KIILANƆƆ Pitɛ sim hoo ni. Chaaŋaa nduaa sim haa ndu kɔɔli ni. Kɛ nuawɔ mɛɛ poo hoo baŋ Pitɛ wulaŋ lachi yɛ. O bɛnda pa le mbo tosa hei? A sina pa wana suu o cho wo?

Poo hoo diolaŋ aa Kɔniiliɔɔ. Bolle puaa chɔuwaa maLoumaŋnda o cho ni. Kɔniiliɔɔ sina Pitɛ le. Kɛ dimullo nda dimul ndu ni maa o veelu Pitɛ o ndulo chiɛiniŋ. Ŋ nuaŋnuŋndɔ mɛɛ i looku yɔŋnɔŋ yɛ.

Buɛiyaa tasiaa Chiisuaa Chuuva nda wa ni. Kɛ Kɔniiliɔɔ ndu ve Chuunɔ le. Kɛ ndoo kaala Mɛlɛka, nduyɛ oo piɛi ndu lɔɔ lɔɔ. Mi ndoo tosal waŋnda sɔɔŋ kɛndɔŋ tau. Kɛ paale pilɛ a paale kalaleŋ, mi kiilanɔ Mɛlɛkaa fula ndu o hɔl. Mbo dimul ndu aa: ‘Mɛlɛka hini kɔl a num, nduyɛ o cho piɛile numndeŋ muli. Viom puaa apum naa po pilɛ cha diolaŋ aa Pitɛ. O cho Chopa o Saimɔŋndo, o chiɛi ndɔɔ cho o mɛŋma ihɛlaŋ ikɛiyo.’

Hau pa mi Kɔniiliɔɔ viam puaa Pitɛ nuuviaa. Diimandɔɔ pilɔɔ, mɛɛ puaa haa wa fuuloo Chopa ikɛi, Pitɛ wa o chiɛi Saimɔŋndo choo tema. Mi Mɛlɛka tosa mi Pitɛ cha kola bɛndoo fulaa choo choo mbo wa tolɔɔ lɛŋ. Visiaa suu o suu wa o kolaa hoo niŋ. A mɛɛ sawa Mɛlɛkaa ndoo dimi yɛ, visiaa haa ndaa niŋ le dio le. Kɛ mi diomndo dimul Pitɛ aa: ‘Chɔŋ Pitɛ, dii visiaa haa ma de.’

Mi Pitɛ muli aa: ‘Ɛ ɛ. I cho nyɛ nɔɔlɛi dio le.’ Kɛ mi diomndo dimul Pitɛ aa: ‘Pɛŋgi nyɛ Mɛlɛka dimi maa o dendu wo veeloo o nɔɔlɛi.’ Bɛmbɔɔ le yaa waŋ hei yɔŋnuŋ ni. Mɛɛ hei yɔŋnuŋ, mi Pitɛ luɛi o buulaŋndo niŋ. O lo o buulaŋ koŋ niŋ, mi puaa Kɔniiliɔɔ vemnda fuuluu o chiɛi Saimɔŋndo. Okoŋ, ma nyuna le Pitɛ.

Mi Pitɛ tual a matou mbo dimi aa: ‘Ya cho wana nya cho nuuviaa wo ni. La vɛ hunɔɔ?’ Mɛɛ puaa dimul Pitɛ maa kiilanɔ Mɛlɛkaa dimul Kɔniiliɔɔ ni le mbo veelu ndu Pitɛ o chiɛi ndɔɔ, mi Pitɛ chɛl le kɔlaŋ nda puaa haa latulu. Diimandɔɔ pilɔɔ, mi Pitɛ nda chaaŋaa nduaa kua o chiɛi Kɔniiliɔɔ wo Sisaliaa chiee.

Mi Kɔniiliɔɔ chuuŋgiaa wanayaŋ ndɔŋ a chaaŋaa nduaa kpou naapilɛ. Mɛɛ Pitɛ fuuluu, mi Kɔniiliɔɔ kɔ demul ndu. Mbo baŋ wulaŋ Pitɛ lachi a mɛɛ naŋ cho naa chɔɔ yɛ. Kɛ mi Pitɛ dimul ndu aa: ‘Chɔŋ; ya bɛɛ wanachioo koni ya cho ni.’ Lende kpeekpei i cho ni. Baabuiyo dimi maa ŋ nɔ di miŋ beŋ wanachioo wulaŋ miŋ piɛi ndu le. Jɛhowa ndupilɛ kpe naŋ nɔ ni miŋ piɛi.

Mɛɛ mi Pitɛ dimul Wanaa chuuŋgiaŋ haa naapilɛ wa suɛi Mɛlɛkɛi. Mbo dimi aa: ‘I sina niŋ a tonya maa Mɛlɛka hɛli ŋwaŋndachiee le. Kɛ wana o wana fee piɛi ndu pɛ o nɛi sakpoo choo, o chɛl ndu.’ Pitɛ lo suɛi, mi nyina Mɛlɛkaa tual nda choo mɛɛ nda cho kpede. Okoŋ, ma kandu suɛi o sɔɔŋ maŋgalaŋ cheleŋndoŋ niŋ. Mi kaamaa bii Chuuwaa laalaŋaa hiŋ nda Pitɛ vaa wa. Kanifuule ndaa yiyaŋ maa nda Chuuwa kinɛi Mɛlɛka hɛli ni. Kɛ hei pɛɛku nda maa, Mɛlɛka hɛli kaale pilɛ maa leŋ te le bɛnda mi le hiau kaale cheleŋ te. Vɛ, o cho suɛi kɛndɛ le miŋ kɛsiŋ ndi o kɔl te?