Le waa chaaŋ o Mɛlɛka, a nɔ ma pɛɛku a ndu okɔɔ. Chaaŋaa numnda sina pa diola numndaŋ nduyɛ ma soliŋ ndaŋ kpeku? Ei. Mɛlɛka bɛɛ yeema num ma sina diola ndɔlaŋ nduyɛ ma soliŋ ndaŋ kpeku. Diola Mɛlɛkalaŋ la cho Chɛhowa ni. (Maatiu 6:​9, NW; Sam 83:​18) A nɔ vɛlɛ ma pɛɛku nyɛ o yeema wo a nyɛ o yeema le wo. A nɔ ma sina wanaa cho chaaŋaa nduaa wa a yaamɔɔwaa nduaa. O chua teleŋ vilɛi le waŋndo sinaa. Baabuiyo dimi maa i cho suɛi taasi le miŋ kɛsi teleŋndo le pɛɛkoo a Chɛhowa okɔɔ.—Ɛfisiaŋnda 5:​15, 16.

Chaaŋaa Mɛlɛkaa tosa nyɛ nɛŋi ndu kɔllo. Yiyaŋndɔ a chaaŋaa numnda okɔɔ. Te a bii nda pɛ biyɔɔ wɔɔŋndo vɛlɛ ma tosa nyɛm nda tul leyɛ woŋ, chaŋyɛi keŋ i hiau pa lachi? Sako! Lende koni, te a yeema pɛ waa chaaŋ o Mɛlɛka, a nɔ ma tosa nyɛ nɛŋi ndu kɔllo.—Chɔŋ 4:​24.

O cho piɛiye kpou le mala num ma wa chaaŋ o Mɛlɛka le. Mi Chiisu cho kpɛɛluŋ o chaŋyɛi niŋ a Mɛlɛka wo suaa a nɛilaŋ la tiɔɔŋ okɔɔ. Nɛi tasoo cho o tuaŋgaa nduyɛ o piaa cha a waŋnda. Nduyɛ nɛi yaa num o tambei niŋndo o cho ni. Nɛiyo opilɔɔ cho sɔɔkɛnyɛɛ vɛlɛ waŋnda nyɛɛmbuiinii ko cho kɔlaŋ lechoo ni. Nɛi koŋ yaa num o yoomu nɔ la mɛɛlu le wo. Hei sim ni maa, te a yeema chaŋyɛi Mɛlɛkɛi pɛ, a nɔ ma pɛɛku le ndu piɛiyo o tonyaa choo.—Maatiu 7:​13, 14, NW.