YƐƐ num yiyaŋ yɛ a Paale Kɔɔsɔleŋ okɔɔ? Wanaa bɔɔbɔɔ yiyaŋ maa, waŋnda nɔ le kɔlaŋ simndaŋ Mɛlɛka lachi o lepula. Maa te a sim pɛ, o kandu niko nda kɔɔsaa a pilɛŋ pilɛŋ. A yiyaŋ vɛlɛ maa wanaa tosa o kɛndɔɔ wa cho lakɔ choo choo, kɛ mi wanaa tosa yɔŋ wɔɔŋndo wa nda kuɛ o nyɛpalaa fɛɛŋ fɛɛŋndo niŋ. Kɛ Baabuiyo ndu yiyaŋ teŋgeŋ a Paale Kɔɔsɔleŋ ndeŋ okɔɔ. O dimi maa ŋ nɔ miŋ wa a isiooŋ le paaleŋ ndeŋ te. Kɛ paale naŋ nɔ miŋ nɔ tiindaŋndo le pioŋɔɔ sɔlaa wo le cho ni.

Te ŋ nua pɛ o Sɔɔŋ Chɔɔmaŋndoŋ niŋ 20:11, 12, ŋ cho chɔ mɛɛ kiilanɔɔ Chɔŋ tɛɛsiaa Paale Kɔɔsɔleŋ ndeŋ yɛ. Loŋ o dimi ni aa, “O koŋ kɔɔli, mi cha kpeŋgbei lemasa humbu bɛndoo a waŋndo ichali lechoo. O le pilɛ niŋ kpe, mi chieeŋndo a ɛchɛnɛ la faŋaŋ ndu lachi mi la lo pɛ, wana o wana chi lɛ laŋ te. O koŋ kɔɔli, mi cha wanaa vi wa, wana bɛndu ni, wana pɔmbɔ ni. A wa isisi o kpeŋgbei lemasaa hɔlndɔ. Ma kumbi yaula pum, la nyɛ o nyɛ fee waŋnda tosa o cho o poonyiaa leniŋ ndaŋ. O koŋ kɔɔli, ma kumbi vɛlɛ yau cheleŋ. Yauwo hoo diola wanaa nɔ le vaa yoomu wa, laŋ lacho le niŋ ni. Ma kɔɔsa a wanaa vi wa kpou, wana o wana mɛɛ kuɛila ndɔlaŋ la wa yɛ, nduyɛ mi i wa i poonyiaa o yaula laŋ niŋ yɛ.” Nɛɛ cho yɛ wana Kɔɔsaa hoo?

 Chɛhowa Mɛlɛka cho wana bɛndu Kɔɔsaa ŋwaŋndachiee wo ni. Kɛ a koŋ kpou, o yulu wana iso le wallo hoo tosaa. Mi kiilanɔɔ Pɔɔl dimi o yau Walta Wanaa Chiisuaa 17:31 niŋ maa, Mɛlɛka “hɛli paaleŋ le kɔɔsɔɔ a waŋnda kpede o chieeŋndo niŋ. Nduyɛ, kɔɔsɔ ndɔɔ o nɔ lakafa le. O hɛli wana pilɛ. Wana koŋ, ndu cho hunɔɔ kɔɔsɔ a waŋnda ni.” Wana o hɛli hoo le hunɔɔ kɔɔsɔɔ a waŋnda wo cho Chiisu Kiliti ni, o Mɛlɛka soli o sɛiyo niŋndo. (Chɔŋ 5:22) Kɛ lɔɔ kuɛɛ Paale Kɔɔsɔleŋ ndeŋ le cho yɛ kandɔŋ? Nduyɛ, le vɛɛ kpɛ le cho yɛ viouwɔɔ?

Yau Sɔɔŋ Chɔɔmaŋndoŋ dimul naa maa te chɔu Amakɛdɔŋndo hiou dɔɔ pɛ, okoŋ Paale Kɔɔsɔleŋ le kanduŋ. * (Sɔɔŋ Chɔɔmaŋndoŋ 16:​14, 16; 19:19–20:3) Te chɔu Amakɛdɔŋndo hiou pɛ, a cho Setana nda nyinaa nduaa wɔɔŋnda wou o sooŋ nɔ lamɛɛlu le wo niŋ le wɔsilaŋ waa opilɛ. O boondii keŋ niŋ, ŋwaŋ 144,000 cho wa o choo choo niŋ. A wa niŋ wanaa kɔɔsaa ŋwaŋndachiee. A wa niŋ vɛlɛ “lamasa nda Kiliti waa le wɔsilaŋ waa o pilɛ.” (Sɔɔŋ Chɔɔmaŋndoŋ 14:​1-3; 20:​1-4; Luomaŋnda 8:​17) O cho paale isiooŋ te Paale Kɔɔsɔleŋ le cho le. Nduyɛ o cho kɔɔsɔ paale pilɛ le. Kɔɔsɔɔ hoo cho wa le wɔsilaŋ waa o pilɛ.

O teleŋ wɔsila waa pilɛ laŋ ndaŋ niŋ, Chiisu cho hunɔɔ kɔɔsa a “wanaa cho yoomu wa ni a wanaa vi niŋnda.” (Timoti Diiŋ Ndɔɔ 4:​1) Wanaa cho “yoomu” wa cho “faŋga bɛndu bɛndoo” a sɔla niŋ pioŋɔɔ a teleŋ chɔu Amakɛdɔŋndo wo wa ni. (Sɔɔŋ Chɔɔmaŋndoŋ 7:​9-17) Mi kiilanɔɔ Chɔŋ cha vɛlɛ “wanaa vi niŋ paandu wa isisi o kpeŋgbei lemasa” Mɛlɛkaa hɔlndɔ. A mɛɛ Chiisu mɛi le diom yɛ maa wanaa cho o sɛila loonaŋndaŋ niŋnda kpou cho diom ndɔɔ tueiyɔɔ, okoŋ ma fula o sɛilaŋ niŋ. (Chɔŋ 5:​28, 29; Walta Wanaa Chiisuaa 24:​15) Kɛ o yɛɛ choo wana o wana fee sɔla yɛ niŋ kɔɔsɔɔ?

A mɛɛ kiilanɔɔ Chɔŋ che o yilaŋndo niŋ yɛ, “Ma kumbi yaula pum, . . . ma kɔɔsa a wanaa vi wa kpou, wana o wana mɛɛ kuɛila ndɔlaŋ la wa yɛ, nduyɛ mi i wa i poonyiaa o yaula laŋ niŋ yɛ.” (Sɔɔŋ Chɔɔmaŋndoŋ 20:​12) Baa a nyɛ waŋndo tosa paandu tuupa mbo wu wo okɔɔ kpeekpei yaulaŋ ndaŋ la cho suɛi ni? Sako. Kɔɔsɔɔ hoo ve niŋ le nyɛ waŋndo tosa tuupa mbo wu wo le. Vɛɛ naŋ looku yɛ hei sina? Ŋ sina hei lapɛŋgu kanifuule, Baabuiyo dimi aa, “Te waŋndo o vi niŋ pɛ, mɛɛ o fula yɔŋ wɔɔŋndo o ba bɛŋgu.” (Luomaŋnda 6:​7) Mɛɛ o dimi niŋ, wanaa cho hunɔɔ miiŋgu yoomu wa nɔ lɛ niŋ lahaki le. Hoo sim ni maa, yɔŋ wɔɔŋ  ndaa tosa tuupa ma wu wo ve lɛ niŋ nda choo le. Yaulaŋ ndaŋ la sim le sawala cheleŋnda Mɛlɛkalaŋ. Le mi wanaa chɔu Amakɛdɔŋndo cho keeku choo wa, vɛlɛ a wanaa cho hunɔɔ fula o sɛilaŋ niŋnda wa achal lefafɛɛŋ, mɛɛ mi nda kpou diikuŋ sawala Mɛlɛkalaŋ ndaŋ. Sawa o sawa sɛnɛi Chɛhowa handu pɛ o sawalaŋ ndaŋ choo, o wɔsila waa pilɛ laŋ ndaŋ bɛŋgu, a nɔ ma diikuŋ ndaŋ. Nyɛ waŋnda wa niŋ tosaa o wɔsila waa pilɛ laŋ bɛŋgu wo cho kɔɔsɔ ndaa ni. Hoo sim le Paale Kɔɔsɔleŋ ni.

Le wanaa bɔɔbɔɔ, Paale Kɔɔsɔleŋ le cho wa paale nda le taseleŋ ni le tueiyɔɔ a Mɛlɛka okɔɔ. Waŋnda haa cho sɔla dikeŋnaŋndo le ma pɛɛku a Mɛlɛka okɔɔ, nduyɛ ma bii sawala ndɔlaŋ. Hoo cho chɔmndo maa, baala pɛɛkaa cho hunɔɔ wa kekele. Lekɛndɛi, ‘sakpoyɛi wanaa wa niŋ o chieeŋndo choo a boondei keŋ nda kpou pɛɛku niŋ ni.’ (Aisaya 26:​9) Kɛ a koŋ kpou, o cho waŋnda fau le yeema niŋ le hɛnaŋ Mɛlɛkaa tosa le. Aisaya 26:​10 dimi aa, “Wanaa dɛnɛ wɔɔŋnda nda, a yɔŋ bɛɛ ma tosal nda dɛnɛ kɛndɔɔ, a nɔla ma maŋgalaŋ ma tosa nyɛ cho sakpo le tosaa wo le. O lɛŋndeŋ ndeŋ niŋ bɛɛ, lɛŋnde cho leŋ sakpo num o hɔl leŋ, hiouwɔɔ nda hiau lachi a sɔɔŋ wɔɔŋndoŋ tosaa ni. A sina maa a [Chɛhowa] cho wana tɔɔma bɛndu le.” Wanaa dɛnɛwɔɔŋnda haa cho hunɔɔ tambii fɛɛŋ fɛɛŋnde sɔla boondii Paale Kɔɔsɔleŋ.—Aisaya 65:​20.

Te Paale Kɔɔsɔleŋ le chuu pɛ, wanaa cho pioŋɔɔ sɔla wa cho hunɔɔ yoomu walaŋndo sɔla. (Sɔɔŋ Chɔɔmaŋndoŋ 20:​5) Te Paale Kɔɔsɔleŋ ndeŋ le hiou pɛ fokpi, waŋndachieeya cho miiŋgu yoomu walaŋndo sɔla mɛɛ mɛɛ Adama nda Ifi wa yɛ tuupa ma tosa hakioo. (Kɔliŋtiaŋ Tasoo 15:​24-28) Mɛlɛka cho waŋndachieeya tofa mɛɛlaa ke. Mɛɛ a teleŋ koŋ kinɛi Mɛlɛka cho vɛlɛ Setana soli o sooŋndo niŋ ni. Mɛɛ o hei niŋ, o hui niŋ waŋndachieeyaa bɔɔbɔɔ ma faŋaŋ o kpeŋgii Mɛlɛka ve choo ma tol ndu kɔɔli. (Sɔɔŋ Chɔɔmaŋndoŋ 20:​3, 7-10) Wanaa cho lasisi o kala kpiŋ ma kɛɛ Setana tolɔɔ kɔɔli wa, cho yoomu ndaa tueiyɔɔ yeela a mɛɛ Baabuiyo dimi yɛ aa, “Wanaa cho sakpo Mɛlɛka o hɔl la nda, a cho wa o lɛŋndeŋ Mɛlɛka chua buŋgɛi leŋ niŋ le fɛɛŋ a fɛɛŋ.” (Sam 37:​29) Hei cho naa chɔmndo kpendekele maa, Paale Kɔɔsɔleŋ le wa niŋ bɔɔ paale sala bɛndu le wanaa laalaŋnda kpede.

^ pɛl. 6 Le chɔɔloo sinaa a Amakɛdɔŋ okɔɔ, yandii tofa yaulaŋ ndaŋ, Insight on the Scriptures, Volume 1, pei 594 tei 595, a pei 1037 tei 1038, vɛlɛ a Worship the Only True God, buŋgɛi 20. (Étude perspicace des Écritures, Volume 1, pei 1073 tei 1075, a Volume 2, pei 63 tei 64, a Adorez le seul vrai Dieu, buŋgɛi 20). Seiyaa Chɛhowaa soli laŋ ni.