A nɔ pɛ chaaŋ num ŋ hɛnaŋ ndo vɛlɛ ma nɔ bɛɛleŋ le ndu, a kindiŋ le waa maa ndu. Baabuiyo dimi aa, “Masanɔɔ Mɛlɛka o cho wana kɔɔsa a waŋnda o nɛi sakpoo choo wo.” (Timoti Diiŋ Ndɔɔ 4:​8) Le waa chaaŋ o Mɛlɛka, ŋ nɔ mi ŋ wa wanaa sakpo. Mi Baabuiyo dimi aa, “Mɛɛ la kindi niko mi la chua kaala ndɔlaŋ. La chɔm waŋnda kaalaa.” (Ɛfisiaŋnda 5:​1, 2) Tofawɔ nɛila naŋ tosa hei laŋ:

Mala acheleŋnda. “Ŋ tosaŋ tonyaa naa waŋnda chua.”—Kaleesiaŋnda 6:​10.

Tosa wallo kekelee. “Wana wa paandu viileŋ ndo o mal niko viileŋ, o koŋ kɔɔli, mbo kelu lalle mbo sɔla nyɛ sɔlaa tonyaa le ba ndɔ havɛiyo solioo.”—Ɛfisiaŋnda 4:​28.

Wa o diandaa o dialloŋ niŋ a kaa. “La tosa niko mi la sɔla dindioo Mɛlɛka o hɔl. Koŋ cho ni maa, nyɛ o nyɛ tosa mi dialuŋ wanachioo a nyina ndɔɔ ŋ simnuŋ nyɛ nɔɔlɛi Mɛlɛka o hɔl, la mal muŋ waŋ waŋ. Nduyɛ, haaa mi ŋ nɔ siooŋii Mɛlɛkɛi, la ŋ wanuŋ maa wanaa cho a yɔŋgaŋ kpou o Mɛlɛka lo.”—Kɔliŋtiaŋ Diiŋ Ndɔɔ 7:​1.

 Chɔm kaalaa a bɛɛleŋ le wanaa nya cho o yuŋgoo niŋnda. “Wana pɔnɔ o wana pɔnɔ, a nɔ ma kaala laa num mɛɛ ŋ kaala num pila yɛ. Nduyɛ, wana lanɔ o wana lanɔ a nɔ ma ke pɔnɔ num bɛɛleŋ. Nya chuauwa, . . . la tuei wanaa velu nya wa diom.”—Ɛfisiaŋnda 5:​33–6:​1.

Chɔm kaalaa o acheleŋnda lo. “La kaaliaŋ vellaa velle, kani fondole, o Mɛlɛka lo kaalaa chɛŋ ni.”—Chɔŋ Tasoo 4:​7.

Bii sawala cho o lɛŋndeŋ niŋndaŋ. “Nya kpou la nɔ mi la tosa nyɛ [“masaa waa,” NW] dimul nya le tosaa wo. . . . Lelaŋ, la yɔŋgu nyɛ nya nɔ le nda yɔŋgoo wo. Te paawaa nya nɔ le malɔɔ ni, mɛɛ la mal paawaa.”—Luomaŋnda 13:​1,7.