Di Oli Baybul na Gɔd in buk we i de yuz fɔ tɔk to wi ɔl. Wi fɔ stɔdi am fɔ no di Wan we rayt am. (Jɔn 17:3; 2 Timoti 3:16) Insay di Baybul, Jiova Gɔd tɛl wi wetin i want fɔ mɔtalman ɛn fɔ di wɔl.—Jɛnɛsis 3:15; Rɛvɛleshɔn 21:3, 4.

No ɔda buk nɔ de we de ɛp pipul dɛn rich di Baybul. Di Baybul de muv wi fɔ falamakata Jiova in kwaliti dɛn lɛk lɔv, masi, ɛn sɔri-at. I de gi op ɛn ɛp pipul dɛn fɔ bia ivin we dɛn de sɔfa bad bad wan. Ɛn i de kɔntinyu fɔ sho di tin dɛn we nɔ de in layn wit wetin Gɔd want.—Sam 119:105; Ibruz 4:12; 1 Jɔn 2:15-17.

Na insay Ibru, Arameik, ɛn Grik fɔs dɛn rayt di Baybul, ɛn dɛn dɔn translet di wan ol Baybul ɔ sɔm pat pan am insay pas 3,000 langwej dɛn. Di Baybul na di buk we dɛn dɔn translet ɛn sheb sheb pas ɛni ɔda buk. Wi nɔ fɔ sɔprayz. Di Baybul bin dɔn tɔk se: “Dɛn go prich dis gud nyuz bɔt di Kiŋdɔm [we na di men mɛsej na di Baybul] na di wan ol wɔl so dat ɔl di neshɔn dɛn go gɛt chans fɔ yɛri, dɔn di ɛnd go kam.”—Matyu 24:14.

Bikɔs wi no se di mɛsej we de na di Baybul impɔtant, wi gol na fɔ translet am di we we go fiba wetin de na di orijinal langwej dɛn, bɔt stil mek am klia ɛn izi fɔ rid. Di Apɛndiks atikul dɛn we gɛt di taytul “Prinsipul dɛn we Dɛn Yuz fɔ Translet di Baybul,” “Di Tin dɛn we De Insay Dis Baybul” ɛn “Aw Wi Gɛt di Baybul?” tɔk bɔt sɔm pan di transleshɔn prinsipul dɛn we wi fala, ɛn i ɛksplen sɔm pan di tin dɛn we de insay dis Baybul.

Di wan dɛn we lɛk Jiova Gɔd ɛn we de wɔship am want Baybul we dɛn translet kɔrɛkt wan ɛn we dɛn ebul fɔ ɔndastand. (1 Timoti 2:4) Na dat mek wi translet dis Baybul insay Krio, ɛn wi want fɔ translet di Nyu Wɔl Transleshɔn insay bɔku ɔda langwej dɛn. Wi op ɛn pre se yu we de rid dis Nyu Wɔl Transleshɔn, go bɛnifit as yu de tray fɔ “luk fɔ Gɔd . . . [ɛn] rili tray tranga wan fɔ fɛn am.”—Akt 17:27.