YAU bundɔŋ tonyaŋ cho hoo ni. Bundɔŋ muŋ kpou ŋ fula o Baabuiyo niŋ. Bundɔŋ muŋ chɔm naa a teleŋ Mɛlɛka kandu nyɔŋ toosiaa wo tei mbo huŋ bii a teleŋ naa hoo. Bundɔŋ muŋ chɔm vɛlɛ naa a nyɛ Mɛlɛka dimi le hunɔɔ tosaa o siɔdii lachioo niŋ ndo.

Yauwo hoo cho num chɔm yooŋgula Baabuiyo nɔ laŋ. O soo a diola wanaa cho o Baabuiyo niŋnda okɔɔ vɛlɛa nyɛm nda tosa woŋ. Yauwo hoo chɔm naa vɛlɛ a tiindaŋ Mɛlɛka ke wana chioo le hunɔɔ yoomu fafɛɛŋndo sɔlaa o kpele hɛnɛkiɔɔ niŋndo.

Bundɔŋ 116 cho o yauwo hoo niŋ ni. Bundɔŋ o yauwo hoo niŋ cho ŋ piɔuwaa o buŋgaŋ ŋɔmaa niŋ. O buŋgɛi kɛ kɛ fee niŋ, peele taseleŋ le dimul naa nyɛ pɔmbɔ a sɔɔŋ naŋ nɔ le hunɔɔ sinaa o buŋgɛi keŋ niŋnde. Bundɔŋ muŋ cho ŋ poonyiaŋ kpɛ kpɛ o lepula a mɛɛ sɔɔŋ yɔŋnuŋ yɛ. Hei mala num le ma sina a teleŋ sɔɔŋ muŋ yɔŋnuŋndo.

Diomnda poonyiaŋ o bundɔŋ muŋ niŋ ndaŋ la cho tɛtɛlɛ le sinaa. Nya chuaambuaa pɔmbuaa nɔla mi la nua o yauwo hoo niŋ a ba nya. Nya kalaŋchuauwa naŋ niŋ kɔl le sinaa maa chuaambuaa nyaa pɔmbuaa yeema niŋ le mi la wa nda muŋ nuello lɔɔ lɔɔ. Bundɔŋ muŋ cho ko le chuaambɔ le, kɛ ŋ cho le kaasoŋnda a chuaambuaa kpede.

O Bundɛi kɛ kɛ fee mɛɛlulaŋ, bolii Baabuiye cho i poonyiaa. A cho o dɛɛniaa le ma nua bolii Baabuiye hei o Baabui numndo niŋ. Hei cho i bɛndaa kanifuule o Baabuiyo niŋ bundɔŋ muŋ kpou cho ni. A chii pɛ nua o bundɛi o bundɛi niŋ, nyunala ndɔlaŋ la cho o bundɛi mɛɛlɛi kpɔŋ kɔɔli o yauwo hoo niŋ. Tofa nyunala bundɛi keŋ ma kindiŋ le laŋ mulio.