NUAWƆ Chiisu ichali naŋ. O cho waŋnda haa naŋ kpou pɛɛkoo o pembei choo o lɛŋnde Kalilileŋ niŋ. Buɛiyaa nduaa o hɛli wa chal ndu haa ikɛi kpɛɛluŋ ni. Ŋwaŋ 12 nda cho ni. A sina pa nda diolaŋ?

Diola ndalaŋ la cho laŋ ni: Saimɔŋ Pitɛ a Andulu pɔmbuaa bɛndoo nda wa ni. Chemisi a Chɔŋ bɛɛ pɔmbuaa bɛndoo nda wa ni. Buɛiyo o pilɔɔ nɔ vɛlɛ diolaŋ aa Chemisi, o pilɔɔ nɔ vɛlɛ diolaŋ aa Saimɔŋ. A ŋiɔɔŋ ndaa nɔ diolaŋ aa Chuda. Chuda Isikaaliɔɔ a Chuda Taadiɔɔ. Filipi a Nataniɛl o ndaa veelu vɛlɛ aa Batɔlomiu wo. A Maatiu, a Tɔmɔsi.

Mɛɛ Chiisu chɛŋ Sameelia, mbo kandu yooŋgu kɛndɛ lemasa Mɛlɛkaa dimio aa: ‘Paale Mɛlɛka cho wa masaa waŋnda choo leŋ le cho niŋ a nya kpɛɛluŋ.’ A sina pa nyɛ cho masale leŋ ndo? Kɔmɛtii kpeekpei Mɛlɛkaa ni. Chiisu cho masaa le Kɔmɛtii koŋ ni. O cho wa masaa choo choo mbo hiŋ a kɔl nyuloo o lɛŋndeŋ choo. Masale Mɛlɛkaleŋ le cho chieeŋndo kpede siiŋguu kpele hɛnɛkɛ.

Chiisu cho waŋnda haa pɛɛkoo a masale leŋ okɔɔ. Mbo wa nda pɛɛkoo aa: ‘Te la wa Mɛlɛka piɛiyo pɛ, la dimi naa aa: Mɛlɛka finya naa, o choo choo niŋ, waŋnda kpou ke diola numndaŋ bɛɛleŋ. Masale numndeŋ le huŋ. Hɛnaŋ numndo yɔŋnuŋ o lɛŋndeŋ choo a mɛɛ o cho choo choo yɛ.’ Wanaa bɔɔ bɔɔ veelu piɛileŋ aa ‘Piɛile Salamanɔɔ.’ A nɔla pa ma dimi leŋ kpede?

Chiisu cho vɛlɛ waŋnda pɛɛkoo mɛɛ nda looku ma bii opilɛ a o cheleŋndo yɛ. Mbo dimul nda aa: ‘Kaa ŋ hɛnaŋ maa chaaŋ num tosal numndo, num bɛɛ tosal chaaŋ num kaa koŋ.’ A niŋ kɔl te waŋndo tosal num pɛ nyɛ ŋ hɛnaŋndo le? Mɛɛ Chiisu cho naa dimullo naŋ maa ŋ nɔ miŋ bii acheleŋnda nyɛkɛndɛi. Kpele hɛnɛkiɔɔ o lɛŋndeŋ choo naŋ niŋ bɔɔ te wana o wana tosa hei pɛ.