kɛndɛla Mɛlɛkalaŋ tau la mala naa miŋ sina ndu nyɛkɛndɛiyo. Le tamaseliiyo, Diom Mɛlɛkaa chɔm naa a suiliŋnda hiɔɔlula tɔɔmala Mɛlɛkalaŋ. Laŋ la cho ni, kpaayaa, sandei, taasioo a kaalaa. Ŋ yaasiaŋndɔ laŋ la pilɛŋ pilɛŋ.

Mɛlɛka Nɔ Kpaaya le Nyɛ o Nyɛ Tosaa

Mɛlɛka nɔ kpaaya bɛndoo

Mi Chɛhowa dimul Ebilaham aa, “Ya cho Mɛlɛka Kpuluŋguma bɛndoo ni.” (Chɛnɛsee 17:​1) Wana o wana nɔ kpaaya maa Mɛlɛkaa le. O nɔ kpaayaa le nyɛ o nyɛ tosaa nduyɛ, kpaaya ndɔɔ nɔ la mɛɛlu le. A kpaaya ndɔɔ o tosiaa chieeŋndo kpou ni.

Mɛlɛka soliŋ kpaaya ndɔɔ kpeku o fondo fuu wo choo le. O soliŋ kpaaya ndɔɔ kpeku lɔɔlɔɔ o nɛi bɛnda wo choo nduyɛ le sabu kɛndɔɔ. Sandii nduɛi, taasi ndɔɔ, a kaala ndɔɔ wa o chɔm naŋ kpendekele a mɛɛ o soliŋ kpaaya ndɔɔ kpeku yɛ.

Chɛhowa soliŋ kpaaya ndɔɔ kpeku o nɛi bɛnda wo choo le buɛiyaa nduaa laalaŋnda. “Hɔlte Mɛlɛka Yaawɛɛ leŋ le cho ba o ba fee o chieeŋndo hoo choo. Wanaa cho ndu o hɔl sakpo ma tosa nyɛ o dimul nda wo wa, dialluŋ kalaŋ o ke nda ni.” (Koloniko Diiŋ Ndɔɔ 16:​9) Baa hei nyindu num ma sɔɔŋguu Mɛlɛka kpaaya bɛndu buulaŋ hoo a naa wo ikɛi kpɛɛluŋ te?

Mɛlɛka Sandaa

“Mɛlɛka Yaawɛɛ . . . kaala sakpoyɛi.” (Sam 37:​28) Le teleŋ o teleŋ, sɔɔŋ cho sakpo nduyɛ miŋ wa ŋ chɛlaŋ a sawala ndɔla walaŋndaŋ ndo o tosa ni.

Mɛlɛka hɛli le

Mɛlɛka tul kafalaŋ leyɛ. “Mɛlɛka chɔm yɛ yɛ ŋwaŋ tɛɛŋ te wo o cho ni, Mɛlɛka bii luɛiyɔɔ niŋ wana o ba le.” (Ditɔnɔmii 10:​17) O tul wanaa tuisi acheleŋnda nyɛkindilaa choo wa leyɛ, nduyɛ mbo mala wanaa nɔ wanaa malaa le wa, kɔ bii a “waŋ laanduaa piaanduaa ndaa a vi wa ni, a wanaa finyaa ndaa a kalaa ndaa a vi wa.” (Ɛsɔdɔɔ 22:​22) Mɛlɛka chua waŋchieeya nyɔɔ pilɛ kpe. “Mɛlɛka hɛli ŋwaŋndachiee le. Wana o wana piɛi ndu pɛ, mbo wa sakpo o kelala ndɔlaŋ niŋ pɛ, a yɔŋ bɛɛ aa lɛŋnde cheleŋ o fula ni, ndu Mɛlɛka chua ni maa wana ndɔ.”—Walta Wanaa Chiisuaa 10:​34, 35.

Sandii Chɛhowɛi cho o nyɛ o nyɛ o tosa niŋ. Chɛhowa cho wana kɛɛ isɔɔ saalaŋ te nduyɛ o hiu vɛlɛ wa ŋuasu ŋuasu le. Mbo tuisi wana kɛɛ dɛnɛ wɔɔŋndo malɔɔ wa nyɛpalaa choo, kɛ mbo chɔm wanaa mal yɔŋ wɔɔŋndo tosaa wa nyɛiye. “Mɛlɛka Yaawɛɛ o cho wana inyiɛɛ, nduyɛ mbo wa wana ikɛndɛ. O cho wana dɔɔnuŋ tumbe chɔ chɔ le, nduyɛ o cho wana kaala ŋwaŋnda chiee le teleŋ o teleŋ. O cho wana chɔm wana ŋsɔɔ choo le teleŋ o teleŋ te. Nduyɛ o cho wana dɔɔnuŋ tumbe a wana mbo wa a tumbe koŋ le fɛɛŋ a fɛɛŋ te. Mbo tusi naa nyɛ palaa choo le yɔŋnda naala wɔɔŋndaŋ, nduyɛ a sɔɔŋ wɔɔŋ naa ŋ tosa woŋ, kɛ nyɛ palaa koŋ o fuuluu a yɔŋ wɔɔŋ naa ŋ tosa wo le.” (Sam 103:​8-10) Mɛlɛka loonuŋ vɛlɛ a walta kɛndɛla buɛiyaa nduaa tosa laŋ nduyɛ mbo dɔu nda sala. Baa o bɛnda ma dɔu tiindaŋndo o Mɛlɛka sandaa waanaa niŋ te?

 Mɛlɛka Taasioo

Mi kɔndɔfillo bii naa tau a taasi Mɛlɛkaa te ŋ tofa pɛ nyɛm o toosiaa woŋ

Mɛlɛka cho puundule taasioo ni. Mɛlɛka “cho wana kɔl kalu bɛndu bɛndu. Nduyɛ nyɛ o nyɛ fee o sina.” (Luomaŋnda 11:​33) Wana nɔla ma sina taasi ndɔɔ lapɛŋgu le nduyɛ o nɔ la mɛɛlu le.

Ŋ cha taasi Mɛlɛkaa kpendekele o nyɛm o toosiaa woŋ niŋ. “Oo Mɛlɛka Yaawɛɛ, walta ŋ tosa laŋ la cho la bɔɔ. A kɔl kalu numndo ŋ lo o koŋ ni, ma toosiaa nyɔɔŋ muŋ kpou. Ma lo o koŋ ma pei chieeŋndo cha a nyaa yoomaa.”—Sam 104:​24.

Ŋ cha vɛlɛ taasi Mɛlɛkaa o Diom Ndɔɔ niŋ. Mi Masaa Deeve poonyiaa aa, “Sawala Mɛlɛka Yaawɛɛ laŋ la cho sakpo. La luei naa dialluŋ kalaŋ sɛnɛiyoŋ. Sɔɔŋ Mɛlɛka Yaawɛɛ dimul naa le tosaa woŋ ŋ cho sɔɔŋ wana tiindaŋ. Sɔɔŋ ndɔɔŋ ŋ ke wanaa nɔ kɔl kalu le wa taasioo.” (Sam 19:​7) Yiyaŋ maa num bɛɛ tiuba ma sɔla tɔnɔɔ o taasi Mɛlɛkaa niŋ! A cho pa dikeŋnaŋndo hoo soliŋ kpeku?

‘Wana Kaala Wo Mɛlɛka Cho Ni’

Suiliŋ hiou suiliŋnda Mɛlɛkalaŋ kpou wo cho kaalaa ni. Diom Mɛlɛkaa dimi aa, ‘Wana kaala wo Mɛlɛka cho ni’ (Chɔŋ Tasoo 4:​8) Kaalaa nyindu Mɛlɛka ni le nyɛ o nyɛ tosaa.

Mɛlɛka chɔm naa kaala ndɔɔ o nɛila naŋ chii chɔm te laŋ niŋ. O ke naa nyɛm kɛndɔŋ. “Mbo tosa sɔɔŋ  kɛndɔŋ naa waŋnda chua le mbo chɔm nda kpendekele wana o cho wo. Mbo tosa mi piɔɔ sia, chɔnɔŋndo o halaa niŋ. Nduyɛ, te teleŋ tɔlɔɔ kuam ndo fuuluu pɛ, o tosa tɔlɔɔla nyalaŋ la yɔŋgu komɔɔ. Mbo ke nya nyɛ diaa. Mbo tosa mi la sɔla kɔl kɛndɔɔ.” (Walta Wanaa Chiisuaa 14:​17) A tonya, “Nyɛm kɛndɛ kɛndɛŋ naa ŋ sɔla woŋ kinɛi, Mɛlɛka ke naa muŋ ni. Mɛlɛka o toosiaa nyɛm ke naa nyɛ wawoŋndo o halaa niŋ ndoŋ.” (Chemisi 1:​17) O Diom sɔvɛ Mɛlɛka ke naa wo niŋ, mbo chɔm naa tonya cho a ndu okɔɔ wo nduyɛ mbo pɛɛku naa vɛlɛ sawala ndɔla kɛndɛlaŋ a sawala mandaalaŋ. Mi Chiisu dimi aa, “Diom numndo, ndu cho tonyaa ni.”—Chɔŋ 17:​17.

Diom Mɛlɛkaa chɔm a taasi Mɛlɛkaa okɔɔ

Mɛlɛka mala naa vɛlɛ a bahawɛila naalaŋ. “Chɔm Mɛlɛka Yaawɛɛ ba num hawɛiyo, o nɔla mbo mala num. Mɛlɛka mel wanaa cho ndu o hɔl sakpo wa mi yaamɔɔwa yem nda le.” (Sam 55:​22) Mbo mal naa le hakila naalaŋ. “Oo Masanɔɔ Mɛlɛka, a cho wana kɛndɛ naa naa chau, nduyɛ le teleŋ o teleŋ a cho o bɛɛndiaŋ le naa malɔɔ le yɔŋnda naala wɔɔŋndaŋ.” (Sam 86:​5) Nduyɛ o cho naa vɛlɛ yoomu fafɛɛŋndo ke. “O cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa, kani fuule, nyɛ o nyɛ paandu chuu faŋaŋ.” (Sɔɔŋ Chɔɔmaŋndoŋ 21:​4) Vɛɛ ŋ yiyaŋ yɛ a kaala Mɛlɛkaa? Baa num bɛɛ cho ndu kaala?

Sɔɔŋguu Mɛlɛka Ikɛi Kpɛɛluŋ

Piɛileŋ a yiyaŋndo o suiliŋnda Mɛlɛkalaŋ choo mala num ma sɔɔŋguu Mɛlɛka ikɛi kpɛɛluŋ

Mɛlɛka yeema num ma sina ndu nyɛkɛndɛi. Diom Ndɔɔ dimul naa aa, “La sɔɔŋguu Mɛlɛka ikɛi. Ndu bɛɛ o cho nya sɔɔŋguu ikɛi.” (Chemisi 4:​8) Mi Mɛlɛka veelu wana ndɔ laalaŋ ndoo suaa le ndu wo Ebilaham aa, “chaaŋ” nuu. (Aisaya 41:​8) Chɛhowa yeema mi num bɛɛ wa chaaŋ ndɔ.

Mɛɛ ŋ pɛɛku a Mɛlɛka okɔɔ fau, lende koni ŋ sɔɔŋguu ndu ikɛi kpɛɛluŋ ni nduyɛ koŋ tosa ma wa a nyaale tau. “Tɔnɔɔ” cho le wanaa cho haa ‘pɛɛkula Mɛlɛka Yaawɛɛ laŋ chuaa wa. Idii ni, ichɔl ni, a cho sawala laŋ nuaa o yauwo niŋ, ma yiyaŋ a laŋ.’ (Sam 1:​1, 2) Lelaŋ, hiou lachi a Diom Mɛlɛkaa pɛɛkoo. Yiyaŋ o suiliŋnda Mɛlɛkalaŋ choo a walta ndɔlaŋ. A chɔm kaala numndo le Mɛlɛka te a dɔu pɛ sɔɔŋ ŋ pɛɛku woŋ o wali niŋ. “Mɛlɛka kalaa cho hoo ni, nyɛ o dimul naa wo tosaa. Nduyɛ, nyɛ o dimul naa le tosa wo, o cho nyɛ kendu maa mi ŋ bumba ndu tosa le.” (Chɔŋ Tasoo 5:​3) Piɛi mɛɛ wana ŋchondoo piɛi yɛ. Mbo piɛi aa, “Mɛlɛka Yaawɛɛ, chɔm ya nɛi num tonyaa, ma pɛɛku ya sɔɔŋ numndoŋ. Pɛɛku ya tonya cho a num okɔɔ wo, mi kuɛ lechoo.” (Sam 25:​4, 5) A cho chɔ maa Mɛlɛka “cho levil a wana o wana le.”—Walta Wanaa Chiisuaa 17:​27.