“O kandɔŋndo mi Mɛlɛka toosiaa wana lanɔɔ a wana pɔnɔɔ.”—Maatiu 19:4.

Chɛhowa * Mɛlɛka pila kɛsi nɔ tasoo ni. Baabuiyo dimul naa maa mbo toosiaa wanalanɔ tasoo mbo huŋ a ndu naa poo cha. Mi Adama naŋ kɔllo tau. Okoŋ mbo dimi aa, “Mi che, hoo cho niŋ paa fula o paala nilaŋ niŋ ndo ni, dialle I fula o dialuŋ nuŋ niŋ nde cho hei ni.” (Kandɔŋ Chieeŋndo 2:​22, 23) Chɛhowa yeema mi wanaa cho o nɔɔ niŋnda wa a nyaale.

Te a chua pɛ nɔɔ, ma yiyaŋ maa nyɛ o nyɛ cho wa o kɛndɛ. Tonya icho ni maa, mɛɛ mɛɛ pɔnɔɔ a lanɔɔ kaaliaŋ, mɛɛ ma nɔ bahawɛiyo. (Kɔliŋtiaŋ Tasoo 7:​28) O yauwo hoo niŋ, la cho silala Baabuiyo chɔ. Nduyɛ, te o wa pɛ mila tol taŋ kɔɔli, la cho nyaaloo sɔla o nɔ nyaa niŋ.—Chondei 19:​8-11, NW.

 1 CHƐL FOOFU CHƐHOWA KE NUMNDO

NYƐ BAABUIYO DIMI WO: Pɔnɔɔ cho lanɔɔ bolleŋ ni.—Ɛfisiaŋnda 5:23.

Te pɔnɔɔ ŋ cho ni, Chɛhowa yeema ma bii laanum maa pelte sɔɔ. (Pitɛ Tasoo 3:​7) O toosiaa wanalanɔɔ le mbo wa wana malaa. Nduyɛ, o yeema num ma chɔm ndu bɛɛleŋ a kaala. (Kandɔŋ Chieeŋndo 2:​18) A nɔ ma kaala laanum tau, nduyɛ ma kɛsiŋ yeemaŋ ndɔŋ nyɛ tase mbo hiou ŋ numndoŋ.—Ɛfisiaŋnda 5:​25-29.

Te lanɔɔ ŋ cho ni, Chɛhowa yeema num ma ke pɔnɔ num bɛɛle yiŋgoloŋndeŋ, le mɛɛ o looku mbo hiou lachi a wali ndɔɔ tosaa nyɛkɛndɛi o yuŋgoo niŋ yɛ. (Kɔliŋtiaŋ Tasoo 11:​3; Ɛfisiaŋnda 5:​33) Chɛl kɛɛsiaa pɔnɔ numndo, nduyɛ ma sim ndu kɔɔli a kɔllo fau le ndu malaa. (Kolosiaŋnda 3:​18) Te a tosa pɛ lende, a cho wa wana sɔvɛ bɛndu pɔnɔ num o hɔl a Chɛhowa.—Pitɛ Tasoo 3:​1-6.

NYƐ Ŋ NƆ MA TOSA WO:

  • Nyuna wana nya cho o nɔɔ niŋndo mɛɛ ŋ looku ma wa pɔnɔ ɔɔ lanɔ kɛndɛ yɛ. Yaŋ nilaŋ nyɛkɛndɛi o nyɛ o cho num dimullo, nduyɛ ma tosa hiouwɔɔ lachioo

  • La biunuŋ. O cho chua teleŋndo tau le sinaa mɛɛ nya huŋ a nyaaloo nyapila tɛɛŋ yɛ

2 LANDUŊ KƆL LE YIYAŊNDA WANA NYA CHO O NƆƆ NIŊNDO

NYƐ BAABUIYO DIMI WO: A nɔ ma landuŋ kɔl le dɛnɛ kɛndɛ wana nya cho o nɔɔ niŋndo. (Filipiaŋnda 2:​3, 4) Bii wana nya cho o nɔɔ niŋndo maa pelte sɔɔ. Ma kɛsiŋ o kɔl maa Chɛhowa yeema mi buɛiyaa nduaa wa wanaa “lasɛɛŋgiaŋ te.” (Timoti Diiŋ Ndɔɔ 2:​24) “Te waŋndo soo pɛ mbo yiyaŋ fɛŋ nyɛ o cho dimioo wo le, diomnda laŋ la boli maa imɔɔ. Kɛ diɔɔmule wana taasioo le siŋgi.” (Talelaŋ 12:​18, NW) Lelaŋ, yiyaŋ fɛŋ yiŋgoloŋ o diomnda ŋ cho soliŋ o sondo laŋ choo. Nyina Chɛhowaa cho num mala le ma soo a bɛɛleŋ, nduyɛ a kaalaa.—Kaleesiaŋnda 5:​22, 23; Kolosiaŋnda 4:6.

NYƐ Ŋ NƆ MA TOSA WO

  • Piɛi o Chɛhowa lo le mbo mala num ma tiu kɔl numndo ba tuupa ma chal a wana nya cho o nɔɔ niŋndo le suukaŋndo o kɛɛ sinalapɛŋgoo choo

  • Yiyaŋ fɛŋ nyɛkɛndɛi a nyɛ ŋ cho isɔɔ wo, nduyɛ a mɛɛ ŋ cho ndu dimi yɛ

 3 LA YIYAŊ MAA DIOMPILƐ NYA CHO NI

NYƐ BAABUIYO DIMI WO Te la chal o nɔɔ niŋ pɛ, la “simnuŋ waŋndo o pilɛ kpe.” (Maatiu 19:​5) Kɛ waŋnda a ŋiɔɔŋ nya cho wɔ ni, nduyɛ la nɔ yiyaŋnda pilɛ le. Lelaŋ, la nɔ mila pɛɛku le diompilɔɔ nɔɔ o yiyaŋnda nyalaŋ niŋ, a yeemaŋ nyaŋ. (Filipiaŋnda 2:​2) Diompilɔɔ cho nyɛ sɔvɛ te la wa pɛ kɛɛsiaalaŋ tosaa. Baabuiyo dimi aa, “Te la naŋgu pɛ fɛŋ tuupa mila tosa suɛi, la cho batiuwaa sɔla o suɛi nya dimi le tosaa ve niŋ.” (Talelaŋ 20:​18, NW) La chɛl silala Baabuiyo te la wa pɛ kɛɛsiaalaŋ tosaa.—Talelaŋ 8:​32, 33, NW.

NYƐ Ŋ NƆ MA TOSA WO

  • Dimul wana nya cho o nɔɔ niŋndo yiyaŋnda numndaŋ, o cho suɛi le suɛi leŋ, ɔɔ nyɛ ŋ tuu le tosaa wo le

  • La suukaŋ fɛŋ nya wana nya cho o nɔɔ niŋndo tuupa ma tosa isɔɔ o isɔɔ

^ pɛl. 4 Mɛlɛka nɔ diolaŋ ni aa Chɛhowa, a mɛɛ Baabuiyo chɔm yɛ.