Go dayrɛkt to di men tin

Di Transleshɔn Wok na Mɛksiko ɛn Sɛntral Amɛrika

Di Transleshɔn Wok na Mɛksiko ɛn Sɛntral Amɛrika

Na lɛk 290 transletɔ dɛn de insay siks kɔntri dɛn na Mɛksiko ɛn Sɛntral Amɛrika. I pas 60 langwej dɛn we dɛn de translet buk ɛn magazin dɛn we de tɔk bɔt di Baybul. Wetin mek dɛn de du ɔl dɛn tin dɛn ya? Bikɔs we pipul dɛn de rid buk ɛn magazin dɛn insay langwej we izi fɔ mek dɛn ɔndastand, dat kin rili tɔch dɛn at.​—Fɔs Lɛta Fɔ Kɔrint 14:9.

Dɛn dɔn transfa sɔm transletɔ dɛn we bin de na di branch ɔfis, na say dɛn usay dɛn de tɔk di langwej we dɛn de translet so dat dɛn go ebul fɔ translet fayn. Aw dat dɔn ɛp dɛn? Di transletɔ dɛn de miks wit di wan dɛn we de tɔk di langwej we dɛn de translet, ɛn dat de mek am izi fɔ mek di pipul dɛn ɔndastand wetin dɛn translet.

Aw di transletɔ dɛn fil bɔt di chenj? Federiko, we na wan pan di Guerrero Nahuat transletɔ dɛn bin tɔk se: “Fɔ lɛk tɛn ia we a bin de na Mɛksiko Siti, na wangren famili nɔmɔ a si we bin de tɔk mi langwej. Bɔt naw, insay di tɔŋ dɛn we de nia di transleshɔn ɔfis, na wan wan pipul dɛn de de we nɔ de tɔk di langwej!”

Karin, de na wan stet insay Mɛksiko we dɛn kɔl, Chiwawa. Na Lo Jaman i de translet, ɛn i bin tɔk se: “We a de wit di pipul dɛn, dat de ɛp mi fɔ no di difrɛn we dɛn aw dɛn de tɔk di langwej. Na insay wan smɔl tɔŋ wi de ɛn na de wi de wok. We a kin luk na winda, a kin si pipul dɛn we go bɛnifit frɔm di transleshɔn wok we wi de du.”

Nɛfi, de naw na wan transleshɔn ɔfis na Mɛrida insay Mɛksiko. I bin tɔk se: “We wi de du Baybul stɔdi insay Maya, wi de ebul fɔ no di wɔd dɛn we at fɔ mek di Maya pipul dɛn ɔndastand. So wi kin tray fɔ translet di kayn we aw di pipul dɛn de tɔk.”

Aw di wan dɛn we de rid di tin dɛn we dɛn dɔn translet, dɔn bɛnifit? Luk wan ɛgzampul: Ɛlina de tɔk Tlapanec ɛn fɔ lɛk 40 i dɔn de atɛnd Jiova Witnɛs dɛn mitin. Bikɔs na Spanish dɛn bin de tɔk na di mitin, i nɔ bin de ɔndastand wetin dɛn bin de tɔk. “I bin tɔk se, a jɔs no se a want fɔ go mitin.” Afta Ɛlina stɔdi di Baybul insay Tlapanec langwej, dat bin mek i lɛk Gɔd mɔ ɛn i baptayz insay 2013. Ɛlina bin tɔk bak se, “A tɛl Jiova tɛnki fɔ we i mek a ɔndastand di Baybul.”