Setana a nyinaa nduaa wɔɔŋnda yeema num ma piɛi Mɛlɛka le. Te a tiuba pɛ, a yeema mi wana o wana mulul Mɛlɛka kɔɔ. Vɛɛ nda kindiŋ yɛ le hei tosaa? Nɛiyo opilɛ cho piɛiyii lachoowɛi ni. (Kɔliŋtiaŋ Diiŋ Ndɔɔ 11:​13-15) Piɛile kɛ kɛ pɛɛku tonya cho o Baabuiyo niŋndo le, piɛile lachoowaleŋ le cho ni. Piɛile lachoowaleŋ le cho ko maa velaŋ kaniei. Ma che ndi maa kanii kpeekpei, kɛ i cho i sɔvɛ le. Mii chuu num kpundɔɔ tau.

Piɛiyii lachoowɛi tosa hɛnaŋ Chɛhowaa le, Mɛlɛka tonyaa. Teleŋ Chiisu wa o lɛŋndeŋ choo wo, kunda lepiɛiyo pum ndoo yeema le ndu diyɔɔ. Yiyaŋ ndaa wa ni maa nda wa Mɛlɛka piɛiyo o nɛi sakpoo choo ni. Ma dimi aa, “Mɛlɛka pila, ndu ko cho finya naa ni.” Mi Chiisu ndoo chɛl? Sako! Mbo dimul nda aa, “Masa nyinaa wɔɔŋnda, ndu cho finya nya ni.” (Chɔŋ 8:​41, 44) Hau wanaa bɔɔbɔɔ yiyaŋ maa Mɛlɛka nda cho piɛiyo ni, kɛ Setana a nyinaa nduaa wɔɔŋnda nda cho biiloo ni!—Kɔliŋtiaŋ Tasoo 10:​20.

 Mɛɛ yɔm wɔɔŋndo kuam kɔmnde wɔɔŋndeŋ yɛ, lende koni piɛile lachoowaleŋ le kuam wanaa wɔɔŋnda a tosa sɔɔŋ wɔɔŋndoŋ nda ni. Chieeŋndo cho o piaa cha a dɛnɛ wɔɔŋndo kanifuule waŋnda cho sɔɔŋ wɔɔŋndoŋ tosaa. Muŋ cho ni, kaa nɔɔlɛiyo, sɔŋgɔlaŋ, viileŋ, nyɛ kindilaa, diyɔɔ laŋ, vɛlɛ a kpuuviaalaŋ. Wanaa bɔɔbɔɔ a tosa sɔɔŋ muŋ nda nɔ piɛiye, kɛ piɛiyii ndɛi nyindu nda le ma pɛɛku o kɛndɔɔ le. A simnuŋ chaaŋaa Mɛlɛka kposoŋ te, mɛɛ ma mal sɔɔŋ wɔɔŋndoŋ tosaa.—Maatiu 7:​17, 18.

Piɛile lachoowaleŋ le pɛɛku waŋnda le ma piɛi piɔmnda. Mɛlɛka dimi aa naŋ piɛi piɔmnda le. Suɛi bɛnda ve cho hei ni. Num a chɛl le mi waŋndo mɛi suɛi o numndo mbo soo o wundule numndeŋ ndo? Wana koŋ cho pa chaaŋ num kpeekpei? Sako, o cho chaaŋ num te. Chɛhowa yeema mi waŋnda soo o ndu lo, o cho o piɔmnda lo le kɛlɛŋgaa wunduleŋ, nyɛm nɔ yoomu kposoŋ te woŋ.—Ɛsɔdɔɔ 20:​4, 5.

Piɛile lachoowaleŋ le pɛɛku maa i cho bɔɔ i kɛndɛ le wanaa cheleŋ diyɔɔ o chɔuwo niŋ. Mi Chiisu dimi maa chaaŋaa Mɛlɛkaa nɔ kaalaa ndapila tɛɛŋ. Ŋ dii wanaa naŋ kaala wa le. (Chɔŋ 13:​35) I cho pɛɛŋ i wɔɔŋ le miŋ dii wanaa wɔɔŋnda. Teleŋ yaamɔɔwa hiŋ Chiisu biyɔɔ wo, o chɛl mi buɛiyaa nduaa chɔulaba le ndu piŋioo le.—Maatiu 26:​51, 52.

Piɛile lachoowaleŋ le pɛɛku maa wanaa dɛnɛ wɔɔŋnda cho nyɛpalaa sɔla o yiŋndeŋ niŋ. Kɛ Baabuiyo ndu pɛɛku maa paawa yɔŋ wɔɔŋndo cho piɔmndo ni. (Luomaŋnda 6:​23) Mɛlɛka kaalaa Chɛhowa cho ni. Mɛlɛka kaalaa tusi pa waŋnda nyɛpalaa choo lefafɛɛŋ? Sako bɛɛ, i yɔŋnuŋ te. O Kpele Hɛnɛkiɔɔ niŋ, piɛileŋ le pilɛ kpe le wa niŋ ni, le Chɛhowa chɛl teŋ. (Sɔɔŋ Chɔɔmaŋndoŋ 15:​4) Piɛiyii tɔlnuŋ o choola Setana laŋ choo ve cho hiouwɔɔ fokpi.