Teleŋ Isɔluɛitiiya wa o chɛleŋ niŋ Babilɔŋndo, ma sɔla tɔɔndaŋnda bɔɔ bɔɔ le laalaŋ ndaa. Ma wou Sedaaki, Misiaki, a Bɛniŋgo o yiŋnde bɛŋndeŋ niŋ, kɛ mi Jɛhowa kiindiaa nda. Mɛɛ wɔsilaŋ la hiou latiŋ, mi Miidiaŋnda a Paatiaŋnda huŋ del Babilɔŋ choo. Mɛɛ nyɔɔ viou kpɛɛ okoŋ kɔɔli, ma wou Daniɛl o sooŋ kpɔkuŋnda niŋ. Kɛ mi Jɛhowa kiindiaa kpɔkuŋnda sondolaŋ a yɔŋ ndu nyɛ o nyɛ le.

O mɛɛlulaŋ kpɔŋ, mi Sailɔɔ masa Paatiaŋnda soli Isɔluɛitiiya o chɛleŋ niŋ. Wɔsilaŋ 70 nda chii o cheleŋ niŋ ni malaŋ nda miiŋgu o lɛŋnde ndaleŋ niŋ. Mɛɛ nda miiŋgu Chulusalɛm, maaŋ Jɛhowaa taŋgullo wa o pilɛ o nyɛm tase nda tosa woŋ tɛɛŋ. Kɛ mi yaamɔwaa ndaa kuuna nda wali taŋgulaa hoo. O wa niŋ le wɔsilaŋ 22 chɔŋ a miiŋgu ndaa Chulusalɛm tuupa ma chii ndu taŋgul.

Ŋ nɔ vɛlɛ le hunɔɔ pɛɛkoo a miiŋgu Ɛsɛla miiŋgu Chulusalɛm le maaŋndo nɛŋioo wo okɔɔ. Wɔsilaŋ 47 laa hiou ni chɔŋ a boondii maaŋndo chuu taŋgulle. Mɛɛ wɔsilaŋ 13 la hiou o miiŋgu Ɛsɛlaa kɔɔli, mi Nɛhimaya bɛɛ huŋ malaa le kpakio Chulusalɛm taŋgullo. Mɛɛ sɔɔŋ yɔŋnuŋ o Buŋgɛi ŊUƐƐNUEI hei niŋnde, chɔŋ a kɔla ndalaŋ o chɛleŋ niŋ Babilɔŋ mbo huŋ bii a kpakio chiiyo taŋgullo, ŋ chua wɔsilaŋ fau fau 152.